Mi cilima 27

Jakob kubini ki fie Esayu seli

1Isaaka den podi ke o nuni den tadigi hali ke waa go den nua. Lanyogunu, o den yini o bijakpelo Esayu, ki yedi o: «N bijua.»

2O den guani ki yedi o: «Mini n ne.» Isaaka den yedi o: «Diidi ki le, n podi, mii bani min baa kpe yaa daali. 3Lanwani, n mia ŋa moala, taa a jatiadi, a piemi leni a dabanli ki gedi ku muagu po, ki lingi n po ti moanandi, 4ki ŋanbi n po mi jiema nani min bua maama, ki cuani n po min je, ki gaali a hali ki daa kpe.»

5Rebeka den cengi Isaaka n den yedi o bijua Esayu yaala kuli. Esayu den gedi ku muagu po ki baa n lingi ti moayandi ki cuani. 6Lanwani, Rebeka den yedi o bijua Jakob: «Diidi, n gbadi ke a baa maadi leni a kpelo Esayu yaa maama n tie ne: 7‹Lingi n po ti moayandi ki ŋanbi n po mi jiema min je, ki gaali a o Diedo nintuali hali ki daa kpe.› 8Lanwani, moala, n bijua, cengi min baa yedi a yaala, ki tieni min baa puogi a yaala. 9Gedi ki taa n po ŋuabigbengalie li yangoli nni. N baa ŋanbi a baa po mi jiema nani wan bua maama. 10A baa gedini ma a baa kani, wan je ki gaali a hali ke o daa kpe.» 11Jakob den guani ki yedi o naa: «Diidi n kpelo Esayu pia ti kobidi boncianla, ama mini n naa pia kobidi. 12Daalinba n baa baa baali nni ki bandi ke n tie o tuofaadaano o nuni po, wan soli nni ki kan gaali nni ba waamu.» 13O naa den yedi o: «Laa solindi n guani n yaa yuli po, n bijua. Cengi n yedima bebe, ki gedi ki taa n po ti yandi.»

14Jakob den gedi ki taa ti ki cuani o naa kani ke o den ŋanbi mi jiema nani o baa n bua maama. 15Lanwani, Rebeka den taa o bijakpelo Esayu tiadi, yaadi n ŋani ki cie wan den pia yaala kuli li dieli nni, ki teni o bonwaalo Jakob ke o lani. 16O den pini Jakob nii leni a ŋuabila gbandi leni o tulu yuu naa den pia kobidi. 17O den teni o bijua Jakob wan den ŋanbi yaa jiema leni dupen. 18Jakob den gedi o baa kani ki yedi: «N baa.» Isaaka den yedi: «Mini n ne. A tie ŋme n bijua?»

19Jakob den yedi o: «N tie Esayu a bijakpelo. N tieni ŋan bi yedi nni yaala. N mia ŋa, fii ki kali ki je n moanandi ki gaali nni.» 20Isaaka den yedi o bijua: «Li tieni lede ke a baa ti nandi tontoni?» Jakob den guani ki yedi o: «Li tie o Diedo a Tienu n teni ke ti cua n kani.»

21Isaaka den yedi Jakob: «Lanwani, nagini ke min baali a n bijua ki bandi a yaa tie n bijua Esayu, bi a yàá tie.»

22Jakob den nagini o baa Isaaka kani. Isaaka den baali o ki yedi: «U nialu tie Jakob yaa nialu, ama i nii tie Esayu yaa nii.»

23Waa den bandi o, kelima o nii den pia ti kobidi nani o kpelo Esayu yaa nii n pia maama yeni. Lanwani, Isaaka den gaali o. 24O den yedi: «Li tie fini n bijua Esayu moamoani bi?» Jakob den guani ki yedi o: «Li tie mine.»

25Isaaka den yedi o: «Teni nni min je n bijua a moanandi, ke min gaali a.» Jakob den teni o ke o dini. O go den cuani o po mi daama ke o ñuni. 26Lan pendi, o baa Isaaka den yedi o: «Lanwani, nagini n kani ki gobini nni, n bijua.» Jakob den nagini ki gobini o.

27Isaaka den gbadi o tiadi nuulu ki gaali o ki yedi:

«N bijua nuulu

Tie ku muagu yaa nuulu, o Diedo n seligi yuu.

28U Tienu n pa ŋa tanpoli mangu

Leni ki tinga yaa kpama,

Ŋalikama leni mi daama hali lan kandi.

29Bi niba kuli n miini bi yula a kani.

I nibuoli kuli n labini a nintuali,

Ŋan tua a kpiiba kuli yudaano.

A naataani n labini a nintuali.

Ti solindi n yaa ye leni yua n soli a.

Li seli n yaa ye leni yua n gaali a kuli.»#Heb 11.20; Cil 12.3.

30Isaaka n den gaali Jakob ki gbeni ke Jakob fii o baa Isaaka kani, lanyogunu Esayu den ñani u fuagoadu ki kpeni. 31Omo den ŋanbi mi jiema, ki taa ki gedini o baa kani ki yedi o baa: «N baa, fii ki je a bijua moanandi, ki gaali nni.» 32O baa Isaaka den yedi o: «A tie ŋme?» O den guani ki yedi: «N tie a bijakpelo Esayu.»

33Ti yanyagiciandi den cuo Isaaka ki lengidi o boncianla, ke o yedi: «Ŋme n nan lingi ti moanandi ki cuani n kani. N dini likuli hali ke a daa cua, ki gaali maama n ki go pia gaama mo abada.»

34Esayu n den gbadi o baa maama yeni, o den yaadi ki kpaani ki buudi boncianla, ki ye leni li pabiidicianli. O den yedi o baa: «Go gaali nmoko n baa.»

35Isaaka den yedi o: «A waalo cua leni i janbi ki gaa a gaali.»

36Esayu den yedi: «Naani li tie ke bi yini o yeli Jakob yo, ke o janbi nni taalimilie kuli? O den kpa gaa n nikpedi. Moala o go gaa n seli.» O go den yedi: «Ŋaa sieni n po gaali ba waamu?»#Cil 25.29-34.

37Isaaka den guani ki yedi o: «N bili ke wan yaa tie a yudaano, n puni o o kpiiba kuli n tua o naacenba, n puni o ŋalikama leni o duvenpaano. N bijua, be go sieni ke n baa fidi ki tieni a po?»

38Esayu den yedi o baa: «N baa, ŋaa go pia gaali, se laa gaali bebe? Gaali nmoko, n baa.» Esayu den kpaani ki buudi.#Heb 12.17.

39O baa Isaaka den guani ki yedi o:

«Ŋan baa yaa ye naani baa yaa foagi leni ki tinga kpama,

Ki go foagi leni tanpoli mangu.

40A baa yaa ye kelima a jugisiega paalu po,

A baa yaa tie a waalo yonbo.

Ama ŋan baa yaa kpaagi ki puagi yeni,

A baa ti faabi leni o yonbidi.»#Heb 11.20; Cil 36.8; 2Bad 8.20.

Jakob sani ki gedi o yiado Laban po

41Esayu den cili ki gbie leni ki nanga Jakob po, kelima o baa n den gaali o yeni po. Esayu den yedi o pali nni: «N baa kuuma daali kpendi, lanyogunu yaa pundi, n baa kpa n waalo Jakob.» 42Bi den cua ki waani Rebeka o bijakpelo Esayu maama. Lanwani, o den teni ke bi yini o bonwaalo Jakob ke o yedi o: «Diidi, a kpelo Esayu baa guani a a panpaani ki kpa ŋa. 43Lanwani, n bijua, cengi n maama. Fii ki sani ki gedi hali Harani, n kpelo Laban kani. 44Ŋan yaa kaa o yaa kani lan waagi waamu, hali a kpelo pali n kuugi, 45hali a kpelo nanga n pendi ki ŋaa ŋa, wan sundi ŋan den tieni o yaala. Lanwani, n baa teni ŋan guani. Be yaa po ke yinba nibilie kuli baa taani ki bodi n po dayenli?»

46Rebeka den yedi Isaaka: «N yama ñani li miali nni, kelima Hititi bisiaba po. N miali go baa yaa pia n po mi laa fuome, Jakob pua yaa baa yaa tie nani Hititi bisiaba ne?»

Currently Selected:

Mi cilima 27: BGP

Highlight

Copy