Mi cilima 6
6
U Tienu jagi ke o baa bolini o tagima
1Bi niba n den cili ki pugidi boncianla ki tinga nni kuli yaa yogunu ki maa a bonpola,#Jb 1.6; 2.1. 2U Tienu bijaba den laa ke bi niba bisiaba ŋani hali bonŋanla, lane bi den taa bi siiga ban bua yaaba ke bi tua bi puoba. 3Lanwani, o Diedo den yedi: «N Fuoma kan yaa ye o nilo niinni yaa yogunu kuli, kelima o nisaalo tie ti gbanandi bebe, o bina ji baa yaa tie kobiga n piilie.» 4U Tienu bijaba n den kua bi niba bisiaba kani ke bi mali bi po a bila, lanyogunu ti niciandi den ye ki tinga nni. Bani n tie kpiama yaaba, yaaba n den bili jama hali puoli po yogunu.#Coa 13.33.
5O Diedo den laa ke bi niba biadima den yabi ki tinga po, ke bi pala yantiana den koa mi biadima nni daali kuli.#Mat 24.37; Luk 17.26; 1Pie 3.20. 6O Diedo pali den biidi leni wan den tagi o nisaalo ki tinga nni, ke o mua ke o yàá bi tagi o. 7O Diedo den yedi: «N baa bolini min den tagi yaa nilo ki ñani o ki tinga nni cain, ki cili o nilo ki yaa caa hali ti denyandi, li bonbalinkaala leni tanpoli bonyugiditi, kelima n lebidi n yama. N mua ke n yàá den tagi ba.» 8Ama Nowe wani den baa U Tienu ŋanbili.
U Tienu jagi ke o baa faabi Nowe
9Diidi Nowe yaabila maama nne: Nowe den tie niteginka leni papiendaano laa yogunu niba kuli siiga. Nowe den cuoni leni U Tienu.#2Pie 2.5.
10Nowe den mali bonjalataa: Sem, Kam leni Jafeti.
11U Tienu nintuali, ki tinga kuli den joagini ki biidi cain. Ki tinga den gbie leni mi biadima. 12U Tienu den nuali ki tinga ki sua ke ki joagini ki biidi, kelima mialifo kuli den tiendi yaala n joagini ŋanduna nni. 13Lani yaa po, U Tienu den yedi Nowe: «N bili ke gbanandi kuli yaa juodima pundi, kelima bi gbieni ki tinga leni mi biadima. Diidi, n baa bolini bani leni ki tinga kuli. 14Ŋan taa yaa tibu n yi goferi daadi ki tagi ku ñinbiagu. A baa boagidi ku diebila bila, ki boali ku tugu nni leni ku puoli kuli yaa sinboanma n ye ki tinga nni. 15Diidi ŋan baa tieni ku maama: ku ñinbiagu yeni foaginu baa yaa tie nukpanduna kobitaa, ku pianu baa yaa tie nukpanduna piimuu, ku kpedima mo baa yaa tie nukpanduna piitaa. 16A baa tieni ku ñinbiagu yeni kali nni li bonli, li foaginu baa yaa tie nukpandunyenli. A baa tieni ku ñinbiagu yeni kunkunu bu buliñoabu, ku tugu nni baa yaa pia a dietuatuada bonataa. 17Lanwani, nmo baa yini ki tabolinkaaga n cua ki bolini ki tinga, ki bolini mialifo kuli. Yaala n ye ki tinga nni kuli baa kpe. 18Ama n baa kuani o ŋantaado leni fini. A baa kua ku biagu nni, fini leni a bijaba, a pua leni a bijaba puoba. 19Bonfuodila buolu kuli siiga, ŋan taa bontonga leni bonsiaga, ki kuani ba ku ñinbiagu nni a kani, ban da kpe. 20Yanbuolu kuli bilie lie, i nuani, ti denyandi, li bonbalinkaala, likuli baa cua a kani ki baa ki yaa ye. 21Ŋan taa jebuolu kuli ki bili a kani lan yaa yabi, ke lan tua mi jiema fini leni bani kuli po.» 22Nowe den tieni yeni. O den tieni U Tienu n den puogi o yaala kuli.#Heb 11.7.
Currently Selected:
Mi cilima 6: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.