A Amoose 8
8
Vẽnegr a naasẽ soaba: Peoog ne tɩɩs biisi
1Ad bũmb ning Zu-soab a Wẽnnaam sẽn wilg maam vẽnegr a to pʋgẽ. Vẽneg-kãng pʋgẽ, mam yãnda peoog sẽn pid ne tɩɩs bi-moaama. 2La b soka maam yaa: Amoose, fo nee bõe? La mam yeelame tɩ m nee peoog sẽn pid ne tɩɩs bi-moaama. La Zu-soabã yeela maam yaa:
Israyɛll sẽn yaa mam nebã sɛɛb wakat taame.
Mam ka na n leb n kõ-b sugr ye.
3Badaare, na-yirã pʋgẽ yɩɩlã na n lebga wiisgu.
Maam a Zu-soab a Wẽnnaam n yeele.
B na n zama kũumã zĩig fãa. B ka na n leb n wʋm bʋrg ye.
Lɛɛbdã zãmbo
4Kelg-y-yã, yãmb dãmb sẽn maand nimbãan-nebã pãngã,
la y namsd tẽngã ka-pãens-rãmbã,
5Yãmb yetame: «Rabʋr la ki-paalgã na n sɛ,
tɩ d paam n koosd d koodã?
La dabʋr la vʋʋsg daarã na n looge,
tɩ d paam n fõgs d bao wã?»
Tõnd na n wẽga d la-magdɩ wã,
la d tall d zɩslem magdsã n zãmbe,
la d rʋg d koosmã raaga.
6Tõnd na n daa naong rãmbã ne ligdi,
la d koos nin-koamã neooda yĩnga.
Tõnd na n koosa baa ne ka-pedsã.
7Sẽn-Ka-Saab wẽena ne Israyɛll zu-zẽkr tẽngã n yeele:
«Mam ka na n tol n yĩm y tʋʋmd ba a yembr ye.»
8Bãmb tʋʋm-wẽnsã yĩnga,
mam na n kɩtame tɩ tẽn-gãongã rigimdi.
Sũ-sãang na n paama neb nins fãa
sẽn be tẽn-kãng pʋgẽ wã
A na n zẽkame n lebg n lʋɩ,
wa Ezɩpt tẽng Nill kʋɩlgã.
Sẽn-Ka-Saab daarã na n yɩɩ sũ-sãang daare
9Zu-soab a Wẽnnaam yetame:
Badaare, mam na n kɩtame tɩ wĩntoogã kẽ wĩnto-sʋka,
la m kɩt tɩ dũniyã lebg lik wĩntoog wakate.
10Mam na n teka y tigã tɩ lebg sũ-sãanga,
la m tek y yɩɩlã fãa tɩ lebg wiisgu.
Mam na n sẽgen-y-la sũ-sãang futu,
la m põng y fãa zutã.
Mam na n kɩtame tɩ sũ-sãang kẽ tẽngã,
wa ned bi-ribl-yend sẽn ki t'a yãbda,
la a baoosg na n yɩɩ sũ-toogo.
11Zu-soab a Wẽnnaam yeelame yaa:
Wakat n wate, tɩ mam na n kɩt tɩ kom kẽ tẽngã,
la ka na n yɩɩ rɩɩb kom,
wall koom sẽn kae n yũud yĩng ye.
Na n yɩɩ Sẽn-Ka-Saab goamã kelgr
kom la a ko-yũud n na n yõk-ba.
12Bãmb na n yeeb n kẽnga goabg la rɩtgo,
ne yaang la taoore,
n baood n na n wʋm Sẽn-Ka-Saab goamã,
la b ka na n wʋm-a ye.
13Badaare, pʋg-sad-neebã ne
ra-sãmbã na n kii ko-yũudu.
14Bãmb wẽenda ne Samaari wẽn-naan-yoogã n yetẽ:
«Tõnd wẽenda ne f wẽn-naandg a Dan,
la d wẽend ne Bɛɛrseba wẽn-naandgã!»
La b na n lʋɩɩme n ka leb n yik abada ye
Currently Selected:
A Amoose 8: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
