YOHANA 8

Gatmooda siing'waay nea gamealuul

1ng'ata gawa Yesu uhuuda giijeeda saytuunajeega. 2Iimuchu nea ghaghar gayeew sakteayda gabiikta jeeda gheeda sibata ASEETA; gaweay headaanyi buuneesean ak goopteada ak goonealshi. 3Hean gweadu ng'oorshoodiga ea Farisaayajeega gatmooni sibwarda ng'eanyi nea gamealuul, geanung' ghamiinaada aba bugusta buuneeda. 4Ng'ata geeyeesha niny, “Giinealshoocheanda, gatmooni ghwanyawa geabwarda ng'eanyi nea gamealuul. 5Aba jeeda deaweeda gagooneasa Musa uurda jea eefta lagheanga dea uurji nih. Giyeaniin ang'iing'i aba badaydeaba gatmooni?” 6Gwarukuta ng'asheanji nea simooda gil ak abeeda ghwanyas gheata gichea eahaaktaawa. Gageanu Yesu ak gabuy uhuudaanyi, ak ghang'oar ng'eanyi aba mooneeda. 7Siinyaash muuchi, ghamiinaada ak gwayeesha, “Siida nyaah riing'a aba jeedeang'wa doawa siida madeeda jea gafta lagheaneeda.” 8Ng'ata gabiikta gabuy uhuuda, ak ghang'oar ng'eanyi aba mooneadaanyi. 9Iiy ng'asheanji hean gabadiinagi nea goosheeda gweargwa. Geanung'wa heeda Yesu nea gaba geaw sea gatmoodida miinaada aba madeadaanyiin. 10Diiw geaw Yesu gwayeesha gatmoodida, “Iya, gwanda yeenu saawa? Manda eara siyagi argweakseeyi?” 11Gwayeesha niny, “Mandana eara akaleala, Ng'utamiida.” Gwayeesha Yesu, “Abeeda eara aniini ea maydeargweakseey; una, ak ea adagudisini riing'eeda.”

Yesu weeshinda ng'eanyiida gil

12Gabiikta Yesu gicha goobalool saawa nea gwayeesha, “Aniini geawooschi weeshinda ng'eanyiida; siida eadu geeshteanyu maygwaneayeewa jeeda misaneeda, niny abeeda gaygwandeawa weeshinda eaweega.” 13Gwayeesha Farisaayajeega niny, “Ang'iing'i gimuuwu ng'asheega badaydaang'u nea gibwaageaw ak ghamneawa muuwuunoadaang'u ea mii huumwa gil.” 14Ghwasha Yesu nea gwayeesha, “Eara damuuwu ng'asheega badaydeanyu nea gabwageaw, ghaanali gideaba muuwuunoodeanyu huumwa, aba gideaba aniini ghaanali heeda ealeabu ak ghaanali heedeagali. Duuku agooga ghanyea moanali heeda ealeabu ghana heedeagali. 15Agooga iissa goorgweaksiini buuneeda ng'asheega saseeda, amaduuku aniini ea maydeargweaksa siida. 16Ama eara deargweaksa girgweaksiindeanyu gaba huumwa aba gideaba aniini mabageaw geandeawi dea ajeaknean. 17Aba jeeda deaweedeedeang'wa geang'waar gideaba muuwuunoomba fih iyeenya huumwa; 18aniini geamuuwu ng'asheega badaydeanyu ak eara Bwaabeeda ajeaknean earada gamuuwu ng'asheega badaydeanyu.” 19Ak geeyeesha niny, “Ghweandaang'u gwanda yeenu?” Ghwalamda Yesu ak gwayeesha, “Agooga moanalaan aniini ghana Bwaabwa; ama inyeeda ghwanyawa ghoanalaan aniini, ghwanyawa gajanala eara Bwaabwa.” 20Ng'asheesu gwarugu aba gah heeda siyiina gheaseeda aba damanda anealsheewa aba jeeda gheeda sibata ASEETA. Nea abeeda ghanyea manda siida aheaksa geatinda ghoang'waay aba gideaba mii ghwahita damandaanyi.

Moammuusi aweayeena heechea dawa

21Gwayeesha gicha saawa, “Aniini neawi heechea dawa, amadu gajagaseadayean, ak gajameewiissiina jeeda riing'eegeagwa; nea heeda eawi aniini ea majoammuusa ahini.” 22Hean gwayi fuga Yahudi, “Ak gaygwanuus geawi, anda gwayi, ‘Heedeawi majoamuusa agooga apkaani’?” 23Gwayeesha saawa, “Agooga gooleabu heeda hiing'aada nea aniini gealeabu heetiyeada, goobeayi ng'eanyiini, aniini meabeahi ng'eanyiini. 24Geayeeshiineegwa gideaba gajameewiisiina jeeda riing'eegeagwa, aba gideaba gajameewiisiina jeeda riing'eegeagwa ea eeghus amwasa gideaba siida aniini.” 25Geeyeesha niny, “Ang'iing'i guwoosi ng'eaha?” Gwayeesha Yesu, “Aba mwadi ghwanyawa nearukuneegwa. 26Geandeawi ng'asheega saang'a jea dargu ea gea jea deargweaksiinaneegwa, amadu siida ajeaknean ea huumwa, nea gearukusi ng'eanyiida ng'asheega eayiing'si headaanyi.” 27Eamajeeng'na saawa gideaba Yesu goobaloola saawa badayda Bwaabwa. 28Gwayeesha Yesu, “Iyoogatkachi Orjeeda Siida, abeeda gajanala gideaba siida aniini, ea gideaba mwammuusi dasin gida wassean aba gheambalmeedeanyu geaghus dargu ng'asheega anaalan Bwaabwa. 29Siida ghayi ajeaknean geandeawi niny; moang'wa gwanung'usean heeda nea gabwageaw, aba gideaba iissa geasinyi galeagasean ng'asheegiga bwariiyiin.” 30Damanda baloola, hean ghamwas fuga saang'a.

Fuga abal geat ea soomjooga

31Gwayeesha Yesu fuga Yahudi mwas niny, “Asi iyoang'waanyi ng'asheegeasu anaaleagwa, gajahuuwa giinealangeasu bea huumwa, 32gajanala huumeanda ak abeeda huumeanda gaygagooneegwa giibaldeaba geat.” 33Ghwasha Saawa niny nea gwayeesha, “Aseasa geewooschi jeata Abrahamu nea eara heeda ghayi ghanyea miyeehuuwa soomjooga sih. Abeeda ginyaashi naaha ng'asheanji bea gideaba, ‘Gajeanyasa giibaldeaba geadiin’?”

34Ghwasha Yesu nea gwayeesha saawa, “Aba huumwa aba huumwa, geayeeshiineegwa, gilinyoo ea sih nyooh gwasina riing'eeda soomjeanda riing'eeda. 35Soomjeanda meabiiteena ghoah galeagasean; orjeeda goobiita ghoah galeagasean. 36Orjeeda iigooneegwa giibaldeaba geat gajoopala geat huumwa. 37Ghaanali gideaba agooga goowooschi jeata Abrahamu; ak eara ghamneawa googaseadayi gideaba gajanuusean aba gideaba manda ng'asheandeanyu jeesingeagwa. 38Aniini gearugu ng'asheega eadeaksi heeda Bwaabwa, nea agooga goosinayi ng'asheega rukuneegwa ghweanigeagwa.”

39Ghwasha Saawa nea gwayeesha, “Ghweandeanya Abrahamu.” Gwayeesha Yesu saawa, “Inyeeda ghwanyawa goowooschi diibiga Abrahamu, gajasina gida ghayi sin Abrahamu, 40ak ghameawa googaseadayi anuusean, siida rukuneegwa huumeanda eayiing'si heeda ASEETA; nih mii gidasin Abrahamu. 41Agooga goosinyi ng'asheega sin ghweanigeagwa.” Gwayeesha saawa niny, “Aseasa meewoosi diibiga sishuwaanda; geendeawi Bwaabeeda asakaleala, nea ASEETA.” 42Gwayeesha Yesu saawa, “Inyeeda ghwanyawa ASEETA ea Ghweandeang'wa gil, gajabwariinyaan, aba gideaba aniini gealeabu heeda ASEETA; aniini mwaawuni aba uhuudeanyu gweanean siida ajeaknean. 43Ghwasaan agooga anda moanali gideargu? Nih gweagu gideaba moamuusi ooleeysiina iit ng'asheandeanyu. 44Agooga goobeayi ghweandeang'wa was meang'nyeandeenda ak iissa googasayi asina gidida bwariiy ghweandeang'wean. Niny gabay gwanuusa buuneeda ghang'eada mwadi, niny iissa ea madoobiiwsiina huumeanda aba gideaba manda jeadaanyi huumeanda. Iissa irugu ng'uyeega gwarugu aba gidida sirata ninyiin, aba gideaba niny gaba ng'uya, ak ea ghweanda ng'uyeega. 45Aniini gearugu huumwa ak ghoah gidamoamwaseawanaan. 46Aba jeedeang'wa gajea ng'eaha gil jea gwarugu gideaba geabea riing'a? Asi abeeda iyearuku huumwa abeeda ghwasaan anda moamwasaan? 47Siida ASEETA iissa gooleeysiit ng'asheega ASEETA; ak ghamneawa agooga ea mooleeysiini iit aba gideaba moowoosi fuga ASEETA.”

Yesu ea Abrahamu

48Ghwasha fuga Yahudi nea gwayeesha, “Neada ea meatoabiiwi rukunooda gideaba guwoosi siida Samariya, ak gibwadi gideaba gindeawi meangeenda?” 49Ghwasha Yesu ak gwayeesha, “Aniini meandeawani meangeenda; aniini iissa ghaawali gheang'da Bwaabwa, amaduuku agooga ghanyea moawali gheang'deanyu. 50Aniini meagassi daaghaambiit geaw; gwanda siyagi gasa nea siida laja girgweageeda. 51Aba huumwa, aba huumwa, geayeeshiineegwa, siida jea ghoang'waay ng'asheandeanyu ea mayghwadaah miyeeda earahay.” 52Hean gwayeesha fuga Yahudi niny, “Asi ghamneawa sinali gideaba ang'iing'i gindeawi meangeenda. Abrahamu ghami ak eara sibanga, ak ghamneawa giyeeni, ‘Siida ang'waay ng'asheandeanyu maygwasamu miyeeda earahay.’ 53Ang'iing'i guwoosi haweewa Abrahamuheeda was ghweandeanya meahi? Eara sibanga gameewa! Ang'iing'i gihindigeaw ng'eaha?” 54Ghwasha Yesu nea gwayeesha, “Iyaaghaambiichi geaw giigheambiiteanyu ea mii gili; Bwaabwa dea aghaambiidani nea dea ooyeenyi ASEETEANG'WA. 55Agooga mii ghanyi anala niny; amaduuku aniini ghaanali niny. Ama eayeenyi mwaanali niny, abeeda gaydoaw siida ng'uyeega uurjeeweegwa; aniini ghaanali niny ak ghaang'waanyi ng'asheandaanyi. 56Ghweandeang'wa was Abrahamu ghayi gahoosan aba gasooda jea ghwadaah eaweeteanyu ak ghwadaah ak gang'weela.” 57Hean ghwalamda fuga Yahudi ak gwayeesha niny, “Ang'iing'i mii anyiida gweanyeew haradam ea damanamughuush ak gajea nidaahi Abrahamu?” 58Gwayeesha Yesu saawa, “Aba huumwa, aba huumwa, geayeeshiineegwa, dea mii gwandeewa Abrahamu, abeeda aniini geandi.” 59Ng'ata gooliimu lagheanga nea geegasa eefta iidu ghafuy geaw Yesu amahit gwariteawa jeeda gheeda sibata ASEETA.

Currently Selected:

YOHANA 8: BG15

Highlight

Copy