Markɩ 10

A kul-taa wɛl-bɛrʋ yele

(Mat 19:1-12, Luk 16:18)

1A Yeezu tɩ yi n a be cen Zude tẽw lowr, a Zurdɛ̃ man gãwn. A zu-sɛbla tɩ lɛb'a maal gbõ taa a ʋ zie, ʋʋ lɛb tɩ kanɛ nɩ bɛ, mɛ̃ a lɛ ʋ na mɩ́ tɩ ɩrɛ a kʋralɛ a. 2Faarizɩ̃ɛ bɛ mɩnɛ tɩ taw na ta a Yeezu zie. Bɛ na tɩ bɔbr kɛ́ bɛ ɩ ʋ kaa a, bɛ sowr'ʋ na: «Dɛb tɛr'ɩ sɔ́r na tʋ̃ɔ́ zawrɩ a ʋ pɔw bɛr bɩɩ?» 3Ʋ tɩ sɔw na: «Nɔ-buor'ʋ a Moyiir ƴãw kʋ̀ nyɩ?» 4Bɛ tɩ sɔw na: «A Moyiir ƴãw nɩ nʋɔr kɛ́ bɛ mɩ́ maalɩ a zawr-bɛrʋ sɛbɛ, ɛ́ bãw zawrɩ a pɔw bɛr.» 5A Yeezu lɛb yel bɛ: «A nyɩ zuru na kpɛmɛ a ƴãw n'a a Moyiir sɛb a nɔ-ƴãwna ŋa kʋ̀ nyɩ. 6Alɛ bɛ ɩ lɛ, a tẽ-daa tib daar a, a Sɛb-sõw yel'a: “Naaŋmɩn ír bɛ na dɛb nɩ pɔw,” 7“alɛ so a dɛb na mɩ́ bɛr a ʋ sãà nɩ a ʋ mã ɛ́ tɩ lãw nɩ a ʋ pɔw, 8bɛ za ayi ɓã taa ɩ nɩ-been#10:8 Nyɛ̃ Yzt 1.27, 2.24.. A na ŋmɛ̃ à ŋá a, bɛ bɛ cãà ɩ ayi ɛ, bɛ ɩ n nɩ-been.” 9A na ɩ à ŋá a, a nɩsaal, ʋ ta mɩ́ bʋ́r bom nɛ a Naaŋmɩn na lãw taa a ɩ.» 10Bɛ na wa kul a yir a, a ʋ po-tuurbɛ tɩ lɛb'a sowri ʋ a pɔw zawr-bɛrʋ yele, 11ʋ yel bɛ: «Dɛb za wa zawrɩ ʋ pɔw bɛr ɛ́ lɛb kul pɔw yũo a, ʋ maal'ɩ pɔw-gaa yel-bier a dãw-niwn sob ƴãw. 12Pɔw mɩ̀ wa zawrɩ ʋ sɩr bɛr ɛ́ lɛb kul dɛb yũo a, ʋ maal'ɩ pɔw-gaa yel-bier.»

A Yeezu na kʋ̀ maalʋ bibi-pʋrmɛ a

(Mat 19:13-15, Luk 18:15-17)

13Nɩbɛ kãw tɩ tɛr'ɩ bibi-cãpili wa n kɛ́ a Yeezu wa ír nuru dɔwlɩ a bɛ zu, ɛcɛ a ʋ po-tuurbɛ tɩ tanɛ bɛ na. 14A Yeezu na tɩ nyɛ̃ a lɛ a, ʋ nyɛ̃ nɩ suur, ɛ́ yel a ʋ po-tuurbɛ: «Nyɩ bɛr a bibiir bɛ wa a ɩ̃ zie, nyɩ ta diwr bɛ bɛrɛ ɩ, a bɛlɩ dem na ŋmɛ̃ taa nɩ bɛ a, bɛlɛ so a Naaŋmɩn Naalʋ. 15Yel-mɩŋa sɩza, ɩ̃ yere na kʋ̀rɛ nyɩ, nɩr bɛ wa dier a Naaŋmɩn Naalʋ yele mɛ̃ bibile a, ʋ bɛ be na kpɛ ʋ pʋɔ ɩ.» 16Al pùorí, ʋ nyɔw bɛ weri ɛ́ maalɩ bɛ, ɛ́ ír nuru dɔwlɩ a bɛ zu.

A Yeezu na bʋɔlɩ tɛra sob kãw a

(Mat 19:16-30, Luk 18:18-30)

17A Yeezu na tɩ lore a sɔ́r a, nɩr kãw tɩ zɔ na wa lo gbĩ dume a ʋ niŋé ɛ́ sowri ʋ: «Wul-wul-kara a, fʋ̃ʋ na ɩ nɩ-vla a, bʋ̃ʋ n'ʋ ɩ̃ na ɩ tʋ̃ɔ́ páw a nyɔ-vʋʋrʋ na be kʋralɛ a?» 18A Yeezu tɩ sowri ʋ na: «Bʋ̃ʋ n'ʋ so fʋ bʋɔlɛ mɛ̃ nɩ-vla? Nɩr za bɛ vɩɛl ʋ bɛ ɩ Naaŋmɩn yõ ɩ. 19Fʋ bãw nɩ a Naaŋmɩn nɛ-ƴãwnɩ: “Ta kʋ nɩr ɛ, ta maalɩ pɔw-gaa yel-bier ɛ, ta zu bom ɛ, ta dɩ dãsɩ-ziri ɛ, ta sãw fʋ tɔ sob ɛ, ƴãwnɛ fʋ sãà nɩ fʋ mã#10:19 Nyɛ̃ Ety 20.12-16, Wl-ayi 5.16-20..”» 20A nɩr ʋl tɩ sɔw ʋ na: «Wul-wul-kara a, ɩ̃ tu n à á ŋá za a ɩ̃ pɔ̀lʋ daarɩ́ za.» 21A Yeezu tɩ bɛl ʋ na kaa ɛ́ nɔ̃w ʋ. Ʋ tɩ yel ʋ na: «Bʋ̃-been yõ n'ʋ cɛ fʋ: kul tɩ kʋɔrɩ a fʋ bʋ̃-tɛrɩ za, de a libie kʋ̀ nan dem, ɛ́ fʋ na páw nɩ na-bome a tẽ-vla pʋɔ. Al pùorí, wa tuur mɛ̃.» 22Ɛcɛ ʋ na wa wõ a ƴɛ̀r-bir ŋa a, ʋ sãw nɩ niwn ɛ́ lɛb cere nɩ pʋ-sãwna, ʋ na tɩ tɛr na-bome yaga a ƴãw.

23A Yeezu tɩ jɩ́r'ɩ a ʋ po-tuurbɛ na viiri koli ʋ a, ɛ́ yel bɛ: «Pa! A tɛra dem Naaŋmɩn Naalʋ pʋɔ kpɛb na kpɛmɛ na!» 24A Yeezu ƴɛ̀r-bie á ŋá tɩ ŋmãa nɩ a ʋ po-tuurbɛ pùor bɛ dɩ vuo ɩ. Ɛcɛ a Yeezu tɩ lɛb'a yel: «Ɩ̃ bibiir i, pa! A Naaŋmɩn Naalʋ pʋɔ kpɛb kpɛmɛ na! 25Nyɔ̃wmɛ na na yi mɩsɩn vʋɔrɩ́ a, a ɩ n mɔlɛ zuo a tɛra sob na na kpɛ a Naaŋmɩn Naalʋ pʋɔ a.» 26A ʋ po-tuurbɛ lɛb bãw nyɔw nʋɔr ɛ́ sowre taa: «Alɛ wa ɩ à ŋá a, ãa n'ʋ pãa na tʋ̃ɔ́ nyɛ̃ a faafʋ a?» 27A Yeezu tɩ jɩ́r bɛ na kaa ɛ́ yel: «A nɩsaalbɛ zie a, a kʋ̃ tʋ̃ɔ́ ɩ, ɛcɛ a bɛ ɩ lɛ Naaŋmɩn zie ɩ, Naaŋmɩn zie a, bom za na tʋ̃ɔ́ na.» 28Lɛ n'a a Pɩɛr tɩ yel ʋ: «Nyɛ̃, a tɩɩm, tɩ bɛr'ɩ bom za ɛ́ tuur fʋ.» 29A Yeezu tɩ sɔw ʋ na: «Yel-mɩŋa sɩza n'a ɩ̃ yere kʋ̀rɛ nyɩ: nɩr kʋ̃ zawrɩ ʋ yir, ʋ yɛbr, ʋ yeepuuli, ʋ mã, ʋ sãà, ʋ bibiir nɩ a ʋ póru bɛr, a mãa nɩ a Yel-nʋ̃ɔ̀ ƴãw, 30ɛ́ bɛ páw a ƴɛrɛŋa, a dɩ̃a zie ŋa pʋɔ tɩ na be a, gb'aa kʋba ƴãw, yie, nɩ yɛbr, yeepuuli, mã mɩnɛ, bibiir, nɩ póru lãwnɩ dɔwrʋ, ɛ́ nɩdaar ʋ páw a nyɔ-vʋʋrʋ na be kʋralɛ a ɩ. 31Niw-dierbɛ yaga na lɩɛb'ɩ po-pàwrbɛ, ɛ́ a po-pàwrbɛ lɩɛbɩ niw-dierbɛ.»

A Yeezu na lɛb yel a ʋ kũu nɩ a ʋ kũu-pʋɔ-lɛb-yibu a gb'a ata sob a

(Mat 20:17-19, Luk 18:31-34)

32Bɛ tɩ lo n a sɔ́r dúor a Zerizalɛm. A Yeezu tɩ de nɩ a ʋ po-tuurbɛ niwn. Pʋ̀lá tɩ vʋ̃ɔnɛ nɩ a ʋ po-tuurbɛ, ɛ́ dɛ̃bɩ̃ɛ nyɔw a bɛlɩ dem na tuur bɛ a. A Yeezu tɩ lɛb'a tɛr a Nɩ-toni pie nɩ ayi taw yi n bɛ tɛwr zie, tɩ manɛ a yele na na ta ʋ a kʋ̀rɛ bɛ. 33Ʋ tɩ yel'a kʋ̀ bɛ: «Nyɩ nyɛ̃, tɩ dúor'ɩ a Zerizalɛm, bɛ na tɩ nyɔw nɩ a Nɩsaal Bie ƴãw a bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ nuru pʋɔ. Bɛ na ŋmãa nɩ kũu dɔwrʋ ƴãw ʋ, ɛ́ de ʋ kʋ̀ nɩ-bʋʋr-yoru. 34A nɩ-bʋʋr-yoru na ɩ ʋ na la, bɛ na pʋʋrɩ mʋtaar ƴãw ʋ, bɛ na fɔb ʋ na, bɛ na kʋ ʋ na, ɛcɛ a bibie ata pùorí, ʋ na lɛb'a yi a kũu pʋɔ.»

A Zakɩ nɩ a Zã zɛlʋ bɛ na zɛlɩ a

(Mat 20:20-28)

35A Zebede bidɛbr, Zakɩ nɩ Zã, tɩ taw na pɩɛlɩ a Yeezu ɛ́ yel ʋ: «Wul-wul-kara a, tɩ bɔbr'a kɛ́ fʋ nãá ɩ a ʋlɩ bom nɛ tɩ na na zɛlɩ a fʋ zie a kʋ̀ tɩ!» 36A Yeezu tɩ sowri bɛ na: «Bʋ̃ʋ n'ʋ nyɩ bɔbr k'ɩ̃ɩ ɩ kʋ̀ nyɩ?» 37Bɛ tɩ sɔw na: «Sàw a tɩ kãw zɩ̃ a fʋ dʋrʋ lowr, ɛ́ kãw zɩ̃ a fʋ gʋba lowr a fʋ yúor-vɩɛlʋ-danʋ pʋɔ.» 38A Yeezu tɩ yel bɛ na: «Nyɩ bɛ bãw a ʋlɩ bom nɛ nyɩ na zɛlɛ a ɩ. Nyɩ na tʋ̃ɔ́ na nyũ a tuo koli-nyúura a na fɛr k'ɩ̃ɩ nyũ a, ɛ́ de a kpɩɛrʋ suob a na fɛr k'ɩ̃ɩ de a?» 39Bɛ tɩ sɔw na: «Tɩ na tʋ̃ɔ́ na!» A Yeezu lɛb yel bɛ: «Yel-mɩŋa n'a, nyɩ na nyũ n a tuo koli-nyúura a na fɛr k'ɩ̃ɩ nyũ a, ɛ́ de a kpɩɛrʋ suob a na fɛr k'ɩ̃ɩ de a. 40Ɛcɛ, a ɩ̃ dʋrʋ lowr bɩɩ a ɩ̃ gʋba lowr zɩma a, mãa bɛ so a bãwfʋ ɛ, a bɛlɩ dem ƴãw a Naaŋmɩn na cɔbrɩ a ziir á ŋá a, bɛlɛ so a.»

41A Nɩ-toni pie ŋmãa bɛl na tɩ wõ à à ŋá a, bɛ nyɛ̃ nɩ nɩ a Zakɩ nɩ a Zã suur. 42A Yeezu tɩ bʋɔlɩ bɛ na wa yel bɛ: «Nyɩ bãwnɩ a na: a bɛlɩ dem bɛ na mɩ́ jɩ́rɛ mɛ̃ a nɩ-bʋʋr-yoru na-mɩnɛ a, bɛ mɩ́ dɩrɛ nɩ naalʋ a bɛ zu, ɛ́ a zu-bɛrɛ wule bɛ a bɛ fãw. 43Ɛcɛ a nyɩɩm zie a, a bɛ ɩ a lɛ ɩ: nɩr wa bɔbr k'ʋʋ ɩ kpɛ̃ɛ a nyɩ pʋɔ a, ʋ lɩɛbɩ a nyɩ tõ-tone, 44ɛ́ nɩr wa bɔbr k'ʋʋ ɩ a nyɩ niw-diere a, ʋ ɩ a nyɩ za gbãgbaa. 45A Nɩsaal Bie bɛ wa k'ʋʋ wa zɩ̃ ɛcɛ bɛ tone ʋ ɛ, ʋ wa na k'ʋʋ wa lɩɛb tõ-tone, ɛ́ de a ʋ nyɔ-vʋʋrʋ tɩr nɩ-yaga faafʋ ƴãw.»

A Zeriko tẽw zɔ̃w Bartime sanʋ

(Mat 20:29-34, Luk 18:35-43)

46Bɛ tɩ ta n a Zeriko tẽw. A Yeezu nɩ a ʋ po-tuurbɛ nɩ a zu-sɛbla na bɛ tɛr vuo a, na tɩ yire a tẽw pʋɔ a, Time bidɛb, Bartime, na tɩ ɩ zɔ̃w a, tɩ zɩ̃ n a sɔ́r nʋɔr zɛlɛ. 47Ʋ na tɩ wõ kɛ́ Nazarɛtɩ tẽw Yeezu n'ʋ a, ʋ ŋmɩɛr'ɩ cɛlsɩ yere nɩ: «Daviir bidɛb Yeezu u, zɔ ɩ̃ nɩbaalʋ!» 48Nɩ-yaga tɩ tanɛ ʋ na k'ʋʋ pàw a ʋ nʋɔr. Ɛcɛ ʋ nɩ̃ɛ na lɛb tɩ bãw cɩɩrɛ kpɛ̃w za yere nɩ: «Daviir bidɛb i, zɔ ɩ̃ nɩbaalʋ!» 49A Yeezu tɩ tɛw na àr ɛ́ yel: «Nyɩ bʋɔl'ʋ.» Bɛ tɩ bʋɔl'ɩ a zɔ̃w ɛ́ yel ʋ: «Nyɔw fʋ mɩŋa, ìr, ʋ bʋɔlɛ fʋ na!» 50Ʋ tɩ lɔb'ɩ a ʋ kpar-kpɛ̃ɛ bɛr, ɛ́ vaa ìr cen a Yeezu zie. 51A Yeezu tɩ sowri ʋ na: «Bʋ̃ʋ n'ʋ fʋ bɔbr k'ɩ̃ɩ ɩ kʋ̀ b?» A zɔ̃w tɩ sɔw na: «Arabuni#10:51 Arabuni: A Arabuni nɩ a Arabi za ɩ n been, a pɛr lɛ kɛ́: Wul-wul-kara. i, ɩ̃ lɛb nyɛrɛ!» 52A Yeezu yel ʋ: «Cere, a fʋ naaŋmɩn-sàw-deb faa fʋ na!» Ɛ́ daadaalɛ, ʋ tɩ lɛb'a nyɛrɛ, ɛ́ tuur a Yeezu a sɔ́r zu.

Currently Selected:

Markɩ 10: DBDC

Highlight

Copy