MATIYU 20
20
1Yeni de, *tanpoli diema tie nani yaa koadaano n den ñani ku tiŋaapanpangu ki baa taa bi tuonsoanba o duven tiidi kuanu tuonli po. 2Wani leni bani den maadi ki kadi ke o baa pa ba kujapienyenli#20.2 kujapienyenli den tie tuonsoanlo kuli n baa ga yaala dayenli tuonli po. yenli daali kuli. Li yaa puoli o den cedi ke bi gedi o kuanu po. 3U yienu n den paagi ke o go ñani, o den laa nitoaba ke bi ye ki daaga nni kaa tuuni liba. 4O den yedi ba: ‹Yi mo n gedi mani n kuanu po, n baa pa yi lan dagidi.› 5Bi den gedi. O go den ñani u yensiinu leni li yenlebidili kuli ki go tieni yeni. 6U yienu n bua ki baa yaa yogunu, o go den ñani ki laa nitoaba ke bi se ki daaga nni. O den buali ba: ‹Be yaa po ke yi tundi ki se ne kaa tuuni liba?› 7Bi den goa ki yedi: ‹Li tie kelima oba naa taa ti tuonle.› O den yedi ba: ‹Yi mo n gedi mani n kuanu po.›
8Ku jofangu n den pundi, o koadaano den yedi o tuonsoanjiido: ‹Yini bi tuonsoanba na ki pa ba bi pani, ki cili leni yaaba n yuandi ki kua, ki ban juodi leni yaaba n kpa kua.›#Lef 19.13; Tia 24.15 9Yaaba n den kua ke u yienu bua ki baa yeni den cua ki ga kujapienyenli yenli. 10Yaaba n den kpa kua mo den cua ki tama ke bi baa ga ki cie yeni, ama bi moko den ga kujapienyenli yenli. 11Ban den ga, bi den yenbidi yenbidi o koadaano po 12ki tua: ‹Yaaba n yuandi ki kua, soani u yogunu waamu bebe, ke a nan taani ki pani bani leni tinba kuli yenma, tinba yaaba n tundi ki tuuni ki yenbiadiga nni ki laadi fala.› 13O koadaano den goa ki yedi bi siiga nni yendo: ‹N danli, mii tudi apo. Tii bi maadi ki kadi ke n baa pa ŋa kujapienyenli kaa? 14Ga ŋan die yaala ki fuadi likani. N bua ki pa yua n yuandi na nani min pani a maama. 15Mii pia sanu ki tieni min die yaala min bua maama yoo? Li nunponli cuo ŋa kelima min ŋani yeni yoo?› »
16Jesu den juodi ki yedi: «Yene ke puoli yaaba baa ti tua liiga yaaba, liiga yaaba mo baa ti tua puoli yaaba.»#Mat 19.30; Mak 10.31; Luk 13.30
Jesu waani mi tataama ke o baa kpe ki go fii
(Mak 10.32-34; Luk 18.31-34)
17Jesu n den do ki caa Jelusalema leni bi piiga n niliediba, o den piadi leni ba. Li cenli siiga o den yedi ba: 18«Cengi mani, ti do ki caa Jelusalema. Bi baa cuo o *Ja Bijua ki teni bi kopadicianba yudanba leni li *bali maama bangikaaba nuu nni. Bi baa jia o ti buudi ki bili ke ban kpa o. 19Bi baa teni o bi nilanba nuu nni ban ñuadi o, ki pua nni i baliji, ki kpa ki tabini nni li *dapoanpoanli po. Ama li dataali daali o baa fii bi tinkpiba siiga.»
Jaka leni Jan naa yaa miabu
(Mak 10.35-45)
20Li yaa puoli Sebede bijaba naa den nagini Jesu kani leni o bila yeni, ki gbaani o nintuali ki baa mia o bu miabu. 21Jesu den buali o: «A bua be?» O den goa ki yedi o: «N bua ŋan bili ke a yaa ti ka ti gbandi po yaa yogunu, n bilieda na n yaa ka yendo a jienu, yendo mo a ganu.» 22Jesu den goa ki yedi: «Yii bani yin miadi yaala. Yi baa fidi ki ño min baa ño yaa tadiñokaaga bi?» Bi den yedi o: «Ti baa fidi.» 23O den goa ki yedi ba: «Moamoane ke yi baa ño min baa ño yaa tadiñokaaga, ama ki kaani o nilo n jienu yaaka n ganu, laa ŋua mini, li tie n Baa n bili la yaaba yaa po yo.»
24Ŋoadikaaba piiga yaaba n sieni n den gbadi lani, bi pala den beni bi naataanliediba yeni po. 25Jesu den yini ba ki yedi: «Yi bani ke yaa nibuoli n kaa tie Jufinba yaa baditieba mabindi ba, bi paatieba mo die ba leni u paalu.#Luk 22.25-26 26Lan da tie yeni yinba yaa siiga. Yi siiga yua n bua ki tua niciamo kuli, wan tua yi naacemo.#Mat 23.11; Mak 9.35; Luk 22.26 27Yua mo n bua ki tua liiga yua kuli, wan tua yi yonbo. 28Lani n tie o Ja Bijua n cua ki tiendi maama. Laa tie nitoaba n yaa tuuni opo ka, ama ke wan yaa tuuni nitoaba po, ki go pa o miali ki kpe, ki da ki faabi bi niba boncianla.»
Jesu noadi juama lie
(Mak 10.46-52; Luk 18.35-43)
29Jesu leni o ŋoadikaaba n den ña Jeliko dogu nni, yaa niligu n yaba den ŋua o. 30Juama lie den ka u sankunu. Ban den gbadi ke Jesu tagini ki pendi, bi den tangi: «Ti Daano, Dafidi Bijua, gbadi tipo mi niñima.» 31Ku niligu den funi leni ba ki yedi ke ban suoni, ama bi go den tangi ki pugidi: «Ti Daano, Dafidi Bijua, gbadi tipo mi niñima.» 32Jesu den sedi ki yini ba ki buali: «Yi bua min tieni yipo be?» 33Bi den goa ki yedi: «Ti Daano, ti bua ŋan pa ti ti nuni n yaa nua.» 34Mi niñima den cuo Jesu ke o sii bi nuni. Lanyogunu bi nuni go den nua ke bi ŋoadi o.
Jesu kua Jelusalema
(Mak 11.1-11; Luk 19.28-40; Jan 12.12-19)
Currently Selected:
MATIYU 20: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
