MI CILIMA 39

1Bi den gedini Josefi Ejipiti po ke o bado *Falono koanbali bi tandanba yudaano Potifala, Ejipiti yua, den da o Isimayeli yaaba kani, yaaba n den gedini o Ejipiti. 2Li Miali Diedo den ye leni Josefi ke li bonla kuli den cuoni opo bonŋanla o canbaa Ejipiti yua diegu nni.#JTT 7.9 3O canbaa den laa ke Li Miali Diedo den ye leni o ke Li Miali Diedo den teni ke Josefi n moandi ki tiendi yaala kuli cuoni bonŋanla. 4Josefi canbaa pali den mangi leni o ke o kuani o o deni ki teni ke o diedi o diegu nni yaa tuonli leni wan die yaala kuli. 5Potifala n den teni ke Josefi diedi o diegu leni o piama kuli, laa yogunu Li Miali Diedo den seligi Ejipiti yua diegu kelima Josefi yaa po. Li Miali Diedo yaa seli den ye leni wan den pia yaala kuli, li yaa tie ku diegu nni bi i kuani po. 6O den piani wan pia yaala kuli Josefi yaa nuu nni kelima o den dugi Josefi po. Waa go den yagini o yama bonliba kuli po se wan kua ki je bebe.

Josefi leni o canbaa pua

Josefi den ye leni mi jawaama hali bonŋanla.

7Lan den yuandi Josefi canbaa pua den diidi o mi buama nuni ki yedi o: «Cua ki duani leni nni.» 8O den yie ki yedi o canbaa pua: «Diidi n canbaa dugi npo cain, ki piani nni wan pia yaala kuli o diegu nni. Waa go tiendi liba kuli o diegu nni. 9Nilo naa ye ku diegu nni kuli yua n cie nni. Waa yie npo bonliba kuli se fini bebe, kelima a tie o pua. N baa ga lede ki tieni laa biadicianma, ki tieni ti *tuonbiadi U Tienu po.» 10Baa ke o pua den maadi leni Josefi daali kuli o den yie ke o kan duani leni o, ke o kan yaa kuu leni o mo. 11Dayenli ke o den kua li dieli nni ki baa soani o tuonli. Ku diegu nni yaaba, baa niyendo naa den ye likani. 12O pua den cuo o liadili ki yedi o: «Cua ki duani leni nni.» O den ŋa o liadili o nuu nni ki sani ki ñani niinpo. 13O pua n den laa ke o ŋa o liadili o kani o nuu nni ki sani ki ñani niinpo, 14o den yini ku diegu nni niba ki yedi ba: «Diidi o den cuani Ebilu yua tikani ke wan janbi ti. Laa ja bi cua n kani ki bua ki duani leni nni, ama n kpaani ki buudi. 15Wan bi sua ke n kpaani ki buudi o ŋa o liadili n kani ki saa ñani niinpo.» 16O den bili Josefi liadili o kani hali ke o canbaa kpeni. 17Lanwani o den yedi o yaa maama n tie na: «Ŋan den cuani yaa yonbo Ebilu ki kuani o tikani yeni, bi cua n kani ki baa janbi nni. 18Ama n den kpaani ki buudi ke o ŋa o liadili n kani ki sani ki ñani niinpo.» 19Wan den gbadi o pua maama ke o yedi o: «Diidi a yonbo n tieni nni yaala.» Josefi canbaa pali den beni hali boncianla.

Josefi ye li kpaadidieli nni

20O den cuo Josefi ki kuani o li kpaadidieli nni. Josefi den ye lankani li kpaadidieli nni ban yen luondi o bado naacenba yaa kpaadidieli nni yeni.

21Li Miali Diedo den ye leni Josefi ki puuni o o *ŋanbili. O den teni ke li kpaadidieli guudo pali mani Josefi po.#JTT 7.9 22Li kpaadidieli guudo den teni ke Josefi guu a kpaada kuli, yaaba n den ye li kpaadidieli nni ke tuonliba kuli kan den tieni ke waa bani. 23Li kpaadidieli guudo naa den buali ki bandi Josefi n tiendi maama, kelima Li Miali Diedo den ye leni o. Li Miali Diedo den teni ke Josefi n den tiendi yaala kuli cuoni bonŋanla.

Currently Selected:

MI CILIMA 39: GUX03

Highlight

Copy