Luki 2

Jesu Kilisiti madi

(Mat 1.18-25)

1Lanyogunu, Sesari Ogusiti#2.1 Sesari Ogusiti: Sesari Ogusiti den tie Jufinba yonbidanba Loma yaaba badiciamo. den ñani li ñoamabonli ki yadi i kaani kuli, ki yedi ke ban coadi Loma diema yaaba kuli. 2Laa coadikpiali den tieni Kilinusi n den tie Siiri diema guveneeri yaa yogunu. 3Yuakuli den caa ke ban coadi o o dandogu nni.

4Josefi moko den fii Nasareti dogu yuu n ye Galile diema nni, ki gedi Jude diema Davidi maadogu Betelemi nni, kelima o den tie Davidi puoliŋuanu leni o diegu nni yua. 5O den gedi ke ban ban coadi wani leni o toginaa Mariyama, yua n punbi.

6Ban den ye Betelemi, o maayogunu den pundi. 7O den mali o posabiga, bonjaga. O den bobini o ti canpanditiadi ki duani o ku yankpaku nni, kelima kaanu ki den ye bi po ku candiegu nni.

Bi yankpaaba leni malekinba

8Laa tinkunu nni bi yankpaaba den ye ku muagu nni ki kpa bi yandi ku ñiagu. 9O Diedo maleki den doagidi o yuli bi kani. O Diedo kpiagidi mo den yendi ki lindi ba, ke ti jawaandi cuo ba boncianla. 10Maleki den yedi ba: «Da jie mani, kelima n cuani yi po o laabaaliŋamo, yua n baa tua bi niba kuli po pamancianli. 11Dinla, Davidi dogu nni, bi mali yi po o Candaano, yua n tie Kilisiti, o Diedo. 12Line n baa yaa tie yaa maalima n baa teni yin bandi o. Yi baa le ki canpandiga ke bi bobini o ti canpanditiadi, ki duani o ku yankpaku nni.»

13Lanyogunu, malekinba boncianla den doagidi bi kani ki taani leni maleki yeni ki pagi U Tienu ki tua:

14«U Tienu n baa ti kpiagidi hali tanpolijoma,

Yaa niba n mangi o pali ki tinga nni

N yaa pia mi yanduanma.»

Bi yankpaaba gedi Betelemi

15Malekinba n den ñani bi kani ki guani tanpoli po, bi yankpaaba den yedi biyaba: «Tin gedi mani tonma hali Betelemi ki ban le yaala n tieni, o Diedo n waani ti yaala.» 16Bi den jaligi ki gedi ki lingi ki laa Mariyama leni Josefi, ki go laa ki canpandiga ke o dua ku yankpaku nni. 17Ban den laa likuli, bi den togidi maleki n den waani ba yaala ki canpandiga po. 18Bi yankpaaba n den togidi yaala, den paki yaaba n gbadi kuli. 19Mariyama den kubi laa togida kuli o pali nni, ki kpaagi li po. 20Bi yankpaaba den lebidi ki guani ki kpiagidi U Tienu, ki go pagi o ban gbadi ki go laa yaala kuli po, ke likuli den tie nani maleki n waani ba maama.

Bi kuani Jesu ku koanciagu

21Ki canpandiga yeni madi daniili n den pundi, bi den kuani o ku koanciagu, ki cili o yeli Jesu, maleki n den waani ba yaa yeli hali ke o naa daa punbi o. #Lev 12.3; Luk 1.31.

Jesu danba cuani o U Tienu diegu nni

22Mi wali-ŋanbima dana n den pundi, nani Musa bali maama n bili maama, bi den gedini ki canpandiga Jerusalemi, ki baa gagidi o o Diedo po, #Lev 12.6-8. 23nani lan diani maama o Diedo bali maama nni: «Bonjakpiaga kuli, bi baa gagidi o o Diedo po.» #Ñam 12.2,12. 24Bi go den cuani nani o Diedo bali maama n bili ban baa padi U Tienu po yaala, lani n tie kpaajefanmulie, yaa ka kpaajenawuundilie.

25Li yogunu o joa den ye Jerusalemi ke bi yi o Simeon. O den tie niteginka ki go fangi U Tienu, ki guu yua n baa baagi Isidayeli buolu. U Tienu Fuoma Yua den ye leni o. 26Li den sua ke U Tienu Fuoma Yua tuodi ki doagidi ki waani o ke o kan kpe kaa laa o Diedo n Gandi Yua. 27U Tienu Fuoma Yua den fiini o ke o cua U Tienu diegu nni. Ki canpandiga Jesu danba n den cuani o ki baa tieni o po U Tienu bali maama n bili yaala, 28Simeon den gaa o ki ŋmabi, ki pagi U Tienu ki yedi:

29«Moala n Diedo,

Ŋan pa mini a naacemo

N kuni leni mi yanduanma,

Kelima a kuani a ñoanianu.

30N nuni laa ŋan soani ti po yaa faabima,

31Ŋan bogini yaama

Ke ŋanduna nibuoli kuli baa le,

32Yaama n tie yenma ki baa yendi

I nibuoli kuli ki teni ban bandi a,

Ki go tie ti kpiagidi

A niba Isidayeli buolu po.» #Esa 42.6; 49.6; 52.10.

Simeon n pua yaa saawalo

33Li den paki Jesu baa leni o naa leni Simeon n maadi yaa maama o po. 34Simeon den gaali ba ki yedi o naa Mariyama: «Diidi ki le, U Tienu bili ke ki naa biga baa teni ke Isidayeli buolu siiga, niba boncianla n baa, niba boncianla mo n fii. O go baa yaa tie U Tienu sinankeene bi nitianba n baa yie yua, 35kelima o baa teni bi niba boncianla n jagi yaala bi pala nni n doagidi. Fini mo, yaa paboanli n tie nani ki jugisiega yeni, n baa muu a pali.»

O saawalipualo Anni maama

36O saawalipualo den ye ki yi Anni ki tie Fanueli bisalo Aseri buolu yua, ki den kpeligi boncianla. O den tieni binalele leni o calo hali o jafandi nni. 37O ji den tie kpepuoli ki pia piinii n binanaa. Waa den ña U Tienu diegu nni. O den tuuni U Tienu po, u yensiinu leni ku ñiagu kuli, mi ñoalolima leni mi jaandi nni. 38Lanyogunu liga, o den nagini bi kani ki pagi U Tienu ki maadi yaaba n gu Jerusalemi daafaabima kuli Jesu maama.

Josefi leni o niba lebidi ki guani Nasareti

39Josefi leni Mariyama n den tieni o Diedo bali maama n bili yaala kuli ki gbeni, bi den lebidi ki kuni bi dogu Nasareti po, Galile diema nni. #Mat 2.23.

40Ki biga den fandi ke o gbanmanu pugidi. O den pia mi yanfuoma boncianla, U Tienu ŋanbili mo den ye leni o.

Jesu makpiama U Tienu diegu nni

41Jesu danba den maani ki caa Jerusalemi binli kuli mi Pendima jaanma yogunu. #Ñam 12.1-27; Tia 16.1-8. 42Jesu n den pundi piiga n binalie, bi den gedi Jerusalemi laa jaanma po, nani ban maani ki tiendi maama. 43Mi jaanma dana n den pendi ke bi guani ki kuni, ki biga Jesu den sedi Jerusalemi. O danba ki den faami. 44Nani ban den tama ke o ye leni bi santagilieba yeni, bi den cuoni damunli ki lingi o bi kpiiba leni bi bankaaba kuli kani. 45Ban ki den laa o, bi den lebidi ki guani Jerusalemi ki baa n lingi o. 46Li dataali, bi den laa o U Tienu diegu nni, ke o kaa U Tienu bali maama bangikacianba siiga, ki cengi bi maama ki go buali ba i buali. 47Li den paki yaaba n gba o maama kuli kelima o yanfuoma leni o maguankaama po. 48O danba n den laa o, li den paki ba boncianla, ke o naa yedi o: «N biga, be n teni ke a tieni ti line? Diidi, a baa leni mini kuli den ye leni ti yanyagiciandi ki lingi a.» 49O den yedi ba: «Be n teni ke yi lingi nni? Yii bani ke li tie tiladi min yaa ye n Baa diegu nni?» 50Ama baa den gaa wan yedi ba yaala.

51O den yegi leni ba ki kuni Nasareti, ki tuo ki ŋua bi maama. O naa den kubi laa bonla kuli o pali nni. 52Jesu den fandi ki go kpedi ke o yanfuoma pugidi. U Tienu pali leni bi niba yaa pala kuli den mani o po. #1Sam 2.26; Kpa 3.4.

Currently Selected:

Luki 2: BGP

Highlight

Copy