छाम्माय़ङ 4
4
पत्रुस खोन्कि युहन्ना धियायोक्खाओ अ़बुदा
1पत्रुस खोन्कि युहन्ना म़नाचिएनान हान्ताङाचिहिदा काब़क्पाचि खोन्कि निनाम्हाङ ब़क्खाखिम कारात्चिओ अ़चुकप्ताना खोन्कि सदुकिचि मोचिएदा म़ता। 2मो म़नाचिओ चाअ़त्लो अ़चुमाइसुङ कारा, देकिनालो मो ह़वाङ्सा देत्नि येसु म़सुवादाओदाङ्का अ़खोन्तालोइसा खोवात्निङा निनाम्हाङ्आ झारा म़स़दाओ म़नाचि म़लासुखोन्तुलोइसुचि निकिना अ़चिन्ताङाचुचिन, खोन्कि खाअ़एत्ताङाचुचिन। 3खोन्किना मोचिआ पत्रुस खोन्कि युहन्ना म़लाउचिकि अ़माङ्कोलेन्तारि छेक्खाखिम्दा म़छेक्तुचि, देकिनालो मोन्ग़रि अ़नाम्प़क लिसाचिआयुङ्सा। 4मेन मो निनाम्हाङ्य़ङ काएन्चिएदाङ्का ब़द्धेकापाङ्आ येसुदा साकोङ्छ़ङ म़मुवा, खोन्कि साकोङ्छ़ङ कामुपाचिओ अ़चुखिप्मा पोयाकि आप्फात पाच हजारा म़लिसा। 5अ़माङ्कोलेन झारा यहुदि बुसुवाचि, अ़धुवाचि खोन्कि य़ङ्हुप काचिन्पाचि यरुसलेम्दा म़कोवान्चिन। 6मो धियायोक्खादा मुलो काब़क्पा हन्नास खोन्कि कैयाफा, युहन्ना, अलेक्जेन्दर खोन्कि हन्नास्ओ झारा अ़द़क्छाचि म़याआङा। 7मोचिआ पत्रुस खोन्कि युहन्ना अ़चुबुदा तात्म़मेत्तुचिकि मोचि म़सेनुचि, “खानाचि साङ्आ नुखा सावा त़पुवाचि, माङ्लो साङ्कोओ अ़ऩङ्दा ओ पेसोला त़नुसाचुओ?” 8खोन्किना पत्रुस सेङ्लावाआ भेप्तुकि मोचि लासुलोचि, “बुसुवाचि खोन्कि अ़धुवाचि ओ! 9आय़ खानानिन्आ आन्कान्का ओ अ़क्छा पेसोला म़नाएदा अ़नुवाक काचि लिसाओ अ़तुक्वादा देत्नि नुवानि त़सेन्निनालो, 10खानानिन खोन्कि इस्राएल्दाओ झारा म़नाचिआ सिन्तानुम, खानानिन्आ क्रुस्दा त़ख़न्तुम्सेरुम्ओ नासरत्ओ येसु ख्रिस्त निनाम्हाङ्आ म़सुवादाओदाङ्का अ़ह़ङ्सालोइसा, येसुओ अ़चुऩङ्दा ओ म़ना नुवाकि आम्नुओ बुदा एप्याङ। 11खानानिन खिम कामुचिआ ऩङात़छिरुम्दोम्ओ लुङ्ताक येसुङा ओ, मेन ओन्ग़रि खोक्को खुचुरोङ्दाओ मुलो लुङ्ताक म़लिसायुङ्सा।#साम्ऱङ्भुङ १८:२२ 12खोन्कि येसुएदाङ्का नि साङ्आछाङ लेन्मा म़ऱनिन, देकिनालो ओ झारा हेन्खामादा आन्कान हेवादाङ्का लेन्मा निम्पाङ निनाम्हाङ्आ येसुओ अ़ऩङ ओन्ङा म़पुवायुङ्सा।” 13यहुदि बुसुवाचिआ पत्रुस खोन्कि युहन्ना मान्खिप्चिओ खोन्कि ताक्पेत्निओनि म़सिन्तुचि। मोवात्नि खोचिओ अ़चुराक अ़खाकिना मोचि दोम्तुदोचि। खोन्कि मोचि बुयादाङ्का येसुएनान अ़क्नि म़युङाङाओ खोचिआ म़सिन्तुचि, 14मेन मो नुवाओ म़ना पत्रुस खोन्कि युहन्नाओ अ़चुच़क्दा एवाङाओ अ़खाकि बुसुवाचिआ खोचिओ अ़चुदेङ्सालाप्पादा देत्छाङ लोमा मान्ऱम़दोचि। 15खोन्ओसा मोचिआ पत्रुस खोन्कि युहन्ना धियायोक्खादाङ्का बुङ्खाह्यात्नि लोन्म़मेत्तुचि, खोन्किना बुसुवाचि खोचि-खोचि याम़योआ, 16“ओ म़नाचि हान आन्कान दे मुमा ऱम्च़म? ओचिआ म़दोम्दाओ काचि अ़मुवाचुओ यरुसलेम्दाओ झारा म़नाचिआ अ़सिन्ताचिआयुङ्सा। खोन्कि ओ काचि खोचिआ मान्मुअ़दाचुओनि आन्कान म़नाचि लोमा अ़ऱन्मिन्चिन। 17मेन ओ य़ङ म़नाचिओ अ़चुरादा च़लोक अ़थ़ङ्निन्खात्निन्ने निकिना आन्कान ओचि येसुओ अ़तुक्वादाओ दुम साङ्चिछाङ ओदाङ्का च़लोक खामान्एत्दाचुचिन्नि चाप्चेत्तुम्च़म्ने।” 18खोन्किना मो यहुदि बुसुवाचिआ पत्रुस खोन्कि युहन्ना लाबुत्म़मेत्तुचिकि “हान्दाङ्का येसुओ अ़ऩङ्दा देम्खाछाङ मान्चेप्दाचि माङ्लो मान्चिन्दाचुचिन!”नि मोचि म़लोचि। 19मेन पत्रुस खोन्कि युहन्नाआ मोचि अ़लासालोवाचुचिन, “निनाम्हाङ्ओ अ़चुबुदा आम्नुओ य़ङ एन्मा अ़नुवाक हे, निनाम्हाङ्ओ अ़चुय़ङ एन्मा अ़नुवाक? खानानिन्ङा अ़छ़ङ मुवानुम। 20देकिनालो येसुआ अ़मुवाओ काचि आन्काच्या खाचुवाओ खोन्कि एनाचुवाओ य़ङ म़नाचि खामान्एत्माङ आन्काच्या युङ्माङा अ़ऱचिन्का।” 21खोन्किना यहुदि बुसुवाचिआ पत्रुस खोन्कि युहन्ना दन्दा प़खा लाम दित्छाङ मान्धित्अ़दाकि च़लोक म़दुङ्तुचिकि खोचि म़लेरुखाइसुचि, देकिनालो पेसोला म़ना नुवाओ अ़खाकि झारा म़नाचिआ निनाम्हाङ अ़चोन्ताङा। 22मो म़दोम्दाओ काचिलाम्पा नुवाओ म़ना चालिस्कादोङ्दाङ्का च़लोक बात्तुङु।
साकोङ्छ़ङ कामुचिओ अ़चुयामात्मा
23यहुदि बुसुवाचिआ पत्रुस खोन्कि युहन्ना म़लेरुङुचिवा मोचि साकोङ्छ़ङ कामुचिएदा खाराचि, खोन्कि झारा मुलो काब़क्पाचि खोन्कि अ़धुवाचिआ म़लोचिओ य़ङ्चि खाअ़एत्ताचुचिन। 24खोन्किना ओ य़ङ अ़एनाकि मोचि झारा म़तोङाकि अ़धिवाङ य़ङ्आ निनाम्हाङ्एदा याम़मारा, “झारासोओ अ़चुहाङ्पा निनाम्हाङ, खानानिन्आङा निनाम्मा, हेन्खामा, धियाङ्वामा खोन्कि मोदा म़याक्याङ्ओ झारा त़मुयुम्च़म। 25खानानिन सेङ्लावालाम्पा आन्काओ सुन्तुम आम्नुओ हारुक दाउद हाङ्ओ अ़दोलाम्पा त़चेविन, ‘देकिना निरावाचिओ अ़चुमाइसुङ कात्याङ, खोन्कि इस्राएलि म़नाचि अ़ङ्देङ्सालाप्पादा सोज्जेओ थालि म़बाङ्याङ? 26हाङ्पा निनाम्हाङ्ओ अ़चुदेङ्सालाप्पादा खोन्कि ख्रिस्तओ अ़चुदेङ्सालाप्पादा हेन्खामादाओ हाङ्चि खोन्कि हाङ्काचि कामुचि अ़क्नि म़कोवान्चिन।’ #साम्ऱङ्भुङ २:१-२ 27अ़नुछ्याङा खानानिन्आ त़छेन्तुम्ओ म़सेङ्याङ्ओ आम्नुओ हारुक येसुओ अ़चुदेङ्सालाप्पादा थालि बाङ्सि हाङ हेरोद खोन्कि पन्तियस पिलातस इस्राएलि म़नाचि खोन्कि निरावाचिएनान म़तोङाकि ओ सहरादा म़कोवान्चिन। 28खानानिन्आ बुयाङा अ़छ़ङ त़मुम्ओ आम्नुओ मिन्मा खोन्कि मित्चिऩङ्वात्नि मोचिआ झारा अ़मुवा। 29खोन्कि हान हाङ्पो, मोचिओ अ़चुदुङ्तिम एन्निप़नि। खोन्कि आन्कान्का आम्नुओ हारुक्चि आम्नुओ य़ङ राक्एनान खालुमा सावा प़नि। 30खोन्कि सेङ्याङ्ओ हारुक येसुओ अ़चुऩङ्लाम्पा कातुक म़नाचि नुखा खोन्कि बुन्चि खोन्कि म़दोम्दाओ काचिचि मुमादा आम्नुओ सावा आन्कान्का प़नि।” 31याम़माराचिआकिना मोचि म़कोवान्चिन्ओदा ङाङ्सा, खोन्कि मोचि झारा सेङ्लावाआ भेप्तुचिकि मोचिआ निनाम्हाङ्ओ अ़चुय़ङ राक्एनान खाअ़लुसा।
साकोङ्छ़ङ कामुचिआ अ़चुचासुम्छेन्बि अ़हा
32साकोङ्छ़ङ कामुचि झारा अ़क साकोङ्वा खोन्कि अ़क मिन्मा म़लिसायुङ्सा, खोन्कि मोचिएदा युङाङाओ अ़चुचासुम्छेन्बिचि “अ़ङ्को ओन्ङा”नि मान्य़ङ्याङ्चि। मेन मोचि झारासोओ अ़चुचासुम्छेन्बिचि अ़क्छा निएदा म़हासुङुचि। 33मो छाम्माय़ङ्चिआ तोक्पो सावाएनान हाङ्पा येसु म़खोन्तालोन्ताओ अ़चुसालुम्स़ङ अ़पुवाङा, खोन्कि निनाम्हाङ्आ झारा साकोङ्छ़ङ कामुचि ब़द्धे आसिखा म़प़चि। 34मोचिएदा साङ्छाङ दिदाछाङ मान्हाप्याङ्चि, देकिनालो साङ्चि व़क्स़ङ माङ्लो खिम म़तोक्ताङा, मोचिआ अ़इनाकि, 35मोसोओ अ़लुङ छाम्माय़ङ्चिएदा अ़ताराङा। खोन्कि मोचिआ खा-खाक्को म़हाप्तादिसाङा, खोचि म़हात्तुङुचि। 36साइप्रस खाम्दाक्दाओ अ़क्छा लेबि भुङ्दाओ योसेफ अ़ऩङ मुवाङाओ म़ना युङाङा। छाम्माय़ङ्चिआ खो बारनाबास्नि अ़ऩङ अ़वात्ता, मोसोओ अ़तुप्माय़ङ राक काप़। 37खोसाआ अ़व़क इनुओ मो फेक्वा बात्तुकि छाम्माय़ङ्चिओ अ़चुबुदा युक्तुचि।
Currently Selected:
छाम्माय़ङ 4: bap
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
