A Sofoni 1
1
1 #
2Rĩm 22.1—23.30, 2Kib 34.1—35.27 Sẽn-Ka-Saab goma ne a Sofoni, a Amo biig a Zoziyaas sẽn wa n dɩt Zʋʋda naamã wakate. A Sofoni yaa a Kusi biiga t'a Kusi yaa a Gedaliya biiga, t'a Gedaliya yaa a Amariya biiga, t'a Amariya yaa a Ezekɩyaas biiga.
Wẽnnaam na n sãama dũniyã zãnga
2Sẽn-Ka-Saab yeelame yaa:
«Ade, mam na n sãama bõn-vɩɩs nins fãa
sẽn be dũniyã zugã.
3Mam na n sãama ninsaalbã ne rũmsã fãa,
la m sãam liuuli wã sẽn yɩgd yĩngrã fãa,
ne zĩmã sẽn be ko-kãsengã pʋgã,
mam na n sãama nin-wẽnsã ne b tʋʋm-beedã fãa,
la m menes ninsaalbã fãa dũniyã zugu.
Yaa maam a Sẽn-Ka-Saab n yeele!»
Wẽnnaam na n zaba ne Zʋʋda la Zeruzalɛm
4Mam na n tẽega m nugã n sɩbg Zʋʋda
ne Zeruzalɛm nebã,
la m na n menesa bũmb ning sẽn ket zĩ-kãngã pʋgẽ,
n yaa wẽn-naandg a Baall dẽndã,
la m menes a Baall tʋmtʋmdbã sẽn yaa a maan-kʋʋdbã.
5Mam na n menesa neb nins fãa sẽn dʋʋd
rot zut n wõgemded n waoogd yĩngr ãdsã,
la m menes neb nins sẽn wõgemded
maam a Sẽn-Ka-Saab taoore,
n yaool n wẽend ne tẽn-kugr a Milkom yʋʋrã.
6Mam na n menesa neb nins sẽn basd
maam a Sẽn-Ka-Saabã,
ne neb nins sẽn ka baood maamã
la sẽn ka baood-b mam saglgã.
7Sĩnd-y sɩɩ Wẽnnaam Sẽn-Ka-Saabã taoore,
bala, bãmb daarã kolgame!
Sẽn-Ka-Saab seglame n na n maan maoongo,
la bãmb welga neb nins bãmb sẽn boolã toore.
8Sẽn-Ka-Saab yeelame:
Mam maoongã daare,
mam na n sɩbga nanambsã, ne na-biisã,
la neb nins fãa sẽn yer bu-zẽms futã.
9Badaare, mam na n sɩbga neb nins sẽn gãndgd
Wẽnd doogã rigno-koakã,#1.9 Rigno-koakã: Rigno-koakã yell b sẽn gomd kaanẽ wã ka tolg n yaa vẽeneg tɩ b mi sẽn yaa rignoor ning ye. La b tagsdame tɩ tõe n yɩɩ wẽn-naandg a Dagõ roogã rigno-koak yell la b gomda. Tɩ ges-y 1 Sãm. 5.3-4.
la neb nins sẽn pidsd b soaalã roog ne wẽng la zãmbã.
10Maam a Sẽn-Ka-Saab yetame:
«Badaare, b na n wʋma kelems sẽn yit dignoor ning
b sẽn boond tɩ Zĩm Dignoorã sẽnẽ,
la b wʋm wiisg sẽn yit Sag-paallã pʋgẽ,
ne bʋr-kãseng sẽn yit tãmsã sẽnẽ.
11Maktɛɛs tẽng nebã, wiis-y-yã!
Bala, Kana tẽngã neb na n sãama zãnga,
la lɛɛbdbã fãa na n kiime.
12Badaare, mam na n widga fɩtl n vɛɛs Zeruzalɛm,
la m na n sɩbga neb nins sẽn zĩ-b bãane,
n tagsdẽ tɩ Sẽn-Ka-Saab ka tõe n maan sõama bɩ wẽngã.
13B na n zɛɛ bãmb paoongã, la b sãam b rotã,
bãmb meta roto, la b ka na n kẽ b pʋsẽ ye,
bãmb senda reezẽ tɩɩse,
la b ka na n yũ b reezẽ rãamã ye.»
Sẽn-Ka-Saab daare
14Sẽn-Ka-Saab daarã sẽn yaa ra-kãsengã kolgame,
a kolgame, la a wata tao-tao!
Sẽn-Ka-Saab daarã rãamd sã n wa zẽkdẽ,
baa ne gãndaadã na n wiisa ne sũ-toogo!
15Daarã na n yɩɩ sũ-puugr daare,
a na n yɩɩ toog la yel-pakr daare,
namsg la sãoong daare,
yaa lik la lik bida daare,
sawad-taok la lik tuu daare.
16Badaare, tãb-biis na n peeba bardo,
n kaas zabr kaasgo,
n zab ne tẽms nins sẽn gũbg ne lalsã,
la b zab ne b lalsã gõdsẽ gãs-bɛdã.
17Mam na n kẽesa ninsaalbã yel-pakr pʋga,
bãmb na n kẽna wa zoense,
bala, bãmb beega Sẽn-Ka-Saabo.
B zɩɩmã na n daaga zĩig zãng wa tom sẽn yɛdge,
la bãmb yãadã na n yʋlma zĩig zãng wa sagdo.
18Bãmb wanzuri wã ne b sãnemã,
ka na n tõog n fãag-b Sẽn-Ka-Saab sũ-puugrã daar ye.
Sẽn-Ka-Saab sũ-yikrã bugum na n dɩɩ dũniyã fãa,
bala, na n yɩɩ to-kãseng daare,
la Sẽn-Ka-Saab na n sãama dũniyã nebã zãnga.
Currently Selected:
A Sofoni 1: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
