SAKARIYA 14
14
Yerusalemu ea eemoojiga
1Asi ng'ula, eaweeda NG'UTAMIIDA ghwaan, nea haleanjeeda sigeandeawa heedeang'wa gajealajaada aba jeedeang'wa. 2Ak gaydabwadageat eemoojiga sean ghapka gang'uchi Yerusalemu. Ak geang'waay mujiini, nea geang'waanyaada fuga mida gealga. Nea geabwaanyaada gadeemga, ak gealach bugusta fuga mujiini nibiyeenya eepaleak. Nea boosteanga fuga mujiini ea mwajeasachi. 3Hean abeeda gayghwahidu NG'UTAMIIDA ak gang'uchi sea eemeeni. Gawuurji gidaghayi ng'ucheata eaweedida. 4Eaweedida abeeda geeshangaaschi gayghamiinaada aba uhuuda giijeeda saytuunajeega. Mida madeeda Yerusalemu bea meatkweeda ghayeawa, ak giijeeda saytuunajeega gayghabwaasha bugusta nibiyeenya. Ghang'eada heeda ghayeawa ea gagul heeda biyeara, ak gaygwanda hoowa moangoachiyda haw muuchi. Ak meatkweenagi bea giijeeda gayghang'eat gagal wiilooda ng'eanyiida ghayeawa, nea meatkweeda niirja gagal wiilooda ng'eanyiida biyeara. 5Ak agooga gajasalda nea ghoayaachi naweeda moangoachiyda giijeegeasu. Aba gideaba moangoachiydida bea giijeegean gayghwadarda ea ghwahita Aseli. Ak gajasaldeayda gidaghayi oosaldeaydi aba damanda sawooda ng'eanyiida, bea damanda Usiya was sugoocheanda Yuda. Ak gayghwahidu NG'UTAMIIDA was ASEETEANYU, gayghwahidu nea goodeana fuga ghaydidi sean.
6Nea eaweecheanji ea maygwanda jeameeda nea maygwanda gooroogeeda ghana dung'usta. 7Eaweedida maygwanda misaneeda, gaygwadagu galeagasean, eara aba eawa. (Nih ghwanal NG'UTAMIIDA nea gabwa geaw.) Maygwanda askwearda ak ea maygwanda eaweeda, aba gideaba damandeaba shing'ada gaygwanda weeshinda.
8Eaweedida gaygwarina beega mideawa eaweega Yerusalemu. Mwaatkwa gaygagal basooda mida heeda ghayeawa, nea mwaatkwa gagal basooda mida heeda biyeara. Ak beesu gaygagulda geayda ea muweeda.
9Ak gayghoah NG'UTAMIIDA sugoocheanda aba badayda ng'eanyiisean; nea eaweedida NG'UTAMIIDA gajea agi nea eara gheawungaaschi gajea agi.
10Ng'eanyiisean gajeayam ea gawuurji mooheeda ng'eada ng'eanyiida Geba ea ghwahita Rimoni mida wiilooda ng'eanyiida biyeareewa Yerusalemu. Ak Yerusalemu gajeetiing'u ghang'eada ghuuta dooshta Benjamini ea ghwahita dooshta madeeda. Ea ghwahita dooshta sinung' ghaghwan geaw, ak gawa ea ghwahita gheeda sideeksa uhuumba nuut bea Hanaeli, ea ghwahita heeda simuriisa difaayi bea sugoocheanda. 11Ak gaygoobiida buuneeda jeeda, nea maygudugwanda habeawooda, ak Yerusalemu gaygoobiida nea gaba hoyyoo.
12Nea fuga jea gang'uchi sea fuga Yerusalemu gayghwalas NG'UTAMIIDA sean aba dawni. Ak gajeenung' ghwadatas sasanuuka nyaawa iimiinaada aba geeshanga nyaawa. Ak eara gheanyanga nyaawa gayghwadatasa aba jeeda iheenga nyaawa, nea eara ng'ushapkeaka nyaawa gayghwadatasa aba jeesinga ghuusiga nyaawa. 13Ak eaweedida gayghang'ut saawa muuwda haw leabu heeda NG'UTAMIIDA. Nea gaba nih ang'waay geatinda giischeewoocheandaanyi, ak gaygaba nih gatgat geatindaanyi googeal giischeewoocheandaanyi. 14Eara fuga Yuda gaygang'uchi sea Yerusalemu. Ak meanang'oocheanduumeeda eemoojiga sean neaweesa gajeawaam dahaabu. Ea lapiya ea hang'weaka saang'a. 15Ak geeyooni bea dawniin gaygoobisa eara faraasajeega ea nghadiga, ea ngamiyajeega, ea digeeniga, ea diyeanga sean mida jeeda museasooda.
16Nea siida wassean ghuh bea eemoojiga sean, hidu gang'uchi sea Yerusalemu, gayghwascheang'da gilakweayda ghabwat sugoocheanda was NG'UTAMIIDA bea lugweega, nea ghoang'waay ghweelmoojiga Udahabeaschajeega. 17Ak giliwas sih aba badayda ng'eanyiida, iimwascheang'da gawa Yerusalemu ghabwat sugoocheanda, was NG'UTAMIIDA bea lugweega, abeeda ea mayghwanyas roopta aba ng'eang'da nyaawa. 18Nea eara fuga ng'eanyiida Misri inyas ea mwascheang'da ghana ea mwapka abeeda gaygoobisa geeyooda dawni, jea ghwalasa NG'UTAMIIDA eemoojiga maweayi ghoang'waay ghweelmeeda udahabeaschajeega. 19Nih abeeda gayghoah lasooda Misri ea lasooda eemoojiga sean mwascheang'da gaweay ghoang'waay ghweelmeeda udahabeaschajeega.
20Ak eaweedida, beembeeyga faraasi gajeeng'oorsa ng'asheesu, “Ea ghaydit aba heeda NG'UTAMIIDA.” Nea haleanjeeda mida jeeda gheeda NG'UTAMIIDA, gaygawuurji gweerajeega mida heeda wagiida. 21Ak gilinyoo ea dahuuda gil aba Yerusalemu ea aba Yuda gajeaghaydit aba heeda NG'UTAMIIDA bea lugweega. Nea fugiga adayda lukghumeedean gayghapka gageanda dabitida ak geawaala banyeega. Ak eaweedida ea maygwanda siida ageakshi aba jeeda gheeda NG'UTAMIIDA bea lugweega.
Currently Selected:
SAKARIYA 14: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
