Mi Ñama 1
1
U Tienu n faabi Isidayeli maama
1—18
Isidayeli yaaba ye ti yonbidi Ejipiti diema nni
1Bine n tie Jakob, ban yi yua Isidayeli bijaba, yaaba n den yegi leni o ki kua Ejipiti diema nni, bani leni bi diedi nni yaaba kuli: 2Rubeni, Simeon, Levi, Juda, 3Isakari, Sabuloni, Benjamen, 4Dan, Nefitali, Gadi leni Aseri.#Cil 46.8-27. 5Jakob tugu nni bila leni o yaabila den taani ki tie niba piilele. Lanyogunu, li den sua ke Josefi peli ki ye Ejipiti nni. 6Li yaa puoli, Josefi den kpe wani leni o kpeliba leni laa nifiima kuli. 7Isidayeli yaaba den maa ki pugidi boncianla. Bi den yabidi ke bi paalu mo pugini boncianla. Bi den gbie mi diema nni.#JTT 7.17.
8Baditoa den fii ki dini li bali Ejipiti diema nni, yua n ki den bandi Josefi.#JTT 7.18. 9O den yedi o niba: «Diidi Isidayeli yaaba, bi tua yaa nibuolu n yabi, ki go pia u paalu ki cie ti. 10Tin taa bi po yaa jagili n baa teni ke bi kan go yabidi, yeni yàá ka, toabu yaa ti fii, bi baa taani leni ti yibalinba ki koani leni ti, ki yuandi ki ña mi diema nni.»#JTT 7.19.
11Bi den teni ba bi tuonsoanjiidiba ke ban faligi ba leni yaa tuona n pa hali boncianla. Li den tieni yene, ke bi den maa Pitom leni Ramisesi dogi ke yi tie Faraon ŋalimandogi. 12Ama ba ke bi den faligidi Isidayeli yaaba boncianla, bi den baa ki maa boncianla ki pugidi hali ke Ejipiti yaaba den cili ki nani ba. 13Lani yaa po, Ejipiti yaaba den mabini Isidayeli yaaba leni a tuona. 14Bi den paagi bi yema leni yaa tuona n pia fala: ti tandi, i tankonkuomi leni i kuani yaa tuona. Bi den teni ke bi tuuni laa tuonfala kuli, kaa gba bi po ninñima.
Faraon faligi Isidayeli yaaba
15Ejipiti bado go den maadi leni Hebilu yaaba madimaanba, yaaba n den yi Sifra leni Puwa. 16O den yedi ba: «Yi yaa baa maani Hebilu puoba yaa yogunu, yi yaa laa ke li tie bonjaga, yin kpa ka. Li yaa tie bonpuoga mo, yin cedi kan yaa ye.» 17Ama bi madimaanba den fangi U Tienu, ki naa tieni Ejipiti bado n den waani ba yaala. Bi den cedi a bonjala kaa kpaani ba. 18Ejipiti bado den yini bi madimaanba ki yedi ba: «Be yaa po ke yi tieni yeni, ki cedi ke a bonjala kuli fo?» 19Bi madimaanba den guani ki yedi Faraon: «Hebilu puoba naa taa leni Ejipiti yaa puoba. Bi pia u fidu boncianla, ki yen maa hali ke o madimaanlo daa pundi bi kani.» 20U Tienu den tieni li ŋanbili bi madimaanba po. Isidayeli yaaba mo den pugidi ki tua yaa niba n yabi ki pia u paalu hali boncianla. 21Nani bi madimaanba n den fangi U Tienu yeni, U Tienu mo den puni ba ti madi. 22Lanwani, Faraon den ñani li naa ñoamabonli o niba kuli po, ki yedi: «Isidayeli yaaba n mali yaa bonjaga kuli, yin taa ka ki lu u kpenciamu nni. Ama yin cedi bi bonpola kuli n yaa ye.»#JTT 7.19.
Currently Selected:
Mi Ñama 1: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
