Luki 1
1
Mi macilikaama
1.1-4
1N buado Teofili#1.1 Teofili yeli gireki maama nni bua ki yedi “U Tienu danli”, bi “Yenbuado”. Li fidi ke Luki diani Teofili po, bi o nua ke yua n cogi li tili ne kuli tie U Tienu buado yo., bi niba boncianla den moandi ki diani yaala n den tieni ti siiga togida. 2Bi den diani la ki ŋoadi hali mi cilima, yaaba n den laa laa bonla leni bi nuni, ki tua o Laabaaliŋamo wangikaaba, n togidi ti maama. 3N den tagidi ki bandi laa bonla kuli bonŋanla ki cili hali li cilima. Min bandi likuli yeni, nmoko sua ke li ŋani min diani a po ki ŋoadi ŋoadi li fuuli, 4ki teni ŋan bandi ke ŋan den baa yaa bangima tie moamoani cain.
Jan Batisi leni Jesu madi maama
1.5—2.52
5 Herodi n den kaa ti gbandi po Jude diema nni yaa yogunu, U Tienu kopadicianba siiga yendo den ye ke bi yi o Sakari. O den tie U Tienu kopadicianba caga siiga cagiyenli yua, Abia yaa cagili. O pua moko den tie Alono puoliŋuanu ki yi Elisabeti. #1Baj 24.10. 6Bani nibilie yeni kuli den tiegi U Tienu nintuali. Bi den ŋua o Diedo bali maama leni o mabilikaama kuli cain kaa pia tagili. 7Ama baa den pia biga, kelima Elisabeti den tie ŋoaliga. Bani nibilie kuli den kpeligi.
8Sakari kopadiciancagili tuonli yogunu n pundi, o den tuuni o tuonli U Tienu nintuali. 9Bi den toani tiatia nani U Tienu kopadicianba n maani ki tiendi maama, ki gandi o ke o baa kua o Diedo dieli nni ki juu a dugibila. 10Ban den juugi a dugibila yaa yogunu, U Tienu niba nitaanli kuli den ye niini ki jaandi. 11Lani, o Diedo maleki den sedi a dugibila padibinbinli jienu po, ki doagidi o yuli Sakari kani. 12Sakari n den laa o, o yama den yagi ke ti jawaandi cuo o. 13Ama Maleki den yedi o: «Sakari, ŋan da jie, U Tienu gaa a miabu, a pua Elisabeti baa maa a po bonjaga, ŋan yini o Jan. 14O baa yaa tie a po pamancianli. Yaaba n baa mangi bi pala kelima o madi po baa yaa yabi. 15O baa yaa tie niciamo o Diedo nintuali. O kan ño duven leni yaa daama n bia kuli. O baa yaa gbie leni U Tienu Fuoma Yua hali ki da ye o naa tugu nni. #Coa 6.3. 16O baa gobidi ki guani Isidayeli buolu niba boncianla o Diedo bi Tienu kani. 17O baa yaa cuoni U Tienu nintuali leni Eli yantiali leni o paalu, ki teni bibaanba n guani ki mangi leni bi bila, ki teni bi niyiekaaba n baa bi niteginkaaba yanfuoma. O baa bogini bi niba pala o Diedo po.» #Mal 3.23.
18Sakari den yedi maleki: «N baa bandi lede ke lani kuli tie moamoani, kelima n kpeligi, n pua mo podi?» #Dan 8.16; 9.21. 19Maleki den guani ki yedi o: «N yi Gabriyeli, yua n ye U Tienu kani ki tuuni o po. O soani nni ke min maadi leni a, ki go waani a laa laabaaliŋamo yo. 20Nani ŋan ki dugi n maama po, mani yaama n baa tieni mi yogunu yaa pundi yeni, a baa tua muulo ki kan go fidi ki maadi hali laa bonla n baa n tieni yaa daali.»
21Bi niba yaaba n den ye niini yeni den jii Sakari ke li paki ba leni wan waagi U Tienu diegu nni maama. 22Wan den ñani, waa fidi ki maadi leni ba. Lane bi den bandi ke o laa li bonlekaala U Tienu diegu nni. O den maadi leni ba leni o nii, ki ji tie muulo.
23Sakari tuonli U Tienu diegu nni dana n den gbeni, o den kuni o denpo. 24Yogunuba n den pendi, o pua Elisabeti den punbi. O den ye deeni yogunu kuli hali ŋmaalimuu, ki maadi leni o yuli ki tua: 25«O Diedo tieni n po line yo wan jagi ke o baa ñani n po i fe yaa yogunu bi niba siiga.»
Maleki tuodi ki waani Jesu madi maama
26Sakari pua tugu ŋmaluobilo nni U Tienu den soani yaa maleki n yi Gabriyeli Nasareti dogu, yuu n ye Galile diema nni. 27O den soani o li puowandiali kani. Yua n den tie yaa joa n yi Josefi yaa toginaa ki tie Davidi diegu nni yua. Li puowandiali yeni den yi Mariyama. #Mat 1.18. 28Maleki yeni den cua o kani ki yedi o: «N fuondi a, fini yua n baa li ŋanbili U Tienu kani. O Diedo ye leni a.» 29Mariyama yama den yagi boncianla laa maama po, ke o buali o yuli laa fuondi n bua ki yedi yaala. 30Maleki den yedi o: «Mariyama, ŋan da jie, kelima a baa li ŋanbili U Tienu kani. 31Diidi, a baa punbi ki maa bonjaga. Ŋan yini o Jesu. #Mat 1.21. 32O baa yaa tie niciamo, bi baa yini o tanpolijoma Tienu Bijua. Li Miali Diedo U Tienu n baa kaani o o yaaja Davidi gbandi po, #2Sam 7.12,13,16; Esa 9.7. 33wan yaa die Jakob buolu hali yaa yogu kuli. O diema mo kan baa juodima abada.»
34Mariyama den yedi maleki: «Min kaa bani joa yeni, lani mo ba gaa lede ki tieni?» 35Maleki den guani ki yedi o: «U Tienu Fuoma Yua baa cua a kani, tanpolijoma Tienu paalu baa yini a po. Lani yaa po, bi baa yini ŋan baa maa yaa bigagidiŋanga yeni U Tienu Bijua. 36Diidi, a kpiilo Elisabeti, omoko punbi bonjaga o puociandi nni. Ban den tua yua ke o tie ŋoaliga yeni, ji ye o ŋmaluobilo nne. 37U Tienu ki pia wan kan fidi yaala.» #Cil 18.14. 38Mariyama den yedi: «N tie o Diedo yonbo, lan tua n po nani ŋan yedi maama.» Maleki den ñani o kani.
Mariyama gedi ki ban fuondi Elisabeti
39Lanyogunu Mariyama den fii ki jaligi ki gedi yaa dogu n ye a juana po, Jude diema nni. 40O den kua Sakari deni ki fuondi Elisabeti. 41Elisabeti n den gbadi Mariyama fuondi yaa yogunu, o biga den jeli o tugu nni, U Tienu Fuoma Yua den gbieni Elisabeti 42ke o kpaani: «A baa li seli ki cie bi puoba kuli, a tugu nni biga mo baa li seli. 43Be n teni ke n baa ke fini n Diedo naa, cua n kani? 44Diidi, min gbadi a fuondi yaa yogunu liga, ki biga ban jeli n tugu nni leni li pamancianli. 45Li pamanli ye leni fini yua n daani ke o Diedo n soani ke bi yedi a yaa bonla baa tieni.»
Mariyama pagi o Diedo
46Mariyama den yedi:
«N naano kpiagi o Diedo, #1Sam 2.1-10.
47N pali mani hali boncianla,
Kelima wani U Tienu n Candaano po.
48O Diedo laa mini o yonbo po.
Dinla liiga nifiima n tuu nifiima kuli
Baa yedi ke li pamanli ye leni nni, #1Sam 1.11.
49Kelima wani U Paaciamu Daano
Tieni n po yaa bonla n yabi.
O yeli gagidi ki ŋani.
50Nifiima n tuu nifiima kuli,
O baa yaa gba yaaba n fangi o ninñima.
51O doagidi o nuu paalu,
Ki yadi ti japaadi danba.
52O jiini i paaciami danba bi bali kalikaani po,
Ki fiini taliginba. #Jb 5.11; 12.19.
53O guoni a konkonba li bonŋanla,
Ki cabi a piada leni i nikuomi.
54O todi o naacenba Isidayeli yaaba.
O tiadi o ninñingbadima yogunu kuli po,
55Nani wan den yedi ti yaajanba,
Abalahama leni o puoliŋuani maama.»#Cil 17.7.
56Mariyama den kali Elisabeti kani ke li bua ki pundi ŋmaalitaa, ki guani ki kuni o denpo.
Jan Batisi madi
57Elisabeti maayogunu den pundi ke o mali bonjaga. 58O yieninlieba leni o kpiiba den gbadi ke o Diedo gbadi o po mi ninñincianma, ki taani ki mangi bi pala leni o. 59Li daniili, bi den cua ki baa kuani ki canpandiga ku koanciagu.#1.59 Laa koanciagu den tie U Tienu n puni Jufinba yaa maalima ke mi doagidi ke bi kuani ki canpandiga yeni U Tienu n pia yaa ŋantaado leni Jufinba niinni. Diidi 2.21. Bi den bua ki yini o o baa yeli Sakari. #Lev 12.3. 60Ama o naa den yedi: «Yeni ka, o baa yaa yi Jan.» 61Bi den yedi o: «A kpiiba siiga ki pia yua n yi laa yeli.» 62Bi den maadi o baa mi muulima nni, ki bua ki bandi wan bua ki biga n yaa yi maama. 63Sakari den mia wan baa diani naani, ki diani lipo: «O yeli yi Jan.» Li den paki bikuli. 64Lanyogunu lanyogunu Sakari lanbu den tabidi, ke o fidi ki yaadi ki pagi U Tienu. 65Ti jawaandi den cuo bi yieninlieba kuli. Yaaba n den ye Jude diema nni kuli den maadi laa bonla kuli bi siiga. 66Yaaba n den gbadi likuli den kubi la bi pala nni ki tua: «Ki naa biga baa tua be?» Moamoani, o Diedo nuu den kubi o.
Sakari n pua yaa saawalo ki biga po
67Ki biga baa Sakari den gbie leni U Tienu Fuoma Yua ki pua saawali ki yedi:
68«O Diedo Isidayeli Tienu n baa ti pagidi,
Kelima o laa o niba po ki daa ki faabi ba.
69O fiini ti po o naacemo Davidi diegu nni
Yaa Candaano n pa.
70O tieni wan den teni ke o saawalipua-gagidiŋanba
Maadi yaala hali yogu.
71O den niani ke o baa gaa ti ti yibalinba nuu nni,
Leni yaaba n nani ti kuli yaa nuu nni.
72Yeni o gbadi ti yaajanba po mi ninñima,
Ki tiadi o: ŋantaado yua n gagidi ki ŋani po,
73Wan den poli ki kuani yua leni ti yaaja Abalahama,
74Ke o baa gaa ti ti yibalinba nuu nni
Ki teni tin yaa jaandi o kaa jie,
75Ki yaa cuoni o nintuali leni mi gagidiŋanma
Leni mi teginma hali ti miali dana kuli nni.
76Fini ki canpandiga, bi baa yaa yi ŋa
U Tienu yua n ye hali tanpolijoma yaa saawalipualo
Kelima a baa gaa o Diedo liiga,
Ki yaa ŋanbidi o sani, #Mal 3.1.
77Ki teni o niba n le o tindima,
Kelima o tieni bi po sugili bi tuonbiadi po.
78Ti Tienu yaa ninñingbadicianma po,
O teni ke o yenma ñani tanpoli
Ki yendi ti po nani u yienu n pudi maama yeni,
79Ki baa yendi yaaba n ye li biigili nni
Leni mi kuuma jinjingu nni po,
Ki gobidi ti ke tin kua ki yaa cuoni
Mi yanduanma sanu nni.» #Esa 9.1.
80Ki biga yeni den kpedi ki go fandi bonŋanla, ki ye li fuali nni hali yaa daali ke o den ti doagidi o yuli Isidayeli yaaba po.
Currently Selected:
Luki 1: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
