Mi cilima 49
49
Jakob gaali o piiga n bijaliediba
1Jakob den yini o bijaba ki yedi ba:
«Taani mani ke n baa waani yi yaala n faadi ki ye yikuli yendo yendo po.
2Taani mani ki cengi, yinba Jakob bijaba,
Yi baa Isidayeli maama.
3Fini Rubeni, n bijakpelo.
A tie n fidu leni n paalu bonluonkakpiala.
A tugi li yuli ti jigidi po,
A go tugi li yuli u paalu moko yaa po.
4A pia mi jama nani mi ñima yeni.
Ama a kan go yaa tie liiga yua,
Kelima a den doni a baa duanu po.
Ŋan den doni yeni, a den joagini n duanu.
5Simeon leni Levi tie kpelo leni waalo.
Bi jugisiemu tie mi biadima yaa tuonsoantiadi.
6N naano n da kua bi juogu nni.
N yantiali n da taani bi taanli nni,
Kelima bi pabienli nni, bi den kpa bi jaba.
Bi paadinyema nni, bi den jia a naatona gadibanjiini.
7Bi pabienli n tua ti solindi yaa bonla,
Kelima li poagili bi niba.
Bi pafiima moko n tua ti solindi, kelima mi pia i nunkuomi.
N baa paadi ba Jakob yaaba siiga,
N baa yadi ba Isidayeli yaaba siiga.
8Juda, a baa baa ti pagidi a waamu leni a kpeliba kani.
A nuu baa mubini a yibalinba bunkpana.
A waamu leni a kpeliba baa gbaani ki pugi a.
9Juda, a tie nani li yangbanbili yeni.
N bijua, a cuoni ki ña ŋan ku yaa yandi kani.
O poali o duna ki labini nani o yangbanlo yeni
O tie nani o yangbanñua, ŋme n baa fidi ki fiini o?#Coa 24.9; Doa 5.5.
10Li bali gbiamu kan foagidi Juda kani,
O badiciamo gbiamu kan fuadi o taana nni.
Hali yua n die o n baa cua,
Bi niba kuli n baa tuo yua.
11O baa loli o ŋunbo i duventiidi nni,
Ki loli o ŋunbiga yaa benu n ŋani ki cie i beni kuli kani.
O ŋuudi o kpalibu duven nni, o liadili mo, duven tiidi bonluonkaala ñima nni.
12O nuni baa moani kelima duven po,
O ñina mo n pendi kelima mi naaŋanma po.
13Sabuloni baa yaa ye mi ñincianma jaali kani,
O baa yaa ye ti ñinbiadi kuli boanjaali kani.
O bianu baa tandi ki pundi Sidon kunu.
14Isakari tie yaa ŋunbo n pa,
Ki duandi a yandiena nni.
15O nua ke wan duani yaa kaanu mani o po.
O nua ke mi diema ŋani boncianla.
O tuo ki gaa li tugili.
O tuo ki baa soani li yonbituonli.
16Dan baa jia ti buudi leni o niba
Kelima o tie Isidayeli yaaba yaa buoli siiga buoyendu.
17Dan baa yaa tie wa yo u sanu nni.
O baa yaa tie waalabili yo u sankunu,
Yua n baa ñidi o taamo taajentinda,
Yua jagi o n lu ki yandi ki baa yanyanli.
18N dugi a faabima po o Diedo.
19Gadi baa sua ke bi sanjiaba gaani ki cebini o.
Ama o baa pua ba, ki deli ba.
20Aseri mo yaa kpaandi n ŋani boncianla,
O baa kuadi bi badiba po yaa jiema n ŋani.
21Nefitali tie yaa piañoago n die o yuli ku muagu nni.
O maa yaa bila n ŋani bonŋanla.
22Josefi tie yaa tibu n luoni bonŋanla benu.
Yaa tibu n luoni bonŋanla, ki se li ñinbunli kani yeni benu yo.
O beni kpedi ki yiini u bilinu po.
23Bi den cidi o ki toani o i piemi.
A dabantuada den fii o po leni ki nanga.
24Ama o dabanli den se ki pa bonŋanla.
O nii den paagi kelima Jakob n ŋua yua
Tie U Paalu Kuli Daano.
Li tie yene ke o tua Isidayeli yaaba yankpaalo leni bi tanciangu.
25Li tie a baa Tienu yua n todi a tuonli.
Li tie U Paaciamu Daano tuonli, wani yua n baa seligi a,
Leni yaa seli n ñani tanpoli po ki jiidi
Leni yaa seli n tie tiipo ñima
Leni yaa seli n tie ti madi, bi puoba leni ti yandi kuli po.
26A baa yaa seli n yabi ki cie n baanba yaa seli kuli,
Hali ki ban pundi yaa juana n kan bodi yaa tanpolijoma.
Laa seli n jiidi Josefi yuli po,
Wani yua n tugi li yuli o kpeliba leni o waamu siiga.
27Benjamen tie o fuasangbanlo yua n ŋmani.
Ku tiŋaagu, o ŋmani wan cuo yaala,
Ku yenjuagu o boagidi wan baa yaala.»
28Bani n tie yaaba n den tua Isidayeli yaaba piiga n buoliedi. Lani n tie bi baa n den yedi yaala, wan den gaali ba yaa yogunu. O den gaali ba, yuakuli leni o gaali n den tie maama.
Jakob kuuma
29Li yaa puoli, o den ñani bi po yaa ñoamabonli n tie ne: «N yaa kpe yaa yogunu, yin taani nni leni n yaajanba. Yin piini nni yaa tanlongu n ye Hititi yua Efiron kuanu nni. 30Li tie yaa tanlongu n ye Makipela kuanu nni, ki tiegi Manmire, Kanana diema nni. U tie Abalahama n den daa yaa kaanu Hititi yua Efiron kani, ke li tua o takula kaanu.#Cil 23.3-20. 31Bi den piini Abalahama leni o pua Sala lankani. Bi go den piini Isaaka leni o pua Rebeka lankani. N go piini Lea moko lankane.#Cil 25.9-10; 35.29. 32Bi den daa laa kuanu leni yaa tanlongu n ye likani Hititi bijaba kani.» 33Jakob n den teni laa ñoamabonli kuli o bijaba ki gbeni, o den guani ki duani o duanu po, ki kpe, ki kuni o danba kani.#JTT 7.15.
Currently Selected:
Mi cilima 49: BGP
Highlight
Share
Copy
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.
