SAKARIYA 13
13
1“Eaweedida gajeajaat gheang'da eenda aba badayda gheeh Dawdi ea dea fuga mida Yerusalemu eamiidu saawa aba riing'eeda ea ririnnyeanda.
2“Ak eaweedida, gwarugu NG'UTAMIIDA bea lugweega gaydasach gheawunga aseecheeka aba jeeda ng'eanyiida. Ak ea majeapkaat ak gaydahoan sibanga ea gurooruunatka munyas bea ririnnyeanda, gwariteawa jeeda ng'eanyiida. 3Ama inyas gwardu giliwas sih ak gwahinda geaw sibaneeda. Abeeda gaygwayeesha ghwaan ea ghaamwat niny, ‘Majabiidana badayda ng'eanyiida, aba gideaba girgu ng'asheega ng'uyeega aba gheawunga NG'UTAMIIDA.’ Ak aba damandida rukuna ramoorangean gayghang'ut ghwaan ea ghaamwat aba barda ak ghami. 4Abeeda eaweedida gilinyoo ea sibaneeda gil. Gayghabwaspwas aba gili itaanyi siihiimsean iramoaran, ak ea maygookwa hang'da mideawa buudeega, aba gideaba gwareengani buuneeda. 5Geaghus gwayi, ‘Aniini meawoosi sibaneeda earahay, aniini geawooschi siida bara ng'eanyi, nea gutawoos baleanda.’ 6Ama inyas geepearsa gideaba ‘deaneaduutsu gabwa naaha?’ Gaygwayi, ‘Deaneaduutsu ghaanyaschi aba gheeda siida eaduupcheewi.’”
Diigheanda jea eabwara jeagiischoocheanda ASEETA
7gwayi NG'UTAMIIDA bea lugweega.
“Ea ng'uta ng'eada, aba badayda jeagiischoocheandeanyu,
ea siida was deanyu.”
“Bwara jeagiischoocheanda ak gayghwadarda gisilga.
Ak abeeda gaydeageal geatindeanyu heeda dayeega gisilga
8Ak aba ng'eanyiisean gajeasach gharmucheew iyeenya,
ak gaygameewa. Gwarugu NG'UTAMIIDA,
nea gharmucheandeaba samwagu gaygoobiida jeeni.
9Ak gaydeadu gharmucheandida bea samwaguun, ak ghaayiinyi jeeda beasta.
Ak gaydadaay saawa ea gawuurji lapiya, iisisim,
ak geasimnyi gawuurji gidasisimiida lagheanga dahaabu,
ak abeeda gaygaguuriisa gheawungeasu, ak gaydealeeysa iit saawa.
Ak gaydayi, ‘Suh fugeasu gil’, Ak gaygwayi niny, ‘NG'UTAMIIDA ASEETEANYU gil.’”
Currently Selected:
SAKARIYA 13: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
