Mi cilima 31

1Jakob den gbadi Laban bijaba maama, ke bi tua ke Jakob taa bi baa n den pia yaala kuli, ke li tie bi baa piama po n teni ke o tua piado. 2Jakob go den laa Laban nunga, ki sua ke waa go den nua o nani kpiama yeni. 3Lanwani, o Diedo den yedi Jakob: «Guani a baa diema nni, ŋan den mali naankani, ke n baa yaa ye leni a.»

4Jakob den yini Raseli leni Lea, yaaba n den ye ku muagu nni a yangola kani. 5O den yedi ba: «N laa yi baa nunga, ke waa go nua nni nani kpiama yeni. Ama n baa Tienu ye leni nni. 6Yinba yi baa, yi bani ke n den soani yi baa po leni n fidu kuli. 7Yi baa den janbi nni ki lebidi n panpaani taalima piiga, ama U Tienu naa den tuo ke o tieni nni yaala n bia. 8O yaa den yedi yaa yogunu ke yaaba n ñoalini n baa yaa tie n panpaani, ti yandi kuli den mali yaadi n ñoalini. O yaa didi den yedi yaa yogunu ke yaadi n buadi buadi n baa yaa tie n panpaani, ti yandi kuli den mali yaa bila n buadi buadi. 9U Tienu den gaa yi baa kani o yangoli ki teni nni. 10Ti yandi n den do biyaba yaa yogunu, n den yaadi ki laa ti dangidi nni, ke yaa yantona n do a yanñuana, bine den buadi buadi, bine ñoalini, bine den tie lega lega. 11U Tienu maleki den yedi nni ti dangidi nni: ‹Jakob.› N den guani ki yedi o: ‹Mini nne.› 12O den yedi: ‹Yaadi ki diidi yaa yantona n do a yanñuana kuli, bine buadi buadi, bine ñoalini, bine tie lega lega kelima n den laa Laban n tieni a yaala kuli. 13N tie Beteli Tienu, ŋan den wuli mi kpama li bontiadikaala po, ki go niani nni naankani yeni. Moala, fii, ña mi diema nni, ki guani ŋan den mali yaa diema nni.› »#Cil 28.18-22. 14Raseli leni Lea den guani ki yedi o: «Naani ti go pia u kaanu ki baa je li faali ti baa diegu nni? 15Waa nua ti nani bi canba ka yo, kelima o kuadi ti ki dini ti ligi. 16U Tienu n den gaa yaa piama ti baa kani kuli, mi tie tinba leni ti bila yaa yaame moala. Moala, ŋan tieni U Tienu n waani a yaala kuli.»

17Jakob den fii ki teni ke o bila leni o puoba kuli jagini ti yuoyuodi. 18O go den taa o yangoli leni wan den pia yaa piama kuli, wan den baa yaala Padan-Arami dogu nni, ki guani Kanana o baa Isaaka diema nni. 19Laban n den ye u dogu po ki moagidi o pe kobidi, Raseli den suni o baa buli. 20Jakob den janbi Arami yua Laban yeni, ki naa waani o o fiima. 21O den taa wan den die yaala kuli ki sani ki gedi. O den fii ki duodi u kpenu, ki teli Galaadi juana po.

22Li dataali, bi den waani Laban ke Jakob fii ki sani. 23O den fii ki taa o waamu ki ŋua Jakob puoli po, hali danalele cenli ki nandi o Galaadi juana kani. 24Ama U Tienu den doagidi Arami yua Laban kani ti dangidi nni ku ñiagu, ki yedi o: «Fangi a yuli, ki da maadi Jakob po maamiba kuli.»

25Laban den nandi Jakob, ki sua ke Jakob sieni o gbandieli li juali kani. Laban mo den tii o yaa yaali wani leni o waamu Galaadi juana po. 26Lanwani, Laban den yedi Jakob: «A tieni nni be n yeni? Be yaa po yo ke a janbi nni ki taa n bisiaba ki gedini ba nani a cuo ba bu toabu nni yeni? 27Be yaa po yo ke a wuoni ki sani ki janbi nni, ki naa waani nni a fiima? N den baa cedi ŋan fii leni li pamancianli, i yani, a gangaana leni ti gogiditi puama. 28A naa den cedi ke n gobini n bijaba leni n bisiaba, ki cabi ba. A laa moala wani, a tieni nani o yanluodaano yeni. 29N nuu pia u paalu, ke n baa fidi ki tieni a yaala n bia, ama a baa Tienu den maadi leni nni wonli nni, ki yedi nni: ‹Fangi a yuli ki da maadi Jakob maamiba kuli.› 30Moala, ŋan fii kelima a yama n yaadi ki se ke a bua ki le a baadiegu yeni daa, be yaa po naane ke a den suni n buli?» 31Jakob den guani ki yedi Laban: «N den jie ke daalinba a baa fie nni a bisiaba. 32Ama a yaa laa a buli yua yaa kani, wan bodi. Lingi n deeni ti kpiiba kuli nintuali, a yaa laa ŋan die yaala, ŋan taa.» Jakob naa den bani ke Raseli suni yi.

33Laban den kua Jakob gbandieli nni ki go kua Lea leni a puotuadilieda yaa gbandiena nni. Waa laa liba. O den ñani Lea gbandieli nni, ki kua Raseli gbandieli nni. 34Raseli den taa i buli ki wuoni ku yuoyuogu gaali tiipo, ki kali li po. Laban den fiidi o gbandieli kuli nni, waa laa liba. 35Raseli den yedi o baa: «N daano, ŋan da biidi a pali ke mii fidi ki fii a nintuali. Li tie ke n ye bi puoba sanu nne.» O den lingi ki naa laa i buli. 36Jakob pali den beni, ke o den koani leni Laban. O go den maadi ki yedi: «N tieni be yaa bonbiadile, n tuonbiadi tie be, ke a ŋoadi nni leni li pabienli? 37Ŋan nan fidi n tiadi kuli yeni, a laa a diegu nni tiagu ba bonyengu? Ñani ku n kpiiba leni a kpiiba nintuali, ban jia ti buudi tinba nibilie siiga. 38Dunla n tie bina piilie ke n den ye a kani, a pe leni a ŋuabi naa den mii, n naa dini a yangola petonli ba yenli. 39Ba ti moayandi n kpa yaa yanga ke mii yen cuani ka a kani, a yen teni min pa ka. A go yen gaa n kani, ban yen su yaa yanga u yensiinu, bi ku ñiagu. 40Ku tontongu den gbadi nni u yensiinu, ti wadi mo den gbadi nni ku ñiagu, n nuni naa den bani mi guama mo. 41N den tieni bina piilie yeni a diegu nni. N den soani a po piiga n binanaa a bisaliediba po, ki go soani binaluoba a yangoli po, ke a den lebidi n panpaani taalima piiga. 42Li yàá bi tie ke yua n todi nni tie n baa Tienu, Abalahama Tienu, Isaaka n fangi Yua, a den baa cabi nni nukuomu. U Tienu den laa n fala leni n nii tuona, lani n teni ke o den yie a po wonli nni ñiagu.»

43Laban den guani ki yedi Jakob: «Bi naa puoba tie n bisiabe, a bila ne tie n yaabila yo, li yangoli ne tie n yaa yangole, ŋan nua yaala ne kuli tie n yaa yaale. N baa fidi ki tieni dinla be yo n bisiaba po, bi bi bila, bani mo n mali yaaba yaa po? 44Cua tin juogi ki poli leni tiyaba, lan tua siedi mini leni fini siiga.»

45Jakob den taa li tanli ki sieni ke li tua li bontiadikaala. 46Jakob den yedi o kpiiba, taani mani a tana. Bi den taani a tana ki dogini a ke a tua binbinli, ke bi den dini mi jiema lankani li binbinli po. 47Laban den yini laa kaanu Yegari-Sahaduta, ke Jakob mo yini u Galedi. 48Laban den yedi: «Dinla li naa binbinli n yaa ye ki tie siedi mini leni fini siiga.» Li tie lani yaa po yo ke bi den yini laa kaanu Galedi, lani n tie “Siedi tanjuaga.” 49Bi go den yini laa kaanu Misipa, kelima Laban den yedi: «O Diedo n yaa tie siedi mini leni fini siiga, ba ti yàá go nua tiyaba yaa yogunu. 50A yaa faligi n bisiaba bi a yaa taa puotoaba goga, ŋan fangi a yuli kelima li naa tie o nilo ka ye leni ti, li tie U Tienu yua n tie siedi mini leni fini siiga.»

51Laban den yedi Jakob: «Diidi li binbinli ne, diidi min maa yaa bontiadikaala mini leni fini siiga. 52Li naa binbinli n tua siedi, li naa bontiadikaala mo n tua siedi ke n kan kandi li naa binbinli ki cua a kani, ke a mo kan kandi li naa binbinli leni li naa bontiadikaala ki cua n kani, ki tieni yaala n bia. 53Abalahama leni Nahori Tienu, yua n go tie bi baa Tienu, wani n tua o bujialo ti siiga.» Jakob den poli leni Isaaka n den fangi Yua yaa yeli. 54Jakob den padi li padili li juali po, ki yini o kpiiba ban cua ki je. Bi den dini yeni, ki duani ku ñiagu li juali po.

Currently Selected:

Mi cilima 31: BGP

Highlight

Copy