Yikri 7

1Sẽn-Ka-Saab yeela a Moyiis yaa: «Ade, mam na n kɩtame tɩ fo yɩ wa wẽnnaam Faarõ nifẽ. La fo saam-biig a Aarõ na n yɩɩ fo no-rɛɛsa. 2Fo na n togsa yẽnda bũmb nins fãa mam sẽn na n yeel foomã. Fo saam-biig a Aarõ na n goma ne Faarõ t'a bas Israyɛll nebã tɩ b yi yẽnda tẽngẽ wã. 3#Tʋʋm 7.36La maam, mam na n kɩtame tɩ Faarõ keng a sũuri, la Ezɩpt soolmã pʋgẽ, mam na n maana bãn ne bõn-bãn n yɩlme. 4La Faarõ ka na n kelg yãmb ye. Dẽ, mam na n tẽega m nug Ezɩpt soolmã zug n sɩbg bãmb ne sɩbgr sẽn yaa kãsenga, la m na n yiisa Israyɛll nebã sẽn yaa m tãb-biisã Ezɩpt soolmã pʋgẽ. 5Wakat ning mam sẽn na n tẽeg m nugã Ezɩpt tẽngã n yiis Israyɛll nebã bãmb sʋkã, Ezɩpt rãmbã na n bãngame tɩ mam yaa Sẽn-Ka-Saabo.» 6A Moyiis ne a Aarõ maana wa Sẽn-Ka-Saab sẽn yeel bãmb tɩ b maanã. 7Wakat ning bãmb sẽn kẽng n na n tɩ gom ne Faarõ wã, rẽ t'a Moyiis tara yʋʋm pis-nii, t'a Aarõ tar yʋʋm pis-nii la a tãabo.

A Aarõ dasaarã lebga waafo

8Sẽn-Ka-Saab yeela a Moyiis ne a Aarõ yaa: 9«Faarõ sã n yeel yãmb tɩ y maan bõn-bãnde, bɩ f yeel a Aarõ t'a rɩk a rasaarã n lob tẽng Faarõ taoore, la rasaarã na n lebga waafo.» 10La a Moyiis ne a Aarõ kẽnga Faarõ nengẽ n tɩ maan wa Sẽn-Ka-Saab sẽn yeel bãmbã. A Aarõ loba a rasaarã tẽng Faarõ ne a tʋmtʋmdbã fãa taoore, la rasaarã lebga waafo. 11La Faarõ me boola yam dãmba ne tɩtã-rãmbã. Dẽ, Ezɩpt tɩtã-rãmb me maana woto ne bãmb tɩɩmã. 12Bãmb fãa loba b rasabã tẽnga, la b lebga wiisi. La a Aarõ dasaarã vela bãmb dẽndã. 13Dẽ, Faarõ sũurã riglmame, la wa Sẽn-Ka-Saab sẽn dag n yeelã, yẽnda ka kelg a Moyiis ne a Aarõ koɛɛgã ye.

Pipi toogo: koom sẽn tek n lebg zɩɩm

14Sẽn-Ka-Saab yeela a Moyiis yaa: «Faarõ sũurã riglmame. Yẽnda zãgsame n ka rat n bas nebã tɩ b loog ye. 15Kẽng yẽnda nengẽ beoog yibeoogo, wakat ning yẽnda sẽn na n kẽng koomã noorã. Kẽng n tɩ yaas be n seg yẽnda Nill kʋɩlgã noore. La bɩ f zã dasaar ning sẽn dag n lebg waafã f nugẽ. 16Yeel Faarõ yaa: Sẽn-Ka-Saab sẽn yaa Ebre nebã Wẽnnaamã tʋma maam fo nengẽ tɩ m wa yeel-f tɩ f bas bãmb nebã tɩ b kẽng we-raoogẽ wã n tɩ waoog bãmba. La hal tɩ ta moasã, fo ka kelg ye. 17#Vẽn 16.4Dẽ, ad Sẽn-Ka-Saab sẽn yeta: Yaa ne bõn-kãngã la fo na n bãng tɩ mam yaa Sẽn-Ka-Saabo: Ade, mam na n wẽe Nill kʋɩlgã koom ne dasaar ning sẽn be mam nugẽ wã, la koomã na n lebga zɩɩm. 18La zĩmã sẽn be Nill kʋɩlgã pʋgẽ wã fãa na n kiime, tɩ kʋɩlgã koom põog hal tɩ Ezɩpt rãmbã ka tõog n yũ-a ye.» 19La Sẽn-Ka-Saab yeela a Moyiis t'a yeel a Aarõ yaa: «Rɩk f dasaarã n tẽeg f nug Ezɩpt soolmã koom zugu. La bãmb kʋɩlsã ne b Nill kʋɩlgã ko-soayã, la b bãgsã, ne bãmb zĩis nins fãa b sẽn bĩngd b koomã, koom na n lebga zɩɩm. Zɩɩmã na n zĩnda ko-yũus nins fãa sẽn be Ezɩpt soolmã fãa pʋgẽ wã pʋse, baa ne b sẽn maan-b rãmb ne raad la kugã.»

20A Moyiis ne a Aarõ maana wa Sẽn-Ka-Saab sẽn yeel bãmbã. Yẽnda zẽka a rasaarã Nill kʋɩlgã koom zug Faarõ ne a tʋmtʋmdbã nifẽ, la Nill kʋɩlgã koom fãa lebga zɩɩm. 21La zĩmã sẽn be Nill kʋɩlgã pʋgẽ wã kiime, la Nill kʋɩlgã koom lebga yũugu, tɩ Ezɩpt nebã ka tõe n yũ Nill kʋɩlgã koom ye. Zɩɩmã zĩnda Ezɩpt soolmã fãa pʋgẽ. 22Ezɩpt tɩtã-rãmb me maana woto ne b tɩɩmã. La Faarõ sũurã riglmame tɩ yẽnda ka kelg bãmb ye. Kell n yɩɩ wa Sẽn-Ka-Saab sẽn dag n yeelã. 23Faarõ lebg n kuila a yiri, la yẽnda ka ges bõn-kãng wa yell ye.

24Ezɩpt nebã fãa tuu buls Nill kʋɩlgã sɛɛgẽ n bao ko-yũudum. Bala, bãmb dag n ka tõe n yũ Nill kʋɩlgã koom ye. 25Sẽn-Ka-Saab sẽn wẽ Nill kʋɩlgã koomã kaoosa rasem a yopoe tõre.

Toog a yiibẽ soaba: lomse

26Rẽ zugẽ, Sẽn-Ka-Saab yeela a Moyiis yaa: «Kẽng Ezɩpt rĩm a Faarõ nengẽ n tɩ yeel-a tɩ Sẽn-Ka-Saab yeelame yaa: Bas mam nebã tɩ b kẽng n tɩ waoog maam. 27Fo sã n ka sak n bas mam nebã tɩ b looge, mam na n kɩtame tɩ loms wa pid f soolmã zãnga. 28Lomsã na n pida Nill kʋɩlgã. La b na n yii be n wa kẽ fo yirã. B na n waa hal fo ro-gãagẽ wã, n dʋ baa fo gãagã zugu. Lomsã na n kẽe fo tʋmtʋmdbã ne f tẽngã neb fãa rotẽ. B na n kẽe baa wʋmsã ne sĩn-bi wã pʋse. 29Lomsã na n dʋʋ fo mengã zugu, la fo nebã ne f tʋmtʋmdbã fãa zutu.»

Currently Selected:

Yikri 7: MPBU

Highlight

Copy