Mi cilima 48

Jakob gaali Josefi bijaba

1Laa bonla n den pendi, bi den cua ki yedi Josefi: «A baa yia.» Josefi den taa o bijaliediba Manase leni Efrayimi, ki gedi o kani. 2Bi den waani Jakob ki yedi o: «Diidi a bijua Josefi cua a kani.» Jakob den moandi leni o fidu kuli ki fii ki kali o duanu po. 3Jakob den yedi Josefi: «U Tienu yua n pia u paalu kuli den doagidi n kani Lusi dogu nni, Kanana diema nni, ki seligi nni. 4O den yedi nni: ‹N baa teni ŋan yaa maa a bila ki pugidi. N baa teni ŋan tua i nibuoli boncianla. N baa pa mi naa diema a puoliŋuani, ban yaa die ma yaa yogunu kuli.›#Cil 28.13-14. 5Moala a bijaliediba, ŋan den mali yaaba Ejipiti diema nni ke n daa cua a kani Ejipiti nni, bi baa tua n yaa yaaba. Efrayimi leni Manase baa yaa tie n po n yaaba nani Rubeni leni Simeon n tie maama. 6Ama ŋan den mali yaa bila bi yaa puoli, baa tie a yaa yaaba. Bi baa gaa bi kpeliba yaa yela kelima li faali po. 7Min den ñani Paran dogu nni ki guani, Raseli den kpe n kani u sanu nni Kanana diema nni, ke ti daa pundi Efrati. N den piini o lankani, Efrati yuu n go yi Betelemi sanu nni.»#Cil 35.16-19. 8Jakob den diidi Josefi bijaba ki yedi: «Ŋmenba nne?» 9Josefi den guani ki yedi o baa: «Bi tie n bijaba, U Tienu n den puni nni yaaba nekanba.» Jakob den yedi: «N mia ŋa, teni ban nagini n kani ke min gaali ba.»

10Jakob nuni den tadigi, kelima wan den podi maama po, ke o naa go nua. Josefi den teni ke bi nagini o kani, ke Jakob den bibi ba, ki gobini ba. 11Jakob den yedi Josefi: «Mii den tama ke n go baa le a nunga. Ama, U Tienu teni ke n laa ba a bila moko.» 12Josefi den teni ke o bijaba fuadi o baa duna kani, ke wani o ba den labini tiipo o nintuali. 13Lanwani, Josefi den taa bani bonbilie kuli, Efrayimi den ye o jienu po, ke li tie Isidayeli ganu po. Manase den ye o ganu po, ke li tie Isidayeli yaa jienu po, ke Josefi den teni ke bi nagini Jakob kani. 14Jakob den tandi o nujienu ki maani Efrayimi yuli po, wani yua n den tie o bonwaalo, ki den maani o nuganu Manase yaa yuli po mo. O den poandi poandi o nii yeni kelima Manase n den tie o nikpelo. 15O den gaali Josefi ki yedi:

«U Tienu, n baanba Abalahama leni Isaaka n cuoni yua yaa nintuali,

U Tienu yua n gobidi nni, ki cili min mali yaa yogunu ki pundi hali moala,

16Yaa maleki n den daa ki faabi nni n fala kuli nni,

Wani n seligi a naa bila.

Ban yini ba n yaa yeli

Leni n baanba, Abalahama leni Isaaka yaa yela.

Ban yaa pugidi hali boncianla mi diema nni.»

17Josefi n den laa ke o baa maani o nujienu Efrayimi po, laa den mangi o. O den cuo o baa nuu ki fuadi u Efrayimi yuli po, ki maani Manase yaa yuli po. 18Josefi den yedi o baa: «N baa, yeni ka ba. O ne n tie o nikpelo, maani a nujienu o yaa yuli po.» 19O baa den yie ki yedi: «N bani, n bijua, n bani ke wani moko baa tua nibuolu ki tua niciamo. Ama o waalo baa tua niciamo ki cie o. O yaa bila baa tua i nibuoli boncianla.» 20O den gaali ba landaali ki yedi:

«Li tie fini yaa po ke Isidayeli yaaba baa yaa gaaliti ki tua:

U Tienu n teni ŋan tua nani Efrayimi leni Manase.»

O den teni ke Efrayimi gaa Manase liiga.#Heb 11.21. 21Jakob den yedi Josefi: «Diidi, n baa kpe. Ama U Tienu baa yaa ye leni yi, ki teni yin guani yi baanba diema nni. 22N puni fine yaa biinu n cie min puni a kpeliba yaa biini. Li tie n jugisiega leni n dabanli n den teni ke n gaa yaala Amoriti yaaba kani.»

Currently Selected:

Mi cilima 48: BGP

Highlight

Copy