Mi cilima 26

Isaaka leni Jakob togida

26—36

Isaaka leni Abimeleki

1Mi koma den tieni mi diema nni, ke laa taa leni yaa konkpiama n den tieni Abalahama yogunu. Isaaka den fii ki gedi Filisiti yaaba bado Abimeleki kani, Gerari dogu nni. 2O Diedo den doagidi o kani ki yedi: «Ŋan da gedi Ejipiti diema nni. Ŋan yaa ye min baa waani a yaa diema nni. 3Ŋan yaa kaa mi naa diema nni n baa yaa ye leni a, ki seligi a, kelima n baa pa ŋa yaa diema n tie ne kuli, fini leni a yaabila po. N baa kubi min den poli yaa poli a baa Abalahama po. 4N baa teni a puoliŋuani n yaa yabi nani tanpoli ŋmabila n yabi maama yeni. N baa pa yaa diema n tie ne kuli a yaabila, ki tinga nibuoli kuli baa baa li seli kelima a yaabila po.#Cil 22.16-18. 5Li baa tua yeni, kelima Abalahama den cengi n nialu, ki kubi n ñoamabona leni n bali maama, n mabilikaama leni n yedima kuli.»

6Isaaka den kali Gerari. 7Laa dogu niba n den buali Isaaka, o pua maama. O den yedi ke o tie o waalo yo, kelima o den jie ke o yaa yedi ke o tie o pua, likani niba den baa kpa o, kelima Rebeka den ŋani hali bonŋanla.#Cil 12.13; 20.2.

8Nani wan den waagi ki ye likani yeni, Abimeleki Filisiti yaaba bado den se o dieli bonli kani ki diidi, ki laa ke Isaaka jeli leni o pua Rebeka. 9Abimeleki den teni ke bi yini Isaaka ke o yedi: «I moamoani, o tie a pua yo. Li gaa lede ke a den yedi nni ke o tie a waalo?» Isaaka den guani ki yedi o: «N den maadi yeni kelima n den jie ki da kpe kelima o po.»

10Abimeleki den yedi o: «A tieni ti po be n yeni? Li den poadi waamu bebe n diema niba siiga yendo bi baa duani leni a pua, yeni mo a den baa kuani ti i tagili nni.»

11Abimeleki den ñani li ñoamabonli bi niba kuli po, ki yedi ba: «Yua n sii o naa joa bi o pua kuli, bi baa kpa o.»

12Isaaka den coagi o kuanu laa diema nni. Laa binli o kuani den loni ke o baa hali taalima kobiga, kelima o Diedo den seligi o. 13O den tua ŋalimandaano. O ŋalimano den pugidi hali ke o den tua piadiciamo. 14O den pia a yangola, ti yanbidi leni a yangbenga kuli, ki go pia bi naacenba boncianla.

Isaaka leni Abimeleki nianli

Filisiti yaaba den pia o po li nunponbiadili. 15O baa Abalahama naacenba n den gbini yaa caana ke Abalahama da pia o miali, Filisiti yaaba den piini a, ki gbieni a leni mi tama. 16Abimeleki den yedi Isaaka: «Fii ki ña ti siiga, kelima a pia u paalu ki cie ti hali boncianla.»

17Isaaka den fii lankani ki jiidi Gerari joaloangu nni, ki kali. 18Isaaka den piidi ban den gbini yaa caana hali o baa Abalahama yogunu, Filisiti yaaba n den piini ya o baa kuuma puoli po yeni. O go den yini a o baa n den kpa yini a maama yeni. 19Isaaka naacenba go den gbini a caana ku joaloangu nni, ki laa yaa caali n tie ñinbunli. 20Gerari yankpaaba den koani leni Isaaka yaa yankpaaba ki yedi: «Li tie ti yaa ñime.» O den yini laa caali yaa yeli n tie ne: Eseki, kelima bi den koani leni o lankane. 21O naacenba go den gbiidi caatoali, ke bi go den lingi o leni li koanli laa caali moko yaa po. O den yini li Sitina. 22O go den foagidi lankani, ki go gbiidi caatoali ke bi naacenba yeni naa go den koani leni o. O den yini laa caali Rehoboti. O den yedi: «Li tie ke o Diedo puni ti mi fanma moala yo, ke ti baa mi diema ñuadi.»

23O den fii lankani, ki gedi Beri-Seba. 24O Diedo den doagidi o po ku ñiagu, ki yedi o: «N tie a baa Abalahama Tienu yo. Ŋan da jie, kelima n ye leni a, n baa seligi a kelima n naacemo Abalahama po.»

25Lankane ke Isaaka den maa li padibinbinli ki jaandi Li Miali Diedo, ki go sieni o gbandieli. Isaaka naacenba go den gbiidi li caali lankani.

26Abimeleki den ñani Gerari, ki pundi Isaaka kani ke o danli Ahusata leni o guudikaaba yudaano Pikoli den yegi leni o.#Cil 21.22. 27Isaaka den yedi ba: «Be yaa po yo ke yi kpendi n kani, kelima n sua ke yi nani nni, ki den deli nni yi kani.»

28Bi den guani ki yedi o: «Ti laa ke o Diedo n ye leni a. Lani yaa po yo, ke ti yedi tin poli li poli ti siiga, tinba leni fini siiga, ki niani tiyaba ke ti baa yaa kuandi tiyaba ŋantaadi. 29Ŋan poli ke a kan tieni ti yaala n bia nani timoko n ki den tieni a yaala n bia maama yeni. Ti den tieni a po yaala n ŋani bebe, ki teni ke a fii leni mi yanduanma. Moala, ti laa ke a baa li seli o Diedo kani.»

30Isaaka den ŋanbi bi po mi jaanjiema, ke bi dini ki go ñuni. 31Bi den fii ku tiŋaapanpangu ki kuani laa ŋantaado bi siiga, kelima bi poli po. Isaaka den cabi ba ke bi fii o kani leni mi yanduanma.

32Landaali Isaaka naacenba den cua ki waani o ban den gbiidi yaa caali yaa maama, ki yedi o ke bi laa mi ñima.

33O den yini laa caali Siba. Li tie lani yaa po ke bi yi laa dogu Beri-Seba ba hali dinla, yaala n bundi “Li poli caali.”

Esayu ñiigili

34Esayu n den pia bina piinaa yaa yogunu, o den taa puobilie, Hititi yua Beeri bisalo Juditi leni Hititi yua Elon bisalo Basimati. 35Laa puoba den cuani li pabiidicianli Isaaka leni Rebeka po.

Currently Selected:

Mi cilima 26: BGP

Highlight

Copy