MI CILIMA 38
38
1Laa yogunu Juda den foagidi leni o naataani ki gedi Adulama dogu yaa ja kani, ke o yi Hila. 2Lanwani Juda den laa Kanana yua yaa bisalo ke o yi Sua ki taa o ke o tua o pua ki kua o kani. 3O den punbi ki mali bonjaga ki yini o Ela. 4O go den punbi ki mali bonjaga ki yini o Onana. 5O go den mali bonjaga ki yini o Sela. Juda den ye Siba dogu, o pua n den mali Sela yaa yogunu.
6Juda den taa o pua o bijakpelo Ela po ke o yi Tamala. 7Juda bijakpelo Ela den bia Li Miali Diedo U Tienu nintuali ke Li Miali Diedo U Tienu den teni ke o kpe. 8Lanwani Juda den yedi Onana: «Kua a kpelo pua kani ki taa. Kelima a tie o kobianu ki maa a bila a kpelo po.»
9Nani Onana n den bani ke laa bila kan tua o yaa yaaba yeni, o yaa den taani leni o pua yaa yogunu kuli waa den juodi o niinni, ama o den yen ñani ki wuli ma tinga nni ke wan da pa o kpelo a bila. 10Wan den tiendi yaala den biidi Li Miali Diedo pali ke o teni ke o moko kpe. 11Lanwani Juda den yedi o biyuaga Tamala, ŋan yaa ye a baadiegu nni ki yaa tie li kpepuoli hali n bijua Sela n yabidi. O den maadi yeni kelima o den jie ke Sela baa kpe nani o kpeliba n den kpe maama. Tamala den gedi ki kali o baadiegu nni.
12A dana den pendi ki waagi ke Juda yaa pua Sua yaa bisalo den kpe. Juda n den baa i baagi ki duani o yama yaa yogunu, o den gedi Timina dogu, yaaba n den moagidi o pe kobidi n den ye naankani, wani leni o danli Hila Adulama yua. 13Bi den waani Tamala laa maama ki yedi o: «Diidi a calo baa caa Timina ki baa n moagidi o pe kobidi.» 14Lanwani o den landi o kpepotiadi ki taa o kpalibu ki libini. O den kali Enayima dogu buliñoabu kani, yaabu n ye Timina sanu po kelima o den laa ke Sela den yabidi ki tua ja ke bi naa den puni o Sela ke o tua o pua.
15Juda den laa o ki tama ke o tie poconconli, kelima o den libini o nunga. 16O den nagini o u sanu nni ki yedi o: «Cedi min duani leni a.» Waa den bani ke o tie o biyuaga. O den yedi o: «A baa pa nni be ki taani leni nni?» 17O den yedi o: «N baa ñani n yangoli nni ŋuabiga ki soani apo.» O den yedi o: «Naani a baa pa nni siedi yaa bonla hali ŋan baa soani ki ŋuabiga?» 18O den goa ki yedi o: «N baa pa ŋa be yaa siedi bonla?» O den yedi: «Pa nni a ñoagilakaama leni mi gaalu leni ŋan kubi yaa gbiamu a nuu nni.» O den puni o lankuli. Lanwani o den duani leni o ke o punbi opo. 19O pua den fii ki ban caa. O den libidi o kpalibu ki go lani o kpepotiadi.
20Juda den soani ki ŋuabiga ke o danli Adulama yua n teni o ki nan ga o siedi bonla o pua kani. Ama waa den laa oba. 21O den buali laa dogu yaa niba ki yedi ba: «Yaa poconconli n den kaa Enayima u sanu nni yeni o ye le?» Bi den goa ki yedi o: «Poconconli naa ye ne baa yendo.» 22O den guani Juda kani ki yedi o: «Mii laa o, baa likani yaaba yedi ke poconconli ki ye bi dogu nni.» 23Juda den yedi: «Wan kubi wan pia yaala. Tin da teni ban fali ti. N den soani n ŋuabiga, ama ŋaa laa o.»
24Lan den bua ki pundi ŋmaali taa yaa yogunu, bi den cua ki yedi Juda: «A biyuaga Tamala tieni o *conconma, diidi o punbi kelima o conconma po.» Juda den yedi: «Teni mani ban ñani o ki sia o mi fantama nni wan kpe.» 25Ban den ñani o yaa yogunu o den yedi o calo baa: «Li tie yaa ja n die yaa bonla n tie na wani n punbi nni. N mia ŋa diidi ki bandi yua n die mi ñoagilakaama na leni mi gaalu leni u gbiamu na.» 26Juda den bandi la ki yedi: «O tiegi ki cie nni kelima mii den puni o n bijua Sela.» Juda naa go den kua o kani.
27Wan den baa ma yaa yogunu bi den sua ke li tie pola. 28O madi yogunu, yendo den ñani o nuu ke o madimaanlo den cuo ki loli i gaalimoani ki yedi: «O ne n kpa mali.» 29Ama o den goa ki kuani o nuu ke o lielo kpa ñani ke o madimaanlo yedi: «A ñani bee ñama n yeni?» O den yini o yeli Peletisa.#38.29 Peletisa: Diidi Lut 4.12,18. 30Lanpendi o waalo den ñani ke o nuu den luo i gaalimoani. O den yini o Sela yaali n bundi «mi yenpudima.»
Josefi ye Ejipiti yua Potifala diegu nni
Currently Selected:
MI CILIMA 38: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
