छाम्‍माय़ङ 1

थियोफिलस्‌ओ निम्‍पाङ

1-2थियोफिलस ओ, येसुआ खोक्‍कोसोओ अ़चुकाचि अ़पुङ्‌साहिदाङ्‌का निनाम्‍मादुत्‍नि अ़खात्‍ताओ लेन्‌तारि खोक्‍कोसाआ दि-दि म़मुचिओ खोन्‍कि दि-दि म़चिन्‍तुचिओ अ़तुक्‌वादा बुयाओ छाप्‍लाखादा अ़ङ्‌का छाप्‍तुङ्‌युङ्‌सुङ। खोक्‍को निनाम्‍मादुत्‍नि अ़चुखात्‍मा बुया खोक्‍कोसाआ म़छेन्‍तुचिओ अ़चुछाम्‍माय़ङ्‌चि दे च़मादोत्‌निओ अ़तुक्‌वादा सेङ्‌लावालाम्‍पा म़लोचि। 3येसु क्रुस्‌दा म़सुवा खोन्‍कि खोक्‍को म़खोन्‍तालोन्‍ताकि चालिस्‌कालेन्‌तारि छाम्‍माय़ङ्‌चिएदा ब़द्‍धेकादु खाङ्‌म़मुसान्‍चिन। मोन्‍ग़रि खोक्‍को खोचिएनान निनाम्‍हाङ्‌ओ अ़चुहाङ्‌होन्‌ओ अ़तुक्‌वादा म़चेवा। खोक्‍कोसाआ मो म़नाचिएनान हान्‍छाङ ह़ङ्‌ङाङा निकिना ब़द्‍धे अ़नुछ्‍याओ सालुम्‍स़ङ्‌चि खाङ्‌अ़मुसा। 4अ़क्‍दु येसु अ़चुछाम्‍माय़ङ्‌चिएनान चा-चासि म़युङाहिदा खोक्‍कोसाआ खोचि म़लोचि, “खानानिन यरुसलेम मान्‍छित्‌दादानुम, मेन अ़ङ्‌पापा निनाम्‍हाङ्‌आ य़सुङ निकिना ऩहिप्‍तिन्‌ओ सेङ्‌लावा ओदाङा हुङानुम। मो य़ङ्‍ओ अ़तुक्‌वादा अ़ङ्‌का खानानिन बुयाङा लोनाचिन्‍नानिन्‌ओ। 5देकिनालो युहन्‍नाआ ना चाक्‌वाआ ओन्‍ङा म़नाचि बप्‍तिस्‍मा प़चि, मेन अ़क्‍चित्‌का लेन्‌कि निनाम्‍हाङ्‌आ खानानिन सेङ्‌लावाआ बप्‍तिस्‍मा ऩप़न।”

येसु निनाम्‍मादु म़खाराओ

6खोन्‍किना #१:६ छाम्‍माय़ङ : अ़देङ्‌या य़ङ्‌सिवा अ़तुक्‌वाऩङ्‌दा ‘छाम्‍माय़ङ’ लामानुम।छाम्‍माय़ङ्‌चि आदेङ्‌माङ अ़क्‍नि म़कोवान्‍चिन्‌हिदा खोचिआ येसु अ़सेना, “हाङ्‌पो, दि खानानिन ओन्‍ग़रिङा हाङ त़लिसिन्‌किना #१:६ रोमिचि : मोन्‍ग़रि रोमि तोक्‍पोहाङ इस्राएल्‌दा खोन्‍कि नि ब़द्‍धे हेन्‍कोप्‌चिदा हाङ मुवाङा। खोन्‌ओसा येसुआ रोमिचि हारा म़चात्‍तुचिकिना यहुदिचिएदा हाङ्‌म़मु हे नि अ़मित्‍ताङा।रोमिचिदाङ्‌का आन्‍काओ हेन्‍कोप आन्‍कान्‍का इस्राएलिचि त़लानिप़निङ्‌नि?” 7येसुआ खोचि म़लासुलोचि, “अ़ङ्‌पापा निनाम्‍हाङ्‌आ अ़ङ्‌का इस्राएलि म़नाचिओ अ़चुहाङ ऩमुङाओ अ़छ़ङ अ़मुवाओ ग़रि खोन्‍कि लेन्‌चि खानानिन सिन्‍मा अ़दोत्‍निन। 8मेन सेङ्‌लावा खानानिन्‌एदा म़य़कि खानानिन सावा त़तोक्‍तुम, खोन्‍किना खानानिन यरुसलेम्‌दा खोन्‍कि झारा यहुदियादा खोन्‍कि सामरियादाकिना झारा हेन्‍खामादाओ म़नाचि अ़ङ्‌तुक्‌वादा खात़एत्‍तुम्‍च़म।” 9खोन्‍कि ओन म़य़ङाचिआकि मोचिआ येसु अ़खाङाहिदाङा निनाम्‍मादुत्‍नि निनाम्‍हाङ्‌आ अ़थेन्‍ताखात्‍ता, खोन्‍कि माक्‍मुइवाआ दिप्‍तुखात्‍तुकि मोदाङ्‌का खोक्‍को मान्‍खाङ्‌अ़दा। 10मोचिआ येसु नाम्‍चोक्‌दुत्‍नि म़खाराङाओ हुत्‍तुवारिरि अ़चोआयुङ्‌साङाहिदा छोक्‍छोक्‍छोक्‌वाओ तित हुम्‍साङाचिओ ह़वाङ म़नाचि म़प्‍च़क़क्‌दा मोचिओ अ़चुबुदा एवाताचि। 11खोन्‍किना मोचिआ अ़लोवाचुचिन, “गालिल्‌दाओ म़नाचिओ, खानानिन देकि त़एविन्‌कि नाम्‍चोक्‌दुत्‍नि खात़चोविन्‌येन? खानानिन्‌आ ओन्‍ग़रि ओ येसु आम्‍नुओ रादाङ्‌का निनाम्‍मादुत्‍नि देत्‍नि निनाम्‍हाङ्‌आ अ़थेन्‍ताखात्‍ताङाओ त़खाम्‌युङ्‌सुम, मोवात्‍निङा खोक्‍को ओ हेन्‍खामादा म़लाय़।”

यहुदाओ अ़फान्‌दा नि छाम्‍माय़ङ अ़छेन्‍ताओ

12खोन्‍किना मो छाम्‍माय़ङ्‌चि जैतुन्‌निओ भ़ऱदुङ्‌का यरुसलेम्‌ह्‍यात्‍नि म़लासा। मो भ़ऱ यरुसलेम्‌दाङ्‌का अ़क हजारा मितरा लेका अ़थाया छुक। 13यरुसलेम म़तालाकि मोचि म़युङाङाओ खिम्‌ओ धाउछान्‌दु म़वाङा, मोदा बुया युङ्‌याङ्‌सा म़मुवाङा। मोदा काकोप्‍नान्‍चिन्‌चि पत्रुस, युहन्‍ना, याकुब, अन्‍द्रियास, फिलिप, थोमा, बारथोलोमाइ, मत्‍ति, अल्‍फयस्‌ओ अ़छा याकुब, हेन्‍कोप सोमाकातुक सिमोन खोन्‍कि याकुब्‌ओ अ़छा यहुदा म़याआङा। 14मो झारा छाम्‍माय़ङ्‌चि, मेत्‍छामाचि खोन्‍कि येसुओ अ़चुमा मरियम्‌किना येसुओ अ़चुनिछाचिएनान अ़धुन अ़क्‍नि म़कोवान्‍चिन्‌कि याम़मारायुङ्‌साङा।

15खोन्‍कि अ़क्‌लेन पत्रुस पुवालोन्‍ताकि साकोङ्‌छ़ङ कामुचिओ अ़चुरादा चेप्‍मा पुङ्‌सु, मोदा आप्‍फात अ़क सये बिस्‌कापाङ हाङ्‌पा येसुदा साकोङ्‌छ़ङ कामु म़नाचि म़कोवान्‌युङ्‌सान्‍चिन। 16“ब़ब़, नाना खोन्‍कि निछाचि ओ, साम्‍कालिन्‌दा सेङ्‌लावाआ आराङ्‌ओ हाङ दाउद्‍लाम्‍पा ब़द्‍धे बुया यहुदाओ अ़तुक्‌वादा म़चेवायुङ्‌साओ मो य़ङ्‌चि तामालामाङा दोराङा। खोन्‍कि खोसाआ रात्‍खामिचि निनाम्‍हाङ ब़क्‍खाखिम्‌दा येसु लाप्‍सि तित्‍तुचि। 17यहुदा हाङ्‌पाओ बारकापाङ अ़चुछाम्‍माय़ङ्‌चिएदाओ अ़क्‍छा याआङा। येसुआ अ़चुकाचि मुसि खो आन्‍कान्‍काएनान अ़छेन्‍ता।

18यहुदाआ अ़त्‍लो काचिआ दुउओ छेन्‍बिआ व़क खिरु। मो व़क्‌दाङा खो ताङ्‌कालेप्‍पा लिसाधाकि सुवादा, खोन्‍कि खोसोओ अ़बुक केराकि अ़थोक्‌चि म़लोन्‍ताखारा। 19झारा यरुसलेम्‌दाओ म़नाचिआ ओ य़ङ्‍ओ अ़तुक्‌वादा अ़एना, खोन्‌ओसा मोचिआ मो व़क्‌ओ अ़ऩङ अ़चुय़ङ्‌दा आखेल्‍दामा अ़पाक्‍ता। मोसोओ अ़तुप्‍माय़ङ ‘ह़आ वापोक्‍ताओ व़क’ ओ।

20देकिनालो साम्‍ऱङ छाप्‍लाखादा दाउद हाङ्‌आ यहुदाओ अ़तुक्‌वादा छाप्‍तुयुङ्‌सु,

‘मोसोओ अ़खिम अ़होम्‍प़द़क लिने,

मोदा साङ्‌छाङ अ़युङ्‌निन्‍ने।’

खोन्‍कि

‘मोसाआ मुमादोत्‌ओ काचिओ पाङ नितात्‍साआङा मुने।’ निकिनाछाङ छाप्‍तायुङ्‌सा।#साम्‍ऱङ्‌भुङ ६९:२५; १०९:८

21-22खोन्‌ओसा येसु म़सुवादाओदाङ्‌का म़लासाखोन्‍तालोन्‍ताओसो अ़सालुम्‍स़ङ काप़ आन्‍रुहुप्‌दाङ्‌का यहुदाओ अ़फान्‌दा अ़क्‍छा छाम्‍माय़ङ छेन्‍मादोत। खो म़नाचि युहन्‍नाआ बप्‍तिस्‍मा प़चिओ ग़रिदाङ्‌का हाङ्‌पा येसु निनाम्‍मादुत्‍नि निनाम्‍हाङ्‌आ अ़खात्‍ताओ लेन्‌तारि आन्‍कान्‍काएनान अ़धुन अ़क्‍नि युङाङाओने।”

23खोन्‍किना खोचिआ ह़वाङ म़नाचिओ अ़चुऩङ अ़युङ्‌सा: अ़क्‍छा योसेफ्‌निओ बारसाबास, खो युस्‍तस निकिछाङ अ़सिन्‍ताङा, खोन्‍कि नितात्‍सोओ अ़ऩङ मतियास। 24खोन्‍किना मोचि अ़नुवाक म़ना छेन्‍मा निकिना झारा याम़मारा। मोचि म़य़ङा, “हाङ्‌पो, खानानिन झारा म़नाचिओ अ़चुसाकोङ्‌वा त़सिन्‍तुम्‌योम, ओ ह़वाङ्‌दा खाक्‍को खानानिन त़छेन्‍तुम्‌ओ, आन्‍कान्‍का खाङ्‌मेत्‍नि, 25खोन्‍कि खोसाआ यहुदाओ अ़फान्‌दा छाम्‍माय़ङ काचि मुमा ऱने, देकिनालो यहुदाआ अ़छिरिन्‍दान्‍काकि खादा खात्‍मा खान्‍तुओ खोदाङा खारायुङ्‌सा।” 26खोन्‍किना मोचिआ मो ह़वाङ्‌दा छेन्‍मा निम्‍पाङ अ़चुऩङ्‌दा चित्‍था म़पाआ, खोन्‍कि चित्‍था मतियास्‌ओ अ़ऩङ्‌दा छुक्‍ता, खोन्‌ओसा खो एघारकापाङ छाम्‍माय़ङ्‌चिएदा तेप्‍ता।

Currently Selected:

छाम्‍माय़ङ 1: bap

Highlight

Copy