MI CILIMA 37
37
1Jakobo den kaa Kanana diema nni, o baa mo n den kali naankani. 2Bine mo n tie Jakobo yaa bijaba. Josefi n den pia piiga n bina lele, o den taani leni o kpeliba ki kpaa li yangoli. Laa biga den ye leni o baa yaa puoba Biliha leni Silipa yaa bijaba. Josefi den wangi o baa, wan gbadi o kpeliba kani yaa mayuodi kuli. 3Isalele den bua Josefi ki cie o bijaba kuli kelima o den baa o o nikpedi nni. O den tieni opo li liadiñoalincianli. 4O kpeliba den laa ke bi baa den bua o ki cie bikuli, bi den cili ki nani o. Baa den fidi ki maadi leni o leni mi buama. 5Josefi den dangi ti dangidi ki waani o kpeliba ke bi den nandi o ki pugini kelima tini yaa po. 6O den yedi ba: «Cengi mani min den dangi yaa dangidi: 7Tikuli den ye u kuanu siiga ki luo *ŋalikama baba. Lanwani diidi mani n yaa babili den fii ki sedi, ke yi yaa baba den lindi li, ki labini li nintuali.» 8O kpeliba den yedi o: «Naani a tama ke a baa diedi ti? A tama ke a baa tua ti canbaa bii?» Bi go den nandi o ki pugini kelima o dangidi leni o maama yaa po.
9O go den dangi ti dangidi ki waani o kpeliba. O den yedi: «N dangi ke u yienu leni o ŋmaalo leni piiga n ŋmabiyenga den labini n nintuali.»
10O den waani laa maama o baa leni o kpeliba kuli. O baa den funi leni o ki yedi o: «Ŋan den dangi yaa dangidi yaa bundima tie be? Naani a tama ke tinba, mini leni a naa leni a kpeliba baa cua ki gbaani ki pugi a bii?»
11O kpeliba den pia opo li nunponbiadili, ama o baa den tiani laa bonla ki naa sundi.#JTT 7.9
Josefi kpeliba kuadi o
12Josefi kpeliba den gedi Sikema ki kpaa bi baa yangoli. 13Isalele den yedi Josefi: «A kpeliba ye Sikema ki kpaa li yangoli. Cua na, n bua ki soani a bikani.» Josefi den goa ki yedi o baa: «Mini n na.» 14Isalele den yedi o: «N mia ŋa, gedi ki le a kpeliba yaa ye leni laafia ke li yangoli mo ye leni laafia ki guani ki pa nni bi laabaali.» Wan den soani o yeni Josefi den fii Ebiloni yaa joaloangu nni ki gedi Sikema po. 15O ja den tuogi o ke o yaadi ku muagu nni. O den buali o ki yedi o: «A lingi be?» 16Josefi den yedi o: «N lingi n kpeliba. N mia ŋa ŋan waani nni ban kpaa bi yangoli naani.» 17Laa ja den yedi o: «Bi den ye nekanba, ama n den gbadi ke bi maadi ki tua: ‹Tin fii ki gedi Dotana.› » Josefi den ŋoadi o kpeliba ki laa ba Dotana po. 18Bi den laa o hali foagima. Hali ke o daa den nagini bikani, bi den juogi ban baa kpa o maama. 19Bi den yedi biyaba: «Diidi ti dangidi daano n kpendi yeni! Cua mani moala tin kpa o ki lu o cakuonliba nni. 20Ti baa waani ke bonbiiguba n ŋmani o. Li yaa puoli ti baa le o dangidi n baa tua yaala.»
21Lubena den gbadi lankuli ki bili o yama nni ke o baa faabi Josefi. O den yedi ba: «Tin da ñani o miali ba.»
22Lubena den yedi ba: «Yin da wuli mani mi soama. Lu o mani li naa cakuonli nni yaali n ye mi fanpienma nni ki da waani o fala leni yi nii. O den jagi ke o baa faabi o bi nuu nni ki guani o o baa kani.»
23Josefi n den pundi o kpeliba kani, bi den landi o liadiñoalincianli wan den laa yaali yeni. 24Bi den taa o ki luni o li cakuonli nni. Laa caali den tie bonkuonli ki naa pia ñima. 25Lani n pendi, bi den kali ki baa je. Lanwani bi den yaadi ki laa Isimayeli yaaba boncianla ke bi ñani Galaadi. Bi yuoyuodi den tugi yaa tibidi n pia u nuulu manu leni mi kpama leni yaa daadi n yi *mili ki pia u nuulu manu ban den caani yaala Ejipiti diema nni ki baan kuadi. 26Lanwani Juda den yedi o kpeliba: «Li baa pia tipo mi laa fuome ti yaa kpa ti waalo ki wuoni o soama? 27Cua mani tin kuadi o Isimayeli yaaba po ki da waani o fala leni ti nii kelima o tie ti waalo ki taa leni ti ti gbanandi.» O kpeliba den cengi o maama. 28Madiana yaaba kpenkpenda n den pundi bi den dadi Josefi ki ñani o li cakuonli nni ki kuadi o Isimayeli yaaba po ki baa opo kujapiena piilie. Bi den taa o ki gedini o Ejipiti.#JTT 7.9 29Lubena den guani ki cua li cakuonli yeni kani ki sua ke Josefi naa go ye li niinni. 30O den padi o tiadi ki guani o waamu kani ki yedi ba: «Ki biga naa go ye likani, n mo baa kua le?»
31Lanwani bi den taa Josefi liadili ki kodi li ŋuabuali ki ñuagi li liadili mi soama nni. 32Bi den soani li liadiñoalincianli yeni bi baa kani ki teni ke bi yedi o: «Diidi tin den laa yaala. Bandi li yaa tie a bijua yaa liadili bi li yaa tie lini.» 33Jakobo den bandi li ki yedi: «Li tie n bijua yaa liadili. Bonbiiguba n ŋmani o. O toatoadi Josefi bonjena jena.»
34Jakobo den padi o tiadi ki lani li paboanli tiadi ki biidi o pali o bijua yaa kuuma po hali ke li waagi. 35O bijaba kuli leni o bisiaba kuli den cua ki baa baagi o. Ama waa den bua ki ga i baagi baa waamu. O den yedi: «Li baa tie leni li paboanle ke n baa jiidi mi kuuma kaanu ki pundi n bijua kani. O den buudi yeni o bijua yaa po.»
36Madiana yaaba den kuadi Josefi Ejipiti nni Potifala po, yua n den tie o bado *Falono yaa koanbali bi toatieba yudaano.
Juda leni Tamala
Currently Selected:
MI CILIMA 37: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
