MATIYU 21
21
1Jesu leni o ŋoadikaaba n den nagidi Jelusalema, ki pundi Betifaje dogu nni, ki kuu *Olifie Tiidi juali, o den soani ŋoadikaaba lie 2ki yedi ba: «Suagi mani ki gedi yaa dobiga n ye yi liiga na. Yi yaa ban pundi yaa yogunu, yi baa le ke o ŋunñua luo ki se leni o biga. Yin loti ki cuani ba npo na. 3Nilo yaa yedi yi liba, yin goa ki yedi o: ‹Ti Daano n bua ba.› Tontoni o baa cedi yin cuani ba.»
4Lankuli den tieni ke o sawalipualo n den pua yaa sawalo n tieni:
5Waani mani Siyono dogu yaaba
Ke bi bado kpendi bikani na.
O dingi boncianla, ki jagi o ŋunbo,
Li tie ŋunbisaagili, o ŋunñua yaa biga.#Sak 9.9
6Bi ŋoadikaaba den gedi ki ban tieni Jesu n waani ba maama. 7Bi den cuani o ŋunñua leni li ŋunbisaagili ki maani bipo bi tiadi ke Jesu jagini. 8Ku niligu siiga bi niba boncianla den ladi bi tiadi u sanu nni, bi tianba mo den pedi i tibensoangi ki ladi u sanu nni. 9Yaa niligu n den ye Jesu liiga leni yaagu n ŋua o puoli kuli den kpaani ki tua: «Dafidi Bijua n baa ti pagidi. U Tienu n seligi yua n kpendi wani o Diedo yaa yeli nni.
U Tienu yua n ye hali tanpojoma n baa ti pagidi.»
#
Pis 118.25-26
10Wan den kua Jelusalema, li den paki u dogu nni yaaba kuli ke bi tua: «One tie ŋme?» 11Ku niligu den goa ki tua: «Li tie Jesu, o sawalipualo, *Galile yaa Nasaleti yua.»
Jesu kua U Tienu diegu nni
(Mak 11.15-19; Luk 19.45-48; Jan 2.13-22)
12Jesu den kua U Tienu diegu nni ki deli ki ñani yaaba n kuadi leni yaaba n da lienni kuli, ki tudi ki luni bi ligilebidiba kpagidi leni a kpaajekuada bonkalikaala. 13O den yedi ba: «Li diani: ‹Bi baa yi n dieli i jaandi diegu.› Ama yinba wani teni ke li tua a concona wuonkaanu.»#Esa 56.7; Jel 7.11
14A juama leni a diama den nagini o kani U Tienu diegu nni ke o paagi ba.
15Ama bi kopadicianba yudanba leni li *bali maama bangikaaba n den laa wan tieni yaa bonlidikaala yeni, ki gbadi ke a bila kpaani U Tienu diegu nni ki tua: «Dafidi Bijua n baa ti pagidi, Dafidi bijua n baa ti pagidi,» bi pala den beni boncianla. 16Bi den yedi o: «A gba ban maadi yaala?» Jesu den goa ki yedi ba: «Mm. Naani yi daa cogi yaa maama n tie na: ‹A teni ke a biwaala leni yaaba n da ŋaani kuli pagi a bonŋanla?› »#Pis 8.3
17Jesu n den fii bikani, o den ñani u dogu nni ki gedi ki ban duani Betani.
Jesu soli bu kankanbu
(Mak 11.12-14,20-24)
18Wan den goa u dogu po ku tiŋaapanpangu, mi koma den cuo o. 19O den laa bu kankanbu u sankunu ki jadi ki gedi bukani. Ama waa den laa pu bupo se ti faadi bebe. O den yedi bu: «Ŋan da go luoni pu kuli hali abada.» Lanyogunu bu kankanbu den kuodi. 20O ŋoadikaaba n den laa lani, li den paki ba ke bi buali o: «Be teni ke bu kankanbu kuodi tontoni nanda?» 21Jesu den goa ki yedi ba: «N waani yi i moamoani, yi yaa pia li *dandanli ki naa maliti yi pala nni ke li baa tieni bi li kan tieni, yi baa tieni ki cie min tieni bu kankanbu na yaala. Baa yi yaa yedi li naa juali: ‹Fii ki ban lu a yuli mi ñincianma nni,› li baa tieni.#Mat 17.20; 1Kol 13.2 22Yin baa jaandi ki mia yaala kuli leni li dandanli kuli, yi baa baa la.»
Jufinba buali Jesu o bali n ñani naani
(Mak 11.27-33; Luk 20.1-8)
23Jesu n den kua U Tienu diegu nni ki bangi bi niba, bi kopadicianba yudanba leni Jufinba *nikpeliba kuli den cua ki yedi o: «Li laa bali yaa po yo ke a tiendi li naa bonla? Ŋme n puni a laa bali?» 24Jesu den goa ki yedi ba: «N moko baa buali yi bonyenla. Yi yaa waani nni, n moko baa waani yi yaa bali yaa po ke n tiendi laa bonla. 25Jan n den *batisi bi niba yeni, o den baa li bali tanpoli po bi, bi bi nisaaliba kane?» Bi den juogi bi siiga ki yedi: «Ti yaa yedi ke o den baa li tanpoli po, o baa yedi ti: ‹Be yaa po ke yii den daani o maama?› 26Ti yaa yedi: ‹Bi nisaaliba yaa kane mo›, ti jie ku niligu, kelima bikuli nua ke Jan den tie sawalipualo.» 27Lani yaa po bi den goa ki yedi Jesu: «Tii bani ba.» O den yedi ba: «N moko kan waani yi yaa bali yaa po ke n tiendi laa bonla.
Bi bijaliediba yaa kpanjama
28Yi tama be? O ja den pia bijaba lie. O den yedi o bijakpelo: ‹N bijua, gedi ki ban soani dinla n duven tiidi kuanu nni.› 29O den goa ki yedi o baa: ‹Mii caa.› Ama lan den yen waamu o den lebidi o yama ki gedi. 30Laa ja den yedi o bijalielo mo yeni. Wani mo den goa ki yedi o: ‹N Daano n baa gedi.› Ama waa den gedi. 31O leepo n den tieni o baa n bua yaala?» Bi den goa ki yedi o: «O bonkpelo te.» Lane Jesu den yedi ba: «N waani yi i moamoani, bi lubigaaba leni a poconcona baa kua yi liiga *U Tienu diema nni. 32Kelima Jan den cua yikani ki wangi yi mi *teginma sanu maama, ama yii den tuo ki ŋoadi o maama. Bi lubigaaba leni a poconcona den tuo o maama, ama yinba n den laa lani, yii den yuandi ki lebidi yi yama ki daani o maama.#Luk 3.12; 7.29-30
Bi koaguudiba kpanjama
(Mak 12.1-12; Luk 20.9-19)
33Go cengi mani kpanjatoama. O diedaano den ye ki ŋu o duven tiidi kuanu. O den kpaa li nagili ki lindi u, ki gbiidi ku buogu ku tangu po ban baa ŋanbidi duven naankani, ki go paani li pagili o duven tiidi siiga. Lani o den guuni o kuanu bi koaguudiba, ki fii ki gedi u dogu.#Esa 5.1-2 34Li bonluonkaala n den beni yaa yogunu, o den soani o naacenba bi koaguudiba kani, ke ban ga o kuanu bonbaakaala. 35Bi koaguudiba den cuo o naacenba ki pua yendo, ki ku one, ki lugidi o taalo mo a tana. 36O koadaano yeni go den soani naacentoaba, yaaba n yaba ki cie bi kpiaba. Bi koaguudiba den soani bani mo nani ban den soani bi kpiaba maama. 37Lani o den yuandi ki soani o bijua bikani ki yedi: ‹Bi baa fangi n bijua wani.› 38Ama bi koaguudiba n den laa o bijua, bi den yedi biyaba: ‹One n tie o faajielo. Cedi tin kpa o mani ki diedi o faali.› 39Lani bi den cuo o ki ñani o u kuanu puoli po ki ku o. 40Yeni o koadaano yaa ti cua daa, o baa soani laa koaguudiba lede?» 41Bi den goa ki yedi o: «O baa bolini laa nibiadiba yaa bolinma n bia, ki go guuni u kuanu nitoaba, yaaba n baa tendi o u kuanu bonluonkaala li yogunu yaa pundi.» 42Jesu den yedi ba: «Naani yi daa cogi i Diani nni yaa maama n tie na?
‹Bi tanmaaba n den yie ki luni yaa tanli
Tua li tanpuuli tanjigi.
Likuli ñani o Diedo kani,
Li tie bonlidikaala ti nuni po.›#Pis 118.22-23
43Lani yaa po n waani yi, bi baa ga yikani U Tienu diema, ki teni yaa nibuolu n baa baadi mipo li bonluonkaala. [ 44Yua n baa laa tanli po kuli baa kuakua, lin baa yua yaa po mo baa tua wagima.]»
45Bi kopadicianba yudanba leni *Falisieninba n den gbadi Jesu n puapua yaa kpanjama, bi den bandi ke o maadi bane. 46Baa ke bi den moandi ki baa cuo o, bi den jie ku niligu kelima ku den nua ke Jesu tie sawalipuale.
Mi pocaajiema yaa kpanjama
(Luk 14.15-24)
Currently Selected:
MATIYU 21: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
