Luki Sɛbɛ 10
10
A PAR-TUURBE LƖJAATA NƖ PIE-NʼAYI A JEEJU NA TƲ̃
1A ala na yi tɔ, a Nɩ-kpɛ̃ɛ lɛ bʋɔlʼã a *par-tuurbe lɩjaata nɩ pie-nʼayi ŋmɛɛ go, tʋ̃ ba ayi-yi a ba de ʋ nĩe cen a ten a jaa pʋɔ nɩ a jiir a jaa a ʋlɔ mɩ̃ɛ na sɛw ʋ cen. 2Ʋ yel ba na:
“A puo bɛrmɛ na, ɩ̃-cɛ a ci-ŋmarba ma jɛ̃ bom wa. Ala-ɩ̃-sɔ nyɩ́ sʋɔr a Puo Sʋbɔ ʋ ƴɔ̃w a tʋ̃tʋnbɔ a ba cen na ŋma a ʋ ci. 3Nyɩ́ cere, ɩ̃ bɔ̃wnaa, peli kaarɩ̃ ɩ̃ tʋnɔ nyɩ a wɛ-baar sɔ̃w. 4Nyɩ taa tɛrɛɛ libie wole wa, nyɩ taa tɛrɛɛ wʋɔ wa, nyɩ taa tɛrɛɛ nafaba wa, nyɩ taa mɩ ɩrɛɛ a sɔr pʋɔ puoro nɩrɛ wa. 5A yir lɛ pʋɔ nyɩ na kpɛɛrɛ nyɩ́ de nĩe yel: ‘Su-ɓaar ú be nɩ a yir na.’ 6Ɩ̃ a ala ɩ nɩrɛ be na na ɩ a su-ɓaar sʋbɔ, a nyɩ su-ɓaar na be na a ʋ jie; a ala ma ɩ lɛ ʋ wa, a na lɩɛbʼã wa a nyɩ sɛ̃. 7Nyɩ́ jɛ be a yir ʋlɔ pʋɔ dɩrɛ nyuure nɩ a ala ba na kʋrɔ nyɩ, a-na-ɩ a tʋ̃tʋnɔ sɛw nɩ na a ʋ yar. Nyɩ taa mɩ lɩɛrɛ a yie yʋɔrɔ nɩ wa. 8A tẽw jaa lɛ nyɩ nɔɔ kpɛ a ba sɔw de nyɩ, nyɩ́ dɩrɛ a dɩb ala ba na kʋrɔ nyɩ, 9nyɩ́ kpaar a wʋlɩ̃sɩ deme bala na be a be ɩ̃ yel a tẽw ʋlɔ nɩbɛ: ‘A Naaŋmɩn fãw ta na pɩɛlʼɩ̃ nyɩ.’ 10Ɩ̃-cɛ a tẽw jaa lɛ pʋɔ nyɩ nɔɔ kpɛ a baa sɔw de nyɩ wa, nyɩ́ yi a ʋ sɔɛ pʋɔ ɩ̃ yel: 11‘A nyɩ tẽw tãbuulĩ tɩɛ na mar sɩ a gbɛɛ, sɩ pine na ƴɔnɔ nyɩ, ɩ̃ nyɩ́ cãa bɔ̃wnaa a Naaŋmɩn fãw pɩɛlʼã.’ 12Ɩ̃ yele nyɩ na, a ƴɛrɩ̃ guorfʋ dayen, a *Sɔdɔm hʋʋr nyɛfʋ na sa na a tẽw naa ben.
13“Nabier na ta na a nyɩmɩ Kɔrajɩ̃-tẽ-deme! Nabier na ta na a nyɩmɩ Bɛsada-tẽ-deme! A-na-ɩ a nɔ-kofʋ tʋmɔ ala na maal a nyɩ sɔ̃w, a ala ɩ̃ dãa ɩ a Tɩɩr nɩ a Sɩdɔ̃ a maal a lɛ, ba naa su na cẽcen jaar a jie naan jɛ nɩ tãpɛlɩ̃ jɩnaa nɩ, miilʼɩ̃ áa ba yɛ̃ lɩɛbʼã. 14Ala-ɩ̃-sɔ, a lɛ a Naaŋmɩn na guoro a nɩbɛ ƴɛrɩ̃sɩ, a Tɩɩr nɩ a Sɩdɔ̃ hʋʋr nyɛfʋ na sa na a nyɩ ben. 15Ɩ̃ a nyɩmɩ, Kapɛɛnam-tẽ-deme, nyɩ tɩɛrʼã beeka a nyɩ na do na a saꞌlon mɩɩ? Nyɩ na ɛ̃ɛ na wur suu ta a kpɩɩn tẽw.”
16Ʋ lɛ yelʼã a ʋ par-tuurbe:
“A ʋlɔ na cɛlɛ a nyɩ ƴɛrɩ̃sɩ, mɩ cɛlɛ na a ɩ̃ ƴɛrɩ̃; a ʋlɔ na jaar nyɩ, maa ʋ mɩ jaar, ɩ̃ a ʋlɔ na jaar ma, ʋ mɩ jaarʼã a ʋlɔ na tʋ ma.”
A PAR-TUURBE NA LƐ LƖƐB WA
17A *par-tuurbe lɩjaata nɩ pie-nʼayi bala lɩɛbʼã wa, a nũɔ ƴala ba a ba yel:
“Nɩ-kpɛ̃ɛ, a fʋ yuor maalʼã a kɔ̃tɔnsɩ tɔr jaa bal a ba mɩ̃ɛ a sɩ jie.” 18A *Jeeju yel ba:
“Ɩ̃ dãa na ꞌwuor nyɛ a Satã na yi a saꞌlon ɩ̃ lo a mɩnɛ a saa na ma nyɩɩlɛ. 19Nyɩ́ nyɛ, ɩ̃ kʋ nyɩ na tʋɔfʋ a nyɩ na nɛbʼɩ̃ a wɩɩr nɩ a lan, nɩ a Bier Sʋbɔ fãw ʋ jaa. Bom jaa ma be be tʋɔrɔ maala nyɩ bier wa. 20A be na a lɛ ɩ̃-cɛ nyɩ taa cɩlɛ a-na-ɩ a kɔ̃tɔnsɩ balʼã a ba mɩ̃ɛ a nyɩ jie wa, ɩ̃-cɛ nyɩ́ cɩlɛ a-na-ɩ a Naaŋmɩn sɛbʼã a nyɩ yoe a be a saa juu.”
A JEEJU KÃKAFƲ
(Mat 11.25-27, 13.16-17)
21A daar ʋlɔ naan pʋɔ, nũɔ ƴala na a *Jeeju a yi a Naaŋmɩn Sɩɛ jie, ʋ yel:
“Ɩ̃ Sãa, ɩ̃ puoro fʋ na, a fʋ̃ʋ na ɩ a saa juu nɩ a tẽw Nɩ-kpɛ̃ɛ, a mɩnɛ fʋ na sɔɔlɩ̃ a yele ala a nɩ-kpaarsɩ nɩ a yɛ̃ deme jie, ɩ̃ miilʼɩ̃ a bibiir. Ɩ̃ Sãa, a lɛ ʋ, fʋ̃ʋ a nʋmɔ a fʋ maal a lɛ.”
22“A ɩ̃ Sãa barʼã a yele a jaa ƴɔ̃w a ɩ̃ nurɩ̃. Nɩrɛ ma bɔ̃w a ala a Bie na ɩ ɩ̃ a ala ma ɩ a Sãa tɛw ʋ wa. Nɩrɛ ma mɩ bɔ̃w a ala a Sãa na ɩ ɩ̃ a ala ma ɩ a Bie tɛw ʋ wa, nɩ a ʋlɔ a Bie na bʋɔrɔ ʋ miilʼɩ̃.”
23Ɩ̃ naa ʋ lɩɛb yel a ʋ *par-tuurbe tɛw:
“A nʋmɔ na a bala a ba mimie na nyɛ a ala nyɩ na nyɛrɛ! 24A-na-ɩ ɩ̃ yele nyɩ na, a Naaŋmɩn ƴɛr-hierbe nɩ a jamansɩ yayaw dãa na bʋɔrɔ ba nyɛ a ala nyɩ na nyɛrɛ ɩ̃ baa nyaa wa; ba mɩ dãa na bʋɔrɔ ba wõ a ala nyɩ na wono, ɩ̃ baa wonaa wa.”
A SAMARI-TẼW DABA SƲKPA
25A *ƴɛr-kpɛn-bɔ̃wnɔ kãw irʼã bʋɔrɔ ʋ bɩɩr a *Jeeju, na ʋ soor ʋ:
“Jãjaana, bõ ɩ̃ na maal ɩ̃ pɔw a baa-kɔ̃-tɛw?” 26A Jeeju soor ʋ:
“Bõ ɩ̃ sɛb a *Naaŋmɩn ƴɛr-kpɛn sɛbɛ pʋɔ? Bõ fʋ ma ꞌwuor nyɛ a be?” 27A daba yel:
“Fʋ na nʋnɔ na a Nɩ-kpɛ̃ɛ na ɩ a fʋ Naaŋmɩn nɩ a fʋ suur ʋ jaa nɩ a fʋ baafʋ nɩ a fʋ fãw nɩ a fʋ tɩɛrʋ̃ ʋ jaa, ɩ̃ mɩ nʋnɔ a fʋ tɔ sʋbɔ a fʋ mɩ̃ɛ kaarɩ̃.” 28A Jeeju yel ʋ:
“Yel-mɩ̃ɛ fʋ yel. A fʋ̃ʋ maal a lɛ, fʋ na pɔw na a baa-kɔ̃-tɛw.” 29Ɩ̃-cɛ a ƴɛr-kpɛn-bɔ̃wnɔ ʋlɔ bʋɔrɔ na ʋ miilʼɩ̃ a ʋ torfʋ, ɩ̃ yel a Jeeju:
“Ala ɩ̃ ɩ a ɩ̃ tɔ sʋbɔ?” 30A Jeeju lɛ lɩɛb yel ʋ:
“Daba kãw dãa na yi a Jerujalɛm ɩ̃ cere a Jeriko-tẽw. Ʋ lo na a nyanyube sɔ̃w a ba nyɔw ʋ yaar a yele, ɩ̃ naa ba pɔb pɔb ʋ bar, a cɛ fɩ̃ɩ ʋ naa kpi. 31A be na a lɛ, a Naaŋmɩn baar-loro kãw mɩ de a ʋna sɔr cere. A lɛ ʋ na nyɛ a ʋna daba, ʋ golʼã de a lõboor sɔr cen. 32A lɛ ʋ mɩ, a *Levi bal nɩrɛ kãw mɩ ta na a be a ʋna jie naan mɩ nyɛ a daba ʋ gã a lɛ, ʋ mɩ gol tɔl de a lõboor sɔr cen. 33Ɩ̃-cɛ a *Samari-tẽw nɩrɛ kãw na tɔlɔ nɩ a sɔr ta na nyɛ a lɛ, a nãw nyɔw ʋ, 34ʋ taw ta de dɩvɛ̃ pɛw nɩ ʋ a natɩɛ ɩ̃ pur a kãa ƴɔ̃w, ɩ̃ de cẽcen vilĩ pɔw. A ala ɩ̃ baar, ʋ ɓɔw ʋ na dɔɔl a ʋ mɩ̃ɛ bʋ̃ɔ juu cenʼɩ̃ a saanba yir pʋɔ, naa ʋ gaal ɩ̃ gã gu ʋ a tɩsɔw. 35A mɩnɛ a bio na vɩɛ, ʋ tʋ̃ na ir warbie kɔɔr anaan kʋ a yir sʋbɔ ɩ̃ yel ʋ: ‘ꞌWuoro a daba na vɩlaa. A maa lɔɔ lɩɛb wa, ɩ̃ na kʋ fʋ na a ala fʋ na maala dɔɔlɔ a ʋ ɩnɛ.’ ”
36A mɩnɛ a Jeeju na ƴɛr a lɛ baar, ʋ soorʼã a ƴɛr-kpɛn-bɔ̃wnɔ:
“Mɩnɛ fʋ tɩɛr? A nɩbɛ ata bala pʋɔ, buor ɩ̃ ɩ a daba ʋlɔ a nyanyube na pɔb tɔ sʋbɔ?” 37Ʋ yel ʋ:
“A ʋlɔ na wɩɛ ʋ, ʋlɔ ʋ.”
A Jeeju yel ʋ:
“A fʋ̃ʋ mɩ, cen na mɩ maal a lɛ.”
A JEEJU NA CEN A MARTƖ NƖ A MAARƖƖ YIR
38A mɩnɛ a *Jeeju nɩ a ʋ *par-tuurbe na be a sɔr juu cere, ʋ vɩɛ na kpɛ tẽ-bile kãw pʋɔ, na ʋ cen pɔw kãw na dɩ Martɩ yir, ʋ de ʋ ir a saan. 39A pɔw ʋlɔ dãa na tɛrɛ yɛ-bile na dɩ Maarɩɩ. A Maarɩɩ wa na jɛ a Nɩ-kpɛ̃ɛ pulẽe cɛlɛ a ʋ ƴɛrɩ̃sɩ. 40Ɩ̃-cɛ a Martɩ tɩɛrɩ̃sɩ ma dãa jɛ ji-bõ-ƴen wa, a yi a tʋ̃-bʋrɔ bʋrɔ ʋ na maala jie, ʋ taw na ta yel a Jeeju:
“Nɩ-kpɛ̃ɛ! Aa ɩ fʋ bom a ɩ̃ yɛ-bile na jɛ ɩ̃ bar ma ɩ̃ tʋnɔ a tʋn a ɩ̃ yẽ wa mɩɩ? Yel ʋ ʋ wa sũo ma!” 41A Nɩ-kpɛ̃ɛ yel ʋ:
“Martɩ wee! fʋ barʼã a tɩɛrɩ̃sɩ a dama fʋ, a kpɛmɛ kʋ fʋ, a yel-yaw fʋ na maala ɩnɛ. 42Ɩ̃-cɛ bom bõ-ƴen tɛw ɩ̃ sa gãw a jaa. A Maarɩɩ vɛlʼã ir a ʋna bom son a nɩrɛ na ma tʋɔrɔ faara wa.”
Currently Selected:
Luki Sɛbɛ 10: BNT93
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue birifor © Alliance Biblique au Burkina Faso, 1993.
