Mi cilima 45

Josefi teni ke bi bandi wan tie yua

1Josefi naa go den fidi ki kubi o yuli yaaba n den lindi o kuli nintuali. O den kpaani ki yedi: «Teni mani bi niba kuli n ña.» Oba kuli n ki go den ye leni Josefi yaa yogunu, o den teni ke o kpeliba leni o waalo bandi wan tie yua.#JTT 7.13. 2O den kpaani ki buudi. Ejipiti yaaba den gbadi, ba Faraon diegu yaaba den gbadi ke o buudi. 3Josefi den yedi o kpeliba: «N tie Josefi yo. Naani n baa baa ki ye?» Ama o kpeliba naa den fidi ki guani o liba, kelima ban den jie ki duodi maama o nintuali. 4Josefi go den yedi o kpeliba: «Nagini mani n kani.» Bi den nagini, ke o yedi ba: «N tie Josefi yi waalo yin den kuadi yua ke bi cuani o Ejipiti diema nni. 5Moala yin da go yagi yi yama, ki da biidi yi pala yi yula po ke yi den kuadi nni ke bi cuani nni nekanba, kelima U Tienu n den soani nni yi liiga, ke min faabi yi miana. 6Yi laa ke mi koma ye mi diema nni binalie moala, li go sieni binamuu ke oba kan ko ki pedi. 7U Tienu den soani nni yi liiga ki baa teni ke yin yaa ye ki fo mi diema nni, ke yin yaa ye kelima wani n bua ki puni laa faabima. 8Lanwani, li naa tie ke yinba kaa den soani nni nekanba, ama li tie U Tiene. O teni ke n tua nani Faraon, ki tie o diegu kuli yudaano, ki go tie Ejipiti diema kuli guveneeri. 9Guani ki kuni mani tontoni n baa kani ki yedi o: ‹A bijua Josefi yedi yaa maama n tie ne. U Tienu teni ke n tua Ejipiti diema kuli yudaano, jaligi ki cua n kani ne. 10A baa yaa ye Gosen dogu nni, ki yaa kuu leni nni, fini, a bijaba, a yaabila, a yandi leni ŋan pia yaala kuli. 11N baa yaa dindi a likani, kelima li sieni binamuu ke mi koma da baa yaa ye. Yeni, a kan luo liba, fini, a niba leni ŋan pia yaala kuli.›#JTT 7.14.

12Yi laa leni yi nuni, n waalo Benjamen mo laa leni o nuni ke li tie mini n ba n li maadi leni yi. 13Yin waani n baa min baa yaa kpiagidi kuli Ejipiti diema nni leni yin laa yaala kuli. Yin teni n baa n cua ne tontoni.»

Faraon yini Jakob Ejipiti diema nni

14O den sani ki bibi o waalo Benjamen ki buudi ke Benjamen mo den buudi. 15O den bibi o kpeliba kuli ki buudi. Lan den pendi, o kpeliba den boni leni o. 16Laa laabaalo den yadi Faraon diegu nni kuli, ke Josefi kpeliba cua. Laa bonla den mangi Faraon pali leni o naacenba kuli pala. 17Faraon den yedi Josefi: «Waani a kpeliba yaa maama n tie ne: ‹Tieni mani line. Tuni mani yi yandi ki guani Kanana diema nni. 18Taa yi baa leni yi denpo yaaba ki cua n kani. N baa pa yi Ejipiti diema nni yaala n ŋani ki cie yaala n sieni kuli, yi baa yaa di mi diema kpaandi yaadi n ŋani.› 19N teni a li ñoamabonli ke ŋan yedi ba: ‹Tieni mani line: Taa mani ti teliti Ejipiti diema nni, yi bila leni yi puoba po, ki taa yi baa ki cuani o nekanba. 20Yin da yagi yi yama yin ŋaa yaala lipo yaa po, kelima yaala n ŋani ki cie likuli Ejipiti diema nni baa yaa tie yi yaa po yo.› » 21Isidayeli bijaba den tieni yeni. Josefi den puni ba ti teliti nani Faraon n den yedi maama. O go den puni ba mi jiema u sanu po. 22O den puni yuakuli bi siiga ti tialebidikaadi. O den puni Benjamen ŋanjilifa kujapiena kobitaa leni tialebidikaadimuu. 23O den soani o baa po ŋunbi piiga ke bi tugi Ejipiti diema nni bonla yaala n ŋani ki cie, ki go soani ŋunñuana piiga ke bi tugi ŋalikama, dupen leni mi jiema, o baa n baa yaa di yaala u sanu po. 24Lanwani, o den cabi o kpeliba ke ban fii ki yedi ba: «Yin da koani mani leni yiyaba u sanu nni.»

25Bi den fii ki ñani Ejipiti ki pundi Kanana diema nni, bi baa Jakob kani. 26Bi den yedi o: «Josefi baa ki ye, wani n die Ejipiti diema kuli.» Ba leni lani kuli laa den yedi o liba, kelima waa den daani bi maama. 27Bi den waani o Josefi n den maadi ba yaa maama kuli. O den laa Josefi n den soani yaa teliti ki baa gedini o. Lane ke bi baa Jakob yama go den duani ke o den yedi: 28«Maama ki ye! Josefi n bijua baa ki ye. N baa gedi ki ban le o ki daa kpe.»

Currently Selected:

Mi cilima 45: BGP

Highlight

Copy