Luki Sɛbɛ 12
12
A POE AYI TƐRƐFƲ
(Mat 10.26-27)
1A daar ʋlɔ pʋɔ, a nɩbɛ tiw na taa ture-ture, fʋrɔ taa nɛbɛ taa, a *Jeeju ƴɛrʼɩ̃ a ʋ *par-tuurbe na ʋ yel ba:
“A dãdãw bom ɩ na: nyɩ́ gu nyɩ mɩ̃ɛ a *Farɩsɩ nɩbɛ tabɩr ɩnɛ na ɩ a ba poe ayi tɛrɛfʋ. 2Bom ma be be na sɔɔlɩ̃ ɩ̃ mɔɔ yire cãa pʋɔ wa. 3Ala-ɩ̃-sɔ a ala a jaa nyɩ na yele a libe pʋɔ na yi na cãa pʋɔ a ba bɔ̃wnaa, ɩ̃ a ala nyɩ na hũhune a di-bile pʋɔ ba na hierʼã a ala a gara jur.
A ƲLƆ NA SƐW FƲ JƆRƆ
(Mat 10.19-20, 10.28-33, 12.32)
4“A nyɩmɩ na ɩ a ɩ̃ badɛɛ, ɩ̃ yele na kʋrɔ nyɩ, nyɩ taa jɔrɔ dãbɩ̃ɛ a bala ɩnɛ na ma kú a ɩ̃gan baar, ɩ̃ ma lɛ tʋɔrɔ maala bom kãw wa. 5Ɩ̃ na miil nyɩ na a ʋlɔ na sɛw a nyɩ na jɔrɔ: nyɩ́ jɔrɔ a ʋlɔ na tʋɔrɔ diere a nɩrɛ baafʋ ɩ̃ mɩ tɛrɛ a tʋɔfʋ lɔbɔ nɩ ʋ ƴɔnɔ a wɛfʋ jie. Yel-mɩ̃ɛ ɩ̃ yele nyɩ, ʋlɔ nyɩ sɛw na jɔrɔ.
6“A tɩ̃ɩtɩ̃ɩ, má a libie pie ba ma da nɩ a ba bõ-bie anuu. Ɩ̃-cɛ a Naaŋmɩn maa hiin bõ-ƴen a ba pʋɔ bar wa. 7Ɩ̃ aa ɩ a ala tɛw ʋ wa; ʋ sɔrʼã a nyɩ jukɔbɔ tɩɛ jaa bɔ̃w a nʋɔr. Ala-ɩ̃-sɔ nyɩ taa ɩ a dãbɩ̃ɛ nyɔw nyɩ wa: nyɩ sa na a tɩ̃ɩtɩ̃ɩ-yayaw.
8“Ɩ̃ yele nyɩ na, a nɩrɛ lɛ na cã yel a nɩbɛ nii-sɔw á ɩ̃ ben ʋ ɩ, a maa *Nɩbɛ Bie na mɩ yelʼã a Naaŋmɩn sɩ-tʋnɩsɩ nii-sɔw a ɩ̃ ben a sʋbɔ ʋlɔ ɩ. 9Ɩ̃-cɛ a nɩrɛ lɛ na cɩɩrɛ a nɩbɛ nii-sɔw a ꞌwaa bɔ̃w ma wa, a maa Nɩbɛ Bie na mɩ cɩɩrɩ̃ na a Naaŋmɩn sɩ-tʋnɩsɩ nii-sɔw a maa bɔ̃w a sʋbɔ ʋlɔ wa.
10“A nɩrɛ lɛ na kpɛrɛ a maa, Nɩbɛ Bie, a Naaŋmɩn na de na a ʋ fãa bar kʋ ʋ; ɩ̃-cɛ a nɩrɛ lɛ na sãwna a Naaŋmɩn Sɩɛ yuor, a Naaŋmɩn ma be na de a ʋ fãa bar kʋ ʋ wa.
11“A lɛ ba nɔɔ tawra nyɩ cere nɩ a *puorfʋ yie pʋɔ, mɩɩ a tẽw nɩ-bɛrɛ nɩ a fãgã deme nii-sɔw, nyɩ taa ɩ a ɩ nyɩ tɩɛrʋ̃ a mɩnɛ nyɩ na ɩrɛ ɩ̃ mana a nyɩ ben, mɩɩ a ala nyɩ na sɛw nyɩ yel wa, 12a-na-ɩ a Naaŋmɩn Sɩɛ na mɩɩn nyɩ na a daar ʋlɔ pʋɔ a ala nyɩ na sɛw nyɩ yel.”
A NAABA DÃBOL SƲKPA
13Daba dãa na be be a nɩbɛ sɔ̃w ɩ̃ yel a *Jeeju:
“Jãjaana, yel a ɩ̃ yɛbɛ ʋ ɩ a sɩ po a sɩ gã-yele.” 14A Jeeju yel ʋ:
“Daba wee! Ala ɩ̃ ƴɔ̃w ma ɩ̃ ɩ a nyɩ ƴɛr-guoro, mɩɩ ɩ̃ na poro nyɩ a nyɩ gã-yele?” 15Ɩ̃ na ʋ yel a nɩbɛ:
“Nyɩ́ tɛrɛ jɩmɛ ɩ̃ mɩ tɛrɛ a nyɩ mɩ̃ɛ a yel-yaw bɔfʋ ɩnɛ, a-na-ɩ a nɩrɛ baafʋ ma yi a ʋ yel-yaw tɛrɛfʋ ɩnɛ wa.”
16Ala-ɩ̃-sɔ a Jeeju lɔb a sʋkpa na kʋ ba. Ʋ yelʼã:
“Daba dãa na be be na ɩ naaba, na ma pɔw yel-yayaw a ʋ por pʋɔ. 17Ʋ nyɔw na ɩ̃ pɛrɛ a ʋ suur pʋɔ yele nɩ: ‘Mɩnɛ ɩ̃ na ɩ? A-na-ɩ maa tɛrɛ a jie ɩ̃ na bine a ɩ̃ yele wa.’ 18Ɩ̃ na ʋ yel: ‘Nɔhɔ̃ ɩ̃ na maal: Ɩ̃ na wɛlʼã a ɩ̃ bobo ɩ̃ lɛ mɛ bõ-bɛrɛ, na ɩ̃ woor a ɩ̃ ci nɩ a ɩ̃ yele a jaa ƴɔ̃w, 19ɩ̃ na ɩ̃ pãa yel a ɩ̃ mɩ̃ɛ: Daba wee! Fʋ tɛrɛ na yele yayaw na fʋ bin yomo yayaw ɩnɛ. Tɛrɛ nʋ̃ɔ jɛ nɩ, dɩrɛ nyuure nɩ.’ 20Ɩ̃-cɛ a Naaŋmɩn yelʼã a daba ʋlɔ: ‘Fʋ ɩ na dãbol! A dɩnaa tɩsɔw na, ba na de na a fʋ baafʋ ɩ̃ a ana yele fʋ na gbɛɛrɩ̃ bin, ala na sɔ?’ ”
21Ɩ̃ a Jeeju yel ba:
“A lɛ a mɩ wɔ̃ nɩ a ʋlɔ na wobo a yel-yaw bine a ʋ mɩ̃ɛ ɩnɛ ɩ̃ ma ɩ naaba a Naaŋmɩn nii-sɔw wa.”
BARꞌƖ̃ A NAAŊMƖN NYÃA
(Mat 6.25-34)
22A ala ɩ̃ baar, a *Jeeju yelʼã a ʋ *par-tuurbe:
“Ala-ɩ̃-sɔ ɩ̃ yele nyɩ, nyɩ taa waala a nyɩ baafʋ ɩnɛ yele nɩ a bõ nyɩ na dɩrɛ, mɩɩ waala nɩ a nyɩ ɩ̃gan ɩnɛ a bõ nyɩ na nyɛ su wa. 23Má a baafʋ gãw na a bõ-dɩraa ɩ̃ má a ɩ̃gan mɩ gãw na a cẽcen. 24Nyɩ́ ꞌwuor nyɛ a gbagbar: ba maa bʋr wa, ba maa ŋma wa, baa mɩ tɛrɛ gar mɩɩ boor ma bin ci wa, ɩ̃-cɛ a Naaŋmɩn ɩ̃ guolo ba. Ɩ̃ a nyɩmɩ, má nyɩ sa na a lili. 25A nyɩ waalɩ̃fʋ pʋɔ, ala a nyɩ pʋɔ na tʋɔ tɔ a ʋ baafʋ bibie dɔɔl fɩ̃ɩ? 26A ala ɩ nyaa tʋɔrɔ maala a ala na ɩ a fɩ̃ɩ wa, bõ ɩ a nyɩ waala a ala ɩnɛ na cɛ? 27Nyɩ́ ꞌwuor a tɩ-pube: ba maa tʋ tʋn wa, ba maa wob cẽcen su wa, ɩ̃-cɛ ɩ̃ yele nyɩ na, a Salʋmɔ̃ mɩ̃ɛ nɩ a ʋ na-yele a jaa ma dãa su cẽcen ʋ vɩlaa ta a tɩ-pube asɩmɛ bõ-ƴen wa. 28A ala ɩ a Naaŋmɩn ma yaarɩ̃ na a tɩ-pube ala a lɛ, na be a mɔɔ pʋɔ a dɩnaa ɩ̃ a ba lɔbɔ ƴɔnɔ a vũu pʋɔ a bio, ʋ kɔ̃ tʋɔ maal nyɩ a gãw a lɛ wa mɩɩ? A nyɩ ƴɔ̃w-nyãa pabʼã a Naaŋmɩn jie. 29Ɩ̃ a nyɩmɩ, nyɩ taa bʋɔrɔ a ala nyɩ na dɩrɛɛ wa, mɩɩ a ala nyɩ na nyuure wa, ɩ̃ nyɩ taa ɩ a pʋlɩ̃nyɛ vʋ̃ɔnɔ nyɩ a ala ɩnɛ wa. 30A-na-ɩ a bala na ma bɔ̃w a Naaŋmɩn wa ɩ̃ ma bʋɔrɔ a yele ala a jaa, ɩ̃ a nyɩmɩ, a nyɩ Sãa bɔ̃w ka nyɩ bʋɔrɔ na a ana yele. 31Nyɩ́ ɛ̃ɛ bʋɔrɔ a Naaŋmɩn fãw ɩ̃-cɛ ʋ na kʋ nyɩ na a yele ala dɔɔl.
A NA-YELE ALA NA BE A SAA JUU
(Mat 6.19-21)
32“Ɩ̃ piir, nyaa jɛ̃ bom wa, ɩ̃ nyɩ taa jɔrɔ dãbɩ̃ɛ wa, a-na-ɩ a nyɩ Sãa, a nʋmɔ ʋ na ʋ de nyɩ ƴɔ̃w a ʋ fãw pʋɔ. 33Nyɩ́ da a nyɩ yele de a libie po a nãw deme; nyɩ́ bʋɔrɔ a libie wʋʋr ala na ma sãwna wa, ɩ̃ kaala a na-yele na ma be baarfʋ jie wa bine a saa juu, a-na-ɩ a nyanyuur ma pɩɛlɛ be wa, ɩ̃ a kpolo ma be be mɔɔrɔ wa. 34Nyɩ́ bɔ̃wnaa, a jie a nyɩ na-yele na be, be a nyɩ tɩɛrɩ̃sɩ na mɩ be.
A TƲ̃TƲNBƆ BALA NA GURE A BA NƖ-KPƐ̃Ɛ
(Mat 24.45-51)
35“Nyɩ́ gbɛɛrɩ̃ a nyɩ mɩ̃ɛ ɩ̃ ƴɔ̃w a nyɩ lãpar, 36ɩ̃ wɔ̃ taa nɩ a tʋ̃tʋnbɔ na gure a ba nɩ-kpɛ̃ɛ, a daar ʋlɔ ʋ na yire a kul-taa fɛtɩ jie waara, a mɩnɛ a ʋlɔ wa wa ta ŋmeere a pan, ba yuo ʋ a jie naan. 37A nʋmɔ a tʋ̃tʋnbɔ bala a ba nɩ-kpɛ̃ɛ na waara nyɛrɛ a ba jɩnɛɛ nɩ a mimir. Yel-mɩ̃ɛ ɩ̃ yele nyɩ, ʋ na gbɛɛrɩ̃ na a ʋ mɩ̃ɛ ɩ̃ ƴɔ̃w ba a ba jɛ a dɩb par ɩ̃ ʋ taw ta po ba a dɩb. 38A ala saarɩ̃ ɩ a tɩsɔw porɩ̃, mɩɩ a nɔdɛɛ kuon daar ʋ wa nyɛ a lɛ, a na nʋmɔ na a ʋ tʋ̃tʋnbɔ bala. 39Nyɩ́ bɔ̃wnaa, a ala ɩ a yir sʋbɔ dãa na bɔ̃w a lɛɛr-buor a nyanyuur na waara, ʋ kɔ̃ bar ʋ ʋ wa kpɛ a yir pʋɔ wa. 40A nyɩmɩ mɩ, nyɩ́ gbɛɛrɩ̃ gu, a-na-ɩ a *Nɩbɛ Bie na wa na a daar ʋlɔ pʋɔ nyɩ na ma tɩɛrʼɩ̃ ʋ wa.”
41A Pɩɛr soor a *Jeeju:
“Nɩ-kpɛ̃ɛ, sɩmɩ tɛw fʋ lɔb a sʋkpa na kʋ mɩɩ a nɩbɛ ba jaa fʋ mɩ yele?” 42A Nɩ-kpɛ̃ɛ yel:
“Tʋ̃tʋ̃-buor ɩ̃ ɩ a nɩ-dẽdẽ na tɛrɛ a yɛ̃? Ʋ ɩ na a ʋlɔ a ʋ nɩ-kpɛ̃ɛ na ƴɔ̃w a ʋ ꞌwuoro a ʋ yir deme kʋrɔ ba a dɩb a daar ʋlɔ na sɛw. 43Nʋ̃ɔ na be na a ʋna tʋ̃tʋnɔ jie a mɩnɛ a ʋ nɩ-kpɛ̃ɛ na lɩɛbɛ waara nyɛrɛ ʋ ʋ maala a lɛ. 44Sɩrɛ jaa ɩ̃ yele nyɩ, a ʋ nɩ-kpɛ̃ɛ na kʋ ʋ na a ʋ yele a jaa ʋ ꞌwuoro. 45Ɩ̃ a ala ɩ a tʋ̃tʋnɔ ʋlɔ yelʼã a ʋ mɩ̃ɛ á ʋ nɩ-kpɛ̃ɛ ma waara fɔw wa, ɩ̃ nyɔw ɩ̃ pɔbɔ a tʋ̃tʋnbɔ nɩ a tʋ̃tʋ̃-pooli, na ʋ dɩrɛ nyuure nɩ, a dãa kʋrɔ ʋ, 46a ʋ nɩ-kpɛ̃ɛ na wa na a bibir ʋlɔ ʋ na ma tɩɛrʼɩ̃ wa nɩ a daar ʋlɔ ʋ na ma bɔ̃w wa, ɩ̃ ʋ na ŋma ʋ na ayi lɔb ʋ ƴɔ̃w a bala pʋɔ na ma tɛrɛ ƴɔ̃w-nyãa wa.
47“A tʋ̃tʋnɔ ʋlɔ na bɔ̃w a ala a ʋ nɩ-kpɛ̃ɛ na bʋɔrɔ ɩ̃ ma gbɛɛrɩ̃ a yele ɩ̃ maal tu nɩ a ʋ nɩ-kpɛ̃ɛ pʋ-tɩɛrʋ̃ wa, ba na nar ʋ na yayaw. 48Ɩ̃-cɛ a ʋlɔ na ma bɔ̃w buon wa ɩ̃ maal a ala na sɛw a ba na pɔb ʋ, ba na nar ʋ na fɩ̃ɩ tɛw. A ʋlɔ ba na kʋ a yayaw ba na soor ʋ na yaw mɩ, ɩ̃ a ʋlɔ nuumɩ ba na ƴɔ̃w a yayaw, ba na soorʼã a gãw a lɛ.
A JEEJU NA WA NƖ A WƐ-TAA
(Mat 10.34-36)
49“Vũu ɩ̃ wa nɩ lɔb ƴɔ̃w a tẽw pʋɔ, ɩ̃ na ɩ̃ tɩɩ bʋɔrɔ ʋ gɔr ꞌle. 50Ɩ̃ sɛw na ɩ̃ kpɛ a won pʋɔ a wɔ̃ taa nɩ kʋ̃ɔ pʋɔ ba mʋrɔ ma, ɩ̃ a tɩɩ na kpɛmɛ kʋ ma wa tara nɩ a mɩnɛ a na maala baara. 51Nyɩ tɩɛrʼã beeka pɩɛnfʋ ɩ̃ wa nɩ ƴɔnɔ a tẽw pʋɔ mɩɩ? Kpee! Ɩ̃ yele nyɩ na, wɛ-taa ɩ̃ ɛ̃ɛ wa nɩ. 52Wa nyɔw nɩ a ƴɛ̃ƴɛrɩ̃, a nɩbɛ anuu na be a yir bõ-ƴen, na wɛrɛ na taa; ata na jɛbɛ nɩ na ayi, ɩ̃ ayi mɩ jɛbɛ nɩ ata. 53A sãa na jɛbɛ nɩ na a ʋ bi-daba ɩ̃ a bi-daba mɩ jɛbɛ nɩ a ʋ sãa; a mã na jɛbɛ nɩ na a ʋ bi-pɔw ɩ̃ a bi-pɔw mɩ jɛbɛ nɩ a ʋ mã; a dɩ̃ɛ-mã na jɛbɛ nɩ na a ʋ bi-daba pɔw, ɩ̃ a bi-daba pɔw mɩ jɛbɛ nɩ a ʋ dɩ̃ɛ-mã.”
SƖ TƖƐR BƆ̃W A DAAR ƲLƆ PƲƆ SƖ NA BE
(Mat 16.2-3)
54A *Jeeju mɩ dãa na yele a nɩbɛ:
“A nyɩmɩ wa nyɛ a dɔ̃dɔrɩ̃-salaa a mɔtɔ̃w mʋrfʋ loor#12.54 A mɔtɔ̃w mʋrfʋ jie ĩ ɩ a *Ɩsɩrayɛl-tẽw nɩbɛ saa parĩ., nyɩ ma yelʼã a jie naan áa saa na wa na, ɩ̃ a lɛ a ma sɩrɩ̃ maal. 55Ɩ̃ a sɛsɛb ɩ̃ wa yi a tẽw parɩ̃ ɩ̃ tɛbɛ, nyɩ ma yelʼã a susuur na kú na, ɩ̃ a lɛ a ma sɩrɩ̃ maal. 56Nyɩna poe ayi deme naa! Nyɩ ma tʋɔ na bɔ̃w a mɩnɛ a yele na be a tẽw pʋɔ nɩ a saꞌlon, ɩ̃ mɩnɛ a ɩ a nyɩ maa lɛ ɛ̃ɛ bɔ̃w a mɩnɛ a daar na na be a ƴɛ̃ƴɛrɩ̃ wa?
57“Mɩnɛ a ɩ a nyɩ maa tɩɛr nyɛ a nyɩ mɩ̃ɛ a ala na tor sɛw a nyɩ na maal wa? 58A ala ɩ a fʋ san-sʋbɔ bʋɔl fʋ na cere nɩ a ƴɛr-guoro jie, dɩ tuo a nyɩ guor a ƴɛrɩ̃ be a sɔr juu a baar. A ala ma ɩ lɛ ʋ wa, ʋ na fɛr fʋ na ta nɩ a ƴɛr-guoro nii-sɔw, a ƴɛr-guoro de fʋ kʋ a kasu-gure, ɩ̃ a kasu-gure de fʋ pɔw a kasu pʋɔ. 59Ɩ̃ yele fʋ na, faa be na yi a be, ɩ̃ ma ɩ fʋ ya na a fʋ san a jaa baar wa.”
Currently Selected:
Luki Sɛbɛ 12: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
