LUKA 14

Yesu ghoahaap siida miyaan

1Eaweecha nea gwanda sabaato gawa gweagiischi aba gheapa siyagi ambaliischi bea Farisaayajeega, hean geeng'ula niny. 2Asi ng'ula, gwanda madeeda siisi looloohani saseeda. 3Goobalool Yesu diinagoodiga ea Farisaayajeega, nea gwayeesha, “Heapi ghwadoabiiwi gideaba gajeahaap siida eaweeda Sabaato, ghana manda?” 4Hean geasiinda. Ghoang'waay siidida ak ghoahaap, ak gwasiksa gawa. 5Ak gwayeesha saawa, “Gajea ng'eaha aba jeedeang'wa, jea ghoabita, orjeedaanyi ghana heeydaanyi jeeda healadeeda, eaweeda Sabaato jea ea maygabay gwalealu?” 6Ea measha ng'asheanji.

Ng'eeninda ea inyeanda jeeda

7Iidu gwarukusa Yesu buuneeda gidagala fuga siguush, iidaah gidiisa ghwaloata buuneeda hoorgajeegeaba mwadi, ak gwayeesha, 8“Iiguurneey siida wassean nyeangiida, adiidu giipteadawi hoorgeeda madeeda, aba gideaba gwadeepa ea siguush siida siiwal gheang'da mawuurjeeweey; 9ak ghwahidu siida guusheegwa ak gwayi, ‘Asiipta goopteada siisi aba hiji,’ abeeda gajuna apteadawana hoorgeedeaba bwadaw nea gibwaspwasaadi. 10Asi iisiguushnyi, guwi ak giipteadi aba hoorgajeegeaba bwadaw, iihidu siida guurneey gaygwayi, ‘Siida eaduupcheewi beeni hiji bea mwadiin,’ abeeda gaynyasa mureeda aba madeeda buuneesean iimbuucheewi. 11Aba gideaba siisi nyooh goodiing'u geaw gajeahiing'u nea dea hiing'u geaw gajeetiing'u.” 12Ng'ata gwayeesha siidida guush ninyiin, “Iidaydi hamiteaba askweari ghana ghweelmeeda, adiguushi fuga iduupcheewi ghana orjooga geamadu ghana buweadeagaagu ghana giischeewdaang'u was meanang'oodiga, gajiidu gaguushnyi saawa gawalu guushtida ghayi itaang'uun. 13Eaweeda isini ghweelmeeda aba gheang'u abeeda giguursi fuga barbari, ea gea ghanyeata ea gea badoojiga, ea gea ng'oowi, 14abeeda gaynyasa ng'wanooda, aba gideaba fiisu mandeawana gichea gawalneey. Ak gaygawalneey ASEETA eaweeda duunooda fuga doobiiweadi.”

Gida sigala ghweelmeeda haw

(Mat 22:1-10)

15Iiy Siyagi bea jeeda fuga ambuuchi gwayeesha, “Ghang'wana siida jea ghwaak mukaate aba jeeda sugoocheanduumeeda ASEETA!” 16Ghwasha ak gwayeesha niny, “Siyagi ghayi gwasin ghweelmeeda haw, ak gaguush fuga saang'a; 17hita damanda ghweelmeeda goojeakta soomjeanda gaguush rabastaanyi nea gwayeesha, ‘Abeeni aba gideaba haleanjeeda sean nihit.’ 18Hean ghabwar badooji sean. Ak gwayeesha dea madeeda siidida, ‘Naashaayi madamnyeanda ak gaydawa dadaah; geamuscheey samsean.’ 19Gwayi niirja, ‘Naashaayi heew damanamughuush bea barooda, ghamneawa geawi daanaal, geamuscheey samsean.’ 20Gwayi niirja, ‘Naagheanyi gatmooda ak ea maydaamu dahidu.’ 21Iidu gawa soomjeanda ghoadaw siidaanyi haw iiteaba ng'asheesu seaniin. Ak ghwanyareas siida bea gheeda ak gwayeesha soomjeandaanyi, ‘Lamwaja una jeeda naweadinga hees ea gea manang'i bea mujiiniin, ak giyeadu fuga barbari ea gea ghanyeata ea gea badoojiga ea gea ng'oowi.’ 22Ak gwayeesha soomjeanda, ‘Siida mureeda, gida iijeakteawanean naahiichi ak gheeda ea miighwanyiit.’ 23Hean gwayeesha Siidida hawiin soomjeanda, ‘Rita jarooda una guuyeeda naweadinga ea moonghajeega ak gidiing'si buuneeda ghapka gah ghwanyiit gheanyu. 24Aba gideaba geayeeshiineegwa, manda eara siyagi aba jeedeaba fugiga siguushiin dea jea gwasamu ghweelmeedeanyu.’”

Gidamiisa sinooda iijeahuuwa giinealaneeda

(Mat 10:37-38)

25Hean gaweay eemeeda nea goodeay niny; ak Ghwayam geaw ak gwayeesha, 26“Siida iihidu heedeanyu nea mwasida ghwaan ea ghaamwat ea gatmoadaanyi ea diibigaaschi ea orjooga ghaamwat ea haweega ghaamwat, nea ea mwasida eaweagaaschi moamu ghoah giinealaneedeanyu. 27Siida mwaada beehiidaanyi ak gweadu geeshteanyu, moamu ghoah giinealaneedeanyu. 28Heapi gajea ng'eaha aba agooga gasa ghwadeas gheeda haw siikeawiit, ak ea meapteada gwayiida nea goodeen haleanjeeda jea ghwadeakta ghwadaah ea jea gwadeay? 29Aba gideaba gajiidu gwasin sindeeta, ak ghwaraay ghoahiit, ak abeeda gwajuuga fugiga sean daahiin, 30nea geeyi, ‘Siisi ghoang'eat ghuuta deekshooda ak ghwaraay ghoahiit.’ 31Ghana gajea ana sugoochean gil jea iigasa gawa gang'uchi sea niirja, jea ea mayghanyi goopteada, ak gooteemshi ghwadaah ea ghoamu niny sea fih sagalamnyooji damanamughuush, ea jea ghoamu gang'uchi sea niirja mideawa fih sagalamnyooji diktam? 32Ak iidaah gideaba moamu gabay goojeakta buuneeda gabay gagasa hoyyoo nea gudeasheagi. 33Asi gwasunu eara aba agooga, siida manung'usiina heeda haleanjeadaanyi sean mideawa moamu ghoah giinealaneedeanyu.

Balang'da masamna gil

(Mat 5:13; Mar 9:50)

34“Balang'da aamiy, ak balang'da iinihuta samneeda, ea manda gichea eekuuyi gabiiksa matawanda? 35Biisa ea mudugwarachi gil eara aba ng'eanyiida ghana raghwata, inyeesa gageanu buuneeda ak goohiisa jarooda. Siida mideawa iidiga ea dayiing'shi.”

Currently Selected:

LUKA 14: BG15

Highlight

Copy