Luki 3

Jesu tuonli boginma

3.1—4.13

Jan Batisi mawangima

(Mat 3.1-12; Mrk 1.1-8; Jan 1.19-28)

1Loma yaaba badiciamo Tibeli Sesari bali piiga n binmuuli binli, Ponsi Pilati den tie Jude diema guveneeri, Herodi den die Galile diema, o waalo Filipi n yaa die Itule leni Takonita diema, Lisaniasi mo n yaa die Abileni diema. 2Hana leni Kayifi den taani ki tie bi kopadicianba yudanba.#3.2 Hana den tie bi kopadicianba bado, ama Jufinba yonbidanba, Loma yaaba, den dindi o ki dini o cuado Kayifa, ba yeni Hana den gobidi Kayifa laa tuonli nni. Laa binle Sakari bijua Jan den ye mi fanpienma nni, ke U Tienu maadi leni o.

3Lani, o den caa yaa dogi n baali Jurden kpenu, ki wangi bi niba ke ban lebidi bi pala, wan batisi ba, ban baa bi tuonbiadi sugili. 4Nani lan diani maama o saawalipualo Esayi tili nni:

O nilo kpaani mi fanpienma nni ki tua:

Yin bogini mani o Diedo sanu,

Ki naadi mani o sani. #Esa 40.3-5.

5Bi baa gbieni ti joaloandi kuli,

Ki jiini joacianli leni joabiga kuli ki ladi ki dagini,

Ki naadi a sangoana,

Ki piini ti sanbuodi.

6Nisaalo kuli baa le U Tienu faabima.

7Bi niba boncianla den kpendi Jan kani ke wan batisi ba. O den tua ba: «Yinba, u waalabi-buolu na, ŋme fandi yi yin sani ki cia U Tienu pabienli yaali n baa cua na? #Mat 12.34; 23.33. 8Yin yaa tuuni mani yaa tuona n doagidi ke yi lebidi yi pala. Yin da tua yi pala nni: ‹Ti pia Abalahama ke o tie ti yaaja.› N waani yi ke U Tienu baa fidi ki teni yaa tana n tie ne n tua Abalahama puoliŋuani. #Jan 8.33. 9Ba moala bi caani li yali i tijiini po. Yaa tibu n ki luoni yaa bonluonkaala n ŋani kuli, bi baa pedi bu ki lu u mu nni.» #Mat 7.19.

10Bi niba boncianla den buali o ki tua: «Ti nan baa tieni lede?» 11O den guani ki yedi ba: «Yua n pia liadalie, wan boagidi leni yua n ki pia. Yua n pia mi jiema moko n tieni yeni.»

12Bi lubigaaba moko den cua ke wan batisi ba, ki yedi o: «Canbaa, ti baa tieni lede?» #Luk 7.29. 13O den guani ki yedi ba: «Yin da gaa mani li lubili ki cie ban bili maama.»

14Bi toatieba moko den buali o: «Ti mo baa tieni lede?» O den yedi ba: «Da tiendi mani bi niba u paalu, ki da gaani suuna ki kuli oba. Yin mangi mani yi pala leni yi ŋmapani.»

15Bi niba den guu U Tienu n Gandi Yua cuama. Bikuli den buali bi yula Jan yaa tie U Tienu n Gandi Yua. 16O den yedi bikuli: «Mini n batisi yi leni mi ñima, ama yua n pia u paalu ki cie nni baa cua, mii pundi ba yua n baa lodi o cacaagbansiama. Wani, o baa batisi yi leni U Tienu Fuoma Yua leni u mu. 17O kubi o kaaligu o nuu nni. O baa ŋanbi o jalu cain, ki lendi ki tigi ki wodi ŋalikama ki kuodi o buali nni, ki nan sia mi fenma yaa mu n ki pia gbindima.»

18Jan den wangi bi niba o laabaaliŋamo ki go tundi ba tunditoe boncianla. 19Ama wan den funi leni Herodi yua n den die Galile kelima o waalo pua Herodiasi po leni wan tieni yaa tuonbiada kuli po, #Mat 14.3-4; Mrk 6.17-18. 20Herodi go den pugini laa tuonbiadi kuli po tuonbiatoadi, ki luoni Jan li kpaadidieli nni.

Jan batisi Jesu

(Mat 3.13-17; Mrk 1.9-11; Jan 1.32-34)

21Bi niba kuli n den kpendi ke Jan batisi ba, o den batisi Jesu moko. Jesu n den jaandi yaa yogunu, tanpoli den luodi 22ke U Tienu Fuoma Yua ñani lipo ki naani leni ki kpaajiega, ki jiidi ki jagini Jesu po. Bi den gbadi u nialu ke u maadi hali tanpoli po ki yedi: «A tie n Bibuadiga. N pali mani a po hali boncianla.» #Cil 22.2; Ps 2.7; Esa 42.1; Mat 3.17; Mrk 1.11; Luk 9.35.

Jesu yaajanba

(Mat 1.1-17)

23Jesu den cili o tuonli ki pia nani bina piitaa. Bi den nua ke o tie Josefi bijua. Josefi den tie Heli bijua, 24Heli mo tie Mata bijua, Mata mo tie Levi bijua, Levi mo tie Meliki bijua, Meliki mo tie Janayi bijua, Janayi mo tie Josefi bijua, 25Josefi mo tie Matatiasi bijua, Matatiasi mo tie Amosi bijua, Amosi mo tie Nahumi bijua, Nahumi mo tie Esili bijua, Esili mo tie Nagayi bijua, 26Nagayi mo tie Mahati bijua, Mahati mo tie Matatiasi bijua, Matatiasi mo tie Semeyini bijua, Semeyini mo tie Joseki bijua, Joseki mo tie Joda bijua, 27Joda mo tie Johana bijua, Johana mo tie Lesa bijua, Lesa mo tie Sorobabeli bijua, Sorobabeli mo tie Salatieli bijua, Salatieli mo tie Neri bijua, 28Neri mo tie Meliki bijua, Meliki mo tie Adi bijua, Adi mo tie Kosama bijua, Kosama mo tie Elimadama bijua, Elimadama mo tie Eri bijua, 29Eri mo tie Jesu#3.29 Jufinba den maani ki yi bi bila “Jesu,” hali ke Jesu daa cua. Hebilu maama nni “Jesu” yeni tie “Josue,” li bundima tie U Tienu yua n tie o Candaano. bijua, Jesu mo tie Elieseri bijua, Elieseri mo tie Jolima bijua, Jolima mo tie Mata bijua, Mata mo tie Levi bijua, 30Levi mo tie Simeon bijua, Simeon mo tie Juda bijua, Juda mo tie Josefi bijua, Josefi mo tie Jonama bijua, Jonama mo tie Eliakim bijua, 31Eliakim mo tie Meleya bijua, Meleya mo tie Mena bijua, Mena mo tie Matata bijua, Matata mo tie Natan bijua, Natan mo tie o bado Davidi bijua, 32Davidi mo tie Isayi bijua, Isayi mo tie Obedi bijua, Obedi mo tie Boasi bijua, Boasi mo tie Sala bijua, Sala mo tie Nasoni bijua, 33Nasoni mo tie Aminadabi bijua, Aminadabi mo tie Adimini bijua, Adimini mo tie Alini bijua, Alini mo tie Esilomo bijua, Esilomo mo tie Peretisi bijua, Peretisi mo tie Juda bijua, 34Juda mo tie Jakob bijua, Jakob mo tie Isaaka bijua, Isaaka mo tie Abalahama bijua, Abalahama mo tie Tera bijua, Tera mo tie Nahori bijua, 35Nahori mo tie Serugi bijua, Serugi mo tie Reu bijua, Reu mo tie Faleki bijua, Faleki mo tie Ebeli bijua, Ebeli mo tie Sela bijua, 36Sila mo tie Kayinam bijua, Kayinam mo tie Afakisada bijua, Afakisada mo tie Sem bijua, Sem mo tie Nowe bijua, Nowe mo tie Lemeki bijua, 37Lemeki mo tie Matusalemi bijua, Matusalemi mo tie Enoki bijua, Enoki mo tie Jeleda bijua, Jeleda mo tie Maleleela bijua, Maleleela mo tie Kayinam bijua, 38Kayinam mo tie Enosi bijua, Enosi mo tie Seti bijua, Seti mo tie Adama bijua, Adama mo tie U Tienu bijua.

Currently Selected:

Luki 3: BGP

Highlight

Copy