LUKA 13

Ni mɔgɔw ma nimisa ka faran u ka kojuguw la, u bɛna halaki

1O waati la, Pilati tun ye Galileka dɔw nii bɔ k'u to begɛnw faga la Ala ye. Mɔgɔ dɔw nana o lakali Yezu ye. 2Yezu y'a fɔ u ye ko: “Aw bɛ miiri k'o Galileka nunu sara ten bari u tun bɛ kojugu kɛ ka tɛmɛ Galileka tɔw bɛɛ kan wa? 3Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana. 4Silowe ciin sangaso benna mɔgɔ tan ni seegi minw kan k'u faga, aw bɛ miiri ko olu tun ye kojugukɛlaw ye ka tɛmɛ Zeruzalɛmuka tɔw bɛɛ kan wa? 5Ne b'a fɔ aw ye ko tinyɛ t'o ye. Ni aw ma nimisa ka faran aw ka kojuguw la, aw bɛɛ bɛna halaki fana.”

Yezu ye talen min la torosun denbali koo la

6O kɔ, Yezu ye talen nin la u ye ko: “Torosun tun bɛ cɛɛ dɔ fɛ a ka foro la. Loon dɔ, a taara toro nyini a la, nga a ma foyi sɔrɔ. 7O loon nin na, a y'a fɔ a ka baaraden ye ko: ‘Ne saan saba filɛ nin ye, ne bɛ na toro nyini torosun nin na, ne tɛ foyi sɔrɔ a la. A tigɛ. Kuun t'a la a ka to foro kɔnɔ gwansan.’ 8Nga baaraden y'a jaabi ko: ‘A to nyinan tugu. Ne bɛna dingɛ sogi k'a lamini ka nɔgɔ kɛ a kɔrɔ. 9Ni o kɛra, n'a sɔrɔ a bɛna deen kɛ saan wɛrɛ. N'a ma deen kɛ, i bɛn'a tigɛ.’ ”

Yezu bɛ muso banabagatɔ dɔ kɛnɛya lafinyɛlon dɔ la

10Lafinyɛlon dɔ la, Yezu tun bɛ mɔgɔw kalanna Alabatoso dɔ kɔnɔ. 11Muso dɔ tun bɛ o yɔrɔ la, jinabana tun b'a la kabini saan tan ni seegi. Bana nin tun y'a kɔɔ kuru, a tun tɛ se ka tilen ka lɔ. 12Yezu y'a ye tuma min na, a y'a wele k'a fɔ a ye ko: “Muso, i kɛnɛyatɔ filɛ nin ye.” 13Yezu y'a bolo la muso kan. O yɔrɔnin bɛ, a kɔɔ tilenna, a y'a daminɛ ka Ala tando.

14Nga Alabatoso kuntigi dimina bari Yezu ye mɔgɔ kɛnɛya lafinyɛlon na. A ye kuma ta k'a fɔ jama ye ko: “An ka kan ka baara kɛ tile wɔɔrɔ kɔnɔ. Aw ka na o loonw na, a k'aw kɛnɛya. Aw kana na lafinyɛlon na.”

15Matigi y'a fɔ ko: “Aw ye nanbaranmɔgɔw le ye! Lafinyɛlon na, aw bɛɛ kelen kelen tɛ aw ka misi, walima aw ka fali foni ka taa u sɔn jii la wa? 16Muso nin min buruju bɔra Ibrayima na, ni Sutana tun y'a siri ni bana ye kabini saan tan ni seegi, a tun ma daga k'o muso kɛnɛya lafinyɛlon na wa?” 17Yezu ye kuma nin fɔ tuma min na, a juguw bɛɛ maloyara. Jama bɛɛ nisɔn tun ka di Yezu ka kabakokɛninw kɔsɔn.

Ala ka masaya bɔnin bɛ mun fɛ?

(Mat 13.31-33; Mar 4.30-32)

18Yezu y'a fɔ tugu ko: “Ala ka masaya bɔnin bɛ mun fɛ? Ne bɛn'a kɛnyɛ ni mun ye? 19A bɛ i n'a fɔ mutaridikisɛ cɛɛ dɔ ye min ta k'a dan a ka nankɔ la. A falenna ka bonya ka kɛ yiri ye. Kɔnɔw ye u ka nyagaw la a bolow kan.”

20Yezu taara nya ni kuma ye k'a fɔ ko: “Ne bɛna Ala ka masaya ni mun kɛnyɛ tugu? 21A bɔnin bɛ burufununan fɛ muso dɔ ye min ta k'a kɛ farinimugu fiyɛ nyaa kelen na k'a nɔɔni. Tuma dɔɔni o kɔ, a bɛɛ fununa.”

Yezu ko kojugukɛlaw tɛ don arijana na

(Mat 7.13-14; 25.10-12; 7.22-23; 8.11,12; 19.30; Mar 10.31)

22Yezu taatɔ Zeruzalɛmu, a tun bɛ duguba ni dugudenninw cɛɛ tigɛ, an'a bɛ mɔgɔw kalanna. 23Mɔgɔ dɔ y'a nyininga ko: “Matigi, mɔgɔ caaman tɛna kisi wa?”

A y'a jaabi ko: 24“Aw ye jija ka don ni dafitini ye bari ne b'a fɔ aw ye ko mɔgɔ caaman bɛna cogo nyini ka don, nga u tɛna se.

25“Ni sotigi wilila ka daa sɔgɔ tuma min na k'aw to kɛnɛma, aw bɛn'a daminɛ ka daa kɔkɔ k'a fɔ ko: ‘Matigi, daa yɛlɛ an ye.’ A bɛna aw jaabi ko a t'aw bɔyɔrɔ lɔn.

26“O tuma na, aw bɛn'a fɔ a ye ko aw ye dumuni kɛ n'a ye, ko a y'aw kalan aw ka dugu forobayɔrɔw la. 27A bɛn'a fɔ aw ye tugu ko ale t'aw bɔyɔrɔ lɔn, ko aw ka taa ka bɔ yan, kojugukɛla nunu.

28“O yɔrɔ la, n'aw ye Ibrayima, ni Isiyaka, ani Yakuba ani kiraw bɛɛ ye arijana na tuma min na, k'a sɔrɔ aw tonin bɛ kɛnɛma, o tuma na, aw bɛna kasi k'a fɔ ko ni aw tun y'a lɔn. 29Mɔgɔ dɔw bɛna na ka bɔ kɔrɔn, ni tileben, ani kɔgɔdugu nyafan, ni worodugu fɛ. U bɛna sigi dumuni na masa Ala ka soo.

30“O tuma na, kɔmɔgɔ dɔw bɛna kɛ nyamɔgɔw ye, nyamɔgɔ dɔw bɛna kɛ kɔmɔgɔw ye.”

Yezu bɛ kuma Zeruzalɛmu koo la

31O tuma na, Farizinyɛ dɔw gwɛrɛla Yezu la k'a fɔ a ye ko: “Taa yɔrɔ wɛrɛ ka yan bila, bari Erɔdi b'a fɛ k'i faga.”

32Yezu y'u jaabi ko: “Aw ka ta'a fɔ o nanbaranmɔgɔ nin ye ko ne bɛ jinaw gwɛn ka bɔ mɔgɔw la, ka banabagatɔw kɛnɛya bii ni sini, ani a tile sabanan loon, ne bɛna tila n ka baara la. 33Nga wajibi lo ne ka taa ni n ka sira ye bii ni sini ani sinikɛnɛ, bari a bɛnnin tɛ kira ka faga yɔrɔ wɛrɛ Zeruzalɛmu kɔ.

(Mat 23.37-39)

34“Zeruzalɛmukaw, Zeruzalɛmukaw, aw minw bɛ kiraw faga, ka Ala ka cidenw bon ni kabakuruw ye k'u faga, sinyɛ joli ne tun b'a fɛ k'aw lajɛn n kɔrɔ i n'a fɔ sisɛ b'a deenw lajɛn a gamanw kɔrɔ cogo min na, nga aw ma sɔn! 35Ayiwa, aw ka dugu bɛna to aw ye. Ne b'a fɔ aw ye ko aw tɛna ne ye tugu fɔɔ loon min na aw bɛn'a fɔ ko: ‘Min natɔ filɛ Matigi tɔgɔ la, Ala ka barika don a la.’ ”

Currently Selected:

LUKA 13: JULNT94

Highlight

Copy