LUKA 17
17
Riing'eeda
(Mat 18:6-7,21-22; Mar 9:42)
1Ng'ata gwayeesha ginealangaaschi, “Simsimda jea gweadu riing'eeda mayghwashiy hinnooda ak ea dashageada siidida jea ghwanung' ghwahidu! 2Gwachi gayghang'wana siisi geerasa gheata lagheaneeda sing'ealiida ak geejaksa jeeda basooda, mayghwasam gideaba gayghwanung' goodiiy siyagi aba jeedeaba suh manang'iin. 3Afura geat; iyadiiy orjeeda geamadu, gireekusi, iiduukuuna gisamsi; 4ama adiiyseey niba ispwa aba jeemba askwearjeanjagi, ak gabiikseey niba ispwa nea gwayi, ‘Neaduukuuni,’ abeeda gisamsi.”
Masaweega
5Gwayeesha Giijasoodiga Ng'utamiida, “Aheaneasa masaweega.” 6Gwayeesha Ng'utamiida, “Inyeeda goondeawi masaweega deena gheang'nyeanda geeta siguura haradaali, abeeda gajoamuusa ayeeshiina meagheayeanda, ‘Loadaana ak geeng'eapseey jeeda basooda,’ ak gayghoawal gheang'deang'wa.
Gidamiisa soomjeanda
7“Heapi gajea ng'eaha gil aba jeedeang'wa mideawa soomjeanda bwar ng'eanyi ghana ghoahaaghwa gisilga, jea gwayeesha niny iibiikna madamnyeanda, ‘Lamwajaana beeni apteada agiischeena’? 8Heapi maygwayeesha, ‘Sinnean gichea daak, radiischeena ak gigadiyeesean ea daahiit, agiischooda ea leeshooda, ak abeeda giyeagiischi nea gileeshi’? 9Gaygabadiischeesa soomjeandida aba gideaba nisin gissirukusa? 10Eara agooga gidoowuurjeewi gil, iyoosinyi gidasiyeeshiineegwa asina, gooyeeshi geat, ‘Aseasa geewooschi soomjooga marachi gil, geesinyi gidamiseasa sinooda.’”
Yesu ghoahaap fih damanamughuush
11Iidu nea gwanda naweeda gawa Yerusalemu gwasik dageascheeda ng'eanyiida Samariya ea Galilaya. 12Geeyi bwak ama hita jeemba gharang'agi gwaroonyi sea fih damanamughuush beardooschi udamusuura, ak ghamiinaada nea sheagi 13Goojuur nea gwayi, “Yesu, Siida haw, eaniyean bwaydaneasa.” 14Daah saawa gwayeesha, “Aweayeena oohiimsiina geat ashoohoodiga diineeda Yahudi.” Damandida beawaan geamiidu. 15Daah siyagi aba jeenyaawa gideaba nihaap, gabiigu nea ghoaghaambiit ASEETA aba ghuuta haw; 16goobeedeaysa Siidida geeshanga Yesu ak gabadiischeesa. Nea siidida gaba eemeeda Samariya. 17Hean gwayi Yesu, “Fuga gwachi siihaap atamanamughuush? Gea ashageash gwanda yeenu?. 18Manda dea nibiigu ghoaghaambiit ASEETA geaghus rabascheanji?” 19Ak gwayeesha niny, “Ng'eada una; gidahaapnyi masaweagaagu.”
Hinooda gheambalmeeda
(Mat 24:23-28,37-41)
20Ng'ata ghoanyaash Farisaayajeega nea gwayeesha, “Sugoocheanduumeeda ASEETA gayghwahidu eeju? Ghwasha nea gwayeesha saawa, Sugoocheanduumeeda ASEETA mayghwahidu nea geadaahaan. 21Ea manda siichea gwayi, ‘Gwanda hiji!’ ghana ‘Hoowa!’ Aba gideaba ng'ula sugoocheanduumeeda ASEETA gwanda jeesingeagwa.” 22Hean gwayeesha giinealanga, “Gayghwahidu eawoojiga jea agaseena adaahana eaweecheanjagi aba eawoojiga Orjeeda Siida, ak ea mwajadaaha. 23Ak gajeeyeeshiineegwa, ‘Ang'ula gwanda hoowa!’ ghana ‘Ang'ula gwanda hiji!’ Adooweayi, nea Adoayaachi geeshta nyaawa. 24Aba gideaba gaygawuurji dadamandeeda aboong'na meatkweenagi bea humng'eeda ea ghwahita meatkweeda niirja bea humng'eeda, ea gichea gawuurji Orjeeda Siida gil aba eaweadaanyi. 25Ak gayghanyi ghwanyas hang'weanidooda aba madeeda aba haleanjeeda saang'a, nea gayghaheawa fiisu bea jeacheeng'suun. 26Ak gidaghayi uurji aba eawoojiga Nuhu, ea gichea gawuurji gil aba eawoojiga Orjeeda Siida. 27Geeyeagiischi, nea geeleeshi, geegeeshi, nea geegeena, ea ghwahiita eaweeda weewa Nuhu jeeda maleambooda, ghwahiing'aan roopta haw ak ghwalas uhuudeaba sean. 28Gaygawuurji gidaghayi uurji aba eawoojiga Lutu, abeeda geeyeagiischi nea geeleeshi, geasha nea geeshaayda, geehista, nea geedeekshi, 29muchu eaweeda riteawa Lutu Sodomean ghoaptu beasta wunda roopta leabu humng'eeda ak ghwalas uhuudeaba sean– 30Nih gichea gawuurji gil aba eaweeda jea eataajiida Orjeeda Siida.
31Eaweedida siida mida uhuuda gheeda nea gwanda haleanjeadaanyi jeeda gheeda, adaghwararang'aan gageanda; ak eara dea mida madamnyeanda ea adagabiikta bwadaw. 32Oapkaada gatmooda Lutu. 33Siida wassean gasa ghoaghu eaweagaaschi gaygahuta, nea dea huteawi eaweagaaschi gayghoaghu. 34Geayeeshiineegwa eaweedida, gaygwandeayi fih iyeenya aba bulaliida, ak gajeegeanda siyagi ak geenung'usa heeda niirja. 35Gaygang'ealshi gadeem iyeenya aba hijagi, geegeanda agi ak geenung'usa heeda niirja.” 36[“Gaygwanda fih iyeenya madamnyeanda, ak gajeegeanda akaleala, ak geenung'usa heeda akaleala.”] 37Ak geeyeesha niny, “Eenu gil Ng'utamiida?” Gwayeesha saawa, “Heeda mida guumeeda heeda jea gooweameesa madoonyaka.”
Currently Selected:
LUKA 17: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
