Mi cilima 7
7
Nowe kua ku ñinbiagu nni
1O Diedo den yedi Nowe: «Ŋan kua ku biagu nni, fini leni a diegu nni yaaba kuli, kelima n laa ke a tiegi mini U Tienu nintuali, mi naa nifiima kuli siiga. 2Ŋan taa ki kubi a kani yaa yandi n ŋani kuli siiga yantonga leni yansiaga, bondilie lie yeni, hali taalimilele yanbuolu kuli po. Yaa yandi n ki ŋani siiga, a baa taa bondilie lie yantonga leni yansiaga yanbuolu kuli po.
3A go baa taa tanpoli bonyugiditi, bontonga leni bonsiaga bondilie lie yeni, hali taalimilele, ke bi yaa buolu mo n yaa ye ki da bodi ki tinga nni.
4Li sieni danalele ke n baa teni ki tabolinkaaga n mi dana piinaa leni ñiadi piinaa. Lani, n baa bolini min den tagi yaala ke li fo ki tinga nni kuli.» 5Nowe den tieni o Diedo n den puogi o yaala kuli.
Ki tabolinkaaga
6Ki tabolinkaaga n mini yaa binli ki tinga nni, Nowe den pia bina kobiluoba. 7Nowe den kua ku ñinbiagu nni leni o bijaba, o pua leni o biyuamu ki faabi leni ki tabolinkaaga ñincianma.#Mat 24.38-39; Luk 17.27. 8Yaa yandi n ŋani leni yaa yandi n ki ŋani, ti bonyugiditi leni yaa bonfuoda n balini ki tinga nni kuli siiga, bontonga leni bonsiaga 9den kua ku ñinbiagu nni Nowe kani, buolu kuli bondilie lie, bontonga leni bonsiaga nani U Tienu n den puogi Nowe maama yeni. 10Danalele n den pendi, ki tabolinkaaga den mini ki tinga nni.
11Li den tie Nowe binkobiluobidili, cilie piiga n daleleeli. Laa daali lige ke u kulu ñinbuna den pudi boncianla, tanpoli bona kuli mo den luodi.#2Pie 3.6. 12Ki taaga den mini ki tinga nni dana piinaa leni ñiadi piinaa, ki naa yandi. 13Landaali Nowe den kua ku ñinbiagu nni, wani leni o bijaba Sem, Kam leni Jafeti. O pua leni o biyuamu moko den yegi leni ba ki kua. 14Bani leni ti moayandi kuli den kua nani bi buoli n tie maama leni ti denyandi kuli, nani bi buoli n tie maama, yaa bonbalinkaala n balini ki tinga nni kuli nani bi buoli n tie maama, ti bonyugiditi kuli nani bi buoli n tie maama, ba i nuani leni yaala n pia i fiabi kuli nani li buoli n tie maama, bikuli den cua. 15Bikuli den kua ku ñinbiagu nni Nowe kani bondilie lie, yaala n tie gbanandi ki pia li miali fuoma kuli. 16Yaala n fuo ki pia gbanandi kuli bontonga leni bonsiaga kuli den kua ku ñinbiagu nni, nani U Tienu n den puogi Nowe maama. Lanwani, o Diedo den luoni o po bu buliñoabu.
17Ki tabolinkaaga yeni den mini hali dana piinaa. Mi ñima den pugidi ki yugidi ku ñinbiagu ke ku den yugidi ki fii ki tinga tanpoli. 18Mi ñima den pugidi ki yabidi boncianla ki tinga nni, hali ke ku ñinbiagu den fii ki puugi u ñingbanu po. 19Mi ñima go den pugidi ki go pugidi hali ke a joaciama ya n ye ki tinga nni kuli yula den bodi. 20Mi ñima go den pugidi hali ke mi den pendi a juana yula, ki go kpedi piiga n nukpanduna muu. 21Yaala n den fo ki tinga nni kuli, ti bonyugiditi, ti denyandi leni ti moayandi, yaala n balini ki tinga nni kuli leni bi niba kuli den kpe. 22Yaala n den fo kuli, ki pia li miali fuoma li niinni ki ye yaa tinga n kuodi niinni kuli den kpe. 23U Tienu den bolini yaala n ye ki tinga nni ki fo, ki cili bi niba ki yaa caa hali ti yandi, li bonbalinkaala leni tanpoli bonyugiditi, bikuli den bodi ki tinga nni cain. Nowe leni yaaba n den ye leni o ku ñinbiagu nni yaa ka, laa den sieni niloba kuli goga.
Nowe ñani ku ñinbiagu nni
24Mi ñima den baa ki yabi ki tinga po, hali dana kobiga n piimuu.
Currently Selected:
Mi cilima 7: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.