Mi cilima 50

Jakob kuŋanbili

1Josefi den bibi o baa ki labini o benli po ki buudi o po. 2O den puogi o lotolinba ke ban ŋanbi o baa o tinkpilo ke wan da bedi. Lotolinba den ŋanbi Jakob yeni. 3Bi den tieni dana piinaa ki ŋanbidi o tinkpilo ke wan da bedi. Ejipiti yaaba den buudi o po hali dana piilele.

4Mi kuuma pabiidili dana n den pendi, Josefi den maadi leni Faraon diegu nni yaaba ki yedi ba: «N mia yi, li yaa tie ke yi pala mani n po, yin waani Faraon min baa yedi yi yaala. 5N baa den teni ke n poli, o den yedi nni: ‹Diidi, n baa kpe moala, ŋan piini nni min den gbini yaa kaanu Kanana diema nni, ke li tua a takula kaanu.› Lanwani, n bua ki gedi lankani ki piini n baa, ki guani.»#Cil 47.29-31. 6Faraon den guani ki yedi o: «Gedi ki ban piini a baa nani wan den teni ke a poli maama.»

7Yeni, Josefi den fii ki gedi ki ban piini o baa. Faraon koanbala kuli den ciani o, yaaba n den waagi Faraon diegu nni leni Ejipiti diema nikpela kuli. 8Josefi diegu nni yaaba, o kpeliba, o waalo leni o baadiegu nni yaaba kuli den gedi. Baa den ŋaa oba Gosen dogi nni, se a bila, i pe leni i ne. 9Bi teliti leni bi taami den gedi. Bi den yabi hali boncianla. 10Ban den pundi Atada fanpienma nni, yaama n ye Jurden boanjaali kani, bi den buudi, ki mua i kumoepaali boncianla. Josefi den biidi o pali kelima o baa kuuma po hali danalele bianu. 11Mi diema yaaba, Kanana yaaba yeni den tieni siedi li pabiidili po, Atada jalu kani ki yedi: «Li pabiidicianli ye Ejipiti yaaba siiga.» Lani yaa po, bi den yini laa jalu Abeli-Mitisirayim jalu, yuu n ye Jurden boanjaali po. 12Li tie yene ke Jakob bijaba den tieni bi baa n den ñani bi po yaa ñoamabonli. 13Bi den gedini o Kanana diema nni ki piini o Makipela kuanu tanlongu nni. Abalahama n den daa yuu Hititi yua Efiron kani, ke u tua o takula kaanu, yaa tanlongu n tiegi Manmire dogu.#JTT 7.16. 14Josefi n den piini o baa ki gbeni, o den guani Ejipiti nni, wani, o kpeliba, o waalo leni yaaba n den ciani o ke o ban piini o baa kuli.

Josefi juodima

15Josefi kpeliba n den laa ke bi baa kpe, bi den yedi bi yula: «Josefi yaa cili ki nani ti, ki guani ti tin den tieni o yaa biadima te?» 16Bi den soani u tondu ke bi yedi Josefi: «A baa den ñani yaa ñoamabonli n tie ne hali ke o daa kpe: 17‹Tieni a kpeliba po sugili bi biadima leni bi tuonbiadi po leni ban den tieni a yaala kuli yaa po. Moala ŋan tieni sugili a baa Tienu naacenba po.› » Josefi n den gbadi laa maama, o den buudi. 18O kpeliba den cua bani bi ba ki labini o nintuali ki yedi o: «Ti tie a yonbi.» 19Josefi den yedi ba: «Yin da jie mani, kelima n naa tie U Tienu. 20Yi den jagi ke yi baa tieni nni mi biadima. Ama U Tienu den lebidi ke li tua bonŋanla ki faabi niba boncianla miana, nani yin nua dinla ke li tie maama yeni. 21Lanwani, yin da jie liba, n baa kubi yi, yinba leni yi bila.» O den baagi ba yeni, ki pendi o pali, ki maadi ba leni mi buama.

22Josefi leni o baadiegu nni yaaba kuli den ye Ejipiti diema nni. Josefi miali dana den pundi kobiga n bina piiga. 23Josefi den laa Efrayimi bila, hali yaabitaa. Manase bijua Makiri bila go den mali Josefi duna po. 24Josefi den yedi o kpeliba leni o waalo: «N baa kpe moala, ama U Tienu baa ti cua yi kani ki teni yin ña mi naa diema nni, ki guani wan den poli ki niani ke o baa pa Abalahama, Isaaka leni Jakob yaa diema nni.» 25Josefi den teni ke Isidayeli bila poli ki yedi: «U Tienu baa cua yi kani ke laa pia tama. Lani, yin teni ban ñani n kpaba, ŋan foagidi leni nekanba.»#Ñam 13.19; Jos 24.32; Heb 11.22.

26Josefi den kpe ki pia kobiga n bina piiga. Bi den ŋanbi o tinkpilo ke wan da bedi, ki duani o ku tinkpikpaku nni, Ejipiti diema nni.

Currently Selected:

Mi cilima 50: BGP

Highlight

Copy