MI CILIMA 26
26
1Mi koma den tieni mi diema nni ke laa taa leni yaa konkpiama n den tieni Abalahama yaa yogunu. Isaaka den fii ki gedi Filisiti yaaba yaa bado Abimeleka kani Gelada dogu po. 2Li Miali Diedo den doagidi o kani ki yedi: «Ŋan da gedi Ejipiti diema nni. Ŋan yaa ye min baa waani a yaa diema nni. 3Ŋan yaa ka mi naa diema nni n baa ye leni a, ki seligi a kelima n baa pa ŋa yaa diema n tie na kuli fini leni a yaa yaabila po. N baa kubi min den poli yaa poli a baa Abalahama po. 4N baa teni a puoliŋuani n yaa yaba nani tanpoli ŋmabila n yaba maama yeni. N baa pa yaa diema n tie na kuli a yaa yaabila ki tinga nni nibuoli kuli baa baa li seli kelima a yaa yaabila yaa po.#Cil 22.16-18 5Li baa tua yeni kelima Abalahama den cengi n nialu ki kubi n ñoabona leni n *bali maama kuli.»
6Isaaka den kali Gelada. 7Laa kaanu yaa niba n den buali Isaaka, o pua maama. O den yedi ke o tie o waalo yo kelima o den jie ke o yaa yedi ke o tie o pua, likani niba den baa kpa o kelima Lebeka den ŋani hali bonŋanla.#Cil 12.13; 20.2
8Nani wan den waagi ki ye likani yeni, Abimeleka Filisiti yaaba bado den se o dieli bonli kani ki diidi ki laa ke Isaaka jeli leni o pua Lebeka. 9Abimeleka den teni ke bi yini Isaaka ki yedi: «I moamoani o tie a pua yo. Li ga lede ke a den yedi nni ke o tie a waalo yo?» Isaaka den goa ki yedi o: «N den maadi yeni kelima n den jie ki da kpe kelima o yaa po.»
10Abimeleka den yedi o: «A tieni tipo be n yeni? Li den poadi waamu bebe n diema niba nni siiga yendo bi baa duani leni a pua, yeni mo a den baa kuani ti i tagili nni.»
11Abimeleka den ñani li ñoabonli bi niba kuli po ki yedi ba: «Yua n sii o naa ja bi o pua kuli bi baa kpa o.»
12Isaaka den coagi o kuanu laa diema nni. Laa binli o kuani den loni ke o baa hali taalima kobiga kelima Li Miali Diedo den seligi o. 13O den tua ŋalimandaano. O ŋalimano den pugidi hali ke o den tua piadiciamo. 14O den pia a yangola, ti yanbidi leni a yangbenga kuli ki go pia bi naacenba boncianla.
Isaaka leni Abimeleka kuani o ŋantaado bi siiga
Filisiti yaaba den pia opo li nunponbiadili. 15O baa Abalahama naacenba n den gbini yaa caana ke Abalahama da pia o miali, Filisiti yaaba den piini ŋa ki gbieni a leni mi tama. 16Abimeleka den yedi Isaaka: «Fii ki ña ti siiga kelima a pia u paalu ki cie ti hali boncianla.»
17Isaaka den fii lankani ki jiidi Gelada yaa joaloangu nni ki kali lankani. 18Isaaka den piidi ban den gbini yaa caana hali o baa Abalahama yogunu, Filisiti yaaba n den piini yaa o kuuma puoli po yeni. O go den yini ŋa o baa n den kpa yini ŋa maama yeni. 19Isaaka naacenba go den gbini a caana ku joaloangu nni ki laa yaa caali n tie li ñinbunli. 20Gelada yaa yankpaaba den koani leni Isaaka yaa yankpaaba ki yedi: «Li tie ti yaa ñime.» O den yini laa caali yaa yeli n tie na: Eseka kelima bi den koani leni o lankani. 21O naacenba go den gbiidi caatoali ke bi go den lingi o li koanli laa caali moko yaa po. O den yini li Sitina. 22O go den foagidi lankani ki go gbiidi caatoali ke bi naacenba yeni naa go den koani leni o. O den yini laa caali Lehoboti. O den yedi: «Li tie kelima Li Miali Diedo puni ti mi fanma moala yo ke ti baa laafia mi diema nni.»
23O den fii lankani ki gedi Beli-Seba. 24Li Miali Diedo den goa ki gedi o kani ku ñiagu ki yedi o: «N tie a baa Abalahama yaa Tienu yo. Ŋan da jie kelima n ye leni a, n baa seligi a kelima n naacemo Abalahama yaa po.»
25Lankane ke Isaaka den maa li *padibinbinli ki jaandi Li Miali Diedo ki go tii o gbandieli. Isaaka naacenba go den gbiidi li caali lankani.
26Abimeleka den ñani Gelada ki pundi Isaaka kani ke o danli Ahusata leni o guudikaaba yudaano Pikola den yegi leni o.#Cil 21.22 27Isaaka den yedi ba: «Be yaa po yo ke yi kpendi n kani? Kelima n sua ke yi nani nni ki den deli nni yi kani.»
28Bi den goa ki yedi o: «Kelima ti laa ke Li Miali Diedo n ye leni a. Lani yaa po yo ke ti yedi tin poli li poli ti siiga, tinba leni fini yaa siiga, tin kuani o *ŋantaado leni tiyaba. 29Ŋan poli ke a kan tieni tipo yaala n bia nani timoko n naa den tieni apo yaala n bia maama yeni. Ti den tieni apo yaala n ŋani bebe ki teni ke a fii leni mi yanduanma. Moala ti laa ke a baa li seli Li Miali Diedo kani.»
30Isaaka den ŋanbi bipo mi jaanjiema ke bi dini ki go ñuni. 31Bi den fii ku tiŋaapanpangu ki kuani laa ŋantaado bi siiga kelima li poli yaa po. Isaaka den cabi ba ke bi fii o kani leni mi yanduanma.
32Laa daali Isaaka naacenba den cua ki waani o ban den gbiidi yaa caali yaa maama ki yedi o ke bi laa mi ñima.
33O den yini laa caali Siba. Li tie lani yaa po ke bi yini laa dogu Beli-Seba baa hali dinla yaala n bundi «u ñoanianu caali.»
Esayu ñiigili
34Esayu n den pia bina piinaa yaa yogunu, o den taa puoba lie, Heta yaa yua Beeli yaa bisalo Judita leni Heta yaa yua Elona yaa bisalo Basimati. 35Bi den cuani li pabiidicianli Isaaka leni Lebeka po.
Jakobo kubini ki fie Esayu seli
Currently Selected:
MI CILIMA 26: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
