Luki Sɛbɛ 1
1
A ƳƐRƖ̃ NYƆWFƲ JIE
1Ɩ̃ araa Towfɩl! Nɩ-yaw dɩ na tuo ɩ̃ sɛb a yele ala na maal a sɩ sɔ̃w. 2A be na a lɛ a mɩnɛ a yel-mɩ̃ɛ ƴɛr-manba na man kʋ sɩ a wɔ̃, na ɩ a bala na dãa nyɛ nɩ a ba mimir, wa nyɔw nɩ a nyɔwfʋ daar, ɩ̃ mɩ ɩ a Naaŋmɩn ƴɛr-son tʋ̃tʋnbɔ. 3Ala-ɩ̃-sɔ a maa mɩ, ɩ̃ mɩ bɔ̃w na ꞌlo a yele a jaa, cenʼɩ̃ na ta a nyɔwfʋ jie, ɩ̃ bʋɔrɔ ɩ̃ sɛb fʋ a mɩnɛ a yele na tu taa, 4a fʋ na tʋɔ bɔ̃w ka a jaanfʋ ala fʋ na pɔw ɩ na yel-mɩ̃ɛ.
A JÃ-BATII DƆWFƲ A SƖ-TƲNAA NA MIIL
5A lɛdaar a *Ɛrɔdɩ na dãa ɩ a Jude jamana, a Naaŋmɩn baar-loro ƴen sʋbɔ be na be na dɩ a Jakarɩ, na be a baar-lorbo bala ba na bʋɔlɔ a Abiya ji-gbulĩ pʋɔ. A ʋ pɔw ba bʋɔlɔ a Elijabɛtɩ na mɩ ɩ a Naaŋmɩn baar-loro bi-pɔw. 6A ba jaa ayi ɩ na nɩ-torisɩ a Naaŋmɩn nii-sɔw, ɩ̃ jɔrɔ a Nɩ-kpɛ̃ɛ ƴɛr-kpɛn nɩ a ʋ ƴɛrɩ̃sɩ a jaa. 7Ɩ̃-cɛ baa dãa tɛrɛ bie wa, a-na-ɩ a Elijabɛtɩ ɩ na pɔw ab, ɩ̃ a ʋlɔ nɩ a Jakarɩ yomo dãa tɔl.
8A daar ta na a Jakarɩ nɩ a ʋ lãa-tʋnbɔ jew taa a tʋmɔ, ʋ be a Naaŋmɩn nii-sɔw a lɛ, tʋnɔ a ʋ baar-lo-tʋmɔ. 9Gbãbie ba lɔb vɛl ʋ ir tu nɩ a mɩnɛ a ba baar-lo-tʋmɔ na be, ʋ kpɛ a Nɩ-kpɛ̃ɛ puor-yir kpɛ̃ɛ na ʋ ƴɔ̃w a *tɩ̃ɩ-nyu-vɩlaa a vũu pʋɔ a dɩ. 10A nɩ-yaw ɩraa na be a yẽw sʋɔrɔ a Naaŋmɩn a tɩ̃ɩ-nyu-vɩlaa dɩfʋ daar. 11A Nɩ-kpɛ̃ɛ sɩ-tʋnaa nyɩrʼã a Jakarɩ, na ʋ ɩraa a tɩ̃ɩ-nyu-vɩlaa dɩfʋ jie a dʋrɩ̃ loor. 12A lɛ a Jakarɩ na nyɛ ʋ, a ʋ suur dama ʋ na, ɩ̃ a pʋlɩ̃nyɛ vʋ̃ɔnɔ ʋ. 13Ɩ̃-cɛ a sɩ-tʋnaa yelʼã:
“Jakarɩ! Taa jɔrɔ dãbɩ̃ɛ wa. A-na-ɩ a Naaŋmɩn sɔw na a fʋ sʋɔrfʋ. A fʋ pɔw Elijabɛtɩ na dɔw na dabile, fú pʋr ʋ a yuor Jã. 14Nʋ̃ɔ na nyɔw fʋ na a fʋ cɩlɛ, ɩ̃ a na mɩ nʋmɔ na a nɩ-yaw a ʋ dɔwfʋ ɩnɛ. 15A-na-ɩ ʋ na ɩ na gãdaa a Nɩ-kpɛ̃ɛ nii-sɔw. Ʋ kɔ̃ wa nyu a dɩvɛ̃ nɩ a dã-tuo fɩ̃ɩ wa; ɩ̃ wa nyɔw nɩ a bile ʋlɔ pʋɔ tɛrɛfʋ daar, ʋ na sɛw nɩ na a Naaŋmɩn Sɩɛ. 16Ʋ na maalʼã a *Ɩsɩrayɛl nɩbɛ yaw jie a ba lɛ lɩɛb wa a ba Nɩ-kpɛ̃ɛ Naaŋmɩn jie. 17Ʋ na de na a Nɩ-kpɛ̃ɛ nĩe cenʼɩ̃ a Naaŋmɩn Sɩɛ ʋlɔ nɩ a fãgã ʋlɔ a Eli na dãa tɛrɛ. Ʋ na lɩɛbʼã a saanba sube a ba ɩ bõ-ƴen nɩ a ba bibiir, ɩ̃ mɩ lɩɛb a to-wownbo yɛ̃, a ba na tɛrɛ a nɩ-torisɩ yɛ̃; ʋ na maalʼã a nɩbɛ a ba gbɛɛrɩ̃ a ba mɩ̃ɛ a Nɩ-kpɛ̃ɛ ɩnɛ.”
18A Jakarɩ soor a sɩ-tʋnaa:
“Mɩnɛ ɩ̃ na ɩ ɩ̃ bɔ̃w ka a ɩ na yel-mɩ̃ɛ? A-na-ɩ ɩ̃ korʼã, ɩ̃ a ɩ̃ pɔw yomo mɩ tɔl.” 19A sɩ-tʋnaa yel ʋ:
“Maa ɩ̃ ɩ a Gabɩyɛl#1.19 Gabɩyɛl: A Naaŋmɩn sɩ-tʋnaa kãw yuor ʋ. na ma ɩraa a Naaŋmɩn nii-sɔw. A ʋlɔ ɩ̃ tʋ ma a ɩ̃ wa ƴɛrʼɩ̃ fʋ, ɩ̃ man fʋ a ƴɛr-son na. 20Nyɛ! A nʋɔr na kpal fʋ na, fʋ kɔ̃ tʋɔ ƴɛr ƴɛrɩ̃ wa ta nɩ a bibir ʋlɔ a ana yele na maala wa. A-na-ɩ faa sɔw nɩ puor a ɩ̃ ƴɛrɩ̃sɩ na sɛw a maal a daar ɩ̃ wa ta wa.”
21A nɩbɛ bala cãa na ɩraa gu a Jakarɩ, a nɔɛ ko ba a mɩnɛ ʋ na kam a Naaŋmɩn puor-yir kpɛ̃ɛ pʋɔ a lɛ. 22A lɛ ʋ na yi, ꞌwaa dãa tʋɔrɔ ƴɛrɛ nɩ ba wa, a ba bɔ̃w ka bom nyɩr ʋ na a Naaŋmɩn puor-yir kpɛ̃ɛ pʋɔ. A nur ʋ mɩɩnɛ nɩ ba, ɩ̃ ꞌwaa tʋɔrɔ ƴɛrɛ wa.
23A lɛ a ʋ Naaŋmɩn puor-yir kpɛ̃ɛ tʋmɔ jewfʋ bibir na ta, ʋ yi na kul a ʋ yir. 24A ɩ na fɩ̃ɩ ɩ̃ a ʋ pɔw Elijabɛtɩ tɛrɛ pʋɔ na ʋ sɔɔlɩ̃ nɩ cur anuu, 25yele nɩ: “Nyɛ a ala a Nɩ-kpɛ̃ɛ na maal a ɩ̃ jie. A daar ta na, ʋ ꞌwuor ma, ɩ̃ ir a ɩ̃ vĩ ʋlɔ ɩ̃ na dãa tɛrɛ a nɩbɛ nii-sɔw.”
A JEEJU DƆWFƲ A SƖ-TƲNAA NA MIIL
26A lɛ a Elijabɛtɩ na tɛrɛ a ʋ pʋɔ maalʼɩ̃ cur ayʋɔb, a Naaŋmɩn tʋ na a ʋ sɩ-tʋnaa Gabɩyɛl a Galile, tẽw kãw pʋɔ na dɩ a Najarɛtɩ, 27be a pɔsabile kãw sɛ̃, na ɩ a Jojɛfʋ baraa. A Jojɛfʋ sãa-kʋmɔ nɩ a Davɩtɩ na dãa ɩ a jamana. Ɩ̃ a pɔsabile ʋlɔ yuor ɩ̃ dɩ a Maarɩɩ. 28A sɩ-tʋnaa kpɛ na a ʋ sɛ̃ ɩ̃ yel ʋ:
“Ɩ̃ puor fʋ na, a fʋ̃ʋ a Naaŋmɩn na vɛl ir maal a vɩlaa. A Nɩ-kpɛ̃ɛ be nɩ fʋ na.” 29A ƴɛrɩ̃ ʋlɔ dama na a Maarɩɩ suur, ʋ sooro a ʋ mɩ̃ɛ a puorfʋ ʋlɔ par. 30A sɩ-tʋnaa yel ʋ:
“Maarɩɩ! Taa jɔrɔ dãbɩ̃ɛ wa. A-na-ɩ a Naaŋmɩn vɛl fʋ na ir maal a vɩlaa. 31Nyɛ, fʋ na tɛrɛ na a pʋɔ, dɔw dabile, na fʋ pʋr ʋ a yuor *Jeeju. 32Ʋ na ɩ na nɩ-kpɛ̃ɛ, ɩ̃ ba na bʋɔlɔ ʋ na a saa juu Naaŋmɩn Bie. A Nɩ-kpɛ̃ɛ Naaŋmɩn na biin ʋ na ʋ ɩ a jamana a ʋ sãa-kʋmɔ Davɩtɩ kaarɩ̃. 33Ʋ na ɩ na a Jakɔb yir deme jamana a daar a jaa, ɩ̃ a ʋ fãw kɔ̃ tɛrɛ baarfʋ daar wa.” 34A Maarɩɩ soor a sɩ-tʋnaa:
“Mɩnɛ a na tʋɔ ɩ a lɛ? A-na-ɩ maa bɔ̃w daba sɛr wa.” 35A sɩ-tʋnaa yel ʋ:
“A Naaŋmɩn Sɩɛ na suu na a fʋ jie ɩ̃ a saa juu Naaŋmɩn fãw na piw fʋ na. Ala-ɩ̃-sɔ a bie ʋlɔ fʋ na dɔwrɔ na ɩ na cɛcɛ, ɩ̃ ba na bʋɔlɔ ʋ na a Naaŋmɩn Bie. 36Nyɛ, a fʋ yɛbɛ Elijabɛtɩ ba na dãa bʋɔlɔ a pɔw ab, ʋ tɛrɛ na pʋɔ a ʋ korfʋ daar a ɩ cur ayʋɔb a dɩnaa. 37A-na-ɩ bom ma be be a Naaŋmɩn maala faara wa.” 38A Maarɩɩ yel:
“Ɩ̃ ɩ na a Nɩ-kpɛ̃ɛ tʋ̃tʋnɔ. Á maal a lɛ a ɩ̃ jie a mɩnɛ fʋ na yel.” A sɩ-tʋnaa bar ʋ na ɩ̃ yi cen.
A MAARƖƖ NA CEN A ELIJABƐTƖ SƐ̃
39A ʋna daarʼãa, a Maarɩɩ yi na pɔɔrɔ cere a Jude wɩɛr kãw pʋɔ na be a tan loor. 40Ʋ ta na kpɛ a Jakarɩ yir, puor a Elijabɛtɩ. 41A mɩnɛ a Elijabɛtɩ na wõ a Maarɩɩ puorfʋ, a ʋ bie lɩɛbɛ na a ʋ puorɩ̃, ɩ̃ ʋ sɛw nɩ a Naaŋmɩn Sɩɛ, 42ɩ̃ ʋ wuurʼɩ̃ kpɛ̃w yele:
“A Naaŋmɩn be nɩ fʋ na gãw a pɔɔbɔ ba jaa, ɩ̃ ʋ mɩ be nɩ na a bie ʋlɔ na be a fʋ puorɩ̃. 43Bõ ɩ mɩ ɩ a ɩ̃ Nɩ-kpɛ̃ɛ mã mɩ wa a ɩ̃ sɛ̃? 44A-na-ɩ a mɩnɛ ɩ̃ na tɔɔ wõ a fʋ puorfʋ, a nʋmɔ na a bie ʋ lɩɛbɛ a ɩ̃ puorɩ̃. 45Anʋmɔ fʋ na a-na-ɩ fʋ sɔw nɩ na puor, áa ala a jaa a Nɩ-kpɛ̃ɛ na yel fʋ na maalʼã a lɛ.”
A YÉLE A MAARƖƖ NA CƖƐRƐ PƐWRƐ NƖ A NAAŊMƖN
46A Maarɩɩ yel:
“Ɩ̃ pɛwrɛ na a Nɩ-kpɛ̃ɛ a ɩ̃ pʋɔ pʋɔ,
47ɩ̃ a ɩ̃ sɩɛ mɩ cɩlɛ na a ɩ̃ Fafaara Naaŋmɩn ɩnɛ,
48a-na-ɩ ʋ ꞌwuorʼã a ʋ tʋtʋ̃-poole na pab.
Wa nyɔw nɩ a ƴɛ̃ƴɛrɩ̃, a bal par bʋrɔ bʋrɔ ba jaa
na yelʼã a nʋ̃ɔ ƴala ma na,
49a-na-ɩ a Fãw Sʋbɔ maalʼã tʋ̃-bɛrɛ a ɩ̃ jie.
A ʋ yuor ɩ na cɛcɛ.
50A ʋ nã-bɔ̃wfʋ ma be nɩ na
a bal par bʋrɔ bʋrɔ ba jaa na jɔrɔ ʋ.
51Ʋ miilʼã a mɩnɛ a ʋ nuu fãgã na wɔ̃,
ʋ yɛ̃yɛlɩ̃ na a bala na dãa tɛrɛ
a yo-bɔfʋ tɩɛrɩ̃sɩ a ba suur pʋɔ bar.
52Ʋ irʼã a jamansɩ a ba jaajiir bar,
ɩ̃ maal a bala na pab a ba lɩɛb ɩ nɩ-bɛrɛ.
53Ʋ kʋ na a kɔ̃ deme a yel-sono a sɛw ba,
ɩ̃ diw a tɛraa deme bar a ba cenʼɩ̃ nu-jaalsɩ.
54-55Ʋ wa na sũo a ʋ tʋ̃tʋnɔ *Ɩsɩrayɛl
a mɩnɛ ʋ na dãa pʋlɩ̃ nɩ a sɩ sãa-kʋnbɔ,
ɩ̃ ꞌwaa hiin a ʋ nã-bɔ̃wfʋ ʋ na tɛrɛ nɩ a Abʋraham
nɩ a ʋ bal par deme a daar a jaa wa.”
56A Maarɩɩ maalʼã cur ata a Elijabɛtɩ sɛ̃, ɩ̃ wa pãa kul.
A JÃ-BATII DƆWFƲ ƳƐRƖ̃
57A Elijabɛtɩ bie dɔwfʋ daar ta na, ʋ dɔw dabile. 58A ʋ taarba nɩ a ʋ yir deme wõ na a mɩnɛ a Naaŋmɩn na sɩrɩ̃ maal ʋ a vɩlaa, ɩ̃ na ba mɩ tɛrɛ a nʋ̃ɔ a ʋ kaarɩ̃. 59A bibie anuu-nʼata dayen ba wɩ na a bie yʋɔr ŋmaafʋ ɩnɛ, ɩ̃ bʋɔrɔ ba pʋr ʋ a yuor a Jakarɩ na ɩ a ʋ sãa yuor. 60Ɩ̃-cɛ a ʋ mã yelʼã a ꞌwaa dɩrɛ a lɛ wa, á Jã ba na bʋɔlɔ ʋ. 61A ba yel ʋ:
“Nɩrɛ ma be be a fʋ yir deme sɔ̃w na dɩ a ʋna yuor wa.” 62Ɩ̃ na ba mɩɩn a sãa nɩ a nur bʋɔrɔ ba bɔ̃w a yo-buor ʋ na bʋɔrɔ ba pʋr ʋ. 63A Jakarɩ ɩ a ba kʋ ʋ sɛbɛ, ʋ sɛb ƴɔ̃w yel áa ʋ yuor dɩ na Jã. A nɔɛ ko a nɩbɛ ba jaa. 64A jie naan, a Jakarɩ nʋɔr ꞌlaw na, a ʋ dɛlɩ̃bir mɩ ꞌlor, ʋ lɛ ƴɛrɛ a ƴɛrɩ̃ pɛwrɛ nɩ a Naaŋmɩn. 65A dãbɩ̃ɛ nyɔw a ba lãa-pɩɛlbɛ ba jaa, ɩ̃ a ba mɩ mana a ala na ta kʋrɔ taa a Jude wɩɛr ʋ jaa pʋɔ na be a tan jur. 66A bala ba jaa na wõ a ʋna ƴɛrɩ̃, de ʋ na ƴɔ̃w a ba suur pʋɔ ɩ̃ yele:
“Mɩnɛ a bibile na nɔɔ be? A-na-ɩ a Nɩ-kpɛ̃ɛ fãw be nɩ ʋ na sɩrɛ jaa.”
A NAAŊMƖN ƳƐRƖ̃SƖ A JAKARƖ NA HIERE
67A Jã sãa Jakarɩ sɛw nɩ na a Naaŋmɩn Sɩɛ, ɩ̃ hiere yele nɩ:
68“Nyɩ́ pɛwrɛ a Nɩ-kpɛ̃ɛ na ɩ a *Ɩsɩrayɛl Naaŋmɩn,
a-na-ɩ ʋ wa na a ʋ nɩbɛ sɛ̃ na ʋ faa ba.
69Ʋ ƴɔ̃w sɩ na Fafaar-gãdaa
be a ʋ tʋtʋnɔ Davɩtɩ yir deme sɔ̃w,
70a mɩnɛ ʋ na dãa ƴɔ̃w a ʋ ƴɛr-hier-sono
a ba yel a korĩ-cɛ jaa.
71Ʋ yel sɩ na á ʋ na faa sɩ na a sɩ sama-deme jie,
lãa faa nɩ sɩ a bala ba jaa na ꞌlaar sɩ nuumɩ.
72Lɛ ʋ ma miilʼɩ̃ a ʋ nã-bɔ̃wfʋ a sɩ sãa-kʋnbɔ jie,
ɩ̃ ma mɩ tɩɛr bɔ̃w nɩ a ʋ pʋlɩ̃-son,
73tu nɩ a mɩnɛ ʋ na dãa pʋlɩ̃ nɩ
a sɩ sãa-kʋmɔ Abʋraham,
74a ʋ na faa sɩ na a sɩ sama-deme nuumɩ,
a sɩ na tʋɔ tʋnɔ a ʋ tʋmɔ, kɔ̃ jɔrɔ dãbɩ̃ɛ wa,
75ɩ̃ na sɩ ow kpee ɩ cɛcɛ, ɩ nɩ nɩ-torisɩ
a ʋ nii-sɔw a sɩ baafʋ bibie a jaa pʋɔ.
76Ɩ̃ a fʋ̃ʋ ɩ̃ bie,
ba na bʋɔlɔ fʋ na a saa juu Naaŋmɩn ƴɛr-hiere
a-na-ɩ fʋ na de na a Nɩ-kpɛ̃ɛ nĩe gbɛɛrɛ a ʋ sɔr,
77na fʋ miil a ʋ nɩbɛ a ba bɔ̃w a faafʋ sɔr,
78a na yi a ba maal-faar a Naaŋmɩn na diere
bara kʋrɔ ba ɩnɛ.
A-na-ɩ a nã-bɔ̃wfʋ ƴala na a sɩ Naaŋmɩn jie,
a ala ɩnɛ a saꞌlon cã́a nɔɔ wa pur caarɩ̃ sɩ,
79a mɩnɛ ʋ na tʋɔ caarɩ̃ a bala na be a libe pʋɔ,
nɩ a bala na pɩɛlʼɩ̃ a kũu,
ɩ̃ tɔwrɔ sɩ ƴɔnɔ a pɩɛnfʋ sɔr pʋɔ.”
80A bile nʋ̃ɔnɔ na ɩ̃ a ʋ sɩɛ mɩ pɔwrɔ a fãgã. A wɛkar pʋɔ ʋ be wa ta nɩ a ʋna bibir ʋ na wa yi a Ɩsɩrayɛl nɩbɛ nii-sɔw.
Currently Selected:
Luki Sɛbɛ 1: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
