Mi cilima 30

1Raseli n den laa ke waa mali Jakob po, li nunponbiadili den cuo o kelima o kpelo po, ke o den yedi Jakob: «Pa nni a bila, lani yaa ka n baa kpe.»

2Jakob pali den beni Raseli po, ke o yedi: «Naani n tie U Tiene, ki teni ke ŋaa mali?»

3O den yedi: «A laa n puotuado Biliha, kua o kani ke wan maa a bila n duna po, ke nmo n baa a bonjala kelima o po.»

4O den puni o o puotuado Biliha ke o tua o pua, ke Jakob den kua o kani. 5Biliha den punbi ki mali bonjaga Jakob po. 6Raseli den yedi: «U Tienu puni nni i moamoani moala.» O den gbadi n miabu ki puni nni ki bonjaga. Lani yaa po, o den yini o Dan. 7Raseli puotuado Biliha go den punbi ki mali bonjaga miliema Jakob po. 8Raseli den yedi: «N den moani leni n kpelo o Diedo nintuali, ki paadi o.» O den yini ki biga yeli Nefitali.

9Lea n den laa ke waa go maa. O den taa o puotuado Silipa ki puni o Jakob ke o tua o pua. 10Lea puotuado Silipa den mali bonjaga Jakob po. 11Lea den yedi: «Li ne tie li cabiŋanli.» O den yini o yeli Gadi yaali n bundi «Cabiŋanli» 12Lea puotuado Silipa go den mali bonjaga miliema Jakob po. 13Lea den yedi: «Moala n pali mangi, kelima bi jafanba baa yedi ke n pali mangi.» O den yini o Aseri.

14Rubeni den ñani ki goadi ku muagu nni ŋalikama cema yogunu, o den laa yaa bonpudikaala n yi mandiragori.#30.14 Mandiragori den tie bonpudikaala ke bi den daani ke li jiini tie u ñoagu yuu n baa teni o pua n punbi. O den ñani la ki ban teni o naa Lea. Raseli den yedi Lea: «N mia ŋa, pa nni a bijua mandiragori.»

15O den guani ki yedi o: «Ŋan den fie n calo yeni, laa dagidi ke a go baa fie n bijua mandiragori?» Raseli den yedi: «To, Jakob baa duani leni a dinla yaa ñiagu ne, a yaa teni nni a bijua mandiragori.»

16Laa ñiagu, Jakob n den ñani o kuanu po ki kpendi, Lea den ñani ki tuogi o ki yedi: «A baa kua mini yaa kane, kelima n den daa ŋa leni n bijua mandiragori.» O den duani leni o laa ñiagu. 17U Tienu den gbadi Lea miabu, ke o den punbi ki go mali bonjaga Jakob po, ke bi tua bonjalamuu. 18Lea den yedi: «U Tienu den pani nni n panpaani, kelima n den puni n calo n puotuado.» O den yini o yeli Isakari. 19Lea go den punbi ki mali Jakob po, ke bi tua bonjalaluoba. 20Lea go den yedi: «U Tienu puni nni yaa paabu n ŋani, moala n calo baa yaa ye leni nni, kelima n mali o po bonjalaluoba.» O den yini o Sabuloni. 21Lan den pendi, o den mali bonpuoga ki yini o Dina.

22U Tienu den tiadi Raseli po, ki gbadi o miabu, ke omo baa ti madi. 23O den punbi ki mali bonjaga ki yedi: «U Tienu ñani n po n fe.»

24O den yini o Josefi. Raseli go den yedi: «O Diedo n go pa nni bonjatoaga.»

Jakob tua piado

25Raseli n den mali Josefi yaa yogunu, Jakob den yedi Laban: «Cedi min fii moala ki guani n diema nni. 26Pa nni n puoba leni n bila, min den soani a po li tuonli yaaba yaa po, ke n baa kuni. A bani min den soani a po yaa tuonli kuli.»

27Laban den yedi o: «Ŋan sinja n po daa. N ban diidi ki sua ke o Diedo seligi nni kelima a yaa po yo. 28Ŋan waani nni a panpaani, n baa pa ŋa.»

29Jakob den yedi o: «A bani min soani a po yaa banlu. A bani a yangola n tua maama n nuu nni. 30Ŋan den pia yaa bonla waamu ke n daa den cua, li pugini boncianla. O Diedo den seligi ba kelima mini yaa po. N baa fuoni n yuli u laa yogune?» 31Laban den yedi: «N baa pa ŋa be?» Jakob den guani ki yedi o: «A kan pa nni puu, a yaa baa tuo min baa waani a yaala. N go baa kpaa a yangola ki guudi ba. 32N baa goandi a yangola kuli dinla, ŋan paadi i pe kuli siiga yaa pebila n ñoalini ki tie lega lega leni pebiboanga kuli. I ŋuabi moko yaa siiga, ŋan ñani yaaba n tie lega ki ñoalini kuli. Lani, n baa tua n panpaani. 33N teginma baa doagidi n po saala, a yaa baa cua ki le n panpaani. Yaaba n naa ñoalini ki naa tie lega lega i ŋuabi siiga ki naa boani a pebila siiga, n suni ba yo.» 34Laban den yedi: «To lan tua nani a maama n yedi maama.»

35Landaali Laban den ñani o yandi siiga yaa ŋuabuana n buadi buadi ki tie lega lega leni yaa ŋuabi n ñoalini ki tie lega lega, ba leni yaaba n pia a legipiena kuli. O go den ñani i pe siiga nni i peboani kuli. O den teni bikuli o bijaba. 36Lanwani, o den teni ban foagidi danataa cenli bani leni Jakob siiga. Jakob den kpaa Laban yangoli yenli yaali n sieni. 37Jakob den taa ti tisoangidi beni yaadi n tie pupilie, amandie leni pilatani yaa tiidi. O den legidi i beni ke yi ñoalini. 38Lanwani, o den bili wan den legidi yaa beni i yangali nni, i pe n den kpendi ki ñu naankani ke i pe yaa cua ki baa ño, ban yaa nua yi ki do biyaba. 39I pe den do biyaba lankani ki kuu leni i beni, ki mali a bila yaaba n buadi buadi ki ñoalini ki tie lega lega. 40Jakob den paadi a pebila ki taani yaaba n buadi buadi leni yaaba n boani kuli Laban yaa yangoli nni. O den paadi o yangocela yeni ke baa den taani leni Laban yangola. 41Yaa yandi n pa n yen do biyaba yaa yogunu, o den biliti i tibeni i yangali nni i pe nintuali, ke ban do biyaba lankani i tibeni nni. 42Ti yantadindi yaa yen baa do biyaba, waa den biliti i tibeni. Li den tua yeni ke ti yantadindi den tua Laban yaaba, ke yaa yandi n pia u fidu mo tua Jakob yaaba.

Jakob sani ki ñani Laban deni

43Laa joa den tua piado ki pugidi o piama. O den pia ti yanbidi hali boncianla, a jatuada, a puotuada, ti yuoyuodi leni i ŋunbi.

Currently Selected:

Mi cilima 30: BGP

Highlight

Copy