Zã 21

Po-tuurbɛ ayopõi bɛ mɩnɛ nyɛ̃ nɩ a Yeezu

1A Yeezu tɩ lɛb'a wul ʋ tʋɔra a ʋ po-tuurbɛ a Tɩberiyadɩ kʋ̃ɔ-kpɛ̃ɛ nʋɔr. Nyɩ nyɛ̃ a lɛ a na tɩ tu a. 2Sɩmʋ̃ Pɩɛr nɩ Toma, bɛ na bʋɔlɛ Didim a, nɩ Natanayɛl na yi Kana a Galile tẽw a, a Zebede bibiir nɩ a Yeezu po-tuurbɛ ayi bɛ mɩnɛ tɩ nɛbɛ. 3A Sɩmʋ̃ Pɩɛr tɩ yel'ɩ a bɛ zie: «Mãa cere nɩ zʋ́mɛ́ nyɔwfʋ.» Bɛ yel ʋ: «Tɩ mɩ̀ na páw fʋ na cen.» Bɛ tɩ yi na kpɛ a gbor. Ɛcɛ a ʋlɩ tɩ̃ɩsɔw nɛ bɛ bɛ tɩ nyɔw bom za ɩ. 4A zie na wa vɩɛrɛ a, a Yeezu tɩ àr'ɩ a kʋ̃ɔ-kpɛ̃ɛ nʋɔr, ɛcɛ a ʋ po-tuurbɛ bɛ tɩ bãw kɛ́ ʋlɛ n'ʋ ɛ. 5A Yeezu tɩ yel bɛ na: «Bibiir i, nyɩ tɛr'ɩ zʋ́mɛ́ ɛ?» Bɛ sɔw: «Ʋ̃ʋ'hʋ̃.» 6Ʋ yel bɛ: «Nyɩ lɔb a mɩ̃ɛ a gbor dʋrʋ lowr, ɛ́ nyɩ na páw na.» Lɛ n'a bɛ tɩ lɔb a mɩ̃ɛ, ɛ́ bɛ lɛb tʋɔr ʋ tawr yire nɩ ɛ: ʋ tɩ paal'ɩ a zʋ́mɛ́ zuo. 7A po-tuure nɛ a Yeezu na tɩ nɔnɛ a tɩ yel'ɩ a Pɩɛr: «A Sore n'ʋ!» A Sɩmʋ̃ Pɩɛr na wa wõ kɛ́ a Sore n'ʋ a, ʋ su n a ʋ kparʋ — ʋ tɩ ɩ n ƴã-gã-zawla — ƴaw lo n a kʋ̃ɔmɩ́. 8A ʋ po-tuur-taabɛ tɩ waar'ɩ nɩ a gbor, lãw tawr'ɩ a mɩ̃ɛ na paalɩ a zʋ́mɛ́ a: bɛ bɛ tɩ zãá nɩ a kõkowr ɛ, a tɩ ta na mɛ̃ mɛtɩr kʋba (100) a. 9Bɛ na tɩ siw a, bɛ nyɛ̃ nɩ zʋ́mɛ́ vũu-bie zu nɩ dipɛ̃. 10A Yeezu tɩ yel bɛ na: «Nyɩ ír a zʋ́mɛ́ nyɩ na nyɔw a ƴɛrɛŋa a wa n.» 11A Sɩmʋ̃ Pɩɛr tɩ lɛb'a do a gbor pʋɔ, ɛ́ taw a mɩ̃ɛ yi n a kʋ̃ɔ nʋɔr, a mɩ̃ɛ tɩ paal'ɩ zʋm-bɛrɛ lɩz'a ayopõi nɩ pie dɔwlɩ zʋ́mɛ́ ata (153). Ɛ́ a zʋ́mɛ na saa tɩ yãwmɛ zɛ̃ à ŋá a, a mɩ̃ɛ bɛ tɩ cɩɛrɩ ɛ. 12A Yeezu tɩ yel bɛ na: «Nyɩ wa dɩ.» A po-tuurbɛ been kãw za bɛ tɩ sàw sowre ʋ ɛ: «Ãa nɛ b?» Bɛ tɩ bãwnɩ a na a Sore na n'ʋ a. 13A Yeezu tɩ taw na ta de a dipɛ̃ kʋ̀ bɛ, ɛ́ mɩ̀ lɛb ɩ a lɛ nɩ a zʋ́mɛ́. 14A gb'a ata sob tɩ n'ɩ a lɛ a Yeezu na tɩ wul ʋ tʋɔra a ʋ po-tuurbɛ a ʋ kũu-pʋɔ-lɛb-yibu pùorí a.

A Yeezu kʋ̀ n a Pɩɛr a ʋ tõ-nʋɔr

15Bɛ na wa dɩ baar'a, a Yeezu yel'ɩ a Sɩmʋ̃ Pɩɛr: «Sɩmʋ̃, Zã bidɛb i, fʋ nɔnɛ mɛ̃ na zuo a bɛ ŋa bɩɩ?» Ʋ sɔw: «Ʋ̃ʋ, Sore e, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Cɩ̃ɩnɛ a ɩ̃ péli.» 16A Yeezu tɩ lɛb'a sowr'ʋ a gb'a ayi sob ƴãw: «Sɩmʋ̃, Zã bidɛb i, fʋ nɔnɛ mɛ̃ na a?» Ʋ sɔw: «Ʋ̃ʋ, Sore, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Ɩ a ɩ̃ pi-cɩ̃ɩnɛ.» 17Ʋ tɩ lɛb'a yel a gb'a ata sob ƴãw: «Sɩmʋ̃, Zã bidɛb i, fʋ nɔnɛ mɛ̃ na a?» Pʋ-sãwna tɩ tɛr'ɩ a Pɩɛr, a Yeezu na tɩ sowr'ʋ a gb'a ata sob ƴãw: «Fʋ nɔnɛ mɛ̃ na a?» Ʋʋ tɩ sɔw na: «Sore e, fʋ bãw nɩ bom za, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Cɩ̃ɩnɛ a ɩ̃ píir. 18Yel-mɩŋa sɩza sɩza n'a ɩ̃ yere kʋ̀rɛ fʋ: fʋ na tɩ ɩ pɔlbile a lɛn daar a, fʋ mɩ́ tɩ sɛ n a fʋ kpàwr fʋ tʋɔra cere nɩ be fʋ na bɔbr a. Fʋ̃ʋ wa kor a, fʋ na mɩ́ zɛw nɩ a kpãkpamɛ ɛ́ nɩ-yũo sɛ b a kpàwr, ɛ́ tɛr fʋ cere nɩ ʋlɩ zie nɛ fʋ na bɛ bɔbr a.» 19A Yeezu tɩ yel'ɩ à à ŋá, k'ʋʋ wul a kũu nɛ bʋʋrɛ a Pɩɛr nãà wa kpi ɩ kɛ̀ Naaŋmɩn nyɛ̃ yúor-vɩɛlʋ-danʋ a. A Yeezu na tɩ yel à ŋá baar'a, ʋ yel'ɩ a Pɩɛr: «Tuur mɛ̃!»

A Yeezu nɩ a ʋ po-tuur-nɔna

20A Pɩɛr na tɩ ŋmɛlɩ kaa a pùorí a, ʋ nyɛ̃ nɩ a po-tuure ʋl a Yeezu na nɔnɛ a, a ʋl na tɩ cɩɩlɩ cen a Yeezu nyãa ƴãw a dɩb daar sowr'ʋ: «Sore e, ãa n'ɩ a sob nɛ na na mɩl fʋ nyɔw tɩr a?» 21A Pɩɛr na tɩ nyɛ̃ ʋ a, ʋ sowr'ɩ a Yeezu: «Ɛ́ à ŋà sob, Sore e, bʋ̃ʋ n'ʋ na ɩ ʋ?» 22A Yeezu tɩ sɔw ʋ na: «Mãa wa bɔbr k'ʋʋ be be ɛ́ gùre ɩ̃ tɩ lɛb wa a, a jɩ́rɛ fʋ na bɩɩ? A fʋ̃ʋ a, tuur mɛ̃!» 23A lɛ n'a bɛ tɩ ŋmɛ yaarɩ a yɛbr sɔgɔ kɛ́ a po-tuure ŋa kʋ̃ kpi ɛ. Ɛcɛ a Yeezu bɛ tɩ yel ʋ k'ʋʋ kʋ̃ kpi ɛ. Ʋ tɩ yel'a: «Mãa wa bɔbr k'ʋʋ be be ɛ́ gùre ɩ̃ tɩ lɛb wa a, a jɩ́rɛ fʋ na bɩɩ?»

24A po-tuure ŋa n'ʋ dɩrɛ a yele á ŋá dãsɩɛ, ɛ́ ʋlɛ n'ʋ sɛb a, ɛ́ tɩ bãwnɩ a na, a ʋ dãsɩɛ tu n yel-mɩŋa.

A sɛbɛ baarʋ zie ƴɛ̀r-bie

25A Yeezu cãà na lɛb maalɩ yel-yaga yaga: bɛlɛ tɩ sɛbr a za been been a, ɩ̃ tɩɛrɛ k'aa tẽ-daa za kʋ̃ʋ tʋ̃ɔ́ de a sɛbr bɛ nãá sɛb a ɩ.

Currently Selected:

Zã 21: DBDC

Highlight

Copy