A Habakuki 3
3
A Habakuk pʋʋsgo
1Wẽnnaam no-rɛɛs a Habakuk pʋʋsgo,
a yẽgengã wɛɛngẽ:
2Sẽn-Ka-Saabo, mam dag n wʋmame
tɩ b gomd yãmb tʋʋm-kãsemsã yelle.
Yãmb tʋʋm-kãsemsã kẽesa maam dabeem.
Maan-y tʋʋm-kãens tõnd zamaanẽ wã.
Kɩt-y tɩ tõnd zamaanẽ nebã bãng y tʋʋm-kãsemsã!
La y sũ-yikrã pʋga, tẽeg-y y nimbãan-zoeerã yelle!
3Wẽnnaam yii Teman n watẽ,
Pʋ-Peelem-Soabã yii Paarã tãngã n watẽ.
Bãmb vẽenemã sẽn yãgdã luda sa-gãongã,
tɩ b waoogrã pid dũniyã gilli.
4Bãmb yaa wa vẽenem sẽn yãgde.
Vẽenem sẽn yãgd n yit bãmb nugẽ wã,
la bãmb pãngã solga beenẽ.
5Bã-longds n dengd bãmb taoore,
tɩ yĩn-wɩngr pʋgd b poore.
6Bãmb yalsame n mag tẽngã,
bãmb gesame n kɩt tɩ ninsaalb pɛleng yɩke.
Pĩnd zamaanẽ tãmsã miimame.
Tɩ kʋdem-wẽndẽ zamaanẽ kunkubã sirgdẽ,
zĩ-kãens rag n yaa bãmb so-tũudsi.
7Mam neeme tɩ b menesa Kusan tẽng nebã fu-roto,
la b zũndga Madiyã nebã rot suga.
8Sẽn-Ka-Saabo, yaa ne kʋɩlsã la y yik y sũurã la?
Rẽ yĩnga, yaa kʋɩlsã n kɩt tɩ y sũurã yik la?
Yãmb sũurã sẽn puugã yaa ne ko-kãsengã la?
Yãmb zombda y wiidi,
yãmb zombda y tõogr saar-dãmba.
9Yãmb rʋʋsa y tãpo,
yãmb wẽenegã yaa pɛɛm sẽn yit y noorẽ.
Yãmb kɩtdame tɩ kʋɩls pus
tẽn-gãongã zug n bundẽ.
10Tãmsã yãnda yãmb n digda,
Sa-koom kiiga ne pãnga,
tɩ b wʋmd bog-zulumsã sẽn kuglumdi,
t'a koomã tãoosd n kuiis yĩngri.
11Yãmb pɛɛmã sẽn fɩɩnd n loogdẽ wã,
tɩ y kãndã sẽn pɩndã fõt n loogdẽ wã,
kɩtame tɩ wĩntoogã ne kiuugã pa b zĩigẽ
n ka serg ye.
12Yãmb sũur puugame n saagd dũniyã,
yãmb tabda bu-zẽmsã ne sũ-kãbre.
13Yãmb yiime n na n fãag y nebã,
Yãmb yi n na n fãaga y nin-tũusdgã.
Yãmb sãamda nin-wẽng roog sugri,
y sãamd-a-la zãng tɩ bũmb ka kell ye.
14Yãmb wẽneg n deega bɛɛbã pɛɛm n kõs
b nanambsã zutu.
Nanambsã yaool n dag n fõta wa sobg n wat n na n
sãam maam.
B zoet n watame la b kaasd ne sũ-noogo,
tɩ wẽnd wa b sẽn solg n paam nimbãan-ned n sãame.
15Yãmb pãrga sor ko-kãsengã pʋg y wiidã yĩnga,
y pãrg-a-la ko-pɛmã sẽn tar pãngã sʋka.
16Mam sẽn wʋm bʋrgã, mam põaagã bendgame.
Bʋrgã kɩtame tɩ m no-bɩmsã rigda,
tɩ mam kõabã wãgda,
tɩ m naoã gĩin maage.
La m dag n yasa sɩɩ n gũudẽ,
m dag n gũuda sũ-sãangã daare,
m dag n gũuda daar ning
tõnd sẽn na n tɩ zab ne sẽn zabd-b ne tõndã.
17Bala, kankang ka ningd puud ye.
Reezẽ tɩɩs ka womd biis ye.
Oliiv tɩɩs ka womd ye,
la pʋtã bõn-koaadl me ka womd ye.
Rũm-bãooneg ka be wubrẽ ye.
Rũm-bɛd ka be yãgrẽ ye.
18La baa ne rẽ fãa, mam na n maana sũ-noog
ne Sẽn-Ka-Saabo.
Mam na n kɩdma ne Wẽnnaam sẽn yaa mam fãagdã.
19 #
2Sãm 22.34, Yɩɩn 18.34 Sẽn-Ka-Saab sẽn yaa mam Zu-soabã
yaa mam pãnga.
Bãmb kɩtdame tɩ mam naoã keng wa wals nao.
La bãmb n sõngd-m tɩ m kẽnd kunkub zutu.
Yaa yɩɩlã naab yɩɩlle.
Yɩɩnda ne yʋʋm-teed sẽn tar susi.
Currently Selected:
A Habakuki 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
