LUKA 6

Iita Sabaato

(Mat 12:1-8; Mar 2:23-28)

1Eaweeda Sabaato damanda beawa gwasik jeesinga madameega, hean ghwalajaada ginealangaaschi muschoonga, ak gang'ealng'ealsa jeesinga baneaguuka nyaawa ak ghwaak. 2Gwayeesha Farisaayajeega mwaatkwa, “Ghwasaan anda goosinyi ng'asheanda mwadoabiiwa eaweeda sabaato?” 3Ghwasha Yesu nea gwayeesha, “Miyoasoamwana gidaghayi sin Dawdi iiyeachih. 4Gidabeada jeeda gheeda ASEETA, ak gageanu ak ghwaak mukaatajeega siyiin madeeda ASEETA, nea mwadoabiiwa aba hichpa siinuut geaghus ghwaak ashoohoodiga, ak ghoadaw eara fuga mideayi sea niny?” 5Ak gwayeesha, “Orjeeda Siida Ng'utamiida sabaatohi.”

Siida aptu geatinda

(Mat 12:9-14; Mar 3:1-6)

6Eaweecha nuut bea sabaato, damanda beawa jeeda ghooriida siinealshacheewa ak goonealshi, gwanda jeeni siisi aptu geatinda dugwa. 7Gang'ula Ng'oorshoodiga ea Farisaayajeega eadaa ea jea ghoahaap siidida eaweeda sabaato, aba sareani geegasa gichea eanyasta ramaseanda jea eahaaktaawa. 8Hean ghwanal gidamida jeesinga nyaawa, ak gwayeesha siidida aptu geatindean, “Beeni miinaada aba hiji.” Ak ghang'eat ak ghamiinaada aba hoowa. 9Ak gwayeesha Yesu, “Gaydaanyaasheagwa, aba eaweeda sabaato, ghwadoabiiwi gideaba geesin ng'asheanda miyi ghana ng'asheanda muy. Ghang'wana giighuuyda eaweega ghana ng'wana lakuunooda?” 10Ng'ata ghoaduup ghaang' buuneeda aba murdajeega sean ak gwayeesha siidida, “Asi adoabiiwa geatindaang'u.” Hean ghoadoabiiw ak gabiikta geatinda gamajeegiit. 11Ghwanyareas muuchi fugiga ak geebalool eegasa gichea eehinda Yesu.

Yesu ghwaloat giijasoodi damaniyeenya

(Mat 10:1-4; Mar 3:13-19)

12Askwearjoojigiga gawa iheenga heayeeniga ghamwaash ASEETA; ghamwaash ASEETA eaweesean. 13Iimuchu, Gaguursa ginealangaaschi, ak ghwaloat damaniyeenya aba jeenyaawa, ak gaguura malaykajeega; 14Nea Simoneeda siguura gheawungaaschi Betarohi, ea orjeeda ghaamwat siyi Andreya, ea Yakobo ea Yohana, ea Filipo, ea Bartolomayo, 15ea Matayo, ea Domaso, ea Yakobo orjeeda Alfayo, ea Simoneeda siguura Selote, 16ea Yuda orjeeda Yakobo, ea Yudayda Iskariyoti, was siida amadu ghwala bwadaw.

Yesu goonealshi nea ghoahaap fuga miyeani

(Mat 4:23-25)

17Iidu nea ghwararang'aan sea saawa ak ghamiinaada aba heeda miy ng'eanyi, abeeda gwandeawa fuga saang'a was ginealangaaschi ea eemeetuw leabu meatkwajeega sean bea Yudeya, ea Yerusalemu ea ghuuta basooda Diro, ea Sidoni, nea ghapka gooleeysiit niny nea geahaap geeyoonung'weaka nyaawa; 18Ak ghoahaap eara fugiga bearji meangeenda munyasiin. 19Gagasa eemeesean ghawaas niny, aba gideaba uurda gwaleabu headaanyi ak ghoahaap sean.

Hooseaneega ea giiseaneega

(Mat 5:1-12)

20Iidu gagatkat gheanyangaaschi goong'weersa ginealangaaschi, ak gwayeesha:

“Ghoang'wani agoogeeda barbari, aba gideaba sugoocheanduumeeda ASEETA deang'wa.

21“Ghoang'wani agoogeeda yeadeagwa jih ghamneawa, aba gideaba gajoolang'uuda.

“Ghoang'wani agoogeeda ooyeawdi ghamneawa, aba gideaba gajoayaaga reari.

22“Ghoang'wani agoogeeda sideagwa buuneeda, nea gwahistaneegwa nea goong'eaweegwa ak geemunyasiidi gheawungeagwa, aba badayda Orjeeda Siida! 23Ahoosana aba eaweedida, nea ghoang'waschi aba hooseaneega, aba gideaba giimeardeang'wa aahaw aba humng'eeda, aba gideaba nih gidaghayi hinda ghweaniga nyaawa sibanga.

24“Asi ashageada agoogeeni oowooschi baruurjeewiin, aba gideaba noanyaschi hawdeayda.

25“Ashageada agoogeeni oowooschi lang'uudeat ghamneawean, aba gideaba gajadaaha jalooda.

“Ashageada agoogeeni oayaaji reari ghamneawean, aba gideaba gajagutuuni heareega nea gooyeawdi.

26“Ashageada agoogeeni, jea gagwarseegwa buuneesean iin aba gideaba eara ghweaniga nyaawa ghayi gwahindunu sibanga ng'uyeega.

Bariinyeega weajoodiga

(Mat 5:38-48; 7:12a)

27“Asi Geayeeshiineegwa agoogeeni ooyiing'shiin, abwariinya weajoodigeagwa, asisiina gea miyaasiin fuga sideagwa, 28Abadiischeesiina fuga mooriidaneegwa, amwaasha ASEETA aba badahuuka fuga ghabwaseegwa. 29Siida iilas madeang'daang'u, giidawi eara meatkweeda niirja; iyareanyi sih hang'daang'u ginung'usi eara shaateadaang'u. 30Siida musnyi gil adawa, nea siida areanyi haleanjeadaang'u ea adimaseawi. 31Asi gidoogasayi gwasinneegwa buuneeda agooga, asisina eara saawa.

32“Iyoabwariinyi fuga bariinyeagwa, abeeda ghoahiimu naaha miy? Aba gideaba eara fuga riing'eega ghabwariiy fuga bwariiy saawa. 33Iyoosissi gea miyaasiin fuga sinuneegwa gea miyaas, abeeda ghoahiimu naaha miy? Aba gideaba eara fuga riing'eega gwasina gea uurjunu. 34Iyoonung' gooleakshi fuga oanali gideaba gay ghoaghuumneegwa abeeda ghoahiimu naaha miy? Aba gideaba eara fuga riing'eega gooleaksheewa heeda fuga riing'eega, aba gideaba ghwanal gideaba gay ghoaghuumu. 35Asi abwariinya weajoodigeagwa, nea goosinyi gea miyaas, nea ghoanung' gooleakshi, nea adoofurdi goodeelneegwa gil; abeeda giimeardeang'wa gajaahaw, ak gajahuuwa orjooga ASEETA haw mida humng'eeda; aba gideaba niny aamiy aba fuga mabadiischeesiina ea gea geawi gheanyan. 36Andeawana baydeayda, ak gawuurji gidamideayeata Ghweandeang'wa baydeayda.

Girgweaksiinda buuneeda

(Mat 7:1-5)

37“Adoorgweakiisi buuneeda, ak ea majeergweakseegwa; adooyeati ghuusi, buuneeda ak ea majeeyeateeweegwa ghuusi; asamiisiina buuneeda, ak gajeesamseegwa; 38oatawa buuneeda haleanjeeda ak gajeegooneegwa; dea nyiit, sidaksa, siituumduum, ea ghwanaawda, ea gichea gagooneegwa. Aba gideaba giideenooda ooteeniidi gichea eeteeneegwa.”

39Gabalool nea gagala geat ng'asheega, nea gwayeesha: “Heapi siida ng'oaw gayghoamu ghoadoabiiw siinuut ng'oawi? May ghoabita duwaawi jeeda shoomanda? 40Giinealaneeda mwang'ala giinealshoocheandaanyi, geaghus ea niduulu giinealshooda abeeda gaygwadeenyi sea giinealshoocheandaanyi. 41Ghwasaan anda ging'ulayi hararooyeanda mida jeeda gheang'da orjeeda geamadu nea ming'uli geeta mida jeeda gheang'daang'u? 42Ak gajamuustaan eeshiina orjeeda geamadu, ‘Orjeeda iya, nung' dageanu hararooyeanda mida gheang'daang'u,’ nea midaahi geeta mida gheang'daang'u ang'iing'i. Siida amiitu geaw, nyooh ghanyi geanda geeta mida gheang'daang'u, abeeda gaydaaha muuchi gichea geandeayda hararooyeanda mida gheang'da orjeeda geamadu.

Geeta ea haghweagaaschi

(Mat 7:16-20; 12:33-35)

43“Geeta miy majiila haghweega munyas, eara geeta muy ea majiila haghweega miyaas; 44aba gideaba gilinyoo ea geadi geenala haghweagaaschi. Aba gideaba moang'wa eebina gulageetka geeta halaghweenga, ghana moang'wa eebina sabiibu heeda yuudeeda. 45Siida miy aba jeeda gheaseadaanyi miy bea gurooroadaanyi gooruutu gea miyaas, nea siida muy aba jeeda gheaseadaanyi muy iissa gooruutu gea munyas; aba gideaba ghuuta gabaloola gea nyiit jeeda gurooroadaanyi.

Fih iyeenya deekshi

(Mat 7:24-27)

46“Ghwasaan anda googuureewean ‘Ng'utamiida, Ng'utamiida,’ nea moosini gidearukuneegwa? 47Siida wassean wuh heedeanyu ak ghwayiiy ng'asheegeasu ak gwasin, gaydaahiimu giduurji: 48gawuurji sea siida deekshi, ghurghurda daranajeega muuchi ak ghwayiin sindeeta heeda mida lagheanga; hidu guldeayda eenda, gagulsa gheeda, ak ea mabwaanya, aba gideaba sideas muuchi. 49Nea siida iiy ng'asheegeasu ak ea masina gawuurji siida deeksa gheeda badayda ng'eanyiida nea manda sindeeta; hidu guldeayda, deagheata ghabwaay, ak habitkweedeaba gheedida aahaw muuchi.”

Currently Selected:

LUKA 6: BG15

Highlight

Copy