LUKA 16

Haghweadoocheanda milmili

1Gwayeesha ginealangaaschi, “Ghayi gwanda siyagi was meanang'ocheanda nea gwandeawa haghweadoocheanda ak iidu geataw meanang'oocheandida iita gidasaksaktaayda haghweadoocheanda haleanjeadaanyi. 2Gaguursa niny siidida ak gwayeesha, ‘Ng'asheesu eayiinyayi aba badaydaang'uun naaha? Goona iita mooneeda haleanjeedeanyu bea haghweadoocheanduumeadaang'u, aba gideaba maygudu huwa haghweadoocheanda.’ 3Gwayeesha geaw haghweadoocheanda, ‘Gaydasin naaha, aba gideaba siideanyu haw gagasa gageandeawaneani haghweadoocheanduumeeda? Meandeawani uurda jea dabwara ng'eanyi, ak ghaawali musiischooda. 4Ak ea naanyaschi gichea dasin, ak abeeda ghwadeaptanaan buuneeda aba gealga nyaawa iisigeandeawanean haghweadoocheanda.’ 5Iidu Gaguursa fuga mideawa siileeniga siida haw ak gaguuriisiinagi ak gwayeesha siida madeeda, ‘Gindeawi siileeni deanaan bea siida haw?’ 6Gwayeesha, ‘Ghadeat bughala bea nagheeda.’ Hean gwayeesha niny, ‘Nukwa siileadaang'u lamwaja apteada ak ging'waari haradam ea damanamughuush.’ 7Ng'ata gwayeesha nuut, ‘Ang'iing'i gindeawi siileeni deanaan?’ Gwayeesha, ‘Guniyaji bughala bea ngaano.’ Gwayeesha niny, ‘Nukwa siileadaang'u ng'oara seedam.’ 8Gagwarsa Siida haw haghweadoocheandida sina ng'asheega munyasiin, aba gideaba orjoogeaba ng'eanyiini ea bareahi iheeni aba jeedeaba rooproobang'su ea ghang'al fuga abiita heedeesh. 9Asi geayeeshiineegwa, asisiina geat rooroocheeda aba meanang'oocheanduumeeda mwadoabiiwa, ama ashealaneegwa gil, ghwadeaptaneegwa aba jeeda giibinda manda muudeanooda.

10“Siida doabiiwaat aba haleanjeeda manang'i muuchi gajea doabiiwaat eara aba haleanjeeda heesi muuchi; nea dea miidoabiiwaat aba haleanjeeda manang'i eara aba gea heesi gajea miidoabiiwaat. 11Asi iimoowoosi doobiiweadi aba meanang'oocheanduumeeda mwadoabiiwa, gaygagooneegwa ng'eaha meanang'oocheanduumeeda huumwa? 12Nea iimoowoosi doobiiweadi aba haleanjeemba sih nuut, gaygagooneegwa ng'eaha haleanjeedida was geagwa? 13Manda soomjeanda jea ghoamu gagadiiyeesa fiisu hees iyeenya, aba gideaba gayghwasit nih ak ghabwariiy nih, ghana ghoang'waay geat sea nih ak gafool nih. Moamuusi agadiyeesiina ASEETA ea meanang'oocheanduumeeda.”

Ng'asha suuk bea Yesu

(Mat 11:12-13; 5:31-32; Mar 10:11-12)

14Iidu nea ghwayiiy Farisaayajeega ng'asheesu seaniin gwashika niny aba gideaba saawa ghabwariiy lapiya. 15Ng'ata gwayeesha saawa, “Agooga goohindi geat gili oowooschi miyaasiin aba madeeda buuneeda, nea ASEETA ghwanal gurooruunatkeagwa; nea gilinyoo goodiing'u geaw aba madeeda buuneeda, gayghoanyareas ASEETA. 16“Deaweedajeega ea sibanga ea gagul Yohana; hean geerukwiida Giijaasta miy bea sugoocheanduumeeda ASEETA, nea gaba siisi abwasaay geaw. 17Gajeawusus ng'ateayda jea ghang'ata humng'eeda ea ng'eanyiida, mayghwasam gideaba gayghwasuunya ng'asheanjagi mwanang' was deaweeda.

18“Siida wassean nung' gatmoadaanyi ak ghayi nuut siisi gamealuul, ak siida jea ghaghi gatmooda sinung' earada siisi gamealuul.

Meanang'oocheanda ea Lasaro

19“Ghayi gwanda meanang'oocheanjagi akweali hang'weaka oomng'i bea sheayeeda haw ak gwasina ghweelmeeda galeagasean. 20Nea abeeda gwanda ghuuteaba gheanyi siisi bwarbwar siguura Lasaro, nea gwandeawa deaneaduutka saang'a, 21inyeesa gagasa ghwaak lajanga abituuna heeda agiischeewa meanang'ocheanda, nea inyeesa ghapka gudajeega gameera deaneaduutkaaschi. 22Ghami siidida bwarbwariin, ak ghwaat malaykajeega ea ghoahiita madeeda Abrahamu. Muchu ghami eara meanang'oocheandida ak geebuy; 23gatgat gheanyangaaschi meanang'ocheanda nea gwanda heeda abiita fuga nimeewa nea gwanda jeeda hang'weanidooda, ghwadaah Abrahamu nea sheagi nea Lasaro gwanda madeadaanyi. 24Gaguurda nea gwayeesha, ‘Bwaabwa Abrahamu, samsean ajeakni Lasaro ghang'uda mooneadaanyi jeeda beega, googarbiit ng'ushapteanyu aba gideaba geasawani aba jeedeapeasi.’ 25Gwayeesha Abrahamu, ‘Orjeedeanyu, apkaada gideaba ang'iing'i ninyasi haleanjeeda miyaasiin aba jeeda eaweagaagu, nea Lasaro ghwanyas gea munyas, ak ghamneawa niny geenung' ghahawda, nea ang'iing'i gindi jeeda hang'weanidooda. 26Nuut gicha, dageascheedeanya ea agooga ea siyiin ghalalayda haw, aba gideaba fuga gasa ghapka hooweani oondiini ea mayghoamu, nea eara fuga meatkweedeang'wa ea maygoogeawu heeda sindi.’ 27Hean gwayeesha, ‘Ada abeeda ghweandeanyu, geamuscheey, ajeaksiina fuga ghaheanya, 28aba gideaba geandeawi orjoogiyya muut, eerukusa ea mwapka eara saawa hiji bea hang'weanidoodean.’ 29Gwayeesha Abrahamu, ‘Gwandeawa Musa ea sibanga, nung'waada gooleeysiit saawa.’ 30Hean gwayeesha, ‘Manda ghweandeanyu Abrahamu; inyeeda gabiiksa saawa siida leabu miyeeda, gaygwaduukuuna.’ 31Gwayeesha niny, ‘Iimealeeysiiniit Musa ea sibanga, ea mayghamwas eara gabiiksa siida duuna miyeeda.’”

Currently Selected:

LUKA 16: BG15

Highlight

Copy