LUKA 7

Yesu ghoahaap siida gadiyeeda shirikarajeanda haw bea Rumi

(Mat 8:5-13)

1Iidu ahiit Yesu baloaldaanyi sean gasa ghwayiiy buuneeda gawa Gapernaumu. 2Damandida gwanda ng'eanyiita shirikarajeanda haw mideawa siidaanyi bea gadiyeeda bwariiy muuchi, nea abeeda ghabwar miyeeda. 3Iiyiiy iita Yesu, goojeakta gweargwa Yahudi headaanyi eemus ghwahidu ghoahaap siidaanyi bea gadiyeeda. 4Hita heeda Yesu geemearmearani nea geeyeesha, “Siisi gammiisa weataang'u. 5Aba gideaba siisi ghabwariiy eemeedeanya ak gwadeekneasa ghooriida siinealshacheewa.” 6Goodeayi Yesu saawa. Geeyi bwak ama neekiisa gheeda, goojeakta shirikarajeanda haw fuga duupchi eeyeesha, “Ng'utamiida adiideawiidi geaw aba gideaba mamiisean gideaba gay hini jeedeaba gheenyu. 7Aba gideaba mamiisean dahidu headaang'u, ang'iing'i rukuni ng'asheanjagi ak gay ghahaap siideanyu bea gadiyeeda. 8Aniini geawooschi siida mideawa gheambalmeeda ak geabali shirikara, inyeesa iyeayeeshi akaleala, ‘Una,’ gawa; nea nuut iyeayeeshi, ‘Beeni,’ ghwaan; ak eara siideanyu bea gadiyeeda iyeayeeshi, ‘Sina gili,’ gwasin.” 9Ghahamng'eanyi Yesu iiyiiy ng'asheesu hean gwayamsa geaw eemeeda gwachi eatu geeshtaanyiin, ak gwayeesha, “Eara aba jeeda ng'eanyiida Israeli mii dadaah siida mideawa masaweega huumwa uurjunu.” 10Iidu nea gabiikta fugiga gwachi siicheaktean ghoah, ghwahita nea ea nihaap siidida bea gadiyeedean.

Yesu gooduudu orjeeda masiinung'weanda

11Iidu ghang'eat Yesu gawa mujiineeda siguura Nayni, nea goodeayi giinealangaaschi ea eemeetuw. 12Iidu nea geeneekiisa ghuuta mujiini, hean geeroonyi sea sareenda eadu muspa orjeeni was ghaamwat masiinung'weanda, ak ea orjeeda ghus ghaamwat gil nea goodeana eemeetuw bea mujiineedida. 13Daah Ng'utamiida gatmoodida ghabwayda ak gwayeesha, “Adiiyeawdi.” 14Gawa ama neekiissa ghoang'waay ghabearanga ak ghamiinaada buuneeda ak gwayeesha, “Geeyi ng'eada baleanda.” 15Gwaduudu Siida nimi ak goopteada ak gabalool ak ghoadaw Yesu ghaamwat. 16Ghabeal buuneassean; ak geakghambiit ASEETA, nea geeyi, “Nirina ng'eang'deanya sibaneeda haw!” Ak eara “ASEETA ea nihidu gabareesa fugaaschi.” 17Gageawiit iitaanyi aba ng'eanyiida Yudeya ea geeng'oojigaaschi.

Fuga ajeagu Yohaneeda Abaatiisachi

(Mat 11:2-19)

18Gweasa giinealanga Yohana iiteaba ng'asheesu seaniin. 19Hean gaguursa Yohana giinealangaaschi iyeenya ak goojeakta heeda Ng'utamiida ghoanyaash gideaba, “Ang'iing'i guwoosi siida ghayi jea ghwaani ghana jea eamuukghuna nuut?” 20Gaweay ama hita heeda geeyeesha, “Goojeakneasa Yohaneeda Abaatiisachi nea gwayi, ‘Ang'iing'i guwoosi siidida ghayi jea ghwahiduuni ghana jea eamuukghuna nuut?’” 21Ak aba damandida ghoahaap fuga saang'a miyeani ea gea bearji meangeenda, ak eara fuga ng'oowi ea niimu ghoang'wearda. 22Ghwasha nea gwayeesha, “Aweayeena ak goorukusi Yohana ng'asheesu oayiinyiin ea gea oadaayi, fuga ng'oowi niimu ghoang'wearda, fuga badoojiga gaweelweel, fuga udamusuura siimiidu, fuga miinyi niyiing'shi, muscheeka siituutu, gea barbari geerukusa Giijasta Miy. 23Ghang'wana siidida mwamwachmwajaniin.” 24Iidu nea gabiikta fuga gwachi ajeagu Yohana ghang'eat goobalool eemeeda aba badayda Yohana nea gwayeesha, “Gwachi gooweayi oong'weersiina naaha aba dareapcheeda, muudayeanda ayuuk jeameeda? 25Abeeda gooweayi adaaha naaha? Siida akwa hang'weaka bumbuni miyaas? Ang'ula, gideaba buuneeda mideawa hang'weaka miyaasiin ak ghwaak miyeenooda gwanda gealga sugoodiga. 26Abeeda gooweayi adaaha naaha? Sibaneeda? Huumwa gil, geayeeshiineegwa, ea haweewa eara sibaneeda. 27Nih siida ghayi sibean eergu aba jeeda ng'ooruutka gil gideaba,

‘Ng'ula, geajeagu giijasoocheandeanyu ghwaan madeadaang'u,

jea gwasin naweadaang'u aba madeadaang'u.’

28Asi geayeeshiineegwa aba jeeda diibiga jih gadeemga manda dea haweewa Yohana; ak eara gwasa siida mwanang' muuchi aba jeeda sugoocheanduumeeda ASEETA eahaweewa niny.” 29(Iidu nea ghwayiiy fugiga ng'asheesu sea fuga ang'oonyi gwaadiin geamwas doobiiwnata ASEETA aba gideaba fiisu fuga ghayi siipaatiisan aba giibaatiisanda Yohana; 30nea Farisaayajeega ea diinagoodiga ghaheawa ng'asheega gasa ASEETA bea badahuuka nyaawa, aba gideaba ghaheawa goobaatiisan niny.) 31“Gaydagala naaha fiisu bea jeacheeng'suun, suh fuga uurjiini? 32Gawuurji diibiga abiitpiit aba jeeda naada ak gaguuriisa geat nea gwayi,

‘Gealaschi igeambooda ak ea moang'wasi;

geenyahuushi ak ea mooyeawdani.’

33Aba gideaba Yohaneeda Abaatiisachi ghwahidu ak ea mwaaga mukaate nea mwali difaayeeda ak gooyeenyi, ‘Gwandeawa meangeenda.’ 34Ghwahidu Orjeeda Siida ak gweagiischi nea gwaleeshi; ak gooyeenyi, ‘Ang'ula, giteaw ea leeyeanda, fugaaschi gea ang'oonyi gwaadi gil ea fuga riing'eega!’ 35Nea weaghuumeeda ea nidaajiit gideaba ea doobiiwnata aba heeda diibigaaschi sean.”

Yesu gwanda gheeh Simoneeda was Farisaayajeanda

36Gaguursa siyagi bea Farisaayo goombuuchi niny, gawa gheawi bea Farisaayuun ak goopteada gweagiischi. 37Hean iiy gatmoomba riing'a mida mujiineedida, gideaba gwanda gheeda Farisaayajeanda gweagiischi, gweadu gideeshteayda nyiit nagheeda ng'andit, 38hean ghamiinaada aba bwadaw aba murdeeda geeshangaaschi ak gooyeawda, ea goobitpisa dabeakaaschi geeshanga ak goobuus aba buudeagaaschi uhuudaanyi ak ghwasam geeshanga nea ghwayeasha nagheedida. 39Daah siidida was Farisaayajeandida guursean gissin gooteemshi nea gwayi, “Inyeeda siisi gwachi ea sibaneeda gil, gwachi gayghwanal gatmooni waasiin giduurji aba gideaba gaba riing'a.” 40Ghwasha Yesu ak gwayeesha niny, “Simon, gwanda ng'asheanji jea darukuneey.” Ghwasha niny ak gwayeesha, “Naaha gil, Giinealshoocheanda?” 41“Siyagi ghayi gwandeawa fih iyeenya mideawa siileadaanyi; akaleala gwandeawa siileemba dinaaraji bughalaji muut, nea niirja gwandeawa haradam ea damanamughuush. 42Iidu nea niraay giidaydeayda, gwasamsa fiisu seaniin. Asi ghamneawa aba jeedeaba fiisu dea jea ghabwariiy muuchi aneeda?” 43Ghwasha Simon nea gwayeesha, “Ghaaghanyi gajea siiteani sisamsiina gea saang'aani.” Gwayeesha niny, “Asi nirugu huumwa.” 44Gwayamsa geaw Yesu gatmoodida ak gwayeesha Simon, “Ging'ulayi gatmooni? Ghaawunyi gheang'u, ak ea miigoona beega jea deahuuna geeshangeasu, nea niny ghwanung' goobitpisa dabeakaaschi geeshangeasu ak goobuus buudeagaaschi. 45Ang'iing'i mii samwaan nea niny dea naahini hiji ea miighwanung'waada samita geeshangeasu. 46Mii eashana uhuudeanyu nagheeda nea niny ea niyeasha geeshangeasu nagheeda. 47Asi gaydayeeshiineey, riing'eagaaschi saang'a sisamsa, aba gideaba ghabwariiy muuchi, nea dea sisamsa gilimwanang' gayghabwariiy gilimwanang'.” 48Ak gwayeesha niny, “Sisamsa riing'eagaagu.” 49Iiyiiy fugiga agiischiin mideayi sea ninyiin gaba nih eesha geaw, “Siisi ng'eaha jea gwasamsa riing'eemba nuudiini?” 50Ak gwayeesha gatmoodida, “Niighuunyi masaweagaagu; una nea gibeahi hoyyoo.”

Currently Selected:

LUKA 7: BG15

Highlight

Copy