Yikri 6

1Sẽn-Ka-Saab yeela a Moyiis yaa: «Moasã, fo na n yãnda bũmb ning mam sẽn na n maan Faarõ. Yaa nug sẽn tar pãng n na n kɩt tɩ yẽnda bas nebã tɩ b looge. N-yẽe, nug sẽn tar pãng n na n kɩt tɩ Faarõ rig bãmb tɩ b yi n bas a tẽngã.»

Wẽnnaam na n fãaga Israyɛlle

2 # Sɩng 17.1, 28.3, 35.11, Yik 3.13-15 Wẽnnaam goma ne a Moyiis n yeele: «Mam yaa Sẽn-Ka-Saabo. 3Mam vẽnega m meng ne a Abrahaam la a Izak ne a Zakoob n wilg bãmb tɩ mam yaa Pãng-Soab a Wẽnnaam. La mam ka kɩt tɩ bãmb bãng tɩ mam yʋʋr la Sẽn-Ka-Saab ye. 4La mam maana kãabg ne bãmb n yeel-b tɩ mam na n kõ-b-la Kana tẽngã, tẽng ning bãmb sẽn dag n yaa sãamb a pʋgẽ wã. 5La sẽn paase, mam wʋma Ezɩpt nebã sẽn kẽes Israyɛll nebã yembd tɩ b yãbdã, la mam tẽega m kãabgã. 6Dẽ yĩnga, bɩ f yeel Israyɛll nebã tɩ mam yaa Sẽn-Ka-Saabo, la m na n yiisa Israyɛll nebã tʋʋm-wɛgl nins Ezɩpt nebã sẽn modg bãmb tɩ b maanã pʋgẽ. La mam na n fãaga bãmb n yiis-b yembd ning pʋg Ezɩpt nebã sẽn kẽes bãmbã. Yaa kang sẽn tar pãng la mam na n tẽeg n fãag yãmba. La mam na n sɩbga bãmb ne sɩbgr sẽn yaa kãseng n fãag yãmba. 7Mam na n deega yãmb tɩ y yɩ mam neba, la mam na n yɩɩ yãmb Wẽnnaam. La yãmb na n bãngame tɩ yaa Sẽn-Ka-Saab n yaa yãmb Wẽnnaam, soab ning sẽn fãag-a yãmb ne tʋʋm-wɛgl nins Ezɩpt nebã sẽn modg yãmb tɩ y maanã. 8Mam na n talla yãmb n tɩ kẽes tẽng ning mam sẽn dag n zẽk m nug n wẽen n yeel tɩ m na n kõo a Abrahaam ne a Izak la a Zakoobã. Maam a Sẽn-Ka-Saab na n kõo yãmb tẽngã tɩ y sooge.»

9A Moyiis togsa Israyɛll nebã gom-kãensã, la b ka kelg a Moyiis ye. Bala, bãmb dag n bee sũ-sãang pʋga, b yembdã sẽn yaa toogã yĩnga.

10Woto, Sẽn-Ka-Saab yeela a Moyiis yaa: 11«Kẽng n tɩ togs Faarõ sẽn yaa Ezɩpt rĩmã t'a kõ Israyɛll nebã sor tɩ b yi soolmã pʋgẽ.» 12La a Moyiis yalsa Sẽn-Ka-Saab taoor n gom n yeele: «Israyɛll nebã sã n ka kelg maam, Faarõ na n maana a wãn n kelg mam sẽn yaa ned sẽn ka tõe goamã?»

13Sẽn-Ka-Saab goma ne a Moyiis la Aarõ, n wilg bãmb b sẽn na n maan bũmb ninga, sẽn kẽed ne Israyɛll nebã la Faarõ sẽn yaa Ezɩpt rĩmã wɛɛngẽ, sẽn na n yɩl n yiis Israyɛll nebã Ezɩpt soolmã pʋga.

A Moyiis ne a Aarõ buudã kãsem-dãmba

14Woto yaa bãmb buudã kãsem-dãmb yʋya.

A Israyɛll bi-kãseng a Rubɛn kom-dibli yaa a Henoke, a Palu, a Hɛsron ne a Karmi. Bãmb yaa a Rubɛn yagense.

15A Sɩmyõ kom-dibli yaa a Yemuwɛlle, a Yamindi, a Ohaade, a Yakindi, a Sokaar la Kana tẽng pagã biig a Sayulli. Bãmb yaa a Sɩmyõ yagense.

16 # Sõd 3.17-20, 26.57,58, 1Kib 6.1-4 Ad a Leevi kom-dibli ne a yagens yʋy wa sẽn zems b roto: A Gerson ne a Kehat la Merari. A Leevi vɩɩmd n kaoosa yʋʋm koabg la pis-tã la a yopoe. 17A Gɛrson kom-dibli yaa a Libni ne a Sɩmeyi ne bãmb buudu. 18A Kehat kom-dibli yaa a Amram ne a Yitsehaar la a Ebrõ ne a Uziyɛlle. A Kehat vɩɩmd n kaoosa yʋʋm koabg la pis-tã la a tãabo.

19A Merari kom-dibli yaa a Makli ne a Musi. Bãmb fãa yaa a Leevi yagense, wa sẽn zems b roto.

20A Amram peega a pʋgdb a Zokebɛɛd n maan a paga, n dog a Aarõ ne a Moyiisi. A Amram vɩɩmd n kaoosa yʋʋm koabg la pis-tã la a yopoe. 21A Yitsehaar kom-dibli yaa a Koore ne a Nefɛɛg la a Zikri. 22A Uziyɛll kom-dibli yaa a Misayɛll ne a Ɛlsafan la a Sitri.

23A Aarõ peega a Nakson tão a Eliseba sẽn yaa a Aminadaab bi-puglã n maan a paga. La yẽnda roga a Nadaab ne a Abihu la a Eleyazaar ne a Itamaare.

24A Koore kom-dibli yaa a Asɩɩr ne a Ɛlkana la a Abiyazafe. Bãmb yaa a Koore yagense.

25A Aarõ bi-ribl a Eleyazaar peega a Putiyɛll bi-pugl a yembr n maan a paga. La yẽnda roga a Fineyaase. Bãmb fãa yaa Leevi buudã kãsem-dãmbã, ne b roto.

26Yaa a Aarõ ne a Moyiis kãens la Sẽn-Ka-Saab sẽn dag n yeel tɩ b yiis Israyɛll nebã Ezɩpt soolmẽ wã, la b kɩt tɩ tãb-biisã tong taab pʋgdg-pʋgdgã. 27Yaa a Aarõ ne a Moyiis kãens n gom ne Ezɩpt rĩm a Faarõ n kɩt t'a bas Israyɛll nebã tɩ b yi Ezɩpt soolmẽ wã.

Wẽnnaam leb n maana kãabg ne a Moyiisi

28Sẽn-Ka-Saab sẽn gom ne a Moyiis Ezɩpt soolmẽ wã, 29Sẽn-Ka-Saab yeela yẽnda yaa: «Mam yaa Sẽn-Ka-Saabo. Togs Ezɩpt rĩm a Faarõ bũmb nins fãa mam sẽn yet foomã.» 30La a Moyiis yalsa Sẽn-Ka-Saab taoor n yeel yaa: «Ade, mam ka mi goam ye. Faarõ na n yɩ a wãn n kelg maam?»

Currently Selected:

Yikri 6: MPBU

Highlight

Copy