A Miise 3
3
Israyɛll nanamb-wẽnsã keoogre
1Maam a Miise yetame:
«A Zakoob yagensã taoor dãmba,
Israyɛll buudã nanambse,
m kot-y lame tɩ y kelge!
Dẽ yĩnga, ka yãmb n dag n tog n bãng
sẽn yaa tɩrg sɩda?
2Yãmb yaool n kisa sẽn yaa sõama,
la y nong sẽn yaa wẽnga.
Yãmb sɩɩda m nebã n yãgsd b gãndã,
la y seend b yĩngã nemd n basd kõaba.
3Bãmb wãbda mam nebã,
Bãmb puunda b gãndã,
la b wõrd b kõabã.
Bãmb beesd-b-la wa nemd sẽn be rʋkẽ,
wa nemd sẽn be bugum dʋkẽ.
4Dẽ, bãmb na n wa kelem n boola
Sẽn-Ka-Saabo,
la b ka na n leok bãmb ye.
Badaare, Sẽn-Ka-Saab na n solga
b nengã ne bãmba,
wẽng ning bãmb sẽn maanã yĩnga.»
Zãmb no-rɛɛsdbã keoogre
5Ad Sẽn-Ka-Saab sẽn yet no-rɛɛsdb
nins sẽn tudgd mam nebã:
«B sã n kõ bãmb tɩ b rɩ,
b yetame tɩ yell kae ye.
La b sã n ka kõ bãmb tɩ b rɩ,
bãmb yikda zabr ne a soabã.
6Bõn-kãng yĩng kɩtame,
tɩ na n lebg wa yʋng yãmb yĩnga,
la y ka na n leb n paam vẽnegr ye.
Na n lebga lik bida yãmb yĩnga,
tɩ y ka leb n tõe n paam yãab ye.
Mam na n kɩtame tɩ zĩigã sobg
no-rɛɛsdb-kãens yĩnga,
la daarã na n lebga lik b yĩnga.
7Bãngdbã fãa na n paama yãnde,
la bagbã na n paama paoogre,
bãmb fãa na n luda b nemsã, yãndã yĩnga.
Bala, Wẽnnaam ka na n leb n leokd-b ye.»
8La sã n yaa ne maam a Miise,
Wẽnnaam Sɩɩgã pid-m-la ne pãnga,
la tɩrlem, ne raoodo,
tɩ m tõe n togs a Zakoob yagensã b kongrã,
la m wilg Israyɛll nebã b yel-wẽnã.
A Miise togsda Zeruzalɛm sãoongo
9Zakoob yagensã taoor dãmba,
Israyɛll buudã nanambse,
m kot-y lame tɩ y kelge!
Yãmb dãmb sẽn kis tɩrlem,
la y golemd sẽn yaa tɩrgã!
10Yãmb daagda zɩɩm n met Sɩyõ,
la y maand zãmb n met Zeruzalɛm.
11Zeruzalɛm nanambsã reegda kũun n yaool
n kao bʋʋdo.
Bãmb maan-kʋʋdbã zãmsda nebã
n deegd yaoodo,
la b no-rɛɛsdbã togsda pĩnd-n-bãngr goamã
n deegd wanzuri.
Bãmb yaool n tika Sẽn-Ka-Saab n yetẽ yaa:
«Sẽn-Ka-Saab sẽn be tõnd sʋkã yĩnga,
yel-beed kõn tol n paam-d ye.»
12 #
Zer 26.18
Woto, yãmb yel-manesmã yĩng kɩtame,
tɩ Sɩyõ na n lebg wa pʋʋg b sẽn gudgi.
N-yẽe! Zeruzalɛm na n lebga raboogo,
tɩ tãng ning Sẽn-Ka-Saab roogã
sẽn be-a zugã lebg kãgre.
Currently Selected:
A Miise 3: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
