Luki Sɛbɛ 11
11
A JEEJU NA JAAN A Ʋ PAR-TUURBE A NAAŊMƖN SƲƆRFƲ
(Mat 6.9-13, 7.7-11)
1Bibir bõ-ƴen, a *Jeeju sʋɔrɔ na a Naaŋmɩn jie kãw. A lɛ v na sʋɔr baar, a v *par-tuure kãw yel v na:
“Nɩ-kpɛ̃ɛ, jaan sɩ a Naaŋmɩn sʋɔrfʋ a mɩnɛ a Jã na jaan a ʋ *par-tuurbe.” 2A Jeeju yel ba:
“A lɛ nyɩ na sʋɔrɔ a Naaŋmɩn, nyɩ́ yel:
‘Sɩ Sãa! A fʋ yuor ú ow kpee,
a fʋ fãw ú wa.
3Kʋrɔ sɩ a bibie a jaa,
a bõ-dɩraa ala na sɛw nɩ sɩ.
4De a sɩ faar bar kʋ sɩ,
a-na-ɩ a sɩmɩ mɩ, sɩ ma de na
a nɩrɛ lɛ na bɩɛ a sɩ jie bɩɛfʋ bar ku ʋ.
Taa bar sɩ a sɩ kpɛ a bɩɩrfʋ pʋɔ wa.’ ”
5A Jeeju lɛ yel ba na go:
“A ala ɩ a kãw a nyɩ sɔ̃w tɛrɛ na a ba-daba na ʋ cen na nyɛ ʋ a tɩsɔw porɩ̃ ɩ̃ yel ʋ: ‘Ɩ̃ ba yaa! Pɛ̃w ma bur-bie ata, 6a-na-ɩ ɩ̃ baraa kãw yi na wɩɛr wa a ɩ̃ sɛ̃, ɩ̃ a maa tɛrɛ bom jaa kʋrɔ ʋ wa,’ 7a nʋmɔ-wa-sɔw a ʋ tɔ sʋbɔ ʋlɔ na be a diem na yel ʋ na: ‘Taa vɔwrɔ ma wa; sɩ pɔw na a pan baar, a maa nɩ a ɩ̃ bibiir gã na; maa lɛ tʋɔrɔ ire kʋrɔ fʋ buru wa.’ 8Ɩ̃ yele nyɩ na, a ʋlɔ ma saarɩ̃ ir ku ʋ bom a-na-ɩ a ʋ baraa ʋ ɩ wa, ɩ̃ ʋ na irʼã ku ʋ a yele a jaa ʋ na buɔrɔ, a-na-ɩ ʋ vɔwrɔ ʋ na.
9“Ɩ̃ a maa, ɩ̃ yele nyɩ na, nyɩ́ sʋɔrɔ ɩ̃ nyɩ na pɔw na, nyɩ́ buɔrɔ ɩ̃ nyɩ na nyaa na, nyɩ́ ŋmeere a pan ɩ̃ ba na yuo nyɩ na. 10A-na-ɩ a nɩrɛ lɛ na sʋɔrɔ ma pɔw na; a ʋlɔ na buɔrɔ ma nyaa na, ɩ̃ ba ma yuo na a pan a ʋlɔ na ŋmeere ɩnɛ. 11Sãa buor ɩ̃ be a nyɩ sɔ̃w, a ala ɩ a ʋ bie suɔr ʋ na a jɩm ʋ de waab ku ʋ? 12Mɩɩ a ʋlɔ ɩ̃ suɔr ʋ a nɔjɛl, ʋ de lãw ku ʋ? 13A ala ɩ a nyɩmɩ na ɩ a nɩ-faar, nyɩ bɔ̃w na yel-vɛlɛ ma kʋ a nyɩ bibiir, mɩnɛ ɩ̃ ɩ a kɔ̃ nyɩrɩ̃ nʋmɔ a nyɩ Sãa na be a saa juu ʋ na tɩɩr a ʋ Sɩɛ kʋ a bala na sʋɔrɔ ʋ wa?”
A JEEJU NƖ A BƐƐJƐBUL
(Mat 12.22-30, Mar 3.22-27)
14A *Jeeju dãa na diwre kɔ̃tɔn na maal daba ʋ ɩ nɔ-mu sʋbɔ. A lɛ a kɔ̃tɔn na yi baar, a nɔ-mu sʋbɔ lɛ ƴɛrɛ na a ƴɛrɩ̃sɩ, a nɔɛ ko a nɩbɛ. 15Ɩ̃-cɛ a nɩbɛ ŋmɛɛ yelʼã:
“A *Bɛɛjɛbul na ɩ a kɔ̃tɔn nɩ-kpɛ̃ɛ, a ʋ fãw ʋ diwre nɩ a kɔ̃tɔnsɩ bara.” 16Ɩ̃ a nɩŋmɛɛ bʋɔrɔ na ba jʋʋr ʋ bɔ̃w a ʋ tɛw ɩ̃ sʋɔrɔ ʋ a ʋ maal bom miilʼɩ̃ ba a ba bɔ̃w ka a Naaŋmɩn jie a ʋ fãw sɩrɩ̃ yi. 17Ɩ̃-cɛ a Jeeju bɔ̃w na a ala ba na tɩɛrɛ ɩ̃ yel ba:
“A tẽw jaa lɛ na var ayi jɛbɛ nɩ a ʋ mɩ̃ɛ ʋ na wɛlʼã, ɩ̃ a ʋ yie na lo na dɔɔl taa bõ-ƴene-ƴene. 18A lɛ ʋ mɩ, a ala ɩ a Sãta lɩɛbʼã jɛbɛ nɩ a ʋ mɩ̃ɛ, mɩnɛ a ʋ fãw na ɩ ɩ̃ tʋɔ cãa be be? Ɩ̃ yelʼã a lɛ a-na-ɩ nyɩ yelʼã a Bɛɛjɛbul fãw ɩ̃ de diwre nɩ a kɔ̃tɔnsɩ. 19Ɩ̃ a maa, a ala ɩ a Bɛɛjɛbul fãw ɩ̃ diwre nɩ a kɔ̃tɔnsɩ, a bala na tuure nyɩ, ala fãw ba ma diw nɩ ba? Ala-ɩ̃-sɔ a bala tɔr jaa ɩ̃ na ɩ a nyɩ ƴɛr-guorbo. 20Ɩ̃-cɛ a ala ɩ a Naaŋmɩn tʋɔfʋ ɩ̃ diwre nɩ a kɔ̃tɔnsɩ, a miile na áa Naaŋmɩn fãw ta na a nyɩ jie.
21“A gãdaa na bɔ̃w tɛrɛ a jɛb yele gu nɩ a ʋ yir, a ʋ yele ma jɛ na vɩlaa. 22Ɩ̃-cɛ a ala ɩ a ʋlɔ fãgã na gãw ʋ wa na tʋɔ ʋ, maal ʋ ʋ bal, ʋ na fa na a ʋna gãdaa jɛb yele ala ʋ na dãa tɩɛrɛ nɩ ɩ̃ de a ʋ yele a jaa po a nɩbɛ.
23“A ʋlɔ na ma be a ɩ̃ jie wa, ʋ ɩ na a ɩ̃ san-sʋbɔ, ɩ̃ a ʋlɔ na ma sũono ma a sɩ lãa kaala wa, ʋ yɛ̃yɛlɛ na bara.”
A KƆ̃TƆN BIER LƖƐB WAA
(Mat 12.43-45)
24“A kɔ̃tɔn bier ɩ̃ yi a nɩrɛ pʋɔ, ʋ ma cenʼã na viire yʋɔrɔ a wɛkar pʋɔ, bʋɔrɔ a jie ʋlɔ ʋ na tʋɔrɔ pɩɛnɛ. A ʋlɔ ɩ̃ wa faa, ʋ ma yelʼã: ‘Ɩ̃ na lɩɛbʼã kul a ɩ̃ yir ʋlɔ pʋɔ ɩ̃ na yi ɩ̃ cɛ bar.’ 25A lɛ ʋ na lɩɛb wa, ʋ nyɛ na a ba pɩɩr a yir ʋlɔ ɩ̃ gbɛɛrɩ̃ a yele vɩlaa. 26A lɛ, ʋ ma lɩɛbʼã cen na bɔ a ʋ tɔ deme anuu-nʼayi na nyɩrɩ̃ ɩ a kɔ̃tɔn-faar gãw ʋ, a ba lãa lɩɛb wa kpɛ a yir ʋlɔ pʋɔ jɛ a be. A ala ɩ̃ baar, a daba ʋlɔ ben ma nyɩrɩ̃ na bɛlɩ̃ gãw a dãdãw.”
A NƲ̃Ɔ ƲLƆ NA SƖRƖ̃ Ɩ A NƲ̃Ɔ
27A mɩnɛ a *Jeeju na ƴɛrɛ a lɛ, pɔw kãw yel ʋ na nɩ kpɛ̃w be a nɩbɛ sɔ̃w:
“A nʋmɔ a pɔw ʋlɔ na dɔw fʋ nɩ a ʋ bɩr fʋ na ƴen.” 28Ɩ̃-cɛ a Jeeju yelʼã:
“A ɛ̃ɛ nʋmɔ a bala na cɛlɛ a Naaŋmɩn ƴɛrɩ̃ ɩ̃ sɔw maala.”
A JONASƖ JƖBAA
(Mat 12.38-42)
29A mɩnɛ a nɩ-yaw na tiwre taa a *Jeeju sɛ̃, ʋ nyɔw na ɩ̃ yele:
“A dɩnaa nɩbɛ ɩ na nɩ-faar. Ba buɔrɔ na ba nyɛ nɔ-kofʋ tʋn ʋ ɩ ba jɩbaa, ɩ̃-cɛ baa be na nyɛ bom ɩ̃ a ala ma ɩ a Jonasɩ jɩbaa ʋ wa. 30A mɩnɛ a Jonasɩ na ɩ a jɩbaa a Nɩnɩvɩ-tẽ-deme jie, lɛ a *Nɩbɛ Bie na mɩ ɩ a jɩbaa a dɩnaa nɩbɛ jie. 31A ƴɛrɩ̃sɩ guorfʋ dayen, a tẽ-nɩdaa pɔɔ-jamana na irʼã ɩraa a dɩnaa nɩbɛ nii-sɔw ɩ̃ ƴɔ̃w ba a ƴɛrɩ̃, a-na-ɩ ʋ yi na a tẽw baarfʋ jie ɩ̃ wa cɛl a jamana Salʋmɔ̃ yɛ̃. Ɩ̃ a nyɩmɩ, nyɩ nyɛ na a ʋlɔ na gãw a Salʋmɔ̃ a nyɩ sɔ̃w. 32A ƴɛrɩ̃sɩ guorfʋ dayen, a Nɩnɩvɩ-tẽ-deme na mɩ irʼã ɩraa a dɩnaa nɩbɛ nii-sɔw ɩ̃ ƴɔ̃w ba a ƴɛrɩ̃, a-na-ɩ ba lɩɛbʼã a ba yɛ̃ a lɛ ba na wõ a Jonasɩ ʋ hier a Naaŋmɩn ƴɛrɩ̃. Ɩ̃ a nyɩmɩ, nyɩ nyɛ na a ʋlɔ na gãw a Jonasɩ a nyɩ sɔ̃w.
A LÃPA SƲKPAR
(Mat 5.15, 6.22-23)
33“Nɩrɛ ma ƴɔnɔ a lãpa ɩ̃ diere sɔɔlɔ, mɩɩ pɔwrɔ lakpow pʋɔ wa, ɩ̃-cɛ a jie ʋlɔ ʋ na tʋɔrɔ caara ba, ba ma ɛ̃ɛ dɔɔl ʋ, a mɩnɛ a nɩbɛ bala na kpɛɛrɛ a be na nyɛ a cãa. 34A fʋ mimie ɩ̃ ɩ a fʋ ɩ̃gan lãpa; a ala ɩ a fʋ mimie ɩ na mimi-sono, a fʋ ɩ̃gan ʋ jaa na mɩ caarɩ̃ na, ɩ̃ a ala ɩ a fʋ mimie sãw na, a fʋ ɩ̃gan na mɩ liw na. 35Ala-ɩ̃-sɔ, bɔ̃w tɛrɛ a fʋ mɩ̃ɛ, a cãa ʋlɔ na be a fʋ pʋ̃ɔ ʋ taa wa lɩɛb ɩ libe wa. 36A ala ɩ a fʋ ɩ̃gan ʋ jaa caarɩ̃ na, ma cɛ jie bar a libe pʋɔ wa, ʋ na be na a cãa pʋɔ ʋ jaa, wɔ̃ taa nɩ a mɩnɛ a lãpa na ma caarɩ̃ fʋ.”
A FARƖSƖ NƖBƐ NƖ A ƳƐR-KPƐN-BƆƆNBƆ PAR A JEEJU NA IR
(Mat 23.1-36, Mar 12.38-40)
37A mɩnɛ a *Jeeju na ƴɛrɛ a ƴɛrɩ̃, a Farɩsɩ nɩrɛ kãw bʋɔl ʋ na be a ʋ yir a dɩb dɩfʋ ɩnɛ, ʋ cen na kpɛ jɛ a dɩb par. 38A nʋɔr ko na a Farɩsɩ nɩrɛ ʋlɔ a lɛ ʋ na nyɛ a Jeeju ʋ jɛ a dɩb par ɩ̃ ma dãa de nĩe pɔl a ʋ mɩ̃ɛ wa. 39Ɩ̃-cɛ a Nɩ-kpɛ̃ɛ yel ʋ na:
“A nyɩmɩ *Farɩsɩ nɩbɛ! Nyɩ́ nyɛ a mɩnɛ nyɩ na wɔ̃: nyɩ ma pɛw na a nyɩ ŋman nɩ a nyɩ laa puo-sɔw bar, ɩ̃ a nyɩ pʋɔ sɛw nɩ na a nyanyu-tɩɛrɩ̃sɩ nɩ a fãa maalfʋ. 40Dãbolo nyɩ ɩ lɛɛ! A ʋlɔ na maal a puo-sɔw, má a ʋlɔ ɩ̃ mɩ maal a pʋɔ! 41Nyɩ́ ɛ̃ɛ de a ala na be a pʋɔ kʋ a nãw deme, ɩ̃ a yele a jaa na ɩ na cɛcɛ a nyɩ jie.
42“Ɩ̃-cɛ nabier na pɔw na a nyɩmɩ Farɩsɩ nɩbɛ, a-na-ɩ nyɩ ma irʼã a Naaŋmɩn ben a nyɩ jɛɛ-yele pʋɔ nɩ a yel-bulisɩ a jaa na ɩ a jɩɛr, ɩ̃ ma lɛ ɛ̃ɛ bar a Naaŋmɩn torfʋ nɩ a ʋ nʋfʋ; a ala ɩ̃ dãa sɛw nyɩ maala ɩ̃ kɔ̃ hiin a yel-bil ala wa.
43“Nabier na pɔw na a nyɩmɩ Farɩsɩ nɩbɛ, a-na-ɩ nyɩ nʋ na a nii-sɔw jaajiir a *puorfʋ yie pʋɔ, ɩ̃ ma mɩ bʋɔrɔ a nɩbɛ ba jaa ba puoro nyɩ a dar pʋɔ. 44Nabier na pɔw nyɩ na! A-na-ɩ nyɩ wɔ̃ na taa nɩ a yar ala kaarɩ̃ a nɩbɛ na ma nɛbɛ, ɩ̃ ma bɔ̃wnaa wa, a-na-ɩ bom ma be be miile a yar ʋ wa.”
45A *ƴɛr-kpɛn-bɔ̃wnɔ kãw yel a Jeeju:
“Jãjaana, a lɛ fʋ na ƴɛrɛ, má a sɩmɩ mɩ fʋ mɩ tʋrɔ.” 46A Jeeju yel:
“Nabier na mɩ pɔw nyɩ na a nyɩmɩ *ƴɛr-kpɛn-bɔɔnbɔ, a-na-ɩ nyɩ ma tuo na a nɩbɛ a to-bɛrɛ na kpɛmɛ a tuofʋ, ɩ̃ nyɩ maa ir a nyɩ nuu sɩɩrʼɩ̃ fɩ̃ɩ wa. 47Nabier na pɔw nyɩ na! A-na-ɩ nyɩ ma cɔɔrɩ̃ na a Naaŋmɩn ƴɛr-hierbe yar ɩ̃ a ɩ a nyɩ sãa-kʋnbɔ ɩ̃ kú. 48A lɛ, nyɩ miilʼã a nyɩ sɔw na a ala a nyɩ sãa-kʋnbɔ na dãa maal, a-na-ɩ bala ɩ̃ kú a Naaŋmɩn ƴɛr-hierbe ɩ̃ a nyɩ cɔɔrɩ̃ a ba yar. 49Ala-ɩ̃-sɔ a Naaŋmɩn na ɩ a Kpaarfʋ Sʋbɔ yel: ‘Ɩ̃ na tʋ nɩ na a ƴɛr-hierbe nɩ a *nɩ-tʋnɩsɩ a ba jie; ba na kú na a ŋmɛɛ ɩ̃ hʋɔl a ŋmɛɛ,’ 50a mɩnɛ a ƴɛrɩ̃ na tuo a dɩnaa nɩbɛ juu a Naaŋmɩn ƴɛr-hierbe jɩ̃ɩ ɩnɛ ba na deer, wa nyɔw nɩ a mɩnɛ a Naaŋmɩn na maal a tẽw, 51ɩ̃ wa mɩ nyɔw nɩ a mɩnɛ ba na kú a Abɛl wa ta nɩ a Jakarɩ ba na kú a baar lofʋ jie nɩ a Naaŋmɩn puor-yir kpɛ̃ɛ sɔɔlɩ̃sɔw. Sɩrɛ jaa ɩ̃ yel nyɩ, ba na tuo na a dɩnaa nɩbɛ a ʋna ƴɛrɩ̃.
52“Nabier na pɔw na a nyɩmɩ ƴɛr-kpɛn-bɔɔnbɔ, a-na-ɩ nyɩ irʼã a bɔ̃wfʋ nakili bar. Nyɩmɩ mɩ̃ɛ ma kpɛ wa, ɩ̃ nyɩ mɩ varʼã a sɔr a bala na dãa bʋɔrɔ ba kpɛ.”
53A lɛ a Jeeju na yi a jie ʋlɔ baar, a ƴɛr-kpɛn-bɔɔnbɔ nɩ a Farɩsɩ nɩbɛ nyɔw na ɩ̃ bʋɔrɔ ʋ a gɔn, papire nɩ ʋ, bʋɔrɔ ʋ ƴɛr ƴɛrɩ̃sɩ yayaw 54na ba bɩɩrɛ nɩ ʋ, ʋ na ƴɛr ƴɛrɩ̃ lɩɛb nyɔw nɩ a ʋ mɩ̃ɛ.
Currently Selected:
Luki Sɛbɛ 11: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
