Luki Sɛbɛ 2

A JEEJU DƆWFƲ ƳƐRƖ̃

(Mat 1.18-25)

1A ʋna daarʼãa a ƴɛrɩ̃ yi na a jaman-kpɛ̃ɛ Ogusi sɛ̃ na yel a ba sɔr a nɩbɛ ba jaa na be a ʋ ten a jaa pʋɔ. 2A sɔrfʋ na ɩ̃ ɩ a dãdãw sɔrfʋ na maal a lɛdaar a Kirinisi na ɩ a Sɩrɩ jamana. 3A nɩbɛ ba jaa bõ-ƴene-ƴene cenʼã a ba mɩ̃ɛ ten pʋʋr a sɔrfʋ ɩnɛ.

4Ala-ɩ̃-sɔ a Jojɛfʋ mɩ yi na a Najarɛtɩ na be a Galile wɩɛr ɩ̃ cen a Jude, a jamana Davɩtɩ tẽ-dɔwraa ba na bʋɔlɔ a Bɛtɩlɛm, a-na-ɩ a ʋlɔ mɩ̃ɛ mɩ ɩ na a Davɩtɩ yir sʋbɔ nɩ a ʋ bal nɩrɛ. 5Ʋ cenʼɩ̃ na a ʋ baraa Maarɩɩ na tɛrɛ a pʋɔ, a ba na lãa sɔr ba. 6Ɩ̃ a lɛ ba na dãa cãa be a be, a Maarɩɩ dɔwfʋ daar ta na, 7ʋ dɔw a ʋ pɔsabie ʋ ɩ dabile, ɩ̃ vilĩ ʋ a cẽcen gaal a dʋn mʋ̃ɔ ƴɔ̃wfʋ jie, a-na-ɩ baa pɔw a die a sáanba yir pʋɔ wa.

A SƖ-TƲNƖSƖ NA NYƖR A DƆ-CƖƖNBƐ

8A ʋna tẽw naa pʋɔ, dɔ-cɩɩnbɛ dãa na be be gana a mɔɔ pʋɔ a tɩsɔw, gure a ba piir, 9a Naaŋmɩn sɩ-tʋnaa nyɩr ba a be ɩ̃ a Naaŋmɩn cãa nyɩnyɩl pɔw ba, a pʋlɩ̃nyɛ nyɩrɩ̃ vʋ̃ɔ ba. 10Ɩ̃ a sɩ-tʋnaa yel ba:

“Nyɩ taa jɔrɔ dãbɩ̃ɛ wa. Ƴɛr-son ɩ̃ ƴɛrɛ kʋrɔ nyɩ na ɩrɛɛ nʋ̃ɔ kpɛ̃ɛ a nɩbɛ ba jaa jie. 11A dɩnaa tɩsɔw na, a Davɩtɩ tẽw pʋɔ, ba dɔw na a Fafaara a nyɩ ɩnɛ, na ɩ a Nɩ-kpɛ̃ɛ nɩ a *Kirisi. 12Nyɩ́ nyɛ a jɩbaa ʋlɔ nyɩ na bɔ̃wnɔ nɩ ʋ: nyɩ na nyɛ na bi-pɩɩlaa ba na vilĩ cẽcen gaal a dʋn mʋ̃ɔ ƴɔ̃wfʋ jie.” 13Ɩ̃ a jie naan, a saꞌlon sɔdaalsɩ yaw jie wa na pɔw a sɩ-tʋnaa ʋlɔ, ɩ̃ pɛwrɛ a Naaŋmɩn yele nɩ:

14“A Naaŋmɩn ɩ̃ sɔ a ju-kpɛ̃ɛ a saꞌlon iin

ɩ̃ a pɩɛnfʋ ú be a tẽw pʋɔ, a bala ʋ na nʋnɔ jie.”

A DƆ-CƖƖNBƐ CENFƲ A BƐTƖLƐM

15A lɛ a sɩ-tʋnɩsɩ na bar a dɔ-cɩɩnbɛ ɩ̃ lɩɛb do a saꞌlon, ba yele na taa:

“Nyɩ ɩ a sɩ cen a Bɛtɩlɛm na nyɛ a ala na ta, a ala ɩnɛ a Naaŋmɩn na tʋ̃ yel sɩ.” 16Ba pɔw na cen na ta nyɛ a Maarɩɩ, nɩ a Jojɛfʋ, nɩ a bi-pɩɩlaa ba na gaal a dʋn mʋ̃ɔ ƴɔ̃wfʋ jie. 17A lɛ ba na nyɛ ʋ, ba manʼã a ala a sɩ-tʋnaa na dãa yel ba a bibile ʋlɔ ɩnɛ, 18a nɔɛ ko a bala ba jaa na wõ a ala a dɔ-cɩɩnbɛ na yele ba. 19Ɩ̃-cɛ a Maarɩɩ bɔ̃w na tɛrɛ a ana yele a jaa a ʋ pʋ̃ɔ ɩ̃ pɛrɛ. 20A dɔ-cɩɩnbɛ lɩɛbʼã cen na kʋrɔ a Naaŋmɩn a ju-kpɛ̃ɛ pɛwrɛ nɩ ʋ a ala a jaa ɩnɛ ba na wõ ɩ̃ mɩ nyɛ, a be a lɛ a mɩnɛ a sɩ-tʋnaa na dãa yel ba.

A JEEJU YUOR PƲRFƲ

21A bibie anuu-nʼata dayen, na ɩ a ʋ yʋɔr ŋmaafʋ bibir ta na, a ba pʋr ʋ a yuor *Jeeju, na ɩ a yuor ʋlɔ a sɩ-tʋnaa na dãa tɩɩr, ɩ̃ a ʋ mã Maarɩɩ ma dãa tɛrɛ a ʋ pʋɔ sɛr wa.

A JEEJU BA NA CENʼƖ̃ A NAAŊMƖN YIR

22-24A mɩnɛ a Maarɩɩ pɔdɔɔr na baar ʋ yi a ʋ pɔdɔɔr diem, a ʋlɔ nɩ a Jojɛfʋ irʼã tu a ƴɛr-kpɛn sɔr a mɩnɛ a Naaŋmɩn na dãa miil a Mowisi, á ba de a dabil ba jaa na ɩ a pɔsabiir kʋ a Nɩ-kpɛ̃ɛ. Ba de na a bie cenʼɩ̃ a Jerujalɛm a Nɩ-kpɛ̃ɛ kʋfʋ jie, ɩ̃ mɩ de a baar-lo-bom a mɩnɛ a Nɩ-kpɛ̃ɛ ƴɛr-kpɛ̃w na yel: a ŋmama ayi mɩɩ naŋmam-pɔlɔ ayi.

25A be a Jerujalɛm, daba kãw be na be na dɩ Sɩmẽw. Ʋ ɩ na nɩ-toraa ɩ̃ mɩ jɔrɔ a Naaŋmɩn, ɩ̃ jɛ ƴɔ̃w toor cɛlɛ a ʋlɔ na waara faara a *Ɩsɩrayɛl nɩbɛ a ba won pʋɔ. A Naaŋmɩn Sɩɛ be nɩ ʋ na, 26ɩ̃ yel ʋ a ʋ na de na nĩe nyɛ a *Kirisi ʋlɔ a Nɩ-kpɛ̃ɛ na tʋ̃ ɩ̃ wa pãa bɩɛr kpi. 27A Naaŋmɩn Sɩɛ tɔw na a Sɩmẽw cenʼɩ̃ a Naaŋmɩn puor-yir kpɛ̃ɛ pʋɔ, ɩ̃ a Jojɛfʋ nɩ a Maarɩɩ wɩ nɩ na a ba bie *Jeeju a be, a mɩnɛ a ba na maal ʋ a ala a *Naaŋmɩn ƴɛr-kpɛn na yel. 28A Sɩmẽw de ʋ na ƴɔ̃w a ʋ nuu pʋɔ, ɩ̃ pɛw a Naaŋmɩn yel:

29“A ƴɛ̃ƴɛrɩ̃ na, Nɩ-kpɛ̃ɛ, fʋ na tʋɔ na bar a fʋ tʋ̃tʋnɔ ʋ cenʼɩ̃ pɩɛnfʋ, a-na-ɩ a fʋ pʋlɩ̃fʋ ƴɛrɩ̃ maalʼã baar: 30a ɩ̃ mɩ̃ɛ mimir nyɛ na a fʋ faafʋ 31ʋlɔ fʋ na gbɛɛrɩ̃ a bal bʋrɔ bʋrɔ ba jaa nii-sɔw, 32na ɩ a cãa na caara a nɩ-bʋrɔ bʋrɔ a ba bɔ̃wnɔ fʋ, ɩ̃ mɩ maala a Ɩsɩrayɛl na ɩ a fʋ nɩbɛ yuor ʋ yire.”

33A mɩnɛ a Jeeju sãa nɩ a ʋ mã na wõ a ala a Sɩmẽw na yel, nʋɔr ko ba na. 34A Sɩmẽw sʋɔrʼã a Naaŋmɩn ƴɔ̃w ba ɩ̃ yel a Jeeju mã, Maarɩɩ:

“A Naaŋmɩn vɛlʼã ir a bie na a Ɩsɩrayɛl nɩbɛ yaw lofʋ ɩnɛ, nɩ a ba lɩɛb irfʋ ɩnɛ. A Naaŋmɩn ƴɔ̃w ʋ na ʋ ɩ jɩbaa a nɩ-yaw na ƴɛrɛ a ƴɛr-bebe ƴɔnɔ ʋ, 35a mɩnɛ a yaw jie pʋ-tɩɛrɩ̃sɩ na yi a cãa pʋɔ. Ɩ̃ a fʋ̃ʋ mɩ, a na wʋlɔ fʋ na wɔ̃ taa nɩ bãjɩnɛ ba na cɔrʼɩ̃ fʋ a suur.”

36Pɔw kãw mɩ dãa na be be na dɩ a An na ma ƴɛrɛ a Naaŋmɩn ƴɛrɩ̃sɩ, a ʋ sãa na dɩ Panʋwɛl na ɩ a Asɛɛr bal nɩrɛ. A pɔw ʋlɔ korʼã yaw. Ʋ dãa na kul a sɩrɛ a ʋ pɔsabile daar maalʼɩ̃ yomo anuu-nʼayi, 37ɩ̃ jɛ ɩ kpɩ̃ɩ-pɔw wa ta nɩ yomo lɩjaanaan nʼanaan. ꞌWaa yire a Naaŋmɩn puor-yir kpɛ̃ɛ wa; ʋ tʋnɔ na a Naaŋmɩn tʋn a tɩsɔw nɩ a mɔtɔ̃w, ma lũ nɩ a nʋɔr puoro nɩ a Naaŋmɩn. 38Ʋ ta na a be a daar ʋlɔ pʋɔ, pɛwrɛ a Naaŋmɩn ɩ̃ ƴɛrɛ a Jeeju ƴɛrɩ̃ kʋrɔ a nɩbɛ ba jaa bala na gu a mɩnɛ a Naaŋmɩn nɔɔ faara a Jerujalɛm-tẽw.

39A lɛ a Maarɩɩ nɩ a Jojɛfʋ na maal a tʋmɔ a jaa baar tu nɩ a mɩnɛ a Nɩ-kpɛ̃ɛ ƴɛr-kpɛn na yel, ba lɩɛbʼã kul a ba tẽw, Najarɛtɩ, na be a Galile wɩɛr. 40A Jeeju nʋ̃ɔnɔ na lãa pɔwrɔ nɩ a fãgã mɩ tɛrɛ nɩ a kpaarfʋ, ɩ̃ a Naaŋmɩn sũofʋ be a ʋ jie.

A JEEJU NA LÃA JƐ NƖ A JUFISƖ ƳƐR-KPƐN-JAANBA

41A yomo a jaa, a *Jeeju dɔɔrbɔ ma cenʼã a Jerujalɛm a *Pakɩ fɛtɩ ɩnɛ. 42A lɛ a Jeeju na pɔw a yomo pie-nʼayi, ba cenʼɩ̃ ʋ na a fɛtɩ ʋlɔ jie a mɩnɛ ba na ma cere a yomo a jaa. 43A lɛ a fɛtɩ bibie na tɔl baar, ba lɛ lɩɛbʼã kule ɩ̃ a Jeeju cãa jɛ be a Jerujalɛm, ɩ̃ a ʋ dɔɔrbɔ ma dãa bɔ̃wnaa wa. 44Ba dãa na tɩɛr beeka ʋ pɔw na a ba nɩbɛ kule nɩ, ɩ̃ maal bibir bõ-ƴen a sɔr juu, ɩ̃ bʋɔrɔ ʋ yʋɔrɔ nɩ a ba yir deme nɩ a ba nɩ-bɔ̃wsɩ jie. 45Ɩ̃-cɛ baa nyɛ ʋ wa, ɩ̃ lɛ lɩɛb cen a Jerujalɛm a ʋ bɔfʋ jie. 46Ba bɔ ʋ na maalʼɩ̃ bibie ata ɩ̃ wa pãa nyɛ ʋ a Naaŋmɩn puor-yir kpɛ̃ɛ pʋɔ, ʋ lãa jɛ nɩ a Jufisɩ *ƴɛr-kpɛn-jaanba, cɛlɛ a ba ƴɛrɩ̃sɩ, sooro nɩ ba a yele par. 47A bala ba jaa na wõ a mɩnɛ ʋ na ire a ƴɛrɩ̃sɩ par, nɔɛ ko ba na a ʋ yɛ̃ ɩnɛ. 48A lɛ a ʋ dɔɔrbɔ na nyɛ ʋ, nɔɛ kpal ba na. Ɩ̃ a ʋ mã soor ʋ:

“Ɩ̃ bie! Bõ ɩ a fʋ maal sɩ a nɔhɔ̃? A fʋ bɔfʋ ƴɔ̃w na a maa nɩ a fʋ sãa dɛn.” 49A Jeeju yel ba:

“Bõ ɩ a nyɩ bʋɔrɔ ma? Nyaa dãa bɔ̃w ka a sɛw na ɩ̃ na jɛ a ɩ̃ Sãa yir pʋɔ wa mɩɩ?” 50Ɩ̃-cɛ baa bɔ̃w a ala ʋ na yel ba par wa, 51ɩ̃ na ʋ ir pɔw ba kulʼɩ̃ a Najarɛtɩ, ɩ̃ wono ba a toor, ɩ̃ a ʋ mã ƴɔ̃w a ƴɛrɩ̃sɩ a jaa a ʋ suur pʋɔ. 52A Jeeju nʋ̃ɔnɔ na, a ʋ yɛ̃ mɩ dɔɔlɔ, ɩ̃ a ʋ ben nʋmɔ a Naaŋmɩn nɩ a nɩbɛ mɩ.

Currently Selected:

Luki Sɛbɛ 2: BNT93

Highlight

Copy