MI CILIMA 27
27
1Isaaka den podi ke o nuni den tadigi hali ke waa go den nua. Lanyogunu o den yini o bijakpelo Esayu ki yedi o: «N bijua.»
2O den goa yedi o: «Mini n na.» Isaaka den yedi o: «Diidi ki le, n podi, mii bani min baa kpe yaa daali. 3Lanwani n mia ŋa moala, taa a toatiadi, a piemi leni a dabanli ki gedi ku muagu po ki lingi npo ti moanandi 4ki ŋanbi npo mi jiema nani min bua maama ki cuani npo min je ke min gaali ŋa hali ki daa kpe.»
5Lebeka den cengi Isaaka n den yedi o bijua Esayu yaala kuli. Esayu den gedi ku muagu po ki baa n lingi ti moayandi ki cuani. 6Lanwani Lebeka den yedi o bijua Jakobo: «Diidi n gbadi ke a baa maadi leni a kpelo Esayu yaa maama n tie na: 7‹Lingi npo ti moayandi ki ŋanbi npo mi jiema min je ke n baa gaali ŋa Li Miali Diedo nintuali hali ki daa kpe.› 8Lanwani moala n bijua cengi min baa yedi a yaala ki tieni min baa puogi a yaala. 9Gedi ki taa npo ŋuabigbenga lie li yangoli kani. N baa ŋanbi a baa po mi jiema nani wan bua maama. 10A baa gedini ma a baa kani wan je ki gaali ŋa hali ke o daa kpe.» 11Jakobo den goa ki yedi o naa: «Diidi n kpelo Esayu pia ti kobidi boncianla, ama mini n naa pia kobidi. 12Daalinba n baa baa baali nni ke n baa tua o tuofaadaano o nuni po, wan ti soli nni ki kan gaali nni baa waamu.» 13O naa den yedi o: «Laa solindi n guani n yaa yuli po, n bijua. Cengi n yedima bebe ki gedi ki taa npo ti yandi.»
14Jakobo den gedi ki taa ti ki cuani ti o naa kani ke o den ŋanbi mi jiema nani o baa n bua maama. 15Lanwani Lebeka den taa o bijakpelo Esayu yaa tiadi yaadi n ŋani ki cie wan den pia yaala kuli li dieli nni ki teni o bonwaalo Jakobo ke o lani ti. 16O den pini Jakobo yaa nii leni a ŋuabila yaa gbandi leni o tulu yu naa den pia ti kobidi. 17O den teni o bijua Jakobo wan den ŋanbi yaa jiema leni dupen. 18Jakobo den gedi o baa kani ki yedi: «N baa.» Isaaka den yedi: «Mini n na. A tie ŋme n bijua?»
19Jakobo den yedi o: «N tie Esayu a bijakpelo. N tieni ŋan bi yedi nni yaala. N mia ŋa fii ki kali ki je n moanandi ki gaali nni.» 20Isaaka den yedi o bijua: «Li tieni lede ke a baa ti nandi tontoni?» Jakobo den goa yedi o: «Li tie Li Miali Diedo a Tienu n teni ke ti cua n kani.»
21Isaaka den yedi Jakobo: «Lanwani nagini ke min baali a n bijua ke min bandi a yaa tie n bijua Esayu bi a yaa tie.»
22Jakobo den nagini o baa Isaaka kani. Isaaka den baali o ki yedi: «U nialu tie Jakobo yaa nialu ama i nii tie Esayu yaa nii.»
23Waa den bandi o kelima o nii den pia ti kobidi nani o kpelo Esayu yaa nii n pia maama yeni. Lanwani Isaaka den gaali o. 24O den yedi: «Li tie fini n bijua Esayu i moamoani bi?» Jakobo den goa ki yedi o: «Li tie mine.»
25Isaaka den yedi o: «Teni nni min je n bijua a moanandi ke min gaali a.» Jakobo den teni o ke o dini. O go den cuani opo mi daama ke o ñuni. 26Lan n pendi o baa Isaaka den yedi o: «Lanwani nagini n kani ki gobini nni, n bijua.» Jakobo den nagini ki gobini o.
27Isaaka den gbadi o tiadi yaa nuulu ki gaali o ki yedi:
«Diidi n bijua yaa nuulu
Tie ku muagu yaa nuulu ke Li Miali Diedo seligi u#Ebl 11.20.
28U Tienu n pa ŋa tanpoli yaa mangu
Leni ki tinga yaa kpama mo
Leni *ŋalikama leni mi daama hali lan kandi.
29Bi niba kuli n miini bi yula a kani.
I nibuoli kuli n labini a nintuali
Ŋan tua a naataani canbaa.
A naa yaa bila n labini a nintuali.
Ti solindi n yaa ye leni yua n soli a.
Li seli n yaa ye leni yua n gaali a kuli.»#Cil 12.3
30Isaaka n den gaali Jakobo ki gbeni ke Jakobo fii o baa Isaaka kani, laa yogunu Esayu den ñani ti tuadi ki kpeni. 31Omo den ŋanbi mi jiema ki taa ki gedini o baa kani ki yedi o baa: «N baa fii ki je a bijua moanandi ke ŋan gaali nni.» 32O baa Isaaka den yedi o: «A tie ŋme?» O den goa ki yedi: «N tie a bijakpelo Esayu.»
33Ti yanyagiciandi den cuo Isaaka ki lengidi o boncianla ke o yedi: «Ŋme n nan lingi ti moanandi ki cuani n kani. N dini likuli hali ke a daa cua, ki gaali maama n ki go pia gaama mo abada.»
34Esayu n den gbadi o baa maama yeni, o den yaadi ki kpaani ki buudi boncianla ki ye leni li pabiidicianli. O den yedi o baa: «Go gaali n moko n baa.»
35Isaaka den yedi o: «A waalo cua leni i janbi ki ga a yaa gaali.»
36Esayu den yedi: «Naani li tie kelima bi yini o yeli Jakobo yo ke o janbi nni taalima lie kuli? O den kpa ga n nikpedi. Diidi moala o go ga n yaa seli.» O go den yedi: «Ŋaa sieni npo i gaali baa waamu?»#Cil 25.29-34
37Isaaka den goa ki yedi o: «Diidi n bili ke wan yaa tie a canbaa, n puni o o naataani kuli ke ban yaa tie o naacenba, n puni o ŋalikama leni o duvenpaano. N bijua be go sieni ke n baa fidi ki tieni apo?»
38Esayu den yedi o baa: «N baa, ŋaa go pia gaali se laa gaali bebe? Gaali n moko, n baa.» Esayu den kpaani ki buudi.#Ebl 12.17
39O baa Isaaka den goa ki yedi o:
«Diidi a denpo baa luo ki tinga yaa kpama
Ki go luo tanpoli mangu#Ebl 11.20.
40A baa yaa ye kelima a jugisiega yaa paalu po
A baa tie a waalo yonbo.
Ama ŋan baa kpaagi ki puagi yeni,
A baa ti faabi leni o yonbidi.»#Cil 36.8; 2Bad 8.20
Jakobo sani ki gedi o yiado Labana po
41Esayu den cili ki gbie leni ki nanga Jakobo po kelima o baa n den gaali o yeni yaa po. Esayu den yedi o pali nni: «N baa kuuma daali kpendi, laa yogunu yaa pundi n baa kpa n waalo Jakobo.» 42Bi den cua ki waani Lebeka o bijakpelo Esayu maama. Lanwani o den teni ke bi yini o bonwaalo Jakobo ki yedi o: «Diidi a kpelo Esayu baa guani a a panpaani ki kpa ŋa. 43Lanwani n bijua cengi n maama. Fii ki sani ki gedi hali Halana, n kpelo Labana kani. 44Ŋan yaa ka o yaa kani lan waagi waamu hali a kpelo pabienli n kuugi, 45hali a kpelo nanga n pendi ki ŋa ŋa wan sundi ŋan den tieni o yaala. Lanwani n baa teni ŋan guani. Be yaa po ke yinba niba lie kuli baa taani ki bodi npo dayenli?»
46Lebeka den yedi Isaaka: «N yama ñani li miali nni kelima Heta yaa bisiaba yaa po. Li yaa tie ke Jakobo taa o pua nani bani n tie maama yeni, Heta yaa bisiaba yaa siiga mi naa diema yaaba yaa siiga, n miali go pia npo mi laa fuome?»
Currently Selected:
MI CILIMA 27: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
