MI CILIMA 45
45
1Josefi naa go den fidi ki kubi o yuli yaaba n den lindi o kuli nintuali. O den kpaani ki yedi: «Teni mani bi niba n kuli ña.» Oba kuli n ki go den ye leni Josefi yaa yogunu, o den teni ke o kpeliba leni o waalo bandi wan tie yua.#JTT 7.13 2O den kpaani ki buudi. Ejipiti yaaba den gbadi, baa *Falono yaa diegu yaaba den gbadi ke o buudi. 3Josefi den yedi o kpeliba: «N tie Josefi yo. Naani n baa baa ye?» Ama o kpeliba naa den fidi ki guani o liba kelima bi yama den lengidi o nintuali. 4Josefi go den yedi o kpeliba: «Nagini mani n kani.» Bi den nagini, o den yedi ba: «N tie Josefi yi waalo yin den kuadi yua ke bi cuani o Ejipiti diema nni. 5Moala yin da go yagi mani yi yama yin da bieni mani yi pala yi yula po ke yi den kuadi nni ke bi cuani nni nekanba, kelima U Tienu n den soani nni yi liiga ki ciadi yi miana. 6Yi laa ke mi koma ye mi diema nni bina lie moala, li go sieni bina muu goga ke oba kan ko ki pedi. 7U Tienu den soani nni yi liiga ki baa teni ke yin yaa ye ki fo mi diema nni ki teni ke yin yaa ye kelima wani n bua ki puni laa *faabima. 8Lanwani li naa tie ke yinba kaa den soani nni nekanba, ama li tie U Tienu. O teni ke n tua nani Falono, ki tie o diegu kuli yudaano ki go tie Ejipiti diema kuli yaa gufeneeli. 9Gedi mani tontoni ki guani n baa kani ki yedi o: ‹A bijua Josefi yedi yaa maama n tie na. U Tienu teni ke n tua Ejipiti diema kuli yaa diedo, cua n kani ki da waagi. 10A baa yaa ye Gosena yaa dogu nni, a baa kuu leni nni, fini leni a bijaba leni a bijaba yaa bila, a pe, leni a ne leni ŋan pia yaala kuli. 11N baa dindi a likani kelima li sieni bina muu ke mi koma da baa yaa ye. Yeni, a kan luo liba, fini leni a diegu nni yaaba leni ŋan pia yaala kuli.›#JTT 7.14 12Yi laa leni yi nuni, n waalo Benjamina mo laa leni o nuni ke li tie mini nba yua n maadi leni yi. 13Yin waani n baa min baa yaa kpiagidi kuli Ejipiti diema nni leni yin laa yaala kuli. Yin teni n baa n cua ne tontoni.» 14O den sani ki bibi o waalo Benjamina ki buudi ke Benjamina mo den buudi. 15O den bibi o kpeliba kuli ki buudi. Lan den pendi o kpeliba den boni leni o.
Falono soani ke ban yini Jakobo Ejipiti diema nni
16Laa laabaalo den yadi Falono diegu nni kuli ke Josefi kpeliba cua. Laa bonla den mangi Falono pali leni o naacenba kuli yaa pala. 17Falono den yedi Josefi: «Waani a kpeliba yaa maama n tie na: ‹Tieni mani line. Tuni mani yi yandi ki guani Kanana diema nni. 18Taa yi baa leni yi denpo yaaba ki cua n kani. N baa pa yi Ejipiti diema nni yaala n ŋani ki cie yaala n sieni kuli, yi baa di mi diema yaa kpaandi yaadi n ŋani.› 19N teni a li ñoabonli ke ŋan yedi ba: ‹Tieni mani line: Taa mani ti teliti Ejipiti diema nni, yi bila leni yi puoba po ki taa yi baa ki cuani o nekanba. 20Yin da yagi yi yama yin ŋa yaala lipo yaa po, kelima yaala n ŋani ki cie likuli Ejipiti diema nni baa tie yi yaa po.› » 21Isalele bijaba den tieni yeni. Josefi den puni ba o teliti nani Falono n den yedi maama. O go den puni ba mi jiema u sanu po. 22O den puni yua kuli bi siiga ti tialebidikaadi. O den puni Benjamina ŋanjilifa kujapiena kobitaa leni tialebidikaadi muu. 23O den soani o baa po ŋunbi piiga ke bi tugi Ejipiti diema nni bonla yaala n ŋani ki cie ki go soani ŋunñuana piiga ke bi tugi *ŋalikama leni dupen leni mi jiema, o baa n baa di yaala u sanu po. 24Lanwani o den cabi o kpeliba ke ban fii ki yedi ba: «Yin da koani mani leni yiyaba u sanu nni.»
25Bi den fii ki ñani Ejipiti ki pundi Kanana diema nni bi baa Jakobo kani. 26Bi den yedi o: «Josefi baa ye, moko wani n die Ejipiti diema kuli.» Baa leni lankuli laa den yedi o liba kelima waa den daani bi maama. 27Bi den waani o Josefi n den maadi ba yaa maama kuli. O den laa Josefi n den soani yaa teliti ki baa gedini o. Lane ke bi baa Jakobo yaa yama go den duani ke o den yedi: 28«Maama ki ye! Josefi n bijua baa ye. N baa gedi ki ban le o ki daa kpe.»
Jakobo fii ki gedi Ejipiti diema nni
Currently Selected:
MI CILIMA 45: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
