MARKO 12

Gida sigala fuga aragan madamnyeanda sabiibu

(Mat 21:33-46; Luk 20:9-19)

1Ng'ata goobalool Yesu saawa nea gagala geat ng'asheega nea gwayeesha, “Ghayi sih ghabwar madamnyeanji itaanyi ak gang'eapsa sabiibu. Hit gooneaweesa madamnyeandaanyi hilooga, gageanu ak gwasin healadeeda jea eemuuriisa difaayeeda was mideega haghweega sabiibu, ak gwasin eara madalooda jea eefura madamnyeanda. Hean ghwanung' gooragan buuneeda madamnyeandaanyi. Ng'ata iidu gawa Siidida ea gawa darooraka sheagi. 2Damandida bea lajitean Goojeakta soomjeanji itaanyi heeda fuga aragan madamnyeanda, gweadu booga sinyas bea madamnyeanda was heeda doobiiwsa niny. 3Ghoang'waay fugiga soomjeandida ak ghabwar amang'ata geanung' gabiikta nea mwaada gil. 4Goojeakta gicha soomjaan nuut, earada geesawan nea geesima ng'asheega munyas. 5Gabiikta gicha Siidida bea madamnyeandean goojeakta soomjaan nuut, amadu gwanuus fugiga aragan madamnyeandean. Eara fuga suuk siicheakta earaga mwaatkwa geabwar nea mwaatkwa geenuuseada. 6Abeeda ea siipuusa heeda siyagi, nea jeaptaanyi bwariiy gil. Iidu Goojeakta nea gwayeesha geaw, ‘Gajeawal gheang'da.’ 7Hean gwayeesha geat fugiga, ‘Nih siida jea numuji gwahearaniischi gil asi eenuusa, ak abeeda gaygabwaaheasa hearaniischooda!’ 8Hean geang'waay ak geenuus amahit geejakta musta eanaawa hilooga madamnyeanda.

9Asi gaygwasin naaha siida bea madamnyeanda? Gayghwahidu ak ghwalas uhuudeaba fugiga ghayi aragan madamnyeandean amang'ata gayghwanung' gooragan fih suuk madamnyeanda sabiibu. 10Asi agooga miyoasoamwana gising'waar bea gideaba,

‘Lagheaneani aneawa

ghaang' deekshoodiga, ghamneawa ea niiw

lagheaneeda haw akar gheeda.

11Nih gidaghayi sin Ng'utamiida,

Ak ea daamdaamwaat aba heedeanya’.”

12Iidu Ashoohoodiga ea giinealshoodiga diineeda Yahudi ea gweargwa gagasa ghoang'waay Yesu aba gideaba saawa nijeeng'u ng'asheega ghwanyawa ruku beadi sigala saawa. Hean geegasa eang'waay, amadu ghoawal eemeeda. Ghang'eat ng'eat ak gwanung'usa heeda.

Giiruuteayda gwaadi

(Mat 22:15-22; Luk 20:20-26)

13Geecheakta buuneeda mwaatkwa was Farisaayajeega, ea fuga duuba Herode gaweay goobalool Yesu nea gagasa gichea eaghasta aba ng'asheagaaschi. 14Geapka headaanyi ak geeyeesha, “Ea Giinealshoocheanda, aseasa geanali gideaba guwoosi siida doabiwaat rukwiida huumeanyeeka nea ghanyea miiwali gheang'ba sih. Nea eara hawunda siida ghanyea miduupi, ak giinealayi ng'asheega naweeda ASEETA bea huumwa. Heapi Rukuneasa ea ghwadoabiiwi gideaba geeruuta gwaadi eataw Gaysari ghana manda? Gajeatawa ghana majeatawa? 15Gwajeeng'u Yesu gidamitaayda geat ak gwayeesha, “Anda agooga googasayi gichea aghastanaani? Heapi ayeani lapiyeeni siguura dinaariin dadaah.” 16Geehiimsa ak ghoanyaash saawa, “Uhuuni ea gheawung'su gabeang'a?” Geeyeesha, “Gaba Gaysari.” 17Gwayeesha Yesu saawa, “Oatawa Gaysari gida was dea Gaysari ak ghoatawji ASEETA gida was dea ASEETA.” Ghwanung' ghahamng'eanyi muuchi buuneeda.

Ng'asheega duunooda

(Mat 22:23-33; Luk 20:27-40)

18Ghapka heeda Yesu Sadukayajeega mamwasa gideaba gaygwaduutu buuneeda, ak gwayeesha, 19“Ea Giinealshoocheanda, ghayi Musa gwayeeshiineasa, Siida iimea nea gwanung'usa heeda gatmooda miigwaji, gatmooni was masinung'weandean gaygwajiila diibiga orjeeda ghamasiyeadaanyi. Nea diibiga iisiji gajeeguushteawa ghweanda nyaawa ghayi meah. 20Ghayi gwanda orju ispwa bea ghaamwadagi. Gageeshi orjeeda haw amadu ghami nea ghwanung'wa hiji gatmooda miigwaji. 21Iidu masinung'weandida gwahearan orjeeda bassa. Iidu ghami earada nea gatmooda ea miigwaji. Gabiikta gwahearan gatmooda baleandeaba samwagu. 22Iidu gatmoodida gwahearan orjoogiga seaniin nea gameewa agi ea goosha sean ispeeda nyaawa nea gatmoodida ea miigwaji. Muchu aba huuydeanda eara gatmoodida ghami. 23Asi heapi eaweeda duunooda gatmooni iidu gaygaba ng'eaha? Gatmooda nighi buuneeda ea ghwahita ispwa.”

24Gwayeesha Yesu saawa, “Agooga noaramwaschi muuchi aba gideaba moanali ginyah ng'ooruutka Ghaydit ghana uurda ASEETA. 25Aba gideaba eaweedida iiduutu buuneeda ea maygageeshi nea majeegeena, gaygawuurji giijasoodiga humng'eeda. 26Asaha aba ng'asheesu bea duunoaniin ghayi neada ea miyoasoamwana aba jeeda gitaabooda Musa heeda sing'waar ng'asheega geeta mughuush yeada beasta jeeda? Ghayi aba hoowa ASEETA gwayeesha Musa, ‘Aniini geawooschi ASEETA Abrahamu ea ASEETA Isaka ea ASEETA Yakobo’. 27Niny mii ASEETA fuga nimeewa gil. Niny ASEETA fuga duugwanda. Agooga noaramwaschi muuchi.”

Diigheanda haw

(Mat 22:34-40; Luk 10:25-28)

28Deagheata ghwahidu Giinealshoocheanda diineeda Yahudi ak gooleeysiit sheang'nyeeda nyaawa. Dea gideaba Yesu ghwasha ng'asheega nyaawa nea ghoadoabiiw, ghwaan ak ghoanyaash, “Aba jeeda digheanyeeka sean aahaw aneeda?” 29Hean gwayeesha Yesu, “Dea madeeda nih gil, ‘Eaniyean aleaydiit Israeli! Ng'utamiida ASEETEANYA gil, Ng'utamiida niny gil nea gaba geaw; 30bwariinya Ng'utamiida was ASEATAANG'U aba jeadaang'u sean ea aba gurooroadaang'u sean, ea aba fughareadaang'u sean, ea aba uurdaang'u sean.’ 31Ng'asheanda haw bea iyeenya gwayi, Bwariiyda gischeewoocheandaang'u gidubwariiydi geaw. Manda digheanyeeka hees naawa suh asiyeenyean.” 32Gwayeesha Giinealshoocheandida bea Diiniin Yahudi, “Asi huumwa gil giinealshoocheanda! Aba hiji girgu huumwa gideaba ASEETA ea agi, ak ea manda nuut geaghus niny nea gaba geaw. 33Ea huumwa gil siida geaghus ghabwariinya ASEETA jeadaanyi sean ea aba fughareadaanyi sean ea aba uurdaanyi sean. Ea huumwa gil siida geaghus ghabwariiyda giischeewoocheandaanyi gidabwariiyda geaw. Ng'asheesu asiyeenyean ea majeekcheewi ea ghwanaawa eara gisilleanda ghadooweeda ea haleanjeeda suurja sisapa geadi sigadoowaniida.” 34Daah Yesu girukuteayda ng'asheega nea goomajeek gwayeesha, “Ang'iing'i ghanyea muwoosi sheageewa Gheambalmeeda ASEETA.” Ng'ata balooli ea mudugwanda siisi badaksa Yesu ghoanyaash ng'asha suuk.

Iita Gristo

(Mat 22:41-46; Luk 20:41-44)

35Damanda anealsheewa Yesu aba jeeda gheeda sibata ASEETEAN, ghoanyaashta nea gwayeesha, “Ghwasaan anda giinealshoodiga Diineeda Yahudi gwayeena Gristo Orjeeda Dawdi gil? 36Damandida gwayi Dawdi aba uurda Guroorooda Ghaydit ghwanung' gwayi,

‘Ng'utamiida gwayeesha Ng'utamiideanyu,

Beeni abiidana meatkweedeanyu

bea geatinda dugwa,

ea danung' alaapta ng'eanyi fuga was

weajoodigaagu.’

37Dawdi niny gaguura Gristo Ng'utamiida. Asi abeeda Gristo gayghoawataan jeaptaanyi?” Abeeda eemeeda gooleeysiit ng'asheega Yesu nea gahoosan.

Yesu gwayeesha buuneeda ashageada giinealshoodiga diineeda Yahudi

(Mat 23:1-36; Luk 20:45-47)

38Gwayi Yesu aba jeeda giinealshoadaanyi, “Ashageada giinealshoodusu bea Diineeda Yahudi. Fuga bwariiy gwaleamideawa hang'weaka geawi, nea geeyeenniisa seayu aba mureeda aba naada. Fuga ama hita ghoorajeega siinealshacheewa gwajiir hoorgajeega madeeda. 39Nea eara Iiweay gealga ghweelmeeda ghwanyoahaada hoorgajeega madeeda. 40Fuga iissa ghwaak haleanjeeda masiinung'weega nea iissa ghamwaash ghawooda nea googeawiit! Eaweeda girgweaksiinda gayghwanyas ghoorjooda haw.”

Gidasabwa geadi gatmooni was masinung'weanda.

(Luk 21:1-4)

41Muchu goopteada Yesu aba jeeda gheeda sibata ASEETA nea neekeewa sandakwajeanda siyiina haleanjeeda ghadooweeda. Gang'ula gida iinda buuneeda lapiya jeeda sandakwajeanda siyiina haleanjeeda ghadooweeda. Ghwadaa meanang'oodiga inyeesa ghabwaang'da lapiyeesaang'a. 42Deagheata ghwahidu Gatmoanagi bwarbwar was masiinung'weanda, ak ghoadayda heelaji iyeenya ak ghwahit. 43Hean gaguursa Yesu ginealangaaschi ak gwayeesha, “Aba huumwa geayeeshiineegwa, gatmooni was masiinung'weanda bwarbwariin, nih ghamneawa ghoadayda gidahaw ea ghwalaabwa hoowa buuneesean iin lapiya jeeda sandakwajeanda siyiina haleanjeeda ghadooweedean. 44Aba gideaba buuneeda suurja ghoadayda gidabina jeeda baruureega nyaawa. Sinung' Masiinung'weanji earapeadi bwarbwariin niidayda gidamideawa sean. Niidayda daghwardaanyi sean.”

Currently Selected:

MARKO 12: BG15

Highlight

Copy