MARKO 13
13
Yesu gabaloola nyarjeawda gheeda sibata ASEETA
(Mat 24:1-2; Luk 21:5-6)
1Damanda riteawa Yesu jeeda gheeda sibata ASEETA gwayeesha siyagi was Giinealaneadaanyi, “Ea Giinealshoocheanda, ang'wearda gealsu heesiin gisam, ea lagheanga ghayi sideasa!” 2Ghwalamda Yesu ak gwayeesha, “Ghamneawa gidaahi gealsu heesiin? Lagheang'su ghayi sideasaan manda dea jea eenung'usa heeda earagi. Gajeeng'adeadu sean.”
Sawanadeeda ea ghabasta
(Mat 24:3-14; Luk 21:7-19)
3Eaweecha Yesu goopteada aba uhuuda Giijeeda Saytuunajeega deaschi gheeda sibata ASEETA gaweay geaba Betaro ea Yakobo ea Yohana sea Andreya ak ghoanyaash Yesu nea gaba geat gideaba, 4“Eaniyean rukuneasa ng'asheesu gayghoah eeju? Ak gajeeroorda naaha aba hinnoodeaba ng'asheesu.” 5Gwayeesha Yesu saawa, “Ashageada adagwareenganeegwa sih. 6Aba gideaba gayghapka fuga saang'a jea ghapkaana gheawungeasu nea gwayi, ‘siida aniini gil!’ Ak aba sareani gaygwareengani fuga saang'a. 7Iyoayiinyi ng'asheega ng'ucheadinga ea giijuureanda ng'ucheeda ea adoohirbabanyi. Ng'asheesu mayghwashiy hinnooda, duuku muudeanooda ea miighoaw. 8Gaygaba ng'eanyiini ng'uchi nuut, gaygaba Sugoocheanji ng'uchi nuut, gaygwasaw ng'eanyiida gicha ak gaygang'eeda geejeadinga. Ng'asheesu seaniin gaygawuurji lajooda gatmooda jea gwaji.
9“Asi agooga ashageada, aba gideaba gayghwaadeagwa buuneeda gheeda sirgweacha, nea geabwareagwa aba jeesinga ghoorajeega siinealshacheewa. Gajeayadeagwa madeeda fuga hees ea madeeda sugoodiga aba badaydeanyu, ak abeeda gajahuuwa mushoodigeasu aba madeanyaawa. 10Nea hinnooda jea ghwahidu muudeanooda ng'eanyiida, abeeda gajea sirukusa buuneesean Giijasta miy. 11Nea eara iisiyaadeagwa gheeda sirgweacha, ea adoohirbabanyi, aba badayda ng'asheega jea arukuta, iihidu damandida, arukuta ng'asheanda wassean sinyuneegwa, aba gideaba mii agooga gil fuga jea gabalool, gaygabalool Guroorooda Ghaydit. 12Nea Siida gayghwala bwadaw orjeeda ghaamwat ak geenuus, nea Bwaabwa gayghwala bwadaw orjeedaanyi, eara Diibiga gayghabwar ghweaniga nyaawa ak gwanuuseada. 13Ak agooga gayghwasteagwa buuneeda aba gheawungeasu. Nea siida jea ghamilikghta ea gagul damandida bea muudeanoodean, siisi gayghaghu.
Gidamuy jea gweadu nyariida
(Mat 24:15-28; Luk 21:20-24)
14“Asi iyoadaayi gidamuy jea gweadu nyariida nea nimiinaada aba heeda mahaguuwsiina, (Siida asoamwa ea dajeeng'na gidawas) asi abeeda fuga mida ng'eanyiida Yudeya ea dasalsiina iheenga heayeeniga. 15Abeeda siida deepa eanyasa uhuuda gheeda adaghwararang'aan, aduwi geani eara gidamida gah jea aadana geadi. 16Siida deepa eanyasa jeeda madamnyeanda eara hang'da badayda ghwanyawa nung'wa ghoah adaghamwaghaada. 17Eeshiina gadeemga was bungaroodiga ashageada, ea gadeemga reer diibiga aba damandida! 18Goomoorayi ea mwahina ng'asheesu munyasiin damandida bea gooroogeedean. 19Aba gideaba damandida gaygwanda sawanadeeda manda dea jea eegala ghang'eada deaghayi nibwada ASEETA ng'eanyiida ea gagul ghamneawa. Ak ea maygudu gabiigu gicha dea jea gawuurji nih. 20Inyeeda gwachi ea moong'ayiida Ng'utamiida askwearjoojigiga ghanyea manda siisi jea ghwalaalaan. Amadu aba badahuuka fuga loossa geaw ea nisuuy Ng'utamiida askwearjoojigiga.
21Asi iiyeeshineegwa Siida, ‘Ang'wearda Gristo gwanda hiji!’ ghana gwayi, ‘Gwanda hoowa!’ adoamwaschi. 22Aba gideaba gayghwahidu fuga was Gristohajeega ng'uyyeega ea sibanga ng'uyeega, gayghoahiimu gwadeagooda ea ng'asheega deamdeameadi, aba huteawda fuga loat ASEETA. 23Asi agooga ashageada. Aniini nearukuneegwa ng'asheega sean heeda mii ghwahina.
Hinnooda Orjeeda Siida
(Mat 24:29-31; Luk 21:25-28)
24“Asi askwearjoojigiga nea ning'ata ng'asheandida ng'waaniin, gaygwatuudu gheang'da ASEETA nea eara sheeda ea maygudu gooboong'u. 25Nea miinga humng'eeda gaygoobitu nea gaygwaduumduum uurda humng'eeda. 26Ak gajeadaah Orjeeda Siida nea gwashuubeanda jeeda shamooghuutka nea gaygwandeawa uurda haw ea giigheambiita. 27Ak Gaygoojeakta giijasoodigaaschi bea humng'eeda goodearsa meadajeega asang'wan bea ng'eanyiida gaweay gooweamu fuga loossa geaw, ghang'eada muudeanooda ng'eanyiida ea ghoah muudeanooda humng'eeda.
Gida anaal fih shaboogheecheanda
(Mat 24:32-35; Luk 21:29-33)
28“Agooga ang'ula shaboogheecheanda. Gwanda gichea ghoanaaleagwa. Iyabit seenga nea ghafiirfiir gea nyawiiri gajanala gideaba doomeelda nineekiit. 29Gwasunu eara agooga iyoadaayi ng'asheesu nea ghwahidu, anala gideaba Orjeeda Siida nineekiit muuchi. 30Gearukuneegwa aba huumwa, Seaygeani bea ghamneawean mayghwanaawda nea mii adaaha ng'asheesu. 31Humng'eeda ea ng'eanyiida gaygammuudean. Duuku ng'asheegeasu ea maygamudean.
Manda siinal askwearjeanda ghana damanda
(Mat 24:36-44)
32“Duuku askwearjeandida, ghana damandida manda siida nal. Eara giijasoodiga humng'eeda, ghana Orjeeda ASEETA. Siinal geaghus Bwaabwa ak ghwahit. 33Ashageada nea ghoang'wearu, aba gideaba moanali damanda jea gawaseewa. 34Gawuurji Siisi ghayi weah bareanyeeka ak gwaruuda nea ghwanung'wa gheeda fuga gadiyeeda. Nea nigeanu ak gaba siisi adaw gichea gwasin ak gageanu ghwayiin furiischoocheanda jea gafur dooshta nea gwayeesha milmiliida. 35Asi oang'wearni adoolili aba gideaba moanali eaweeda jea ghwahina siida bea gheeda, gwadeepa ghwahidu shing'ada, ghana gwadeepa ghwahidu eaweeda agweena, ghana gwadeepa ghwahidu beashata, ghana gwadeepa ghwahidu nea goorearu aseeta– 36Asi oang'wearni gajiidu gwashameegwa ak ghabwardaneegwa ng'eanyi nea goondi jeeda ruweanga. 37Gichea darukuneegwa oogasean, gaydayi, Oang'wearni, adoolili!”
Currently Selected:
MARKO 13: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
