MI CILIMA 44
44
1Josefi den maadi leni o diegu nni tuonsoanyudaano ki yedi: «Gbieni bi niba yeni kpalipadi mi jiema hali ban baa fidi ki tugi yaa banlu ki ŋuuni yua kuli yaa ligi o kpalipiagu ñoabu nni. 2Go taa n tadibuoga, yaaga n tie ŋanjilifa ki ŋuuni ku waajuogu yaa kpalipiagu nni ki taani leni o *ŋalikama yaa ligi.» O tuonsoanyudaano den tieni Josefi n den yedi o yaala kuli.
3Ku tiŋaagu, lan den yendi yaa yogunu, bi den cabi laa niba leni bi ŋunbi. 4Ban den ñani u dogu nni ki daa gedi foagima baa waamu, Josefi den yedi o tuonsoanyudaano: «Fii ki ŋoadi bi niba yeni. A yaa pundi bikani yaa yogunu ŋan yedi ba: ‹Be n teni ke yi tieni mi ŋanwaama? 5Li ga lede ke yi suni n diedo tadibuoga wan kubi yaaga ki lingi mi lingima yeni. Yin tieni yaala yeni, laa ŋani baa waamu.› » 6O tuonsoanyudaano den pundi bikani ki maadi ba laa maama. 7Bi den goa ki yedi o: «Be yaa po ke n diedo maadi laa maama buolu? U Tienu n kubi a naacenba ke ban da soani laa tuonli buolu. 8Diidi tin den laa yaa ligi ti kpalipadi ñoana nni, ti den ñani i hali Kanana diema nni ki guani i. Ti baa ga lede ki su ŋanjilifa bi wula ti diedo yaa diegu nni? 9Ŋan laa ki tadibuoga yua yaa kani a naacenba yaa siiga, wan kpe ti mo n tua n diedo yaa yonbi.» 10O den yedi ba: «To lan tua nani yin maadi maama yeni. Min laa ki tadibuoga yua yaa kani, o baa tua n yonbo, yinba, yi baa faabi ki naa pia i tagili.» 11Lanwani, tontoni yua kuli den jiini o kpalipiagu tiipo ke bi loti ti kpalipadi. 12O tuonsoanyudaano den diidi ti kpalipadi kuli niinni ki cili leni o nikpelo ki ban juodi leni ku waajuogu. O den laa ki tadibuoga Benjamina yaa kpalipiagu nni. 13Bikuli den padi bi tiadi. Yua kuli go den tuni o ŋunbo ki lebidi ki guani u dogu po.
Juda maadi ki baa ga Benjamina
14Juda leni o kpeliba leni o waamu den pundi Josefi yaa diegu nni ki sua ke o da ye likani ke bi gbaani ki pugi o. 15Josefi den yedi ba: «Yi soani be yaa tuonli n yeni? Naani yii bani ke n tie yua n baa fidi ki bandi yaala n tieni baa bi yaa waani nni?» 16Juda den goa ki yedi o: «Ti baa yedi ti diedo be? Ti baa maadi lede? Ti baa fidi ki saa ti yula po i moamoani lede? U Tienu den laa a naacenba biadima. A nua ti, ti tie n diedo yonbi tinba leni ban bi laa ki tadibuoga yua yaa kani kuli.» 17Josefi den yedi: «U Tienu n kubi nni min da tieni yeni. Ban bi laa ki tadibuoga yaa ja yaa kani, wani n baa tua n yonbo, ama yinba, yin guani yi baa kani leni mi yanduanma.»
18Lanwani Juda den nagini Josefi kani ki yedi o: «Tieni npo sugili n diedo ke a naacemo n fidi ki maadi n diedo kani mayenma a pali n da be leni a naacemo kelima a tie nani *Falono. 19N diedo den buali o naacenba ki yedi ba: ‹Naani yi pia baa, bi o waalo?› 20Ti den goa ki waani a ke ti pia baa, ke o tie jakpelo leni ti waalo yua n tie ti baa nikpedi yaa bijua. Laa biga den pia o kpelo, yua n kpe ki den taa leni o naa. O sieni o bebe ke o baa bua o hali boncianla. 21Lanwani a den yedi a naacenba: ‹Teni wan cua n kani ke min le o leni n nuni.› 22Ti den goa ki yedi ti diedo: ‹Ki biga kan fidi ki ŋa o baa, o yaa ŋa o, o baa baa kpe.› 23A den yedi a naacenba: ‹Yi waalo yaa yegi leni yi ki cua, yi kan go le n nunga.› 24Tin den guani ki pundi a naacemo ti baa kani, ti den waani o n diedo maama kuli. 25Ti baa den yedi ti: ‹Guani mani ki da tipo mi jiema waamu.› 26Ti den goa ki yedi o: ‹Ti kan fidi ki gedi, ama li yaa tie ke ti waajuogu yegi leni ti, ti baa gedi. Kelima ti waalo yaa ye leni ti, ti kan fidi ki le laa ja nunga.› 27A naacemo ti baa den yedi ti: ‹Yi bani ke n pua den mali npo jaba lie. 28Yendo den ñani n kani n tama ke bonbiiguba n den toatoadi o kelima n naa go laa o hali moala. 29Yi yaa go taa o ne yua n sieni ke bonbiadila cuo o, yi baa teni n yukobipiendi n kua mi kuuma kaanu leni li paboanli.› 30Moala n yaa guani a naacemo n baa kani ke ki biga naa ye leni ti, o naano n bua wani yua yaa naano boncianla yeni, 31o baa kpe, o yaa laa ke ki biga naa ye leni ti. A naacenba baa teni a naacemo ti baa yukobipiendi n kua mi kuuma kaanu leni li paboanli. 32Mini a naacemo n pia i panpaani ki biga po. N den yedi n baa: ‹N yaa guani o a kani, n baa ye leni i tagili n baa kani hali yaa yogunu kuli.› 33Lanwani n mia ŋa ŋan cedi a naacemo n ga ki biga kaanu ki sedi ki tua n diedo yonbo ki biga n yegi leni o kpeliba ki kuni. 34N baa tieni lede ki guani n baa kani, ki biga yaa ye leni nni. Ŋain. Mii bua ki le n baa paboanli.»
Josefi teni ke bi bandi wan tie yua
Currently Selected:
MI CILIMA 44: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
