LUKA 13

Oapuuda riing'eegeagwa iimajameewa

1Abeeda damandida gwanda Fiisu rukusa iita fuga Galilaya aguuyi Bilato foojeanda nyaawa sea haleanjeeda sisabwa geadi bea ghadooweeda. 2Ghwasha nea gwayeesha, “Agooga ghoaghanyi gili fiisu bea Galilayaan gaba riing'a muuchi ea ghang'al fuga Galilaya suurja, aba gideaba gwasawaneatunu? 3Geayeeshiineegwa, Manda; iimooduukuunani riing'eegeagwa eara agooga gajooshealda saawa. 4Ghana fugiga atamasis bea Siloamu meewa iing'adeesa gheeda geawiin, ghoaghanyi gideaba fiisu niramwas muuchi ea ghang'al buuneesean abiita Yerusalemu? 5Manda; geayeeshiineegwa, iimooduukuunani eara agooga gajooshealda gidashealda saawa.”

Gida sigala shaboogheecheanda manda haghweega

6Goobaloola galeega nea gwayeesha, “Sih ghayi gwandeawa shaboogheecheanda aba jeeda madamnyeandaanyi bea sabiibu, iidu gawa gagasa haghweega ak ea mwanyasa eara akaleala. 7Gwayeesha siida fur madamnyeanda, ‘Nih gweaydeaba samwagu gil nea geahitu dagasa haghweegeaba geedi ak ea mwaanyasi eara akaleala. Laksiina ng'eanyi, aba gideaba gaygweaksa naaha uurda sigeeda?’ 8Ghwasha niny nea gwayeesha, ‘Siida mureeda, eanung'waada jeemba gwanyagi, ghanyi dabarsa nea ghayiinyi sururuuda. 9Iideepa gweanyiin gwaji haghweega abeeda ghoahiit; iideepa ea maji, abeeda gilaksi ng'eanyi.’”

Yesu ghoahaap gatmooda badeeda eaweeda Sabaato

10Hean eaweecha nea goonealshi aba jeeda ghooriida siinealshacheewa eaweeda sabaato. 11Abeeda gwanda gatmooni sinyuut ng'utooschi meangeenda nea niiluul gweanyeew damasis, nea niighuumwa ea eamudu ghoamu gwadiiw geaw. 12Daah Yesu gatmoodida gaguursa ak gwayeesha, “Iya siihaapnyi aba geeyooni ibearjeewiin.” 13Ghwayiin geatingaaschi uhuudeaba gatmoodida, deagheata gwadiiw geaw ak gwaduumsheesa ASEETA. 14Ghwanyareas siida haw ahaaghwa ghooriida siinealshacheewa aba gideaba Yesu ghoahaap siida eaweeda Sabaato, hean gwayeesha buuneeda, “Goondeawi eawooji lah jea asinana gadiyeeda, asi apkaani eahaabeagwa askwearjoojisu, ak ea adoapkaanyi eaweeda Sabaato.” 15Hean ghwasha Ng'utamiida nea gwayeesha, “Fuga amiitu geat! Aba agooga gwanda siida maygwajeassa heeydaanyi ghana digeadaanyi aba seamooda, eaweeda Sabaato ak gawa ghoaleayda? 16Ama ghamneawa gatmooni, was hudeaba Abrahamu nirada Shataani gweanyeew damasisiin, mamiisiina eetin aba ghealoonigaaschi eaweecheanji bea Sabaatohiin?” 17Rugu ng'asheesu ghabwaspwas sean; gea gwachi sheang'nyi niny nea gahoosan buuneeda sean aba ng'asheega gheambiideadi sin niny.

Gida sigala ghajiileanda haradaali

(Mat 13:31-32; Mar 4:30-32)

18Ghoanyaashta nea gwayeesha, “Ghamneawa sugoocheanduumeeda ASEETA gawuurji sea naaha? Ak gaydagala naaha? 19Gawuurji ghajiileanda geeta siguura haradaali geanu sih ak gwahista aba jeeda madamnyeandaanyi mwanang', ak gwardu ak gwaheedu ea ghoah geeta, inyeesa gwasin damealga ea gwasissa dariidaka ghoorajeega nyaawa.”

Gida sigala hamiira

(Mat 13:33)

20Iidu gabiikta gicha gwayeesha, “Gaydagala naaha sugoocheanduumeeda ASEETA? 21Gawuurji sea hamiireeda geanu gatmooda ak ghwayiin jeemba sooscheew samwagu bea dearanga, ak ghwanung' ghaghuut geat sean.”

Gidaghuuta mwariis

(Mat 7:13-14,21-23)

22Hean ghang'eat gawa nea gwasik mujiinajeega ea gharang'weaka, goonealshi nea gagal Yerusalemu. 23Ghoanyaash siida nea gwayeesha, “Ng'utamiida fuga jea ghwalaalaan gajeang'ayi?” Hean gwayeesha saawa, 24“Amilmiliita ak goosikchi gidaghuuta mwanang'; aba gideaba geayeeshiineegwa, gaygagasa fuga saang'a gwasik ak ea mayghoamu. 25Gayghwahidu damanda jea ghang'eat siida bea gheeda ak ghwajap gidaghuuta, hean goobissi amiinaada ak googulguli gidaghuuta, nea gooyeenyi, ‘Ng'utamiida, jaaseasa.’ Ak gayghwasha niny nea gwayeesha, ‘Mwaanali heedooleabu.’ 26Ak gajayeeshiina, ‘Aseasa ghayi geembuutooschi nea geeleeshachi sea ang'iing'i nea giinealshachi aba mujiineedeanya.’ 27Ak gaygwayeesha, ‘Geayeeshiineegwa, mwaanali heedooleabu, ang'amwana heedeanyu, agoogeeni sina ng'asheega munyasiin!’ 28Abeeda gayghwahidu shooka ea giiwiirooda geeshatka, iyoadaayi Abrahamu ea Isaka ea Yakobo ea sibanga sean aba jeeda sugoocheanduumeeda ASEETA nea agooga ea sihisaneegwa jarooda. 29Ak gay ghapka fuga jea gwaleabu heeda ghayeawa ea heeda biyeara, ea wiilooda ng'eanyiida ghayeawa ea wiilooda ng'eanyiida biyeara, ak gaygweagiischi aba jeeda sugoocheanduumeeda ASEETA. 30Asi ang'ula fuga huuydean gayghoah fuga madeeda, nea fuga madeeda gayghoah fuga huuydean.”

Bariinyeega Yesu bea Yerusalemu

(Mat 23:37-39)

31Aba damandida ghapka headaanyi Farisaayajeesu ng'ay ak gwayeesha, “Ng'amwana hiji, aba gideaba Herode gagasa gwanuusnyi.” 32Ng'ata gwayeesha saawa, “Aweayeena ak gooyeeshi fureayoodida, ‘Ng'ula askweareani ea numuji gaydearuuta meangeenda nea ghaahaapchi fuga miyeani, eaweedeaba samwagu gaydaahiit gadiyeedeanyu. 33Eara gwasa gamiisean daang'waay naweedeanyu askweareani ghanea numuji ghanea niseerida; aba gideaba mamiisiina gideaba gajeenuuksa sibaneeda heeda mawoosa Yerusalemu.’ 34Ea Yerusalemu, Yerusalemu, gibarayi sibanga nea giftayi aba lagheanga fuga siicheagu headaang'u! Neagasayi niba hada damuughuushta diibigaagu gida amuguuriida nghaghooda dayeagaaschi aba jeesinga meang'eagaaschi, ak ghoaheawi! 35Ang'ula, ghaheang'wa sinung'usa heeda. Ak geayeeshiineegwa, maygudu abiikta adaahaan ea eaghus ayeena, ‘Sibadiischeesa siida wuna gheawunga Ng'utamiida!’”

Currently Selected:

LUKA 13: BG15

Highlight

Copy